Kubasika
15 Na ntangu yina, Moyize na bantu ya Izraele yimbilaka Yehova nzimbu yayi:
“Bika mu yimbila Yehova, samu ti yandi me zanguka mingi.
Mpunda na muntu yina ke nataka yawu, yandi me losa bawu na mubu.
2 Ngolo ya munu mpe bukindi ya munu ke ni Yah,* samu ti yandi me kuma muvuukisi ya munu.
Yayi ni Nzambi ya munu, mpe mu ke kumisa yandi; Nzambi ya tata ya munu, mpe mu ke zangula yandi.
3 Yehova ke soda ya ngolo. Yehova ni nkumbu ya yandi.
4 Bapusu-pusu ya Faraoni mpe basoda ya yandi, yandi me losa bawu na mubu,
Mpe basoda ya yandi ya kulutila ngolo, me dyama na Mubu ya Mbwaki.
5 Bamaza ya kudasuka me fuka bawu; mutindu ditadi, ba me dyama na bisika ya sunda.
6 Diboko ya nge ya bakala, O Yehova, ke ngolo mingi;
Diboko ya nge ya bakala, O Yehova, lenda mwangisa mbeni.
7 Na bunene ya nge ya kulutila, nge ke bwisaka ba yina ke teleminaka nge;
Nge ke filisaka nkele ya nge yina ke na pelaka, mpe ya ke nyengisaka bawu mutindu matiti ya nyanga.
8 Na mupepe ya mbombo ya nge, bamaza vukanaka;
Ya kangamaka kisika mosi mutindu kibaka samu maza vutuka ve;
Bamaza ya kudasuka kangamaka mutindu ditadi na kati-kati ya mubu.
9 Mbeni vanda zonza: ‘Mu ke landa bawu! Mu ke kuzwa bawu!
Mu ke kabula bimvwama yina mu ke botola bawu tii mu* ke yukuta!
Mu ke basisa mbele ya munu ya mvita! Diboko ya munu ke nunga bawu!
10 Nge fulaka mupepe ya nge, mubu fukaka bawu;
Ba dyamaka mutindu kisengo ya kilo na kati ya bamaza ya nene.
11 O Yehova, nani ke mutindu nge na kati ya banzambi?
Nani ke mutindu nge, nge yina ke lakisaka busantu ya kulutila?
Nge yina ba me fwana kukima mpe kukembila na banzimbu, Nge yina ke salaka bamambu ya ngitukulu.
12 Nge tambaka diboko ya nge ya bakala, mpe ntoto minaka bawu.
13 Na luzolo ya nge ya kukwikama, nge twadisaka bantu yina nge vuukisaka;*
Na ngolo ya nge, nge ke nata bawu na kisika ya santu yina nge ke vanda.
14 Bantu ya bayinsi ke kuwa yawu; ba ke tekita;
Misongo* ke simba bantu yina ke vandaka na Filisti.
15 Na ntangu yina, bamfumu* ya Edome ke fuluka na boma,
Mpe matekita ke simba bamfumu* ya ngolo ya Moabe.
Ngolo ke manisa ba yina nyonso ke vandaka na Kanana.
16 Boma mpe matekita ke bwila bawu.
Samu na ngolo ya diboko ya nge, ba ke ningana ve mutindu ditadi
Tii ntangu bantu ya nge ke luta, O Yehova,
Tii ntangu bantu yina nge salaka ke luta.
17 Nge ke nata bawu mpe nge ke kunda bawu na mongo ya nge,*
Kisika yina nge bongisaka samu nge vanda ntangu nyonso, O Yehova,
Kisika ya santu, O Yehova, yina maboko ya nge tulaka.
18 Yehova ke yala mvula na mvula.
19 Ntangu bampunda ya Faraoni na bapusu-pusu ya yandi ya mvita mpe basoda ya yandi yina ke nataka bampunda kotaka na mubu,
Yehova vutulaka maza ya mubu na zulu ya bawu,
Kasi bantu ya Izraele tambulaka na zulu ya ntoto ya kukawuka na kati-kati ya mubu.”
20 Na yawu mbikudi ya kento Miriame, kibusi ya Aroni bakaka tambure ya fioti na diboko ya yandi, mpe bakento nyonso landaka yandi na batambure ya fioti mpe mabina. 21 Samu na kupesa mvutu na babakala, Miriame yimbaka mutindu yayi:
“Beno yimbila Yehova, samu ti yandi me zanguka mingi.
Mpunda na muntu yina ke nataka yawu, yandi me losa bawu na mubu.”
22 Na manima, Moyize twadisaka Izraele, ba katukaka na Mubu ya Mbwaki mpe ba kwendaka na ntoto ya kuyuma ya Shure. Ba tambulaka bilumbu tatu na ntoto ya kuyuma, kasi ba kuzwaka ve maza. 23 Ba kumaka na Mara, kasi ba lendaka ve kunwa maza ya Mara* samu ya vandaka ndudi. Ni na yawu yandi pesaka kisika yina nkumbu Mara. 24 Na yawu, dikanda bandaka kunyunguta na ntadisi ya Moyize na kuzonzaka: “Beto ke kunwa yinki?” 25 Yandi dilaka na sika ya Yehova, mpe Yehova lakisaka yandi yinti mosi. Ntangu yandi losaka yawu na kati ya maza, maza kumaka kitoko.
Kuna Nzambi tudilaka bawu musiku ya kulanda mpe mutindu ya kusambisa, mpe kuna yandi mekaka bawu. 26 Yandi zonzaka: “Kana nge kuwa mbote-mbote ndinga ya Yehova Nzambi ya nge mpe nge sala mambu yina ke ya kulunga na meso ya yandi, mpe nge teka dikebi na misiku ya yandi mpe nge tumama na mikanu ya yandi nyonso, mu ke nata ve na zulu ya nge ata kimbevo mosi yina mu nataka na zulu ya bantu ya Ezipte, samu ti munu Yehova, mu ke na belusaka nge.”
27 Na manima ba kumaka na Elime, kisika yina vandaka na mikelo 12 ya maza mpe maba 70. Ba vandaka kuna, pene-pene ya maza.