Kubanda

32 Yakobi landaka nzila ya yandi, mpe bambazi ya Nzambi vanda kwiza bwabana yandi. 2 Ntangu yandi talaka bawu, Yakobi zonzaka: “Yayi ke camp ya Nzambi!” Na yawu, yandi bokilaka kisika yango Mahanayime.*

3 Na manima, Yakobi filisaka minati-nsangu na mantwala ya yandi na sika ya mpangi ya yandi Ezawu na bwala ya Seyire, ntoto ya Edome, 4 mpe yandi zonzaka na bawu: “Yayi mambu beno ke zonza na mfumu ya munu Ezawu, ‘Yayi mambu kisadi ya nge Yakobi me zonza: “Mu me zinga na Labani na kati ya bamvula mingi tii ntangu yayi. 5 Mpe mu me kuzwa bangombe ya babakala, bambuluku, mameme, bisadi ya babakala mpe ya bakento, mpe mu me filisa nsangu yayi na nge mfumu ya munu, na kivuvu ti mu ke vanda ya kundimama na meso ya nge.”’”

6 Mwa ntangu na manima, minati-nsangu vutukaka na sika ya Yakobi. Ba zonzaka: “Beto me kutana na mpangi ya nge Ezawu, yandi ke na nzila samu na kwiza bwabana nge, mpe yandi ke na kwizaka na babakala 400.” 7 Yakobi kumaka na boma mingi mpe ntima ya yandi vandaka dyaka ve na kizunu. Na yawu, yandi kabulaka na bacamp zole bikunku ya yandi ya bibulu, bangombe mpe bashamo. 8 Yandi zonzaka: “Kana Ezawu nwanisa camp mosi, camp ya nkaka ke lenda kuvuuka.”

9 Na manima, Yakobi zonzaka: “O Nzambi ya tata ya munu Abrahami mpe Nzambi ya tata ya munu Izaki, O Yehova, nge muntu zonzaka na munu, ‘Vutuka na bwala ya nge mpe na dikanda ya nge, mpe mu ke sala nge mambu ya mbote,’ 10 Mu me lunga ve kuzwa luzolo ya kukwikama nyonso mpe kukwikama nyonso yina nge me lakisa kisadi ya nge, samu mu sabukaka Yordani yayi kaka na mwa yinti ya munu, mpe ntangu yayi, mu me kuma bacamp zole. 11 Mu me sambila nge, vuukisa munu na maboko ya mpangi ya munu Ezawu, samu mu ke na boma ya yandi. Yandi lenda kwiza mpe kunwanisa munu kintwadi na bamama na bana ya bawu. 12 Nge zonzaka: ‘Ntembe ve, mu ke sala nge mambu ya mbote, mpe mu ke sala ti bana ya nge kuma mutindu bambuma ya zyelo ya mubu, yina ba lenda tanga ve.’”

13 Yandi lutisaka mpimpa kuna. Na manima, yandi bakaka mwa bima ya yandi mutindu dikabu samu na Ezawu: 14 Bankombo ya bakento 200, bankombo ya babakala 20, mameme ya bakento 200, mameme ya babakala 20, 15 bashamo 30 yina vanda nwikisa ntete bana ya bawu, bangombe ya bakento 40, bangombe ya babakala 10, bambuluku ya bakento 20 mpe bana ya bambuluku ya babakala 10.

16 Yandi pesaka na bisadi ya yandi kikunku mosi-mosi ya bibulu, mpe yandi zonzaka na bawu: “Beno sabuka na mantwala ya munu, mpe beno sala ti kikunku mosi vanda mwa ntama na kikunku yina ke landa.” 17 Mpe yandi zonzaka na yina vandaka na mantwala: “Kana mpangi ya munu Ezawu yufula nge, ‘Nge ke muntu ya nani, mpe wapi kisika nge ke na kwendaka, mpe bibulu yayi ke na mantwala, ke ya nani?’ 18 Nge me fwana kuzonza na yandi, ‘Ya ke ya kisadi ya nge Yakobi. Ya ke dikabu yandi me filisa mfumu ya munu Ezawu, mpe tala! Yandi mosi mpe ke na kwizaka na manima.’” 19 Yandi zonzaka mpe na ya zole, ya tatu, mpe na ba yina nyonso vandaka na manima ya bikunku ya bibulu: “Ni mambu yayi beno ke zonza na Ezawu ntangu beno ke bwabana yandi. 20 Beno fwana kuzonza mpe na yandi, ‘Kisadi ya nge Yakobi ke na kwizaka na manima.’” Samu yandi vanda zonza na yisi ya ntima: ‘Kana mu zunisa ntima ya yandi na kufilisaka yandi dikabu, ntangu yandi ke tala munu, yandi lenda yamba munu na mutindu ya mbote.’ 21 Na yawu, dikabu sabukaka na mantwala ya yandi, kasi yandi mosi lutisaka mpimpa na camp.

22 Na manima, kaka na mpimpa yina, yandi telamaka mpe yandi bakaka bakento ya yandi zole, bisadi ya yandi zole ya bakento, mpe bana ya yandi ya bantwenya ya babakala 11, mpe sabukaka maza ya Yaboke na kisika yina ba ke sabukaka na makulu. 23 Yandi bakaka bawu, zengisaka bawu maza. Yandi zengisaka mpe bima nyonso ya nkaka yina vandaka na yandi.

24 Nsuka-nsuka, Yakobi bikanaka yandi mosi. Na manima, bakala mosi bandaka kunwana na yandi tii bwisi kutyaka. 25 Ntangu yandi talaka ti yandi nungaka ve Yakobi, yandi simbaka mukwa ya luketo ya yandi, mpe mukwa ya Yakobi katukaka na kisika ya yawu ntangu yandi vanda nwana na yandi. 26 Na manima bakala yango zonzaka: “Bika munu mu kwenda, samu bwisi ke na kutyaka.” Na yawu Yakobi vutulaka: “Mu ke bika ve nge kwenda tii ntangu nge ke sakumuna munu.” 27 Na yawu, yandi zonzaka na yandi: “Nkumbu ya nge nani?” Yandi vutulaka: “Yakobi.” 28 Na manima yandi zonzaka: “Nkumbu ya nge ke vanda dyaka ve Yakobi, kasi Izraele,* samu nge me nwana na Nzambi mpe na bantu, mpe nsuka-nsuka, nge me nunga.” 29 Na manima, Yakobi zonzaka na yandi: “Mulemvo, pesa munu nkumbu ya nge.” Kasi yandi zonzaka: “Samu na yinki nge ke na yufulaka nkumbu ya munu?” Na yawu, yandi sakumunaka yandi kuna. 30 Na yawu, Yakobi bokilaka kisika yango Peniele,* samu yandi zonzaka, “Mu me tala Nzambi na meso, kasi mu ke kaka moyo.”

31 Mpe ntangu basikaka ntangu yandi lutaka pene-pene ya Penwele,* kasi yandi vanda tambula ve mbote samu na luketo ya yandi. 32 Ni na yawu, tii bubu yayi, bana ya Izraele ke kudyaka ve musuni ya kwise yina ke vandaka na kisika yina mikwa ya luketo ke vukanaka, samu yandi simbaka Yakobi na kisika yina mikwa ya luketo ke vukanaka.