Kubanda
28 Na yawu, Izaki bokilaka Yakobi, sakumunaka yandi mpe pesaka yandi musiku ti: “Nge me fwana kubaka ve kento na kati ya bana ya bakento ya Kanana. 2 Kwenda na Padane-arami na yinzo ya Betwele, tata ya mama ya nge, mpe kuna, baka kento na kati ya bana ya Labani ya bakento, mpangi ya mama ya nge. 3 Nzambi ya Ngolo-Nyonso ke sakumuna nge mpe ke sala ti nge buta mpe nge kuma mingi, mpe ntembe ve, nge ke kuma kimvuka ya makanda. 4 Mpe yandi ke pesa nge lusakumunu ya Abrahami, na nge mpe na bana ya nge kintwadi na nge, samu nge baka bwala kisika nge zingaka mutindu nzenza, bwala yina Nzambi pesaka na Abrahami.”
5 Na yawu, Izaki filisaka Yakobi, mpe yandi kwendaka na Padane-arami na sika ya Labani mwana ya Betwele Muarami, mpangi ya Rebeka, mama ya Yakobi na Ezawu.
6 Ezawu talaka ti Izaki sakumunaka Yakobi mpe filisaka yandi na Padane-arami samu na kubaka kento kuna, mpe ti ntangu yandi sakumunaka yandi, yandi pesaka Yakobi musiku ti, “Kubaka ve kento na kati ya bana ya bakento ya Kanana,” 7 mpe ti Yakobi tumamaka na tata ya yandi na mama ya yandi mpe kwendaka na Padane-arami. 8 Na yawu, Ezawu kwizaka tala ti bana ya bakento ya Kanana vanda sepelisa ve tata ya yandi Izaki. 9 Na yawu, katula bakento yina yandi vandaka na bawu, Ezawu kwendaka na Ismaele mpe bakaka mutindu kento Mahalate mwana ya Ismaele, mwana ya Abrahami, mpangi ya Nebayote.
10 Yakobi katukaka na Beere-sheba mpe vanda kwenda na Arani. 11 Na manima, yandi kumaka na kisika mosi mpe bongamaka samu na kulutisa mpimpa kuna, samu ntangu kotaka. Na yawu, yandi bakaka mosi ya matadi ya kisika yina, bongisaka yawu mutindu kima ya kutudila yintu, mpe yandi lalaka kuna. 12 Na manima yandi salaka ndosi, mpe tala! ya vandaka na eskalye mosi yina vandaka na ntoto mpe nsongi ya yawu vanda kwenda tii na mazulu. Mpe ya vandaka na bambazi ya Nzambi yina vanda kwenda mpe kukulumuka na zulu ya yawu. 13 Mpe tala! Yehova vandaka ya kutelama na zulu ya yawu mpe zonzaka:
“Mu ke Yehova Nzambi ya tata ya nge Abrahami mpe Nzambi ya Izaki. Bwala kisika yina nge ke ya kulala, ni na nge mu ke pesa yawu mpe na bana ya nge. 14 Mpe ntembe ve bana* ya nge ke kuma mutindu bambuma ya zyelo ya ntoto, mpe ba ke mwangana na westi mpe na esti, na norde mpe na sude mpe ya tsyeleka na nzila ya nge mpe ya bana ya nge makanda nyonso na zulu ya ntoto ke kuzwa lusakumunu. 15 Mu ke na nge, mpe mu ke bumba nge kisika nyonso yina nge ke kwenda, mpe mu ke vutula nge na bwala yayi. Mu ke bika ve nge tii ntangu mu ke lungisa nsilulu yina mu me sala nge.”
16 Na manima Yakobi vumbukaka mpe zonzaka: “Ya tsyeleka Yehova ke na kisika yayi mpe mu zabaka ve yawu.” 17 Yandi kumaka na boma mpe bwelaka: “Kisika yayi ke ve mpamba, ya ke kisika ya santu! Ya lenda vanda kaka yinzo ya Nzambi mpe ya lenda vanda mwelo ya mazulu.” 18 Na yawu, Yakobi vumbukaka na suka-suka, bakaka ditadi yina yandi sadilaka samu na kutula yintu ya yandi, telemisaka yawu mutindu dikunzi mpe mwangisaka mafuta na zulu ya yawu. 19 Na yawu, yandi bokilaka kisika yango Betele,* kasi nkumbu ya mbanza yango vandaka ntete Luze.
20 Na manima Yakobi salaka nsilulu, mpe zonzaka: “Kana Nzambi tatamana na kuvanda na munu mpe kubumba munu na nzyetolo ya munu mpe pesa munu dimpa ya kudya mpe bilele ya kulwata 21 mpe ti mu vutuka na kizunu na yinzo ya tata ya munu, na yawu, Yehova ke lakisa ti ya tsyeleka yandi ke Nzambi ya munu. 22 Mpe ditadi yayi yina mu me telemisa mutindu dikunzi ke kuma yinzo ya Nzambi, mpe mu ke bika ve kupesa nge kikunku mosi na kati ya bikunku 10 ya bima nyonso yina nge ke pesa munu.”