Mukanda ya Yude

1 Yude, kisadi ya Yesu Kristo mpe leki ya Zaki, na bantu yina ba bokilaka, yina Nzambi Tata ke zolaka, mpe yina ba bumbaka samu na Yesu Kristo.

2 Bika Nzambi bwela ntima ya kyadi, kizunu mpe luzolo yina yandi ke na lakisaka beno.

3 Bampangi ya munu ya luzolo, ata ti mu vanda sala nyonso samu na kusonikila beno na yina me tadila luvuukusu yina beto nyonso ke na yawu, mu talaka ti ya lungaka mu sonikila beno samu na kukindisa beno na kunwana ngolo samu na kiminu yina ba pesaka mbala mosi samu na ntangu nyonso na basantu. 4 Mu ke na sonikilaka beno samu bantu ya nkaka me kota na mansweki na kati-kati ya beno, bantu yina Masonoko soolaka banda ntama samu na kuzwa lusambusu yayi. Ya ke bantu yina ke ve na buzitu na Nzambi. Ba ke kumisaka ntima ya kulutila mbote ya Nzambi ya beto mutindu kima yina ke pesaka bawu nzila ya kuvanda na ndyatulu ya busafu mpe ya nko,* mpe ba ke na mangaka Mfumu mpe muntu kaka mosi ya kuzwa beto, Yesu Kristo.

5 Ata ti beno zaba mbote-mbotemambu nyonso yayi, mu zola kubambula beno ti Yehova* vuukisaka dikanda mosi ntangu yandi basisaka bawu na ntoto ya Ezipte, kasi na manima yandi kufwaka ba yina lakisaka ve kiminu. 6 Mpe bambazi yina bumbaka ve bisika ya bawu ya mbandukulu, kasi yina bikaka kisika ya bawu ya kuvanda, yandi me kanga bawu na basinga ya ntangu nyonso na kati ya kitombi ya ngolo samu na lusambusu ya kilumbu ya nene. 7 Mutindu mosi mpe Sodome na Gomore, mpe babwala yina vandaka pene-pene na yawu, yina salaka na faso ya kulutila kinsuza* mosi ya kusakana ve, mpe yina sosaka kulungisa bansatu ya nzutu na mutindu yina me lunga ve, kuzwaka kitumbu ya tiya ya ntangu nyonso. Na faso yina, ba ke na mantwala ya beto mutindu kifwani yina ke kebisaka.

8 Ata mpila yina, bantu yayi mpe ke na kukipesaka na bandosi, ba ke na kumisaka nzutu mvindu, ba ke na vwezaka bumfumu mpe ba ke na zonzilaka yimbi ya bantu ya nkembo. 9 Kasi ntangu Mikayele, Mfumu ya bambazi, kuzwaka mambu na Dyabulu mpe ba swanaka na yina me tadila nzutu ya Moyize, yandi mekaka ata fioti ve kusambisa yandi mpe kuzonzila yandi bamambu na bifingu. Kasi yandi zonzaka: “Bika Yehova* semba nge.” 10 Kasi bantu yayi ke na zonzaka yimbi ya bamambu nyonso yina ya tsyeleka, ba ke na bakulaka ve. Mpe na bamambu nyonso yina ba ke bakulaka kukondwa kuyindula mutindu bibulu yina ke ve na mayela, ba ke na tatamanaka na kusala yawu mpe kubebisa bawu mosi.

11 Kyadi na bawu, samu ba me landa nzila ya Kayini. Samu na kuzwa difuta, ba kotaka na mbangu na nzila yina zimbisaka Balami, mpe ba kufwaka samu, mutindu Kora, ba zonzaka bamambu yina ke nataka na yintu ngolo. 12 Ba ke matadi yina ke ya kubumbana na yisi ya maza na mikembo ya beno ya luzolo, ntangu yina ba ke na kudyaka kintwadi na beno, mivungi yina ke dikisaka bawu mosi na ata boma, matuti yina ke nokisaka ve mvula, yina mupepe ke nataka kisika ni kisika, bayinti yina ke butaka ve mbuma na ntangu ya kubuta bambuma, yina kufwaka bambala zole* mpe yina ba timunaka, 13 bimpo* ya ngolo ya mubu yina ke basisaka nsoni ya yawu mutindu mafulu, bambwetete yina ke ve na nzila ya siki-siki, yina ba bumbilaka kitombi ya kulutila ngolo samu na ntangu nyonso.

14 Ee, Enoki muntu ya sambwadi* na kati ya mulonga ya bantu katuka na Adami, bikulaka yandi mpe na yina me tadila bawu ntangu yandi zonzaka: “Beno tala, Yehova* me kwiza na bamiriade* ya yandi ya basantu, 15 samu na kusambisa bantu nyonso mpe kulakisa na bantu nyonso yina ke ve na buzitu na Nzambi, bisalu nyonso ya yimbi yina ba salaka na mutindu ya kukondwa buzitu na Nzambi, mpe bamambu nyonso ya yimbi yina basumuki yina ke zitisaka ve Nzambi zonzaka samu na yandi.

16 Bantu yayi ke nyungutaka, ba ke yawulaka samu na luzingu ya bawu. Ba ke landaka bansatu ya bawu mosi, mpe bayinwa ya bawu ke zonzaka bamambu ya nene samu na kubudila bawu mosi ntulu, ntangu yina ba ke na lebaka* ba ya nkaka samu na bambote ya bawu mosi.

17 Kasi beno bampangi ya munu ya luzolo, beno bambuka mambu yina bantumwa ya Mfumu ya beto Yesu Kristo zonzaka na ntama,* 18 ntangu ba vanda zonza na beno: “Na ntangu ya nsuka, ya ke vanda na bantu yina ke sekaka,* yina ke sosa kulungisa bansatu ya bawu mosi ya yimbi.” 19 Ni bawu ke kotisaka kukabuka, ba ke salaka bamambu mutindu bibulu,* ba ke ve na kimpeve.* 20 Kasi beno bampangi ya munu ya luzolo, beno tungama na zulu ya kiminu ya beno ya kulutila santu mpe beno sambila na mpeve ya santu, 21 samu beno bikana na kati ya luzolo ya Nzambi, ntangu yina beno ke na vingilaka ntima ya kyadi ya Mfumu ya beto Yesu Kristo yina ke nataka na luzingu ya ntangu nyonso. 22 Dyaka, beno tatamana na kulakisa ntima ya kyadi na ba yina ke na bantembe. 23 Beno katula bawu na tiya samu na kuvuukisa bawu, kasi beno tatamana na kulakisa ntima ya kyadi na ba ya nkaka, beno sala yawu na boma, na ntangu yina beno ke na yiinaka tii na kilele yina nzutu me kumisa mvindu.

24 Ntangu yayi, na muntu yina lenda bumba beno samu beno bula ve dibaku, mpe yina lenda sala ti beno lenda kutelama na ata mvindu na mantwala ya nkembo ya yandi* na kilengi mingi, 25 na Nzambi kaka mosi, Muvuukisi ya beto na nzila ya Yesu Kristo Mfumu ya beto, bika yandi kuzwa nkembo, bunene, ngolo mpe lutumu, katuka ntangu nyonso yina me luta, bubu yayi mpe samu na ntangu nyonso. Ameni.