Bisalu ya Bantumwa

10 Na Sezarea, ya vandaka na bakala mosi na nkumbu ya Korneye. Yandi vandaka mfumu ya kikunku mosi ya basoda* yina ba vanda bokilaka kimvuka ya Itali.* 2 Yandi vandaka muntu ya lusambu. Yandi na bantu nyonso yina vandaka na yinzo ya yandi vandaka na boma ya Nzambi. Yandi vanda pesaka bantu makabu mingi ya kyadi, mpe yandi vanda bondilaka Nzambi ntangu nyonso. 3 Pene-pene na ngunga ya tatu na manima ya midi,* yandi talaka pwelele na kimona-meso, mbazi mosi ya Nzambi, yina kwizaka na sika ya yandi mpe zonzaka: “Korneye!” 4 Korneye talaka yandi mbote-mbote, mpe na boma nyonso yandi yufulaka yandi: “Mfumu, wapi mambu?” Yandi zonzaka na yandi: “Balusambu ya nge mpe makabu ya nge ya kyadi me kuma na sika ya Nzambi, mpe yandi me bambuka yawu moyo. 5 Na yawu ntangu yayi, filisa bantu na Zope samu ba kwenda bokila bakala mosi na nkumbu ya Simoni yina ba ke bokilaka Piere. 6 Muntu yayi ke na vandaka na sika ya Simoni, bakala mosi yina ke bongisaka bampusu ya bibulu, yina ke na yinzo pene-pene na mubu.” 7 Kaka na ntangu yina mbazi yina sololaka na yandi kwendaka, yandi bokilaka bisadi ya yandi zole mpe soda mosi yina vandaka muntu ya lusambu. 8 Yandi zabisaka bawu mambu nyonso mpe filisaka bawu na Zope.

9 Kilumbu yina landaka, ntangu ba vandaka na nzila mpe kumaka pene-pene na mbanza, Piere kwendaka na zulu ya yinzo samu na kusambila tekila ngunga ya midi lunga.* 10 Kasi yandi kumaka na nsatu mingi mpe yandi vanda sosa kudya. Ntangu ba vanda lamba, yandi kuzwaka kimona-meso. 11 Yandi talaka zulu fungukaka mpe kima mosi* mutindu kitende ya nene ya lino yina ba simbaka na bansongi yiya, kulumukaka mpe ba vanda nata yawu na ntoto. 12 Na kati ya yawu, ya vandaka na bibulu ya mutindu nyonso yina ke na makulu yiya, bibulu yina ke tambulaka kivumu na ntoto mpe bandeke ya mazulu. 13 Na manima, ndinga mosi zonzaka na yandi: “Piere, telama, kufwa yawu mpe kudya!” 14 Kasi Piere zonzaka: “Ata fioti ve Mfumu, samu nabunu mu kudya kima yina ke ve ya kuvedila mpe ya mvindu.” 15 Ndinga yango zonzaka dyaka na yandi mbala ya zole: “Bika kubokila mvindu bima yina Nzambi me kumisa ya kuvedila.” 16 Ndinga yango wakanaka dyaka mbala ya tatu, mpe na mbala mosi kitende* yango vutukaka na zulu.

17 Ntangu Piere vanda sosa ntete kuzaba yinki kimona-meso yango vanda sosa kuzonza, bantu yina Korneye filisaka yufulaka kisika yina yinzo ya Simoni vandaka, mpe ba telamaka na mwelo. 18 Ba bokilaka mpe ba yufulaka kana Simoni yina ba ke bokilaka Piere vanda vanda kuna. 19 Ntangu Piere vanda yindula ntete na kimona-meso yango, mpeve zonzaka na yandi: “Tala! Bantu tatu ke na sosaka nge. 20 Na yawu, telama, kwenda na yisi mpe kwenda kintwadi na bawu. Mpe kusala ata fioti ve ntembe, samu ni munu me filisa bawu.” 21 Piere kwendaka na yisi na sika ya bantu yango mpe zonzaka: “Munu yandi yayi, muntu yina beno ke na sosaka. Samu na yinki beno me kwiza awa?” 22 Ba zonzaka: “Korneye, mfumu mosi ya basoda, muntu ya lunungu* mpe yina ke na boma ya Nzambi, muntu yina dikanda nyonso ya Bazwife ke zonzaka mambu ya mbote samu na yandi, me kuzwa na sika ya mbazi mosi ya santu, musiku mosi yina me katuka na Nzambi, samu yandi lomba nge na kukwiza na yinzo ya yandi mpe yandi kuwa mambu yina nge ke zonza.” 23 Na yawu, yandi kotisaka bawu mpe yambaka bawu mutindu banzenza ya yandi.

Kilumbu yina landaka, yandi telamaka mpe kwendaka na bawu, mpe bampangi ya nkaka ya mbanza ya Zope kwendaka kintwadi na yandi. 24 Kilumbu yina landaka, yandi kotaka na bwala ya Sezarea. Korneye vanda vingila bawu, mpe yandi vanda me vukisa bantu ya dikanda ya yandi mpe bandiku ya yandi ya ntima. 25 Ntangu Piere kotaka, Korneye kwizaka bwabana yandi, kubwaka na makulu ya yandi mpe fukamaka na mantwala ya yandi. 26 Kasi Piere telemisaka yandi mpe zonzaka na yandi: “Telama. Munu mpe, mu ke kaka muntu.” 27 Ntangu yandi vanda solola na yandi, yandi kotaka mpe kutanaka bantu mingi ya kuvukana. 28 Yandi zonzaka na bawu: “Beno zaba mbote-mbote ti ba ke niminaka Bazwife na kuvukana to na kuvanda pene-pene na muntu ya dikanda ya nkaka. Kasi Nzambi me lakisa munu ti mu me lunga ve kubokila muntu mosi ti yandi ke ve ya kuvedila to mvindu. 29 Na yawu, mu mangaka ata fioti ve kukwiza ntangu ba filisaka bantu ba kwiza bokila munu. Na yina, beno zabisa munu samu na yinki beno me bokila munu.”

30 Korneye zonzaka: “Bilumbu yiya me luta, kaka na ngunga yayi, mu vanda sambila na yinzo ya munu na ngunga ya tatu na manima ya midi.* Bakala mosi yina lwataka bilele yina vanda ngenga telamaka na mantwala ya munu, 31 mpe zonzaka: ‘Korneye, Nzambi me kuwa lusambu ya nge mpe yandi me bambuka moyo na makabu ya nge ya kyadi. 32 Na yawu, filisa bantu na Zope samu ba kwenda bokila bakala mosi na nkumbu ya Simoni yina ba ke bokilaka Piere. Muntu yayi ke na vandaka na sika ya Simoni, bakala mosi yina ke bongisaka bampusu ya bibulu, yina ke na yinzo pene-pene na mubu.’ 33 Na yawu na mbala mosi, mu filisaka bantu na kukwenda sosa nge, mpe ya tsyeleka, nge me sala mbote na yina nge me kwiza awa. Ntangu yayi, beto nyonso kele awa na mantwala ya Nzambi, samu na kuwa bamambu nyonso yina Yehova* me tumisa nge na kuzonza.”

34 Na yina, Piere fungulaka yinwa mpe zonzaka: “Ya tsyeleka, awa mu me kwiza zaba ti Nzambi ke soolaka ve bizizi, 35 kasi na konso yinsi, yandi ke ndimaka muntu yina ke na boma ya yandi mpe ke salaka mambu ya lunungu.* 36 Yandi filisaka bana ya Izraele mambu ya yandi samu na kuzonzila bawu nsangu ya mbote ya kizunu na nzila ya Yesu Kristo, muntu yina ke Mfumu ya bantu nyonso. 37 Beno zaba mambu yina bantu vanda zonzila na bwala nyonso ya Zude, kubanda na Galile, na manima ya mbotokolo yina Yoane vanda samuna, 38 mambu yina me tadila Yesu muntu ya Nazareti, mutindu Nzambi tulaka yandi mafuta na mpeve ya santu mpe ngolo, mpe yandi tambulaka na yinsi nyonso. Yandi vanda sala mambu ya mbote mpe yandi vanda belusa ba yina nyonso Dyabulu vanda talisa mpasi, samu Nzambi vandaka na yandi. 39 Mpe beto ke bambangi ya mambu nyonso yina yandi salaka na bwala ya Bazwife mpe na Yeruzalemi, kasi ba komaka yandi na zulu ya yinti mpe kufwaka yandi. 40 Nzambi vumbulaka yandi na lufwa na kilumbu ya tatu, mpe pesaka yandi luve ya kutalana, 41 na bantu nyonso ve, kasi na bambangi yina Nzambi soolaka na mantwala, na beto yina kudyaka mpe kunwaka na yandi na manima ya kuvumbuka ya yandi na bantu ya kufwa. 42 Dyaka, yandi tumisaka beto na kusamuna na bantu, mpe kupesa kimbangi ya kulunga ti ni yandi Nzambi me tula samu na kuvanda zuzi ya bantu yina ke moyo mpe ya bantu ya kufwa. 43 Bambikudi nyonso ke pesaka kimbangi samu na yandi, ti muntu nyonso yina ke kwikila na yandi, ke kuzwa mulemvo ya masumu na nkumbu ya yandi.”

44 Ntangu Piere vanda zonza ntete bamambu yayi, mpeve ya santu kwizaka na zulu ya bantu nyonso yina vanda kuwa mambu yango. 45 Mpe bandimi* yina ba zengaka kibakala, yina kwizaka na Piere, vanda yituka samu dikabu ya ofele ya mpeve ya santu vanda me mwangana mpe na bantu ya makanda. 46 Ya tsyeleka, ba vanda kuwa bawu kuzonza na bandinga ya banzenza, mpe kukumisa Nzambi. Na yawu Piere zonzaka: 47 “Bantu yayi me kuzwa mpeve ya santu mutindu beto. Na yawu, nani lenda nimina bawu na kuzwa mbotokolo na maza?” 48 Na yina, yandi tumisaka ti ba botika bawu na nkumbu ya Yesu Kristo. Na manima ba lombaka yandi na kubikana mwa bilumbu.