Nsangu ya Mbote ya Yoane

20 Kilumbu ya ntete ya lumingu, Maria ya Magdala kwizaka na ndyamu* na suka-suka, ntangu mpimpa vandaka ntete, mpe yandi talaka ti ba katulaka yimeni ditadi yina vandaka na ndyamu.* 2 Na yawu, yandi kimaka mbangu na sika ya Simoni Piere mpe na sika ya kilandi ya nkaka yina Yesu vanda zolaka mingi, mpe yandi zonzaka na bawu: “Ba me katula Mfumu na kati ya ndyamu, mpe beto zaba ve wapi kisika ba me tula yandi.”

3 Na yawu, Piere na kilandi ya nkaka yango kwendaka na ndyamu. 4 Bawu nyonso zole bandaka kukima kintwadi. Kasi kilandi ya nkaka lutilaka Piere na mbangu, mpe yandi kumaka na ndyamu ya ntete. 5 Yandi kondamaka, mpe talaka ti bitende ya lino vandaka kuna. Kasi yandi kotaka ve na kati. 6 Simoni Piere kwizaka mpe na manima ya yandi, mpe yandi kotaka na kati ya ndyamu. Yandi talaka bitende ya lino kuna. 7 Kitende yina ba vandaka ya kukanga yandi na yintu, vandaka ve kisika mosi na bitende ya nkaka. Kasi ya vandaka ya kufutika na kisika ya yawu mosi. 8 Na manima, kilandi ya nkaka yina kumaka ya ntete na ndyamu, kotaka mpe na kati. Yandi talaka mpe kwikilaka. 9 Ya tsyeleka ba vandaka nabunu ba bakula masonoko yina zonzaka ti yandi me fwana kuvumbuka na lufwa. 10 Na yawu, bilandi vutukaka na bayinzo ya bawu.

11 Kasi Maria vandaka kaka ya kutelama pene-pene na ndyamu, mpe yandi vanda dila. Ntangu yandi vanda dila, yandi kondamaka samu na kutala na kati ya ndyamu, 12 mpe yandi talaka bambazi zole yina vandaka ya kulwata bilele ya mpembe. Ba vandaka ya kuvanda pene-pene na kisika yina nzutu ya Yesu vandaka, mosi na yintu mpe ya nkaka na makulu. 13 Ba yufulaka yandi: “Kento, samu na yinki nge ke na dilaka?” Yandi vutulaka: “Ba me katula Mfumu ya munu, mpe mu zaba ve kisika ba me tula yandi.” 14 Na manima ya kuzonza faso yina, yandi balukaka mpe talaka Yesu ya kutelama kuna. Kasi, yandi vanda zaba ve ti ya vandaka Yesu. 15 Yesu zonzaka na yandi: “Kento, samu na yinki nge ke na dilaka? Nge ke na sosaka nani?” Samu yandi vanda kanisa ti ya vandaka kengidi ya bilanga, yandi zonzaka na yandi: “Mfumu, kana ni nge me katula yandi, zabisa munu kisika nge me tula yandi, mpe mu ke kwenda baka yandi.” 16 Yesu zonzaka na yandi: “Maria!” Maria balukaka mpe zonzaka na yandi na ndinga ya Kiebre: “Rabuni!” (yina zola zonza “Mulongi!”) 17 Yesu zonzaka na yandi: “Bika kukangimina munu, samu nabunu mu nanguka na sika ya Tata. Kasi kwenda na sika ya bampangi ya munu, mpe zonza na bawu, ‘Mu ke na nangukaka na sika ya Tata ya munu, mpe Tata ya beno, mpe na sika ya Nzambi ya munu, mpe Nzambi ya beno.” 18 Maria ya Magdala kwendaka mpe natinaka bilandi nsangu: “Mu me tala Mfumu!” Mpe yandi zonzaka na bawu mambu yina Yesu zonzaka na yandi.

19 Tekila ntangu kota, kilumbu ya ntete ya lumingu, mpe ntangu bamwelo ya kisika yina bilandi vandaka, vandaka ya kukangama ngolo samu ba vandaka na boma ya Bazwife, Yesu kwizaka, telamaka na kati-kati ya bawu mpe zonzaka na bawu: “Kizunu vanda na beno.” 20 Ntangu yandi manisaka kuzonza mambu yayi, yandi lakisaka bawu maboko ya yandi, mpe mbanzi ya yandi. Na yawu, bilandi sepelaka na kutala Mfumu. 21 Yesu zonzaka dyaka na bawu: “Kizunu vanda na beno. Kaka mutindu Tata filisaka munu, munu mpe ke na filisaka beno.” 22 Na manima ya kuzonza mambu yayi, yandi fulaka bawu mupepe, mpe zonzaka na bawu: “Beno kuzwa mpeve ya santu. 23 Kana beno me lemvokila masumu ya muntu, yandi me kuzwa mulemvo ya masumu. Kasi kana beno me lemvokila ve masumu ya muntu, yandi me kuzwa ve mulemvo ya masumu.”

24 Kasi Toma, mosi ya bilandi 12, yina ba vanda bokilaka dipasa, vandaka ve na bawu ntangu Yesu kwizaka. 25 Na yawu, bilandi ya nkaka zabisaka yandi: “Beto me tala Mfumu.” Kasi yandi zonzaka na bawu: “Kana mu tala ve kidimbu ya bansonso na maboko ya yandi, mpe mu kotisa ve musapi ya munu na kidimbu ya bansonso yina, mpe kana mu tula ve diboko ya munu na mbanzi ya yandi, mu ke kwikila ata fioti ve.”

26 Na yawu, bilumbu 8 na manima, bilandi vandaka dyaka na kati ya yinzo mpe Toma vandaka na bawu. Yesu kwizaka, ata ti bamwelo vandaka ya kukangama ngolo. Yandi telamaka na kati-kati ya bawu mpe zonzaka: “Kizunu vanda na beno.” 27 Na manima yandi zonzaka na Toma: “Tula musapi ya nge awa, mpe tala maboko ya munu. Baka diboko ya nge, mpe kotisa yawu na kati ya mbanzi ya munu, mpe kusala dyaka ve ntembe,* kasi kwikila.” 28 Toma zonzaka na yandi: “Mfumu ya munu mpe Nzambi ya munu!” 29 Yesu zonzaka na yandi: “Samu nge me tala munu, ni na yawu nge me kwikila? Kilengi na ba yina me tala ve kasi ata faso yina ba me kwikila.”

30 Ya tsyeleka, Yesu salaka bimangu mingi na mantwala ya bilandi ya yandi. Bimangu yina ke ve ya kusonama na kati ya rulo* yayi. 31 Kasi bamambu yayi ke ya kusonama samu beno kwikila ti Yesu ke Kristo, Mwana ya Nzambi, mpe beno kuzwa luzingu na nzila ya nkumbu ya yandi samu beno me kwikila.