Kubasika
24 Na manima yandi zonzaka na Moyize: “Yuluka* na sika ya Yehova, nge na Aroni, Nadabi na Abiwu, mpe babakala 70 na kati ya bakuluntu ya Izraele, mpe beno fukama mwa ntama. 2 Kaka ni Moyize ke kwiza pene-pene ya Yehova; ba ya nkaka me fwana ve kukwiza pene-pene, mpe dikanda ke kwiza ve na zulu kintwadi na yandi.”
3 Moyize kwizaka zabisa dikanda bamambu nyonso yina Yehova zonzaka, mpe misiku* nyonso; mpe dikanda nyonso vukisaka bandinga mpe zonzaka: “Mambu nyonso yina Yehova me zonza, beto ke sala yawu.” 4 Na yawu Moyize sonikaka bamambu nyonso yina Yehova zonzaka. Na manima yandi telamaka na suka-suka, mpe na yisi ya mongo, yandi yidikaka dikuku ya minkayulu mpe makunzi 12 samu na mabuta 12 ya Izraele. 5 Na manima yandi filisaka bantwenya ya babakala ya Izraele, mpe ba pesaka makabu ya kuyoka, mpe bangombe ya babakala mutindu minkayulu ya kizunu samu na Yehova. 6 Moyize bakaka ndambu ya menga, mpe tulaka yawu na kati ya bandonga, mpe ndambu ya nkaka yandi mwangisaka yawu na zulu ya dikuku ya minkayulu. 7 Na manima yandi bakaka buku ya luwawanu mpe tangaka yawu na ndinga ya ngolo na mantwala ya dikanda. Ba zonzaka: “Mambu nyonso yina Yehova me zonza, beto ke sala yawu, mpe beto ke tumama.” 8 Na yawu Moyize bakaka menga, mwangisaka yawu na zulu ya dikanda mpe zonzaka: “Yayi ni menga ya luwawanu yina Yehova me sala na beno na kulandaka bamambu nyonso yayi.”
9 Moyize na Aroni, Nadabi na Abiwu, mpe babakala 70 na kati ya bakuluntu ya Izraele kwendaka,* 10 mpe ba talaka Nzambi ya Izraele. Na yisi ya makulu ya yandi vandaka na kima mutindu dale* ya matadi ya safire, mpe ya vandaka bunkete mutindu zulu. 11 Yandi salaka ve yimbi na babakala ya lukumu ya Izraele. Ba talaka Nzambi ya tsyeleka na kimona-meso, ba kudyaka mpe ba kunwaka.
12 Na manima Yehova zonzaka na Moyize: “Kwiza na zulu ya mongo, na sika ya munu, mpe vanda kuna. Mu ke pesa nge matadi yina ke na misiku mpe mikanu yina mu ke sonika samu na kulonga bawu.” 13 Na yawu Moyize telamaka na kisadi ya yandi Yozue, mpe Moyize kwendaka na zulu ya mongo ya Nzambi ya tsyeleka. 14 Kasi Moyize zonzaka na bakuluntu: “Beno vingila beto awa tii ntangu beto ke vutuka na sika ya beno. Aroni na Hure ke na beno. Kana muntu ke na dyambu ya kusambisa, yandi lenda kwenda tala bawu.” 15 Na manima Moyize kwendaka na zulu ya mongo ntangu dituti vanda fuka yawu.
16 Nkembo ya Yehova bikanaka na zulu ya Mongo Sinayi, mpe dituti fukaka yawu na kati ya bilumbu 6. Na kilumbu ya 7, yandi bokilaka Moyize katuka na kati-kati ya dituti. 17 Na meso ya bantu ya Izraele yina vanda tala, nkembo ya Yehova vanda talana mutindu tiya yina ke na nyengisaka bima na nsongi ya mongo. 18 Na yawu Moyize kotaka na kati ya dituti mpe kwendaka na zulu ya mongo. Moyize bikanaka na mongo bilumbu 40 mpe bampimpa 40.