2 Yoane

1 Ni munu mbuta* ke na sonikaka na kento yina ba soolaka mpe na bana ya yandi yina mu ke zolaka ya tsyeleka, mpe kaka munu ve, kasi mpe ba yina nyonso me zaba matsyeleka, 2 samu na matsyeleka yina ke na kati ya beto mpe yina ke vanda ntangu nyonso na beto. 3 Ntima ya kulutila mbote ke vanda na beto, mpe ntima ya kyadi na kizunu yina me katuka na Nzambi Tata mpe Yesu Kristo, Mwana ya Tata, kintwadi na matsyeleka mpe luzolo.

4 Mu ke na sepelaka mingi samu mu kuwaka ti bana ya nge ya nkaka ke na tambulaka na kati ya matsyeleka, kaka mutindu beto kuzwaka musiku na sika ya Tata. 5 Na yawu, ntangu yayi, kento yina ba soolaka, mu ke na lombaka nge ti beto zolasana beto na beto. (Mu ke na sonikilaka ve nge musiku ya malu-malu, kasi yina beto kuzwaka katuka mbandukulu.) 6 Mpe luzolo zola zonza mambu yayi, ti beto tatamana na kutambula mutindu misiku ya yandi ke lombaka. Yayi ni musiku, kaka mutindu beno kuwaka yawu katuka mbandukulu, ti beno me fwana kutatamana na kutambula na kati ya luzolo. 7 Samu bantu mingi ya luvunu me basika na yinza, ba yina ke ndimaka ve ti Yesu Kristo kwizaka na nzutu ya kinsuni.* Ni bawu kele muntu ya luvunu mpe mbeni ya Kristo.

8 Beno sala keba na beno mosi samu beno zimbisa ve mbuma ya kisalu ya beto, kasi samu beno kuzwa difuta ya muvimba. 9 Muntu nyonso yina ke kwendaka ntama mpe yina ke bikanaka ve na kati ya malongi ya Kristo, ke ve na bumosi na Nzambi. Muntu yina me bikana na kati ya malongi yayi, ni yandi ke na bumosi na Tata mpe na Mwana. 10 Kana muntu me kwiza na sika ya beno mpe me nata ve malongi yayi, beno yamba ve yandi na bayinzo ya beno, mpe beno pesa ve yandi mbote. 11 Samu muntu yina me pesa yandi mbote ke na kabulaka mavanga ya yandi ya yimbi.

12 Mu ke na mambu mingi ya kuzabisa beno, kasi mu zola ve kusala yawu na mukanda mpe na maza ya kisonokono, mu ke na kivuvu ti mu ke kwiza na sika ya beno mpe mu ke solola na beno meso na meso, samu ti kilengi ya beno vanda ya kulunga.

13 Bana ya mpangi ya nge, kento yina ba soolaka, me filisa nge bambote.