Nsangu ya Mbote ya Matayi
1 Yayi mukanda yina ke zonzilaka disolo* ya Yesu Kristo,* mwana ya Davidi, mwana ya Abrahami:
2 Abrahami butaka Izaki,
Izaki butaka Yakobi,
Yakobi butaka Yuda
na bampangi ya yandi.
3 Yuda butaka Pereze na Zera, mpe mama ya bawu vandaka Tamare.
Pereze butaka Ezerone,
Ezerone butaka Rami.
4 Rami butaka Aminadabi,
Aminadabi butaka Nashone,
Nashone butaka Salmone.
5 Salmone butaka Boaze,
mpe mama ya Boaze
vandaka Rahabi.
Boaze butaka Obede,
mpe mama ya Obede
vandaka Rute.
Obede butaka Yese.
6 Yese butaka mfumu Davidi.
Davidi butaka Salomo,
mpe mama ya Salomo
vandaka kento ya Uri.
7 Salomo butaka Rehoboami,
Rehoboami butaka Abiya,
Abiya butaka Aza.
8 Aza butaka Yehozafati,
Yehozafati butaka Yehorami,
Yehorami butaka Uziya.
9 Uziya butaka Yotami,
Yotami butaka Akaze,
Akaze butaka Ezekyase.
10 Ezekyase butaka Manase,
Manase butaka Amoni,
Amoni butaka Yozyase.
11 Yozyase butaka Yekonia
na bampangi ya yandi
na ntangu yina ba nataka
bantu ya Izraele na Babiloni.
12 Ntangu ba vandaka
na Babiloni,
Yekonia butaka Seyaltyele.
Seyaltyele butaka Zorobabele.
13 Zorobabele butaka Abiyude,
Abiyude butaka Eleyakime,
Eleyakime butaka Azore.
14 Azore butaka Zadoki,
Zadoki butaka Akime,
Akime butaka Eliyude.
15 Eliyude butaka Eleyazare,
Eleyazare butaka Matani,
Matani butaka Yakobi.
16 Yakobi butaka Yozefi.
Yozefi kwelaka Maria,
mpe Maria butaka Yesu,
yina ba ke bokilaka Kristo.
17 Na yawu, kubanda Abrahami tii na Davidi, bankooko nyonso yina lutaka, vandaka bankooko 14. Kubanda Davidi tii na ntangu ba nataka bantu ya Izraele na Babiloni, bankooko 14, mpe kubanda ntangu ba nataka bantu ya Izraele na Babiloni tii na Kristo, bankooko 14.
18 Yayi ni mutindu yina Yesu Kristo butukaka: Na ntangu yina mama ya yandi Maria vandaka na nsilulu ya makwela na sika ya Yozefi, yandi kuzwaka kivumu na ngolo ya mpeve ya santu* tekila makwela ya bawu. 19 Kasi samu bakala ya yandi Yozefi vandaka muntu ya lunungu,* mpe yandi zolaka ve kutalisa Maria nsoni na meso ya bantu, yandi kanisaka kufwa makwela na mansweki. 20 Kasi ntangu yandi vanda kanisa na mambu nyonso yayi, mbazi ya Yehova* basikilaka yandi na ndosi, mpe zonzaka: “Yozefi mwana ya Davidi, kuvanda ve na boma ya kubaka Maria kento ya nge na yinzo ya nge, samu kivumu yina yandi me kuzwa, yandi me kuzwa yawu na ngolo ya mpeve ya santu. 21 Yandi ke buta mwana ya bakala, mpe nge ke bokila yandi Yesu,* samu ti yandi ke vuukisa bantu na masumu ya bawu.” 22 Nyonso yayi salamaka samu na kulungisa mambu yina Yehova* zonzaka na nzila ya mbikudi ya yandi: 23 “Tala! Mwana ya kento yina me zaba ntete ve babakala ke kuzwa kivumu, mpe yandi ke buta mwana ya bakala, mpe ba ke bokila yandi Emanwele,” yina zola zonza, “Nzambi ke na beto.”
24 Na manima, Yozefi vumbukaka na pongi, mpe yandi salaka mutindu mbazi ya Yehova* zonzaka na yandi. Yandi tulaka kento ya yandi na yinzo. 25 Kasi Yozefi vukisaka ve nzutu na yandi tii ntangu Maria butaka mwana ya bakala, mpe Yozefi bokilaka yandi Yesu.