3 Yoane

1 Ni munu mbuta* ke na sonikilaka Gayuse, mpangi ya munu ya luzolo yina mu ke zolaka ya tsyeleka.

2 Mpangi ya munu ya luzolo, mu ke na sambilaka samu mambu nyonso vanda kaka mbote samu na nge, mpe nge vanda na mavimpi ya mbote, kaka mutindu nge* ke ntangu yayi. 3 Samu mu sepelaka mingi ntangu bampangi kwizaka mpe pesaka kimbangi na yina me tadila matsyeleka yina ke na nge, samu nge ke na tatamanaka na kutambula na kati ya matsyeleka. 4 Kilengi ya munu* ya kulutila ke ni kuwa ti bana ya munu ke na tatamanaka na kutambula na kati ya matsyeleka.

5 Mpangi ya munu ya luzolo, nge ke na lakisaka kukwikama ya nge na yina nge ke na salaka samu na bampangi, ata ti ba ke banzenza samu na nge. 6 Ba pesaka kimbangi na yina me tadila luzolo ya nge na mantwala ya kimvuka. Ntangu ba ke kwenda, mulemvo, sadisa bawu na mutindu yina me lunga na meso ya Nzambi. 7 Ya tsyeleka, ni samu na nkumbu ya yandi ba basikaka, mpe ba bakaka ata kima mosi ve na sika ya bantu ya makanda. 8 Ni na yawu, beto me fwana kuyamba bantu ya mutindu yayi, samu beto kuma bampangi ya kisalu na kati ya matsyeleka.

9 Mu sonikilaka kimvuka mwa bamambu, kasi Diotrefeze yina ke zolaka kuvanda na kisika ya ntete na kati ya bawu, ke na zitisaka ata mambu mosi yina beto ke zonzaka. 10 Ni na yawu, kana mu kwiza, mu ke zonzila bamambu yina yandi ke na salaka na yina yandi ke na mwangisaka bamambu ya luvunu na nkumbu ya beto.* Yandi me suka ve kaka kuna. Yandi ke na mangaka kuyamba bampangi na buzitu. Mpe ba yina zola kuyamba bawu, yandi ke na sosaka kunimina bawu, mpe kubasisa bawu na kimvuka.

11 Mpangi ya munu ya luzolo, kulanda ve kifwani ya ba yina ke salaka mambu ya yimbi, kasi landa kifwani ya ba yina ke salaka mambu ya mbote.* Muntu yina ke salaka mambu ya mbote me katuka na Nzambi. Muntu yina ke salaka mambu ya yimbi me tala ve Nzambi. 12 Bampangi nyonso ke na zonzaka mambu ya mbote samu na Demetriyuse. Matsyeleka mpe ke pesaka kimbangi yayi samu na yandi. Ya tsyeleka, beto mpe ke na pesaka kimbangi yayi samu na yandi, mpe nge zaba ti kimbangi yina beto ke na pesaka ke ya tsyeleka.

13 Mu vandaka na mambu mingi ya kusonikila nge, kasi mu zola ve kusonikila nge yawu kaka na kisonokono mpe na maza ya kisonokono.* 14 Kasi mu ke na kivuvu ti mu ke tala nge kaka na mwa ntangu fioti, mpe beto ke solola meso na meso.

Kizunu vanda na nge.

Bandiku me filisa nge bambote ya bawu. Pesa bandiku kuna bambote ya munu, muntu na muntu na nkumbu ya yandi.