Nsangu ya Mbote ya Matayi

8 Ntangu yandi katukaka* na mongo, bimvuka ya nene ya bantu landaka yandi. 2 Muntu mosi yina vandaka na maladi ya bwazi* kwizaka, fukamaka* na mantwala ya yandi, mpe zonzaka: “Mfumu, kana nge zola, nge lenda vedisa* munu.” 3 Na yawu, Yesu tambaka diboko, simbaka yandi mpe zonzaka: “Mu zola! Kuma ya kuvedila.” Na mbala mosi, yandi belukaka na maladi ya yandi ya bwazi. 4 Na manima Yesu zonzaka na yandi: “Tala, kuzonzila yawu na ata muntu, kasi kwenda talana na nganga-nzambi, mpe pesa dikabu mutindu Musiku ya Moyize lombaka yawu, samu ya vanda kimbangi samu na bawu.”*

5 Ntangu yandi kotaka na Kapenawume, mfumu mosi ya basoda kwizaka na sika ya yandi mpe bandaka kubondila yandi: 6 “Mfumu, kisadi ya munu ke ya kulala na yinzo, yandi ke na lendaka ve kuningana mpe yandi ke na talaka mpasi mingi.” 7 Yesu zonzaka na yandi: “Mu ke kwenda na yinzo ya nge, mpe mu ke belusa yandi.” 8 Mfumu ya basoda vutulaka: “Mfumu, mu ke ve ya kulunga samu nge kota na yinzo ya munu. Kasi zonza kaka mambu mpe kisadi ya munu ke beluka. 9 Samu munu mpe, mu ke na bamfumu na zulu ya munu, mpe mu ke na basoda yina ke na yisi ya lutumu ya munu. Mu ke zonzaka na mosi, ‘Kwenda!’ mpe yandi ke kwendaka, na ya nkaka, ‘Kwiza!’ mpe yandi ke kwizaka, mpe na kisadi ya munu, ‘Sala yayi!’ mpe yandi ke salaka yawu.” 10 Ntangu Yesu kuwaka yawu, yandi yitukaka mpe zonzaka na ba yina vanda landa yandi: “Ya tsyeleka, mu ke na zonzaka na beno ti, mu me tala ata muntu na kiminu ya nene ya faso yayi na Izraele. 11 Kasi mu ke na zonzaka na beno ti, bantu mingi ke katuka na esti mpe na westi, ke kwiza mpe ke vanda na mesa kintwadi na Abrahami, Izaki mpe Yakobi na Kimfumu ya mazulu. 12 Kasi ba ke losa bana ya Kimfumu na ngaanda, na kati ya kitombi. Ni kuna ba ke dila mpe ba ke dyakuna meno.” 13 Na yawu, Yesu zonzaka na mfumu ya basoda: “Kwenda. Kaka mutindu nge me lakisa kiminu, ni faso yina mpe ya ke salama samu na nge.” Mpe kaka na ntangu yina, kisadi yango belukaka.

14 Ntangu Yesu kumaka na yinzo ya Piere, yandi talaka bokilo ya Pierre ya kento* ya kulala, samu yandi vandaka na fievre. 15 Yesu simbaka yandi na diboko, mpe fievre ya yandi manisaka. Yandi telamaka mpe bandaka kusadila yandi.* 16 Ntangu nkokila kumaka, ba natinaka yandi bantu mingi yina bambazi ya yimbi kotilaka. Yandi zonzaka kaka mambu mosi samu na kubingisa bampeve yango, mpe yandi belusaka bantu nyonso yina vandaka na mpasi, 17 samu na kulungisa mambu yina Nzambi zonzaka na nzila ya mbikudi Izayi: “Yandi bakaka yandi mosi bampasi ya beto, mpe yandi lwataka bimbevo ya beto.”

18 Ntangu Yesu talaka bantu mingi pene-pene na yandi, yandi lombaka na bilandi ya yandi na kukwenda na simu ya nkaka. 19 Kisoniki mosi kwizaka mpe zonzaka na yandi: “Mulongi, mu ke landa nge kisika nyonso nge ke kwenda.” 20 Kasi Yesu zonzaka na yandi: “Mibaku* ke na mabulu, mpe bandeke ke na manzanza, kasi Mwana ya muntu ke ve na kisika ya kupemisa yintu.” 21 Na manima, kilandi ya nkaka zonzaka na yandi: “Mfumu, pesa ntete munu nzila ya kukwenda kunda tata ya munu.” 22 Yesu zonzaka na yandi: “Landa munu,* mpe bika bantu ya kufwa kunda bantu ya bawu ya kufwa.”

23 Mpe ntangu yandi kotaka na bwatu, bilandi ya yandi landaka yandi. 24 Na mbala mosi, mupepe mosi ya ngolo basikaka na mubu, mpe maza* vanda fuluka na bwatu, kasi Yesu vanda lala. 25 Bilandi kwendaka vumbula Yesu mpe zonzaka na yandi: “Mfumu, vuukisa beto, beto ke kufwa!” 26 Kasi yandi zonzaka na bawu: “Samu na yinki beno ke ya kufuluka na boma,* beno bantu ya kiminu ya fioti?” Na yina, yandi telamaka, ngalaka mupepe na mubu, mpe bima nyonso kumaka swi. 27 Na yawu, bilandi kamwaka mpe zonzaka: “Muntu yayi ke nani? Samu ti ata mipepe mpe mubu ke tumamaka na yandi.”

28 Ntangu yandi kumaka na simu ya nkaka, na bwala ya bantu ya Gadara, babakala zole yina bambazi ya yimbi kotilaka, basikaka na kati-kati ya bandyamu,* mpe kutanaka na Yesu. Ba vandaka na myangu ya kulutila.* Na yawu, ata muntu vandaka na bukindi ya kuluta na nzila yina. 29 Ba bandaka kuzonza na ngolo nyonso: “Mwana ya Nzambi, nge na beto wapi mambu? Nge me kwiza awa samu na kukwamisa beto tekila ntangu yina Nzambi tulaka?” 30 Mwa ntama na bawu, ya vandaka na bangulu mingi yina vanda kudya. 31 Na yawu, bambazi ya yimbi bandaka kubondila yandi: “Kana nge ke bingisa beto, filisa beto na kati ya bangulu.” 32 Mpe yandi zonzaka na bawu: “Beno kwenda!” Ba basikaka mpe ba kwendaka kota na kati ya bangulu. Bangulu nyonso katukaka na zulu ya mongo, kubwaka na mubu na mbangu nyonso, mpe kufwaka na kati ya maza. 33 Kasi bantu yina vanda kengidila bangulu kimaka. Ntangu ba kotaka na mbanza, ba zabisaka bantu mambu nyonso yina salamaka, mpe disolo ya bantu yina bambazi ya yimbi kotilaka. 34 Na yawu, bantu nyonso ya mbanza kwendaka bwabana Yesu. Ntangu ba talaka yandi, ba bondilaka yandi na kukatuka na bwala ya bawu.