KUBASIKA

1 Ntyo yayi ni bankumbu ya bana ya Izraele yina kwizaka na Ezipte kintwadi na Yakobi, muntu na muntu na dikanda ya yandi: 2 Rubeni, Simeyone, Levi mpe Yuda; 3 Izakare, Zabulone mpe Benzame; 4 Dane na Neftali; Gade na Azere. 5 Bantu* nyonso yina butamaka na Yakobi vandaka bantu 70, kasi Yozefi tekilaka na Ezipte. 6 Na manima, Yozefi kufwaka. Bampangi ya yandi nyonso, na bantu nyonso ya mbandu* yina mpe kufwaka. 7 Bantu* ya Izraele butaka mingi, mpe ba kumaka mingi ya kulutila. Ba vanda bika ve kukuma mingi, mpe kukuma na ngolo ya kulutila na faso mosi ya kusakana ve. Na yawu, ba fulukaka na bwala.

8 Na manima, mfumu ya malu-malu yina zabaka ve Yozefi bandaka kuyala na Ezipte. 9 Yandi zonzaka na bantu ya yandi: “Beno tala! Bantu ya Izraele kele mingi mpe ba ke na ngolo mingi kulutila beto. 10 Beto sala kima na mayela nyonso samu ba bika dyaka kukuma mingi. Samu ti, kana mvita kubwa, ba ke vukana na bambeni ya beto, ba ke nwanisa beto mpe ba ke kima bwala.”

11 Na yawu ba tulaka na zulu ya bawu bamfumu yina zola nata bawu na ngolo nyonso na kusala kisalu ya mpasi samu na kunyokola bawu, mpe ba tungilaka Faraoni bambanza ya kubumba bima. Bankumbu ya bambanza yango vandaka Pitome mpe Raamsese. 12 Kasi ata ti ba vanda lutila kaka kunyokola bawu, ba vanda lutila kukuma mingi mpe kufulusa bwala. Na yawu, bantu ya Ezipte kumaka na boma ya bantu ya Izraele mpe ba vanda tala bawu nganzi. 13 Ni na yawu, bantu ya Ezipte kotisaka bantu ya Izraele na kati ya bungaamba ya ngolo. 14 Ba kumisaka luzingu ya bawu ndudi na bisalu ya mpasi: kulamba ntoto, kuyidika babrike, mpe kusala bisalu nyonso ya bungaamba na bilanga. Ya tsyeleka, na ntima ya yimbi nyonso ba vanda nata bawu na ngolo na kusala bisalu nyonso ya bungaamba.

15 Na manima mfumu ya Ezipte sololaka na bibutisi* ya Baebre yina ba vanda bokilaka Shifra na Puwa. 16 Yandi zonzaka na bawu: “Ntangu beno ke butisa bakento ya Baebre, beno tala mwana yina ke basika. Kana ya ke mwana ya bakala, beno kufwa yandi. Kasi kana ya ke mwana ya kento, beno bika yandi moyo.” 17 Kasi bibutisi vandaka na boma ya Nzambi ya tsyeleka. Na yawu, ba salaka ve mambu yina mfumu ya Ezipte zonzaka na bawu. Ba vanda bikaka bana ya babakala moyo. 18 Na manima, mfumu ya Ezipte bokilaka bibutisi mpe yufulaka bawu: “Samu na yinki beno ke na bikaka bana ya babakala moyo?” 19 Bibutisi vutulaka na Faraoni: “Bakento ya Baebre ke ve faso mosi na bakento ya Ezipte. Samu ba ke na ngolo, ba ke butaka tekila kibutisi kuma na sika ya bawu.”

20 Na yawu, Nzambi sakumunaka bibutisi,* mpe bantu ya Izraele vanda bika ve kukuma mingi mpe na ngolo ya kulutila. 21 Mpe samu bibutisi vandaka na boma ya Nzambi ya tsyeleka, na manima yandi pesaka bawu bana. 22 Na yina Faraoni pesaka musiku yayi na bantu ya yandi nyonso: “Beno losa na Nzadi ya Nile bana nyonso ya babakala ya Baebre yina ke butuka, kasi beno bika bana nyonso ya bakento moyo.”

2 Na ntangu yina, bakala mosi ya dibuta ya Levi kwelaka mwana mosi ya Levi ya kento. 2 Kento yango kumaka na kivumu mpe butaka mwana ya bakala. Ntangu yandi talaka ti mwana yango vandaka kitoko mingi, yandi bumbaka yandi bangonda tatu. 3 Ntangu yandi vanda lenda dyaka ve kubumba mwana, yandi bakaka kitunga yina ba yidikaka na yinti ya papiruse, yandi pakulaka yawu gudron mpe koole, mpe yandi tulaka mwana na kati ya yawu. Na manima, yandi kwendaka tula yawu na kati-kati ya matiti ya bidyadya yina vandaka na lweka ya Nzadi ya Nile. 4 Kasi kibusi ya mwana telamaka mwa ntama samu na kutala yinki zola kumina yandi.

5 Ntangu mwana ya Faraoni ya kento kwendaka yobila na Nzadi ya Nile, bisadi ya yandi ya bakento vanda tambula na lweka ya Nile. Yandi talaka kitunga na kati-kati ya matiti ya bidyadya. Na nswalu nyonso, yandi tumisaka mwana ya yandi ya kisalu na kukwenda baka yawu. 6 Ntangu yandi fungulaka yawu, yandi talaka mwana ya bakala, mpe mwana yango vanda dila. Yandi talaka yandi kyadi, mpe yandi zonzaka: “Ya ke mwana ya Baebre.” 7 Kibusi ya mwana zonzaka na mwana ya Faraoni: “Nge zola mu kwenda sosila nge ndesi* mosi na kati ya bakento ya Baebre yina ke pesa mwana mabene?” 8 Mwana ya Faraoni zonzaka na yandi: “Ee, kwenda!” Na mbala mosi yandi kwendaka mpe bokilaka mama ya mwana. 9 Mwana ya Faraoni zonzaka na yandi: “Baka mwana yayi mpe nwikisa yandi mabene samu na munu, mpe mu ke futa nge.” Na yawu, kento yango bakaka mwana mpe sansaka yandi. 10 Ntangu mwana kulaka, yandi nataka yandi na mwana ya Faraoni mpe yandi kumaka mwana ya yandi. Yandi pesaka yandi nkumbu ya Moyize* mpe zonzaka: “Ya ke samu mu basisaka yandi na maza.”

11 Na manima, ntangu Moyize kumaka kuluntu,* yandi kwendaka na sika ya bampangi ya yandi samu na kutala bisalu ya mpasi yina ba vanda sala. Mpe yandi talaka muntu mosi ya Ezipte yina vanda bula Muebre mosi, mosi ya bampangi ya yandi. 12 Na yawu, yandi talaka na lweka mosi mpe na lweka ya nkaka. Ntangu yandi talaka ti ata muntu vandaka kuna, yandi kufwaka muntu ya Ezipte mpe zikaka yandi na yisi ya ntoto.

13 Kilumbu yina landaka, yandi basikaka dyaka mpe yandi talaka babakala zole ya Baebre yina vanda nwana. Na yawu yandi zonzaka na muntu yina vandaka na foti: “Samu na yinki nge ke na bulaka mpangi ya nge?” 14 Kasi bakala yango vutulaka: “Nani me tula nge mfumu mpe zuzi na zulu ya beto? Nge ke na sosaka kufwa munu mutindu nge kufwaka muntu ya Ezipte?” Na yawu Moyize kumaka na boma mpe yandi kanisaka: “Ya tsyeleka mambu yango me zabana.”

15 Na manima, Faraoni kuwaka mambu yango, mpe yandi sosaka kufwa Moyize. Kasi Moyize kimaka ntama na Faraoni, mpe yandi kwendaka zinga na bwala ya Madiani. Ntangu yandi kumaka kuna, yandi kwendaka vanda pene-pene na dibulu mosi ya maza. 16 Nganga-nzambi ya Madiani vandaka na bana 7 ya bakento. Bana yango kwizaka samu na kuteka maza mpe kufulusa bisika ya kunwa maza samu na mameme ya tata ya bawu. 17 Kasi mivungi kwizaka bingisa bawu kaka mutindu ba vandaka na kifu ya kusalaka yawu. Na yawu, Moyize telamaka mpe sadisaka* bakento yango, mpe yandi nwikisa mameme ya bawu maza. 18 Ntangu ba vutukaka na sika ya tata ya bawu Rewele,* yandi yufulaka bawu na kukamwa nyonso: “Yinki me sala ti beno vutuka mbangu bubu yayi?” 19 Ba vutulaka: “Bakala mosi ya Ezipte me vuukisa beto na maboko ya mivungi, yandi me tekila beto maza mpe me nwikisa mameme.” 20 Yandi zonzaka na bana ya yandi: “Wapi yandi? Samu na yinki beno me bika yandi kuna? Beno bokila yandi, yandi kwiza kudya na beto.” 21 Na manima, Moyize ndimaka kuvanda na sika ya Rewele, mpe Rewele kwelisaka yandi Zipora, mwana ya yandi. 22 Zipora butaka mwana ya bakala mpe Moyize bokilaka yandi Gershome,* samu yandi zonzaka: “Mu me kuma nzenza yina ke vandaka na yinsi ya bunzenza.”

23 Ntangu mingi* na manima, mfumu ya Ezipte kwizaka kufwa. Kasi bantu ya Izraele vanda bika ve kuyawula mpe kudila samu na bungaamba, mpe bidilu ya bawu samu na kulomba lubakusu vanda kwenda na sika ya Nzambi ya tsyeleka. 24 Nsuka-nsuka, Nzambi kuwaka bidilu ya bawu, mpe yandi bambukaka moyo luwawanu yina yandi salaka na Abrahami, Izaki mpe Yakobi. 25 Na yawu Nzambi tulaka bantu ya Izraele dikebi, mpe yandi talaka bampasi ya bawu.

3 Moyize kumaka muvungi ya mameme ya bokilo ya yandi Yetro, nganga-nzambi ya Madiani. Kilumbu mosi, ntangu yandi nataka mameme na westi ya ntoto ya kuyuma, yandi kwizaka kuma na Horebe, mongo ya Nzambi ya tsyeleka. 2 Mbazi ya Yehova basikilaka yandi na kati ya tiya yina vandaka na kati-kati ya mwa yinti mosi ya bansende. Ntangu yandi vanda tala, yandi talaka ti yinti ya bansende bakaka tiya, kasi ya vanda nyenga ve. 3 Na yawu Moyize zonzaka: “Mu ke kwenda pene-pene samu na kutala mbote-mbote mambu ya ngitukulu yayi, mpe kutala samu na yinki yinti ya bansende ke na nyengaka ve.” 4 Ntangu Yehova talaka ti Moyize vanda kwenda samu na kutala, yandi bokilaka yandi na kati-kati ya yinti ya bansende: “Moyize! Moyize!” Moyize vutulaka: “Munu yandi yayi.” 5 Nzambi zonzaka na yandi: “Suka kuna. Katula mapapa ya nge, samu ti kisika yina nge ke ya kutelama ke ntoto ya santu.”

6 Na manima yandi zonzaka: “Mu ke Nzambi ya tata ya nge, Nzambi ya Abrahami, Nzambi ya Izaki mpe Nzambi ya Yakobi.” Na yawu Moyize bumbaka kizizi ya yandi samu yandi vandaka na boma ya kutala Nzambi ya tsyeleka. 7 Yehova bwelaka: “Ya tsyeleka, mu me tala mpasi ya bantu ya munu yina ke na Ezipte, mpe mu me kuwa bidilu ya bawu samu bamfumu ya kisalu ke na nataka bawu na ngolo na kusala. Mu zaba mbote-mbote mpasi yina ba ke na talaka. 8 Mu ke kulumuka samu na kuvuukisa bawu na maboko ya bantu ya Ezipte. Mu ke basisa bawu na ntoto yina, mpe mu ke nata bawu na ntoto ya mbote mpe ya nene, ntoto yina ke ya kufuluka na miliki mpe mafuta ya nyosi, bwala ya Bakanana, ya Bahitite, ya Baamorite, ya Baperizite, ya Bahivite mpe ya Bayebuzite. 9 Ya tsyeleka, bidilu ya dikanda ya Izraele me kuma na makutu ya munu, mpe mu me tala mutindu bantu ya Ezipte ke na nyokolaka bawu na ntima ya yimbi nyonso. 10 Ntangu yayi, kwiza, mu ke filisa nge na sika ya Faraoni, mpe nge ke basisa dikanda ya munu, bantu ya Izraele, na Ezipte.”

11 Kasi Moyize zonzaka na Nzambi ya tsyeleka: “Mu ke nani samu mu kwenda na sika ya Faraoni, mpe mu basisa bantu ya Izraele na Ezipte?” 12 Nzambi zonzaka na yandi: “Mu ke vanda na nge, mpe yayi ni kidimbu yina mu ke pesa nge samu nge vanda ya kundima ti ni munu me filisa nge: Ntangu nge ke basisa dikanda ya munu na Ezipte, beno ke sadila* Nzambi ya tsyeleka na mongo yayi.”

13 Kasi Moyize zonzaka na Nzambi ya tsyeleka: “Kana mu kwenda na sika ya bantu ya Izraele mpe mu zonza na bawu, ‘Nzambi ya bankooko ya beno me filisa munu na sika ya beno,’ mpe ba zonza na munu, ‘Nkumbu ya yandi nani?’ yinki mu ke zonza na bawu?” 14 Na yawu Nzambi zonzaka na Moyize: “Mu ke kuma yina mu ke soola* na kukuma.”* Yandi bwelaka: “Zonza na bantu ya Izraele mutindu yayi, ‘Mu ke kuma me filisa munu na sika ya beno.’” 15 Nzambi zonzaka dyaka na Moyize:

“Zonza na bantu ya Izraele mutindu yayi, ‘Yehova, Nzambi ya bankooko ya beno, Nzambi ya Abrahami, Nzambi ya Izaki, mpe Nzambi ya Yakobi me filisa munu na sika ya beno.’ Yayi ni nkumbu ya munu ya mankululu, mpe ni na nkumbu yayi bantu ya ntangu yayi mpe yina ke kwiza me fwana kubambukila munu moyo. 16 Ntangu yayi, kwenda kutika bakuluntu ya Izraele mpe zonza na bawu, ‘Yehova Nzambi ya bankooko ya beno, Nzambi ya Abrahami, ya Izaki mpe ya Yakobi me basikila munu mpe yandi me zonza: “Ya tsyeleka, mu me tula beno dikebi, mpe mu me tala mambu yina ba ke na salaka beno na Ezipte. 17 Ni na yawu, mu me zonza ti mu ke katula beno na mpasi yina beno ke na talaka na maboko ya bantu ya Ezipte, mpe mu ke nata beno na ntoto ya Bakanana, ya Bahitite, ya Baamorite, ya Baperizite, ya Bahivite mpe ya Bayebuzite, na ntoto yina ke ya kufuluka na miliki mpe mafuta ya nyosi.”’

18 “Ba ke kuwa nge, mpe beno ke kwenda, nge na bakuluntu ya Izraele na sika ya mfumu ya Ezipte, mpe beno ke zonza na yandi: ‘Yehova Nzambi ya Baebre me solola na beto. Na yawu, mulemvo, bika beto sala nzyetolo ya bilumbu tatu na ntoto ya kuyuma samu beto pesa minkayulu na Nzambi ya beto Yehova.’ 19 Kasi mu zaba ti, kana diboko ya ngolo* me kwikisa ve yandi, mfumu ya Ezipte ke bika ve ti beno kwenda. 20 Ni na yawu, mu ke tamba* diboko ya munu mpe mu ke bula Ezipte na bamambu nyonso ya ngitukulu yina mu ke sala kuna. Na manima, yandi ke bika beno kwenda. 21 Mu ke sala ti bantu ya Ezipte lakisa beno bumbote, mpe ntangu beno ke kwenda, beno ke kwenda ve maboko mpamba. 22 Konso kento fwana kulomba na kento yina ke vandaka pene-pene na yandi mpe na kento yina ke vandaka na yinzo ya yandi bima yina ba yidikaka na arza mpe na wolo, mpe bilele. Mpe beno ke lwatisa yawu bana ya beno ya babakala mpe ya bakento. Beno ke botola bimvwama ya bantu ya Ezipte.”

4 Kasi Moyize vutulaka: “Kasi yinki mu ke sala kana ba ndimina ve munu mpe ba kuwa ve munu? Samu ba ke zonza, ‘Yehova me basikila ve nge.’” 2 Na yawu, Yehova yufulaka yandi: “Yinki ke na nge na diboko?” Yandi vutulaka: “Yinti.” 3 Nzambi zonzaka: “Losa yawu na ntoto.” Yandi losaka yawu na ntoto mpe ya kumaka nyoka. Mpe na mbala mosi Moyize kimaka yawu. 4 Yehova zonzaka dyaka na Moyize: “Tamba diboko ya nge mpe simba yawu na mukila.” Na yawu, yandi tambaka diboko mpe simbaka yawu, mpe ya vutukaka yinti na diboko ya yandi. 5 Na yina Nzambi zonzaka: “Nge ke sala yawu samu ba ndima ti Yehova Nzambi ya bankooko ya bawu, Nzambi ya Abrahami, Nzambi ya Izaki, mpe Nzambi ya Yakobi me basikila nge.”

6 Yehova zonzaka dyaka na yandi: “Mulemvo, kotisa diboko na kinkuti, na ntulu ya nge.” Na yawu, yandi kotisaka diboko na kinkuti ya yandi. Ntangu yandi basisaka yawu, yeee! ya kumaka na maladi ya bwazi, mpe ya kumaka mpembe. 7 Na manima yandi zonzaka: “Vutula diboko na kinkuti ya nge.” Na yawu yandi vutulaka diboko na kinkuti ya yandi. Ntangu yandi basisaka diboko, ya vutukaka mbote mutindu nzutu ya yandi nyonso. 8 Yandi zonzaka: “Kana ba ndimina ve nge mpe ba teka ve dikebi na kidimbu ya ntete, ntembe ve ba ke teka dikebi na kidimbu ya zole. 9 Kasi, kana ba ndimina ve bidimbu zole yayi mpe ba manga kuwa nge, nge ke baka mwa ndambu ya maza ya Nzadi ya Nile mpe nge ke mwangisa yawu na ntoto, mpe maza yango ke kuma menga na ntoto.”

10 Na manima Moyize zonzaka na Yehova: “Lemvokila munu Yehova, mu ke zabaka ve kuzonza mbote-mbote, ya vanda banda ntama to banda ntangu yina nge me banda kusolola na kisadi ya nge, samu yinwa ya munu mpe ludimi ya munu ke vandaka kilo.” 11 Yehova zonzaka na yandi: “Nani pesaka muntu yinwa? Nani ke salaka ti muntu vanda dibaba, to na makutu ya kufwa? Nani ke salaka ti muntu tala, to yandi vanda na meso ya kufwa? Ya ke ve ni munu, Yehova? 12 Na yawu, kwenda, mu ke vanda na nge ntangu nge ke zonza,* mpe mu ke zabisa* nge mambu yina nge ke zonza.” 13 Kasi yandi zonzaka: “Lemvokila munu Yehova, mulemvo ya nge, filisa muntu ya nkaka yina nge zola kufilisa.” 14 Kuna Yehova dasukilaka Moyize mpe yandi zonzaka: “Aroni Mulevi ke ve yaya ya nge? Mu zaba ti yandi zaba kuzonza, mpe ntangu yayi yandi ke na kwizaka bwabana nge. Ntangu yandi ke tala nge, ntima ya yandi ke yangalala. 15 Nge ke zonza na yandi mpe nge ke zabisa yandi mambu yina yandi me fwana kuzonza,* mpe mu ke vanda na beno ntangu beno ke zonza, mpe mu ke zabisa beno mambu ya kusala. 16 Yandi ke zonza na bantu na kisika ya nge. Yandi ke vanda nzonzi ya nge mpe nge ke vanda mutindu Nzambi* samu na yandi. 17 Mpe nge ke baka yinti yayi na diboko ya nge, mpe nge ke sala bimangu* na yawu.”

18 Na yawu Moyize vutukaka na sika ya bokilo ya yandi Yetro mpe zonzaka: “Mulemvo ya nge, mu zola kukwenda mpe kuvutuka na sika ya bampangi ya munu yina ke na Ezipte samu na kutala kana ba ke ntete moyo.” Yetro zonzaka na Moyize: “Kwenda mbote.”* 19 Na manima Yehova zonzaka na Moyize na bwala ya Madiani: “Kwenda, vutuka na Ezipte, samu ti bantu nyonso yina vanda sosa kufwa nge* me manisa kufwa.”

20 Na yawu Moyize bakaka kento ya yandi mpe bana ya yandi ya babakala. Yandi tulaka bawu na zulu ya mbuluku mpe yandi bakaka nzila samu na kuvutuka na Ezipte. Moyize bakaka mpe yinti ya Nzambi ya tsyeleka na diboko ya yandi. 21 Yehova zonzaka dyaka na Moyize: “Ntangu nge ke vutuka na Ezipte, sala na mantwala ya Faraoni bimangu nyonso yina mu me pesa nge ngolo ya kulungisa. Kasi mu ke bika yandi sala yintu ngolo,* mpe yandi ke bika ve ti dikanda ya munu kwenda. 22 Nge ke zonza na Faraoni faso yayi, ‘Yayi ni mambu yina Yehova me zonza: “Izraele ke mwana ya munu, mwana ya munu ya ntete. 23 Mu ke na zonzaka na nge, bika mwana ya munu kwenda sadila munu. Kana nge manga yandi kwenda, mu ke kufwa mwana ya nge, mwana ya nge ya ntete.”’”

24 Na nzila, ntangu ba vandaka na kisika yina ba lutisaka mpimpa, Yehova kutanaka na yandi mpe vanda sosa kufwa yandi. 25 Na yawu Zipora bakaka ditadi ya meno mpe zengaka mwana ya yandi kibakala. Yandi salaka ti musutu ya yandi kuma na makulu ya yandi* mpe yandi zonzaka: “Ya ke samu ti nge ke bakala ya munu ya menga.” 26 Na yina Nzambi bikaka yandi. Ni samu na mambu ya kuzenga kibakala Zipora zonzaka na ntangu yina, “bakala ya menga.”

27 Yehova zonzaka na Aroni: “Kwenda kutana na Moyize na ntoto ya kuyuma.” Na yawu yandi kwendaka mpe kutanaka na yandi na mongo ya Nzambi ya tsyeleka, mpe yandi pesaka yandi mbote mpe babizu. 28 Moyize zonzaka na Aroni mambu nyonso yina Yehova muntu yina tumisaka yandi zonzaka, mpe bimangu nyonso yina yandi zonzaka na yandi na kusala. 29 Na manima Moyize mpe Aroni kwendaka mpe kutikaka bakuluntu nyonso ya dikanda ya Izraele. 30 Aroni zabisaka bawu bamambu nyonso yina Yehova zonzaka na Moyize, mpe yandi salaka bimangu na meso ya dikanda ya Izraele. 31 Na yina, ba kwikilaka. Ntangu ba kuwaka ti Yehova tulaka dikebi na bantu ya Izraele mpe ti yandi talaka mpasi ya bawu, ba kondamaka mpe ba fukamaka na kutulaka bizizi na ntoto.

5 Na manima Moyize na Aroni kwendaka na sika ya Faraoni mpe ba zonzaka na yandi: “Yayi ni mambu yina Yehova Nzambi ya Izraele me zonza, ‘Bika ti dikanda ya munu kwenda samu ba sadila munu mukembo na ntoto ya kuyuma.’” 2 Kasi Faraoni zonzaka: “Yehova ke nani samu mu tumama na yandi mpe mu bika Izraele kwenda? Mu zaba ata fioti ve Yehova, mpe mu ke bika ve ti bantu ya Izraele kwenda.” 3 Ba zonzaka: “Nzambi ya Baebre me solola na beto. Lemvo, beto zola kusala nzyetolo ya bilumbu tatu na ntoto ya kuyuma mpe kupesa minkayulu na Yehova Nzambi ya beto. Kana beto sala yawu ve, yandi ke kufwa beto na bimbevo to na mbele ya mvita.” 4 Mfumu ya Ezipte vutulaka: “Moyize na Aroni, samu na yinki beno ke na nataka bantu na kubika kisalu ya bawu? Beno vutuka na kisalu!”* 5 Faraoni bwelaka: “Beno tala mutindu bantu yayi me kuma mingi na bwala, mpe beno ke na sosaka ti ba pema na kisalu ya bawu.”

6 Kaka kilumbu yina, Faraoni pesaka musiku yayi na bamfumu ya kisalu mpe na basadisi ya bawu: 7 “Beno me fwana kupesa dyaka ve bantu matiti ya nyanga samu ba sala babrike. Beno bika bawu mosi ba kwenda sosa yawu. 8 Kasi beno fwana kuzonza na bawu na kusala kaka lutangu ya babrike faso ba vanda sala na ntama. Beno kumisa ve yawu fioti samu na bawu, samu ba ke na kumaka na bubolo. Ni na yawu ba ke na dilaka, ‘Beto ke na nsatu ya kukwenda, beto ke na nsatu ya kupesa Nzambi ya beto minkayulu!’ 9 Beno kubisa bisalu ya bawu,* mpe beno sala ti ba vanda na bisalu mingi samu ba teka ve dikebi na bamambu ya luvunu.”

10 Na yawu, bamfumu ya bisalu mpe basadisi ya bawu kwendaka zonza na bantu: “Faraoni me zonza mutindu yayi, ‘Mu ke pesa dyaka ve beno matiti ya nyanga. 11 Beno kwenda sosa beno mosi matiti ya beno ya nyanga, kisika ni kisika yina beno ke kuzwa yawu, kasi ba ke kumisa ata fioti ve kisalu ya beno fioti.’” 12 Na yina, bantu mwanganaka na bwala nyonso ya Ezipte samu na kulokota matiti yina ke bikanaka na bilanga mpe kusadila yawu mutindu matiti ya nyanga. 13 Bamfumu ya kisalu vanda salaka bawu tiya na kuzonzaka: “Mosi na mosi ya beno fwana kumanisa kisalu ya yandi konso kilumbu, kaka faso beno vanda sala yawu ntangu ba vanda pesa beno matiti ya nyanga.” 14 Dyaka, bamfumu ya bisalu vanda bulaka bantu ya Izraele yina ba tulaka mutindu basadisi. Ba yufulaka bawu: “Samu na yinki beno me lungisa ve lutangu ya babrike yina beno vanda lungisa na ntama? Ya salamaka mazono, bubu yayi mpe kaka faso mosi.”

15 Na yawu, bantu ya Izraele yina vandaka basadisi kwendaka yawula na sika ya Faraoni: “Samu na yinki nge ke na salaka bisadi ya nge faso yayi? 16 Ba ke na pesaka ve bisadi ya nge matiti ya nyanga, kasi ba ke na zonzaka na beto, ‘Beno sala babrike!’ Ba ke na bulaka bisadi ya nge, ntyo ni bantu ya nge mosi ke na foti.” 17 Kasi yandi zonzaka: “Beno ke na kumaka na bubolo, beno ke na kumaka na bubolo! Ni na yawu beno ke na zonzaka, ‘Beto ke na nsatu ya kukwenda, beto ke na nsatu ya kupesa Yehova minkayulu.’ 18 Tala, beno vutuka na kisalu! Ba ke pesa ve beno matiti ya nyanga, kasi beno ke sala kaka lutangu ya babrike yina beno vanda sala.”

19 Bantu ya Izraele yina vandaka basadisi kwizaka tala ti ba kumaka na mpasi samu na musiku yayi: “Beno me fwana kukumisa ve fioti lutangu ya babrike yina beno ke salaka na kilumbu.” 20 Ntangu ba katukaka na Faraoni, ba kutanaka na Moyize na Aroni yina vanda vingila bawu. 21 Na mbala mosi ba zonzaka na bawu: “Bika ti Yehova tala mambu yina beno me sala, mpe yandi sambisa beno, samu beno me sala ti Faraoni na bisadi ya yandi yiina beto,* mpe beno me tula mbele ya mvita na maboko ya bawu samu ba kufwa beto.” 22 Na yawu, Moyize balukaka na sika ya Yehova mpe zonzaka: “Yehova, samu na yinki nge me talisa bantu yayi mpasi? Samu na yinki nge me filisa munu awa? 23 Katuka ntangu yina mu kwendaka na sika ya Faraoni samu na kuzonza na nkumbu ya nge, yandi ke na lutilaka dyaka kutalisa dikanda yayi mpasi, mpe nge me vuukisa ata fioti ve dikanda ya nge.”

6 Na yawu Yehova zonzaka na Moyize: “Ntangu yayi nge ke tala mambu yina mu ke sala Faraoni. Diboko ya munu ya ngolo ke nata yandi na kubika bawu ba kwenda, mpe diboko ya munu ya ngolo ke nata yandi na kubingisa bawu na bwala ya yandi.”

2 Na manima Nzambi zonzaka na Moyize: “Mu kele Yehova. 3 Mu vanda talanaka na Abrahami, Izaki, na Yakobi mutindu Nzambi ya Ngolo-Nyonso. Kasi na yina me tadila nkumbu ya munu Yehova, mu saa zabakanaka ve na bawu. 4 Dyaka, mu salaka luwawanu ya munu na bawu samu na kupesa bawu ntoto ya Kanana, kisika yina ba zingaka mutindu banzenza. 5 Ntangu yayi mu me kuwa bidilu ya bantu ya Izraele, yina bantu ya Ezipte me kumisa bangaamba, mpe mu me bambuka moyo na luwawanu ya munu.

6 “Na yawu zonza na bantu ya Izraele mutindu yayi: ‘Mu kele Yehova, mpe mu ke katula beno na bisalu ya mpasi yina bantu ya Ezipte ke na pesaka beno. Mu ke vuukisa beno na bungaamba yina ba me kotisa beno, mpe mu ke kuula beno na nzila ya diboko ya munu ya ngolo mpe ya balusambusu ya nene. 7 Mu ke baka beno mutindu bantu ya munu mpe mu ke vanda Nzambi ya beno, mpe ya tsyeleka beno ke zaba ti mu ke Yehova, Nzambi ya beno, yina ke na basisaka beno na kati ya bisalu ya mpasi ya Ezipte. 8 Mu ke kotisa beno na ntoto yina mu zengaka ndefi* ti mu ke pesa na Abrahami, Izaki na Yakobi, mpe mu ke pesa beno yawu samu ya vanda ya beno. Mu kele Yehova.’”

9 Na manima Moyize pesaka bantu ya Izraele nsangu yayi, kasi ba kuwaka ve yandi samu ba lembaka mpe samu bungaamba ya bawu vandaka ngolo.

10 Na yawu Yehova zonzaka na Moyize: 11 “Kwenda tala Faraoni mfumu ya Ezipte mpe zonza na yandi ti yandi me fwana kubika bantu ya Izraele basika na bwala ya yandi.” 12 Kasi Moyize zonzaka na Yehova: “Bantu ya Izraele me kuwa ve munu. Na yawu, wapi mutindu Faraoni ke kuwa munu, munu yina zaba ve kuzonza?” 13 Kasi Yehova zabisaka dyaka Moyize na Aroni misiku yina ba zola pesa na bantu ya Izraele mpe na Faraoni, mfumu ya Ezipte, samu na kubasisa bantu ya Izraele na bwala ya Ezipte.

14 Yayi ni bankumbu ya bamfumu ya makanda:* Bana* ya Rubeni, mwana ya ntete ya Izraele: Anoke, Palu, Ezerone na Karmi. Yayi ni makanda yina butukaka na Rubeni.

15 Bana ya Simeyone: Yemuele, Yamine, Owade, Yakine, Zoware, mpe Shawule, yina vandaka mwana ya kento mosi ya Kanana. Yayi ni makanda yina butukaka na Simeyone.

16 Yayi ni bankumbu ya bana ya Levi na kulandaka makanda yina butukaka na bawu: Gershone, Keyate na Merari. Levi zingaka bamvula 137.

17 Bana ya Gershone: Libni na Shimeyi, na kulandaka makanda ya bawu.

18 Bana ya Keyate: Amirame, Izare, Ebroni, na Uziele. Keyate zingaka bamvula 133.

19 Bana ya Merari: Mali na Mushi.

Yayi ni makanda ya Balevi, na kulandaka makanda yina butukaka na bawu.

20 Amirame kwelaka Yokebede, kibusi ya tata ya yandi. Yokebede butilaka yandi Aroni na Moyize. Amirame zingaka bamvula 137.

21 Bana ya Izare: Kora, Nefege, na Zikri.

22 Bana ya Uziele: Mishaele, Elizafane, na Sitiri.

23 Aroni kwelaka Elisheba, mwana ya Aminadabe, kibusi ya Nashone. Elisheba butilaka yandi Nadabi, Abiwu, Eleyazare, na Itamare.

24 Bana ya Kora: Asire, Elkana, na Abiasafe. Yayi ni makanda ya Bakorahite.

25 Eleyazare mwana ya Aroni kwelaka mosi ya bana ya Putiele. Yandi butilaka yandi Fineyase.

Yayi ni bamfumu ya makanda ya batata ya Balevi, na kulandaka makanda ya bawu.

26 Ni na Aroni na Moyize yayi, Yehova zonzaka: “Beno basisa bantu ya Izraele na bwala ya Ezipte, kikunku na kikunku.”* 27 Ni bawu, Moyize na Aroni, zonzaka na Faraoni mfumu ya Ezipte na kubasisa bantu ya Izraele na bwala ya Ezipte.

28 Kilumbu yina Yehova zonzaka na Moyize na bwala ya Ezipte, 29 Yehova zonzaka na yandi: “Mu kele Yehova. Zabisa Faraoni, mfumu ya Ezipte bamambu nyonso yina mu ke na zonzaka na nge.” 30 Na yawu Moyize zonzaka na Yehova: “Mu zaba ve kuzonza, wapi mutindu Faraoni ke kuwa munu?”

7 Na manima Yehova zonzaka na Moyize: “Tala, mu me kumisa nge mutindu Nzambi* samu na Faraoni, mpe yaya ya nge Aroni ke kuma mbikudi ya nge. 2 Nge fwana kuzonza mambu nyonso yina mu ke tumisa nge na kuzonza. Yaya ya nge Aroni ke zonza na mantwala ya Faraoni, mpe yandi ke bika bantu ya Izraele basika na bwala ya yandi. 3 Kasi munu, mu ke bika Faraoni sala yintu ngolo,* mpe mu ke sala bidimbu mingi mpe bimangu mingi na ntoto ya Ezipte. 4 Kasi Faraoni ke kuwa ve beno. Mu ke tamba diboko ya munu na zulu ya Ezipte, mpe mu ke basisa bimvuka ya nene* ya bantu ya munu, bantu ya Izraele, na bwala ya Ezipte na nzila ya balusambusu ya nene. 5 Na yawu, bantu ya Ezipte ke zaba ya tsyeleka ti mu kele Yehova, ntangu mu ke tamba diboko ya munu samu na kusemba Ezipte, mpe mu ke basisa bantu ya Izraele na kati-kati ya bawu.” 6 Moyize na Aroni salaka mambu yina Yehova tumisaka bawu na kusala. Ni mutindu yina ba salaka. 7 Moyize vandaka na bamvula 80 mpe Aroni na bamvula 83 ntangu ba kwendaka zonza na Faraoni.

8 Na manima Yehova zonzaka na Moyize mpe Aroni: 9 “Kana Faraoni zonza na beno, ‘Beno sala kimangu mosi,’ nge fwana kuzonza na Aroni, ‘Baka yinti ya nge mpe losa yawu na mantwala ya Faraoni.’ Ya ke kuma nyoka ya nene.” 10 Na yawu Moyize na Aroni kotaka na sika ya Faraoni, mpe ba salaka kaka mutindu Yehova tumisaka bawu. Aroni losaka yinti ya yandi na mantwala ya Faraoni mpe bisadi ya yandi, mpe ya kumaka nyoka ya nene. 11 Kasi Faraoni bokilaka bantu ya mayela mpe banganga. Mpe banganga-nzambi ya Ezipte yina ke salaka maji sadilaka mpe maji ya bawu samu na kusala mambu ya mutindu mosi. 12 Mosi na mosi ya bawu losaka yinti ya yandi, mpe ya kumaka banyoka ya nene. Kasi yinti ya Aroni minaka bayinti ya bawu. 13 Ata faso yina, Faraoni salaka yintu ngolo, mpe yandi kuwaka ve bawu, kaka mutindu Yehova zonzaka yawu.

14 Na yawu Yehova zonzaka na Moyize: “Faraoni ke na ntima ngolo.* Yandi me manga kubika dikanda* kwenda. 15 Kwenda tala Faraoni mbasi na suka. Yandi ke vanda na nzila samu na kukwenda na maza. Nge fwana kutelama na lweka ya Nzadi ya Nile samu na kubwabana yandi. Baka na diboko ya nge yinti yina kumaka nyoka. 16 Nge fwana kuzonza na yandi, ‘Yehova Nzambi ya Baebre me filisa munu na sika ya nge, mpe yandi me zonza: “Bika dikanda ya munu, ba kwenda sadila munu na ntoto ya kuyuma.” Kasi tii awa nge ke na kuwaka ve. 17 Yayi ni mambu yina Yehova me zonza: “Ni na mambu yayi nge ke zaba ti mu ke Yehova. Mu ke bula maza ya Nzadi ya Nile na yinti yayi ke na diboko ya munu, mpe ya ke kuma menga. 18 Bambisi yina ke na Nzadi ya Nile ke kufwa, mpe Nzadi ya Nile ke basika nsunga, mpe bantu ya Ezipte ke lenda ata fioti ve kunwa maza ya Nile.”’”

19 Na manima Yehova zonzaka na Moyize: “Zonza na Aroni, ‘Baka yinti ya nge mpe tamba diboko ya nge na zulu ya bamaza ya Ezipte, na zulu ya bamwila ya yawu, na zulu ya banzila ya maza yina ba fungulaka,* na zulu ya badyanga ya yawu, mpe na zulu ya bisika nyonso yina ba ke bumbaka maza, samu ya kuma menga.’ Ya ke vanda na menga na bwala nyonso ya Ezipte, tii na kati ya bima ya mabaya mpe ya matadi yina ba ke bumbaka maza.” 20 Na mbala mosi Moyize na Aroni salaka kaka mutindu Yehova tumisaka bawu. Aroni nangunaka yinti mpe bulaka yawu na maza ya Nile, na meso ya Faraoni mpe bisadi ya yandi, mpe maza nyonso ya nzadi kumaka menga. 21 Na yawu, bambisi yina vandaka na nzadi kufwaka, nzadi bandaka kubasika nsunga, mpe bantu ya Ezipte vanda lenda ve kunwa maza ya Nile, mpe menga vandaka na bwala nyonso ya Ezipte.

22 Kasi banganga-nzambi ya Ezipte yina ke salaka maji sadilaka bansalulu ya bawu ya mpimpa samu na kusala mambu ya mutindu mosi. Na yawu Faraoni vanda sala kaka yintu ngolo, mpe yandi kuwaka ve bawu, kaka mutindu Yehova zonzaka yawu. 23 Na yina Faraoni vutukaka na yinzo ya yandi, mpe yandi tekaka ve dikebi na mambu yango. 24 Na yawu, bantu nyonso ya Ezipte vanda timuna mabulu pene-pene na Nile samu na kuzwa maza ya kunwa, samu ba vanda lenda ve kunwa maza ya Nile. 25 Bilumbu 7 ya muvimba lutaka katuka ntangu yina Yehova balulaka maza ya Nzadi ya Nile na menga.*

8 Na manima Yehova zonzaka na Moyize: “Kwenda na sika ya Faraoni mpe zonza na yandi, ‘Yayi ni mambu yina Yehova me zonza: “Bika dikanda ya munu, ba kwenda sadila munu. 2 Kana nge manga kaka kubika ba kwenda, mu ke fulusa bwala ya nge na batsyula. 3 Nzadi ya Nile ke fuluka na batsyula. Ba ke basika na Nile mpe ba ke kota na yinzo ya nge, na shambre ya nge, na zulu ya mfulu ya nge, na bayinzo ya bisadi ya nge mpe ya bantu ya nge, na bafure ya nge, mpe na kati ya banzungu ya nge ya kubudila pate. 4 Batsyula ke kwiza na zulu ya nge, na zulu ya bantu ya nge, mpe na zulu ya bisadi ya nge nyonso.”’”

5 Na manima Yehova zonzaka na Moyize: “Zonza na Aroni, ‘Baka yinti ya nge mpe tamba yawu na zulu ya bamwila, ya banzila ya maza ya Nile yina ba fungulaka, mpe ya badyanga, mpe basisa batsyula samu ba fulusa bwala ya Ezipte.’” 6 Na yawu, Aroni tambaka diboko ya yandi na zulu ya bamaza ya Ezipte, mpe batsyula bandaka kubasika mpe kufulusa bwala ya Ezipte. 7 Kasi banganga-nzambi yina ke salaka maji sadilaka bansalulu ya bawu ya mpimpa samu na kusala mambu ya faso mosi. Bawu mpe basisaka batsyula na bwala ya Ezipte. 8 Na yawu, Faraoni bokilaka Moyize na Aroni mpe zonzaka na bawu: “Beno bondila Yehova samu yandi katula batsyula na zulu ya munu mpe bantu ya munu, samu mu zola kubika dikanda ya beno kwenda pesa Yehova minkayulu.” 9 Na yawu, Moyize zonzaka na Faraoni: “Ni nge me fwana kuzonzila munu na wapi ntangu mu me fwana kubondila Nzambi samu yandi katula batsyula na zulu ya nge, ya bisadi ya nge, ya bantu ya nge, mpe ya bayinzo ya nge. Batsyula ke bikana kaka na Nzadi ya Nile.” 10 Yandi vutulaka: “Mbasi.” Na yawu Moyize zonzaka na yandi: “Ya ke salama mutindu nge me zonza, samu nge kwiza zaba ti ya ke ve na muntu mutindu Yehova Nzambi ya beto. 11 Batsyula ke katuka na zulu ya nge, ya bayinzo ya nge, ya bisadi ya nge, mpe ya bantu ya nge. Ya ke bikana kaka na Nile.”

12 Na yawu Moyize na Aroni katukaka na mantwala ya Faraoni, mpe Moyize bondilaka Yehova samu na batsyula yina yandi* filisaka na sika ya Faraoni. 13 Na yina, Yehova salaka mutindu Moyize lombaka, mpe batsyula bandaka kufwa na kati ya bayinzo, na balupangu mpe na bilanga. 14 Ba vanda kutika yawu na bikunku mingi, mpe bwala bandaka kubasika nsunga. 15 Ntangu Faraoni talaka ti bamambu vanda me bonga, yandi kubisaka ntima ya yandi,* mpe mangaka kuwa Moyize na Aroni, kaka mutindu Yehova zonzaka yawu.

16 Na yawu Yehova zonzaka na Moyize: “Zonza na Aroni, ‘Nanguna yinti ya nge mpe bula fundu-fundu ya ntoto, mpe ya ke kuma bangungu na bwala nyonso ya Ezipte.’” 17 Ba tumamaka. Aroni nangunaka yinti ya yandi mpe bulaka fundu-fundu ya ntoto, mpe bangungu kwizaka na zulu ya bantu mpe bibulu. Fundu-fundu nyonso ya ntoto kumaka bangungu na bwala nyonso ya Ezipte. 18 Banganga-nzambi yina ke salaka maji mekaka mpe kusala yawu, mpe kubasisa bangungu na nzila ya bansalulu ya bawu ya mpimpa, kasi ba lembanaka. Bangungu vandaka kaka na zulu ya bantu mpe bibulu. 19 Na yawu banganga-nzambi yina ke salaka maji zonzaka na Faraoni: “Ya ke musapi ya Nzambi!” Kasi Faraoni vanda bika ve kusala yintu ngolo,* mpe yandi kuwaka ve bawu, kaka mutindu Yehova zonzaka yawu.

20 Na manima Yehova zonzaka na Moyize: “Telama na suka-suka mpe kwenda na mantwala ya Faraoni. Yandi ke vanda na nzila samu na kukwenda na maza. Nge fwana zonza na yandi, ‘Yayi ni mambu yina Yehova me zonza: “Bika dikanda ya munu, ba kwenda sadila munu. 21 Kasi, kana nge manga kubika dikanda ya munu kwenda, mu ke filisa banzinzi yina ke tatikaka na zulu ya nge, na zulu ya bisadi ya nge, na zulu ya bantu ya nge, mpe na kati ya bayinzo ya nge. Bayinzo ya Ezipte ke fuluka na banzinzi yango, mpe ntoto yina ba* ke dyatilaka ke fuluka na yawu. 22 Na kilumbu yango, mu ke bumba ntoto ya Goshene, kisika yina dikanda ya munu ke na zingaka. Banzinzi yango ke vanda ve kuna, mpe na mambu yayi nge ke zaba ti munu Yehova, mu kele awa na kati ya bwala. 23 Mu ke sala luswaswanu na kati ya bantu ya munu na ya nge. Kidimbu yayi ke talana mbasi.”’”

24 Yehova salaka mutindu yina, mpe bikunku ya nene ya banzinzi yina ke tatikaka kotaka na yinzo ya Faraoni, na bayinzo ya bisadi ya yandi mpe na bwala nyonso ya Ezipte. Banzinzi yayi bebisaka bwala nyonso. 25 Nsuka-nsuka, Faraoni bokilaka Moyize na Aroni mpe zonzaka: “Beno kwenda pesa Nzambi ya beno minkayulu, kasi beno sala yawu kaka awa, na kati ya bwala.” 26 Kasi Moyize vutulaka: “Ya ke simba ve, samu minkayulu yina beto ke pesa na Yehova Nzambi ya beto ke nganzi samu na bantu ya Ezipte. Kana bantu ya Ezipte tala beto kupesa minkayulu yina ke nganzi na meso ya bawu, ba ke bula ve beto matadi? 27 Beto ke sala nzyetolo ya bilumbu tatu na ntoto ya kuyuma, mpe kuna beto ke pesa Yehova Nzambi ya beto minkayulu, kaka mutindu yandi zonzaka na beto.”

28 Faraoni zonzaka: “Mu ke bika beno kwenda pesa minkayulu na Yehova Nzambi ya beno na ntoto ya kuyuma, kasi beno kwenda ve ntama mingi. Beno bondila Nzambi ya beno samu na munu.” 29 Na yawu, Moyize vutulaka: “Awa, mu me bika nge. Mu ke bondila Yehova mpe mbasi banzinzi ke katuka na zulu ya Faraoni, ya bisadi ya yandi mpe ya bantu ya yandi. Kasi Faraoni me fwana kusakanina* dyaka ve beto na faso yandi ke na mangaka kubika dikanda ya beto kwenda pesa minkayulu na Yehova.” 30 Moyize katukaka na mantwala ya Faraoni mpe bondilaka Yehova. 31 Na yawu Yehova salaka mutindu Moyize lombaka. Banzinzi bikaka Faraoni, bisadi ya yandi mpe bantu ya yandi. Ata mosi bikanaka. 32 Kasi mbala yayi mpe, Faraoni kubisaka dyaka ntima ya yandi, mpe yandi bikaka ve ti dikanda ya Izraele kwenda.

9 Na yawu Yehova zonzaka na Moyize: “Kwenda na sika ya Faraoni mpe zonza na yandi, ‘Yayi ni mambu yina Yehova Nzambi ya Baebre me zonza: “Bika dikanda ya munu, ba kwenda sadila munu. 2 Kasi, kana nge manga kubika ba kwenda, mpe nge tatamana kukanga bawu, 3 kuwa, diboko ya Yehova ke bula bibulu ya nge yina ke na bilanga. Kimbevo ya ngolo ke kuzwa bampunda,* bambuluku,* bashamo, bangombe mpe mameme. 4 Ya tsyeleka Yehova ke sala luswaswanu na kati ya bibulu ya bantu ya Izraele mpe bibulu ya bantu ya Ezipte, mpe ata kibulu mosi ya bantu ya Izraele ke kufwa.”’” 5 Dyaka, Yehova tulaka ntangu yina ya ke salama. Yandi zonzaka: “Mbasi Yehova ke sala mambu yayi na bwala.”

6 Kaka kilumbu yina landaka, Yehova salaka yawu. Bibulu ya mutindu nyonso ya Ezipte bandaka kufwa, kasi ata kibulu mosi ya Izraele kufwaka. 7 Ntangu Faraoni yufulaka bansangu, ba zonzaka na yandi ti ata kibulu mosi ya bantu ya Izraele kufwaka. Ata faso yina, Faraoni bikaka ve kusala yintu ngolo, mpe yandi bikaka ve ti dikanda kwenda.

8 Na manima, Yehova zonzaka na Moyize mpe Aroni: “Beno fulusa maboko ya beno na bombi ya fure, mpe Moyize me fwana kumwangisa yawu na zulu, na mantwala ya Faraoni. 9 Ya ke baluka fundu-fundu na bwala nyonso ya Ezipte, mpe ya ke kuma babibon* yina ke basisaka mafinya na zulu ya bantu mpe bibulu nyonso ya Ezipte.”

10 Na yawu ba bakaka fundu-fundu ya fure, mpe ba kwendaka na mantwala ya Faraoni. Moyize mwangisaka yawu na zulu mpe ya kumaka babibon* yina ke basisaka mafinya na zulu ya bantu mpe bibulu. 11 Banganga-nzambi yina ke salaka maji vanda lenda ve kuvanda na mantwala ya Moyize samu na babibon,* samu babibon basikaka bawu mpe bantu nyonso ya Ezipte. 12 Kasi Yehova bikaka Faraoni sala yintu ngolo,* mpe yandi kuwaka ve bawu kaka mutindu Yehova zonzaka na Moyize.

13 Na manima Yehova zonzaka na Moyize: “Telama na suka-suka mpe kwenda na mantwala ya Faraoni. Zonza na yandi, ‘Yayi ni mambu yina Yehova Nzambi ya Baebre me zonza: “Bika dikanda ya munu, ba kwenda sadila munu. 14 Ya tsyeleka, mbala yayi, mu ke basisa makofi ya munu nyonso samu na kubula ntima ya nge, bisadi ya nge mpe bantu ya nge. Na yawu, nge ke zaba ti ya ke ve na muntu mutindu munu na ntoto nyonso. 15 Ntembe ve, kana mu sadilaka diboko ya munu samu na kubula nge na bantu ya nge na kimbevo ya ngolo, nge zola zimbana* na ntoto. 16 Kasi mu me bika nge na luzingu samu na kulakisa nge ngolo ya munu mpe samu ba zonzila nkumbu ya munu na ntoto nyonso. 17 Ata faso yina, nge ke kaka na salaka lunangu mpe nge ke na teleminaka dikanda ya munu na yina nge ke na bikaka ve ba kwenda. 18 Na yawu mbasi, na ngunga yayi, mu ke nokisa mvula ya nene ya matadi, mvula yina me nokaka ntete ve na Ezipte katuka kubanda ya yawu tii bubu yayi. 19 Yawu yina, filisa bantu, ba kwenda bumba bibulu ya nge nyonso mpe bima ya nge nyonso yina ke na bilanga. Muntu nyonso mpe kibulu nyonso yina ke vanda na bilanga mpe yina ke vanda ve na kati ya yinzo ke kufwa ntangu mvula ya matadi ke bwidila yandi.”’”

20 Bisadi ya Faraoni yina talaka ti mambu yina Yehova zonzaka vandaka mfunu, kotisaka na mbangu bisadi ya bawu mpe bibulu ya bawu na kati ya bayinzo. 21 Kasi ba yina tulaka ve mambu ya Yehova na ntima bikaka bisadi ya bawu mpe bibulu ya bawu na bilanga.

22 Na manima Yehova zonzaka na Moyize: “Nanguna diboko ya nge na zulu samu mvula ya matadi noka na zulu ya bwala nyonso ya Ezipte, na zulu ya bantu, bibulu, mpe matiti nyonso ya bilanga ya Ezipte.” 23 Na yawu, Moyize nangunaka yinti ya yandi na zulu mpe Yehova filisaka kidumu* mpe mvula ya matadi. Tiya* kubwaka na zulu ya ntoto, mpe Yehova vanda sala ti mvula ya matadi bika ve kunoka na bwala ya Ezipte. 24 Mvula ya matadi vanda noka, mpe na kati-kati ya yawu, tiya vanda basika. Ya vandaka ngolo mingi. Mvula ya mutindu yayi vandaka nabunu ya noka banda ntangu yina Ezipte kumaka bwala. 25 Ya bebisaka nyonso yina vandaka na bilanga na bwala nyonso ya Ezipte. Mvula ya matadi yango bebisaka matiti nyonso mpe ya mwangisaka bayinti nyonso ya bilanga. 26 Kaka ni na Goshene, kisika yina bantu ya Izraele vandaka, mvula ya matadi nokaka ve.

27 Na yawu Faraoni bokilaka Moyize na Aroni, mpe yandi zonzaka na bawu: “Mbala yayi, mu me sumuka. Yehova me sala mambu ya kulunga,* mpe munu na bantu ya munu, beto me sala yimbi. 28 Beno bondila Yehova samu kidumu mpe mvula ya matadi manisa. Na manima mu ke bika beno kwenda, mpe beno ke vanda dyaka ve awa.” 29 Na yawu Moyize zonzaka na yandi: “Ntangu mu ke basika na mbanza, mu ke nanguna maboko ya munu na mantwala ya Yehova. Kidumu ke manisa, mpe mvula ya matadi ke noka dyaka ve. Na yawu, nge ke zaba ti ntoto kele ya Yehova. 30 Kasi mu zaba ti, ata na ntangu yina, nge na bisadi ya nge, beno ke vanda ve na boma ya Yehova Nzambi.”

31 Ntyo matiti ya lino mpe ya orze bebaka, samu orze yelaka, mpe lino basisaka bafololo. 32 Kasi ble na ble ya mpusu ya ngolo bebaka ve, samu ya ke basisaka ve bambuma na mbangu.* 33 Moyize basikaka na sika ya Faraoni mpe na mbanza. Yandi nangunaka maboko na mantwala ya Yehova, mpe kidumu na mvula ya matadi manisaka, mpe mvula bikaka kunoka. 34 Ntangu Faraoni talaka ti mvula, na mvula ya matadi mpe kidumu manisaka, yandi salaka dyaka disumu mpe kubisaka ntima, yandi mpe bisadi ya yandi. 35 Faraoni vanda sala kaka yintu ngolo, mpe yandi bikaka ve ti bantu ya Izraele kwenda, kaka mutindu Yehova zonzaka yawu na nzila ya Moyize.

10 Na yawu Yehova zonzaka na Moyize: “Kwenda na sika ya Faraoni, samu mu me bika ti ntima ya yandi mpe bantima ya bisadi ya yandi kuma ngolo, samu mu sala bidimbu ya munu na mantwala ya yandi, 2 mpe samu nge zabisa bana ya nge mpe mitekolo ya nge mpasi yina mu talisaka Ezipte, mpe bidimbu yina mu salaka na kati ya bawu; mpe ya tsyeleka, beno ke zaba ti mu kele Yehova.”

3 Na yawu Moyize na Aroni kwendaka na sika ya Faraoni mpe zonzaka na yandi: “Yayi ni mambu yina Yehova Nzambi ya Baebre me zonza, ‘Tii wapi ntangu nge ke manga kutumama na munu? Bika dikanda ya munu, ba kwenda sadila munu. 4 Kana nge manga kaka kubika dikanda ya munu ba kwenda, mbasi mu ke filisa makonko na bwala ya nge. 5 Ba ke fuluka tii na ntoto ya bwala mpe ntoto ke talana dyaka ve. Ba ke kudya bima yina mvula ya matadi bebisaka ve, bima yina mvula yango bikilaka beno. Ba ke kudya bayinti ya beno nyonso yina ke kulaka na bilanga. 6 Ba ke fulusa bayinzo ya nge, bayinzo ya bisadi ya nge nyonso, mpe bayinzo nyonso ya Ezipte. Batata na bankooko ya beno me talaka ve ntete mambu ya mutindu yayi banda ntangu yina ba ke na bwala yayi tii bubu yayi.’” Ntangu yandi manisaka kuzonza, yandi balukaka mpe basikaka na yinzo ya Faraoni.

7 Bisadi ya Faraoni zonzaka na yandi: “Tii wapi ntangu muntu yayi ke bika ve kukwamisa beto?* Bika ba kwenda sadila Yehova Nzambi ya bawu. Tii ntangu yayi nge ke na talaka ve ti Ezipte me kufwa?” 8 Na yawu ba zonzaka na Moyize na Aroni na kuvutuka na sika ya Faraoni. Yandi zonzaka na bawu: “Beno kwenda sadila Yehova Nzambi ya beno. Kasi banani ke kwenda?” 9 Moyize vutulaka: “Beto ke kwenda na bantwenya ya beto, biboba ya beto, bana ya beto ya babakala, bana ya beto ya bakento, mameme ya beto, mpe bangombe ya beto, samu ti beto ke sadila Yehova mukembo.” 10 Yandi zonzaka na bawu: “Kana mu ndima kubika beno beno kwenda na bana ya beno, ya tsyeleka Yehova ke na beno. Faso mu ke na talaka beno, beno ke na sosaka kusala mambu ya yimbi. 11 Ve! Kaka babakala lenda kwenda kusadila Yehova, mpamba ve ni yawu beno lombaka.” Na yawu ba bingisaka bawu na mantwala ya Faraoni.

12 Na manima Yehova zonzaka na Moyize: “Tamba diboko ya nge na zulu ya Ezipte samu na kubokila makonko, ba kwiza na bwala mpe ba kudya matiti nyonso ya bwala, nyonso yina mvula ya matadi bikaka.” 13 Na mbala mosi Moyize tambaka yinti ya yandi na zulu ya Ezipte, mpe Yehova salaka ti mupepe ya esti fula na bwala kilumbu yango ya muvimba mpe mpimpa ya muvimba. Ntangu suka kumaka, mupepe ya esti nataka makonko. 14 Makonko kwizaka na Ezipte nyonso, mpe ya vandaka na bisika nyonso ya bwala. Ya vandaka mpasi mingi. Makonko mingi ya faso yayi vandaka nabunu ya talana, mpe ya ke talana dyaka ve. 15 Ba fulusaka bwala nyonso, mpe ba kumisaka bwala mpimpa. Ba manisaka matiti nyonso ya bwala mpe bambuma nyonso ya bayinti yina mvula ya matadi bikaka. Ata dikasa mosi ya mubisu bikanaka na zulu ya bayinti to na matiti ya bilanga ya bwala nyonso ya Ezipte.

16 Na yawu Faraoni bokilaka mbangu-mbangu Moyize na Aroni mpe zonzaka: “Mu me sala disumu na ntadisi ya Yehova Nzambi ya beno mpe na ntadisi ya beno. 17 Mulemvo, beno lemvokila disumu ya munu mbala yayi, mpe beno bondila Yehova Nzambi ya beno samu yandi katula kwandi mpasi ya lufwa yayi na zulu ya munu.” 18 Na yawu yandi* basikaka na yinzo ya Faraoni mpe bondilaka Yehova. 19 Yehova balulaka mupepe, mpe ya kumaka mupepe ya ngolo ya westi. Ya nataka makonko ntama mpe losaka yawu na Mubu ya Mbwaki. Ata dikonko mosi bikanaka na bwala nyonso ya Ezipte. 20 Kasi Yehova bikaka ti Faraoni sala yintu ngolo, mpe Faraoni bikaka ve ti bantu ya Izraele kwenda.

21 Na manima Yehova zonzaka na Moyize: “Nanguna diboko ya nge na zulu samu bwala ya Ezipte kuma na kati ya kitombi, kitombi mosi ya ngolo mingi.” 22 Na mbala mosi Moyize nangunaka diboko ya yandi na zulu, mpe bwala nyonso ya Ezipte kumaka na kati ya kitombi mosi ya ngolo na kati ya bilumbu tatu. 23 Ba vanda lenda ve kutala bampangi, mpe ata muntu na kati ya bawu bikaka yinzo ya yandi na kati ya bilumbu tatu. Kasi bantu nyonso ya Izraele vandaka na nsemo bisika yina ba vanda vandaka. 24 Na yawu Faraoni bokilaka Moyize mpe zonzaka na yandi: “Beno kwenda sadila Yehova. Kaka mameme ya beno mpe bangombe ya beno ke bikana awa. Beno lenda kwenda ya beno na bana ya beno.” 25 Kasi Moyize vutulaka: “Ni nge mosi muntu ke pesa beto* minkayulu mpe makabu ya kuyoka, mpe beto ke pesa yawu na Yehova Nzambi ya beto. 26 Beto ke kwenda na bibulu ya beto. Ata kibulu mosi* ke bikana, samu ti beto ke sadila bibulu ya nkaka samu na kusambila Yehova Nzambi ya beto. Ni ntangu beto ke kuma kuna beto ke zaba wapi bibulu beto ke pesa samu na kusambila Yehova.” 27 Na yawu, Yehova bikaka ti Faraoni sala yintu ngolo, mpe Faraoni ndimaka ve ti ba kwenda. 28 Faraoni zonzaka na yandi: “Zimbana na meso ya munu! Kumeka dyaka ve kusosa kutala kizizi ya munu, samu ti kilumbu yina nge ke tala dyaka kizizi ya munu, nge ke kufwa.” 29 Na yina Moyize zonzaka: “Mambu ve, mu ke sosa dyaka ve kutala kizizi ya nge.”

11 Na manima Yehova zonzaka na Moyize: “Mu ke nata dyaka mpasi ya nkaka na zulu ya Faraoni mpe na zulu ya Ezipte. Na manima ya yawu, yandi ke bika beno kwenda. Ntangu yandi ke bika beno kwenda, ya tsyeleka yandi ke bingisa beno awa. 2 Ntangu yayi, zonza na bantu ya Izraele: ‘Babakala mpe bakento nyonso me fwana kulomba na bantu yina ke vandaka pene-pene na bawu bima yina ba yidikaka na arza mpe wolo.’” 3 Mpe Yehova salaka ti bantu ya Ezipte lakisa bantu ya Izraele bumbote. Dyaka, na bwala ya Ezipte, Moyize yandi mosi kumaka muntu yina ba vanda zitisa mingi, ya vanda bisadi ya Faraoni to bantu.

4 Moyize zonzaka: “Yayi ni mambu yina Yehova me zonza, ‘Pene-pene na kati-kati ya mpimpa, mu ke luta na kati ya Ezipte, 5 mpe bana nyonso ya ntete ya bwala ya Ezipte ke kufwa, kubanda na mwana ya ntete ya Faraoni yina ke vandaka na kiti ya kimfumu tii na mwana ya ntete ya kisadi ya kento yina ke salaka na kinikunu ya bambuma, mpe bana nyonso ya ntete ya bibulu. 6 Bidilu ya ngolo ke wakana na bwala nyonso ya Ezipte, bidilu mosi yina nabunu ya wakana, mpe ya ke saa wakana dyaka ata fioti ve. 7 Kasi ata yimbwa mosi ke lola* samu na bantu ya Izraele to samu na bibulu ya bawu. Na yawu, beno ke zaba ti Yehova lenda sala luswaswanu na kati ya bantu ya Ezipte mpe bantu ya Izraele.’ 8 Bisadi ya nge nyonso ke kulumuka na sika ya munu mpe ke fukama na mantwala ya munu. Ba ke zonza, ‘Kwenda, nge na bantu nyonso yina ke na manima ya nge.’ Na yawu mu ke kwenda.” Na manima, Moyize basikaka na yinzo ya Faraoni, na nkele ya kulutila.

9 Na yawu Yehova zonzaka na Moyize: “Faraoni ke kuwa ve beno, samu bimangu ya munu kuma mingi na bwala ya Ezipte.” 10 Moyize na Aroni salaka bimangu nyonso yayi na mantwala ya Faraoni. Kasi Yehova bikaka ti Faraoni sala yintu ngolo.* Na yawu yandi bikaka ve ti bantu ya Izraele bika bwala ya yandi.

12 Na yawu Yehova zonzaka na Moyize mpe Aroni na bwala ya Ezipte: 2 “Ngonda yayi ke vanda kubanda ya bangonda samu na beno. Ya ke vanda ngonda ya ntete ya mvula samu na beno. 3 Zonza na kimvuka nyonso ya bantu ya Izraele, ‘Na kilumbu ya 10 ya ngonda yayi, muntu na muntu me fwana kubaka dimeme samu na dikanda ya yandi, dimeme mosi samu na konso dikanda. 4 Kasi kana bantu ya dikanda ke fioti samu na kumanisa dimeme mosi, ba* me fwana kukabula yawu na yinzo ya bawu na ba* yina ke vandaka pene-pene na bawu,* na kulandaka lutangu ya bantu.* Ntangu beno ke tala lutangu ya bantu, beno fwana kuzaba bantu yikwa dimeme mosi lenda lungila. 5 Dimeme fwana kuvanda ya bakala, yina ke na mvula mosi mpe yina ke ve na kimbevo.* Beno lenda soola yawu na kati ya bana ya mameme to ya bankombo. 6 Beno fwana keba yawu tii na kilumbu ya 14 ya ngonda yayi, mpe bantu nyonso ya kimvuka ya Izraele me fwana kufwa yawu na nkokila, tekila ntangu kota.* 7 Ba fwana kubaka ndambu ya menga mpe kupakula yawu na makunzi zole ya mwelo mpe na dibaya na zulu ya mwelo ya bayinzo yina ba ke kudya yawu.

8 “‘Ba fwana kudya musuni na mpimpa yayi. Ba fwana kuyoka yawu na tiya mpe kudya yawu na mampa yina ke ve na levire mpe bandunda ya ndudi. 9 Beno kudya ve kitini ya yawu ya nkunzu to ya kutokisa, kasi beno yoka yawu na tiya, yintu ya yawu na makulu ya yawu mpe bima ya yawu ya kati. 10 Beno fwana kulalisa ve kitini mosi ya yawu tii na suka, kasi bitini yina ke bikana tii na suka, beno fwana kunyengisa yawu na tiya. 11 Beno fwana kudya yawu mutindu yayi: singa ya kukangama na luketo,* mapapa na makulu mpe yinti na diboko. Beno fwana kudya yawu mbangu-mbangu. Ya ke Pake ya Yehova. 12 Mu ke luta na bwala ya Ezipte na mpimpa yina, mpe mu ke kufwa bana nyonso ya ntete ya bwala ya Ezipte, kubanda na bantu tii na bibulu. Mu ke pesa kitumbu na banzambi nyonso ya Ezipte. Mu kele Yehova. 13 Menga ke vanda kidimbu na zulu ya bayinzo yina beno ke vandaka. Mu ke tala menga mpe mu ke luta na zulu ya beno, mpe mpasi ke kwiza ve na zulu ya beno samu na kufwa beno ntangu mu ke bula bwala ya Ezipte.

14 “‘Kilumbu yina, ke vanda samu na beno kilumbu ya kubambuka moyo, mpe beno na bana ya beno fwana kusala yawu bamvula nyonso mutindu mukembo samu na Yehova. Ya ke musiku ya bantangu nyonso. 15 Na kati ya bilumbu 7, beno ke kudya mampa yina ke ve na levire. Na kilumbu ya ntete, beno fwana kukatula levire na bayinzo ya beno, samu ti muntu nyonso yina ke kudya bima yina ke na levire kubanda na kilumbu ya ntete tii na kilumbu ya 7, ba fwana kukatula* muntu* yango na dikanda ya Izraele. 16 Kilumbu ya ntete, beno ke sala lukutakanu ya santu, mpe na kilumbu ya 7, beno ke sala lukutakanu ya santu ya nkaka. Beno fwana kusala ata kisalu bilumbu yango. Beno ke lamba kaka madya yina konso muntu* ke kudya.

17 “‘Beno fwana kusala Mukembo ya Mampa yina ke ve na levire, samu ti ni kilumbu yina mu ke basisa bimvuka ya beno ya nene* na bwala ya Ezipte. Beno na bana ya beno, beno fwana kubambuka moyo kilumbu yango. Ya kele musiku ya bantangu nyonso. 18 Na ngonda ya ntete, na nkokila ya kilumbu ya 14, beno fwana kudya mampa yina ke ve na levire, tii na nkokila ya kilumbu ya 21. 19 Ba fwana kutala ata levire na bayinzo ya beno na kati ya bilumbu 7, samu muntu yina ke kudya bima yina ke na levire, ya vanda nzenza to muntu ya bwala, ba fwana kukatula* muntu* yango na kati ya kimvuka ya bantu ya Izraele. 20 Beno fwana kudya ata kima yina ke na levire. Na bayinzo ya beno nyonso, beno fwana kudya mampa yina ke ve na levire.’”

21 Moyize bokilaka bakuluntu nyonso ya Izraele na mbangu, mpe yandi zonzaka na bawu: “Beno kwenda soola bibulu* yina ke ntete bana, samu na makanda ya beno, mpe beno kufwa bawu samu na Pake. 22 Beno fwana kukotisa diboke ya matiti ya izope* na kati ya menga yina ke na ndonga. Beno ke pakula yawu na dibaya ya zulu ya mwelo, mpe na makunzi zole ya mwelo. Ata muntu fwana kubasika na yinzo ya yandi tii na suka. 23 Na yawu ntangu Yehova ke luta samu na kupesa kitumbu na bantu ya Ezipte, mpe yandi ke tala menga na dibaya ya zulu ya mwelo mpe na makunzi zole ya mwelo, Yehova ke luta na zulu ya mwelo, mpe yandi ke bika ve ti mpasi ya lufwa kota na bayinzo ya beno.

24 “Beno fwana kutatamana na kusala yawu. Ya ke musiku ya bantangu nyonso samu na beno mpe bana ya beno. 25 Ntangu beno ke kota na bwala yina Yehova ke pesa beno, mutindu yandi zonzaka yawu, beno fwana kutatamana na kusala mukembo yayi. 26 Mpe ntangu bana ya beno ke yufula beno, ‘Yinki zola zonza mukembo yayi?’ 27 beno fwana kuzonza, ‘Ya ke munkayulu ya Pake samu na Yehova yina lutaka na zulu ya bayinzo ya bantu ya Izraele na Ezipte. Yandi pesaka kitumbu na bantu ya Ezipte, kasi yandi vuukisaka bayinzo ya beto.’”

Na yawu dikanda kondamaka mpe fukamaka kizizi na ntoto. 28 Na manima, bantu ya Izraele kwendaka mpe salaka kaka mutindu Yehova tumisaka Moyize na Aroni. Ni mutindu yina ba salaka.

29 Na yawu na kati-kati ya mpimpa, Yehova kufwaka bana nyonso ya ntete ya bwala ya Ezipte, kubanda na mwana ya ntete ya Faraoni yina vandaka na kiti ya yandi ya kimfumu tii na mwana ya ntete ya muntu yina ba kangaka na boloko,* mpe bana nyonso ya ntete ya bibulu. 30 Faraoni telamaka na mpimpa yina, kintwadi na bisadi ya yandi mpe bantu nyonso ya nkaka ya Ezipte. Ya vandaka na bidilu ya ngolo na kati ya bantu ya Ezipte, samu ti ya vandaka ve na yinzo yina muntu kufwaka ve. 31 Na mbala mosi, yandi bokilaka Moyize na Aroni na mpimpa mpe zonzaka na bawu: “Beno kwenda, beno basika na kati ya bantu ya munu, beno na bantu ya nkaka ya Izraele. Beno kwenda sadila Yehova kaka mutindu beno zonzaka. 32 Beno baka mpe mameme na bangombe ya beno, mpe beno kwenda, kaka mutindu beno zonzaka. Kasi beno fwana mpe kusakumuna munu.”

33 Bantu ya Ezipte bandaka kusala bantu ya Izraele tiya samu ba katuka na bwala mbangu-mbangu, mpe ba vanda zonza: “Kana beno kwenda ve, beto ke manisa na kufwa.” 34 Na yawu, ba nataka pate ya bawu yina ba vandaka nabunu ba tula levire, mpe bandonga ya bawu ya kubudila pate ya kufuka na kati ya bilele. Ba tulaka yawu na zulu ya mapeka. 35 Bantu ya Izraele salaka mambu yina Moyize zonzaka na bawu, mpe ba lombaka na bantu ya Ezipte bima yina ba yidikaka na arza mpe na wolo, mpe bilele. 36 Yehova salaka ti bantu ya Ezipte lakisa bantu ya Izraele bumbote. Na yawu, ba pesaka bawu bima yina ba lombaka, mpe ba botolaka bimvwama ya bantu ya Ezipte.

37 Na manima, bantu ya Izraele katukaka na bwala ya Raamsese samu na kukwenda na Sukote. Katula bana, ba vandaka babakala kana 600 000 yina vanda tambula na makulu. 38 Kimvuka mosi ya nene ya bantu ya mutindu na mutindu* kwendaka kintwadi na bawu. Ba nataka mpe mameme mpe bangombe, bibulu mingi. 39 Ba bandaka kulamba pate yina ba katukaka na yawu na Ezipte. Ba yidikaka mampa ya ronde yina vandaka ve na levire. Ya vandaka ve na levire samu ba bingisaka bawu na mbangu-mbangu na Ezipte, mpe ba kuzwaka ve ntangu ya kubongisa bima yina ba zola kudya.

40 Na ntangu yina bantu ya Izraele katukaka na Ezipte, ya salaka bamvula 430 yina ba zingaka mutindu banzenza. 41 Na nsuka ya bamvula 430, kaka kilumbu yina, bimvuka nyonso ya nene* ya Yehova katukaka na bwala ya Ezipte. 42 Ya ke mpimpa yina ba fwana kukanisa mutindu Yehova basisaka bawu na bwala ya Ezipte. Bantu nyonso ya Izraele fwana kukembila mpimpa yango samu na Yehova, na bambandu* ya bawu nyonso.

43 Na manima Yehova zonzaka na Moyize mpe Aroni, “Yayi musiku samu na Pake: Ata nzenza mosi ve lenda kudya yawu. 44 Kasi kana muntu ke na ngaamba ya bakala yina yandi sumbaka, yandi fwana kuzengisa yandi kibakala. Na manima, yandi lenda kudya Pake. 45 Muntu yina me katuka na bwala ya nkaka mpe kisadi yina ba ke futaka lendaka kudya ve yawu. 46 Beno ke kudya yawu kaka na yinzo mosi. Beno fwana kubasika ve na ngaanda na ndambu ya musuni, mpe beno fwana ve kubuka ata mukwa mosi ya yawu. 47 Kimvuka nyonso ya bantu ya Izraele fwana kusala mukembo yayi. 48 Kana nzenza mosi yina ke vandaka na beno zola kusala mukembo ya Pake samu na Yehova, babakala nyonso yina ke vandaka na yandi fwana kuzengisa kibakala. Na manima yandi lenda kusala mukembo yayi, mpe yandi ke kuma mutindu muntu ya bwala.* Kasi ata muntu mosi yina me zengisa ve kibakala lenda kudya yawu. 49 Musiku ke vanda kaka mosi samu na muntu ya bwala mpe samu na nzenza yina ke zingaka na kati ya beno.”

50 Na yawu, bantu nyonso ya Izraele salaka kaka mutindu yina Yehova tumisaka Moyize na Aroni. Ni mutindu yina ba salaka. 51 Kaka kilumbu yina, Yehova basisaka bantu ya Izraele na bimvuka ya bawu ya nene* na bwala ya Ezipte.

13 Yehova zonzaka dyaka na Moyize: 2 “Kumisa santu samu na munu* konso mwana ya ntete ya bakala* ya bantu ya Izraele. Mwana ya bakala yina ke butuka ya ntete, ya bantu mpe ya bibulu, ke ya munu.”

3 Moyize zonzaka na dikanda: “Beno bambukila moyo na kilumbu yayi yina beno me basika na Ezipte, na yinzo ya bungaamba, samu Yehova me basisa beno awa na nzila ya diboko ya ngolo. Na yawu beno ke kudya ata kima yina ke na levire. 4 Beno me basika bubu yayi na ngonda ya Abibe.* 5 Ntangu Yehova ke kotisa nge na bwala ya Bakanana, ya Bahitite, ya Baamorite, ya Bahivite mpe ya Bayebuzite, yina yandi zengaka ndefi na bankooko ya nge ti yandi ke pesa nge, ntoto yina ke ya kufuluka na miliki mpe mafuta ya nyosi, nge fwana kutatamana na kusala mukembo yayi na ngonda yayi. 6 Na kati ya bilumbu 7, nge ke kudya mampa yina ke ve na levire, mpe na kilumbu ya 7, ya ke vanda na mukembo samu na Yehova. 7 Na bilumbu 7 yina, bantu ke kudya mampa yina ke ve na levire. Ba fwana kutala ve na sika ya nge kima yina ke na levire, mpe ba fwana kutala ve na sika ya nge pate yina ba me funisa, na bisika nyonso* ya bwala ya nge. 8 Kilumbu yina, nge ke zonza na mwana ya nge, ‘Mu ke na salaka yawu samu na mambu yina Yehova salaka samu na munu ntangu mu basikaka na Ezipte.’ 9 Mukembo yayi ke vanda samu na nge mutindu kidimbu yina ke ya kusonama na diboko ya nge mpe na mbunzu* ya nge,* samu musiku ya Yehova vanda na yinwa ya nge. Ntembe ve, Yehova basisaka nge na Ezipte na nzila ya ngolo ya diboko ya yandi. 10 Konso mvula nge fwana kulanda musiku yayi na ntangu ya yawu.

11 “Ntangu Yehova ke kotisa nge na bwala ya Bakanana, yina yandi zengaka ndefi na nge mpe na bankooko ya nge ti yandi ke pesa nge yawu, 12 nge fwana kupesa na Yehova konso mwana ya ntete ya bakala,* mpe konso mwana ya ntete ya bakala* ya bibulu yina nge ke kuzwa. Ba kele ya Yehova. 13 Nge fwana kusumba dyaka konso mwana ya ntete ya mbuluku na kupesaka dimeme na kisika ya yandi. Kana nge sumba dyaka ve yandi, nge fwana kubuka yandi laka. Mpe nge fwana kusumba dyaka konso mwana ya nge ya ntete ya bakala.

14 “Na mantwala, kana mwana ya nge yufula nge, ‘Samu na yinki beto ke na salaka yawu?’ nge ke zonza na yandi, ‘Na ngolo ya diboko ya yandi, Yehova basisaka beto na Ezipte, na yinzo ya bungaamba. 15 Samu Faraoni vanda manga kaka kubika beto kwenda, Yehova kufwaka bana nyonso ya ntete ya bwala ya Ezipte, kubanda na bantu tii na bibulu. Ni na yawu, mu ke na pesaka Yehova bana nyonso ya ntete ya bibulu mutindu munkayulu, mpe mu ke na sumbaka dyaka konso mwana ya ntete ya bana ya munu.’ 16 Ya fwana kuvanda mutindu kidimbu na diboko ya nge, mpe kitende ya kukangama na mbunzu* ya nge, samu ti ni na ngolo ya diboko ya yandi, Yehova basisaka beto na Ezipte.”

17 Ntangu Faraoni bikaka bantu ya Izraele kwenda, Nzambi nataka ve bawu na nzila ya bwala ya Bafilisti, ata ti ya vandaka pene-pene, samu ti Nzambi zonzaka: “Bantu lenda soba makanisi ya bawu ntangu ba ke kutana na mvita mpe ba ke vutuka na Ezipte.” 18 Na yawu Nzambi salaka ti ba baka nzila ya yinda yina ke lutaka na ntoto ya kuyuma ya Mubu ya Mbwaki. Kasi bantu ya Izraele basikaka na Ezipte na mulonga mutindu kimvuka ya basoda. 19 Moyize nataka mpe mikwa ya Yozefi, samu Yozefi zengisaka bana ya Izraele ndefi ntangu yandi zonzaka: “Ya tsyeleka Nzambi ke tula beno dikebi, mpe beno me fwana kukatula mikwa ya munu awa mpe kukwenda na yawu.” 20 Ba katukaka na Sukote mpe ba kwendaka vanda na Etami pene-pene na* ntoto ya kuyuma.

21 Yehova vandaka tambula na mantwala ya bawu, na ntangu, na dikunzi ya dituti* samu na kunata bawu, mpe na mpimpa, na dikunzi ya tiya* samu na kupesa bawu nsemo. Na yawu, ba vanda lenda kutambula na ntangu mpe na mpimpa. 22 Dikunzi ya dituti vanda katuka ve na sika ya bantu ya Izraele na ntangu, mutindu mosi mpe na dikunzi ya tiya na mpimpa.

14 Yehova zonzaka na Moyize: 2 “Zonza na bantu ya Izraele ba vutuka manima mpe ba kwenda vanda na mantwala ya Pihayirote, na kati-kati ya Migdole mpe mubu, kisika yina ke na talasanaka na Baale-zefone. Beno ke vanda na mantwala ya yawu, pene-pene na mubu. 3 Faraoni ke zonza mambu yayi samu na bantu ya Izraele, ‘Ba ke na kuyenga-yengaka na bwala. Ba me kangama na ntoto ya kuyuma.’ 4 Mu ke bika ntima ya Faraoni kuma ngolo, mpe yandi ke landa bawu. Mu ke kuzwa nkembo na mambu yina mu ke sala Faraoni mpe kimvuka nyonso ya basoda ya yandi. Ya tsyeleka bantu ya Ezipte ke zaba ti mu kele Yehova.” Na yawu, bantu ya Izraele salaka mutindu yina.

5 Na manima, ba pesaka mfumu ya Ezipte nsangu ti bantu ya Izraele kimaka. Na mbala mosi, Faraoni na bisadi ya yandi sobaka makanisi ya bawu na yina me tadila bantu ya Izraele, mpe ba zonzaka: “Samu na yinki beto me sala mambu yayi? Samu na yinki beto me bika bantu ya Izraele, bangaamba ya beto ba kwenda?” 6 Na yawu, yandi bongisaka bapusu-pusu ya yandi ya mvita, mpe yandi kwendaka na bantu ya yandi. 7 Yandi bakaka bapusu-pusu 600 ya kulutila mbote, mpe bapusu-pusu nyonso ya nkaka ya bwala ya Ezipte. Konso pusu-pusu vandaka na basoda. 8 Na yawu Yehova bikaka ntima ya Faraoni mfumu ya Ezipte kuma ngolo, mpe yandi landaka bantu ya Izraele, na ntangu yina ba vanda kwenda na ata boma.* 9 Bantu ya Ezipte landaka bawu. Bapusu-pusu nyonso ya Faraoni mpe basoda ya yandi yina ke nataka bampunda,* na kimvuka ya yandi ya basoda vanda pusana pene-pene ya bantu ya Izraele ntangu ba vandaka ntama mingi ve na mubu, pene-pene ya Pihayirote, yina ke talasanaka na Baale-zefone.

10 Ntangu Faraoni kumaka pene-pene, bantu ya Izraele nangunaka meso mpe talaka bantu ya Ezipte kulanda bawu. Ba kumaka na boma mingi, mpe ba bandaka kudidila Yehova. 11 Ba zonzaka na Moyize: “Bandyamu vandaka ve na Ezipte samu nge nata beto awa samu beto kufwa na ntoto ya kuyuma? Yinki nge me sala beto na kubasisa beto na Ezipte? 12 Ni yawu ve beto zabisaka nge na Ezipte ntangu beto zonzaka, ‘Bika ya nge beto, beto sadila bantu ya Ezipte?’ Samu ya me lutila mbote beto sadila bantu ya Ezipte na kisika ya kufwa na ntoto ya kuyuma.” 13 Na yawu Moyize zonzaka na bawu: “Beno vanda ve na boma. Beno sikama ngolo mpe beno tala mutindu Yehova ke vuukisa beno bubu yayi. Ya tsyeleka, bantu ya Ezipte yina beno ke na talaka bubu yayi, yimeni, beno ke tala dyaka ve bawu. 14 Yehova yandi mosi ke nwanina beno, mpe beno ke vanda swi.”

15 Na manima Yehova zonzaka na Moyize: “Samu na yinki nge na bikaka ve kudidila munu? Zonza na bantu ya Izraele ba landa nzila ya bawu. 16 Mpe nge, nanguna yinti ya nge mpe tamba diboko ya nge na zulu ya mubu samu na kukabula yawu, samu bantu ya Izraele luta na kati-kati ya mubu, na zulu ya ntoto ya kukawuka. 17 Munu, mu ke na bikaka bantima ya bantu ya Ezipte kuma ngolo, samu ba landa bawu. Mpe mu ke kuzwa nkembo na mambu yina mu ke sala na Faraoni mpe na kimvuka ya basoda ya yandi nyonso, na bapusu-pusu ya yandi ya mvita, mpe na basoda ya yandi yina ke nataka bampunda. 18 Ya tsyeleka bantu ya Ezipte ke zaba ti mu kele Yehova, ntangu mu ke kuzwa nkembo na mambu yina mu ke sala na Faraoni, na bapusu-pusu ya yandi ya mvita, mpe na basoda ya yandi yina ke nataka bampunda.”

19 Na manima, mbazi ya Nzambi ya tsyeleka yina vanda tambula na mantwala ya bantu ya Izraele lutaka na manima ya bawu, mpe dikunzi ya dituti yina vandaka na mantwala ya bawu katukaka mpe lutaka na manima ya bawu. 20 Ya kwizaka telama na kati-kati ya bantu ya Ezipte na bantu ya Izraele. Na lweka mosi, ya vandaka dituti ya mpimpa, mpe na lweka ya nkaka, ya vanda pesa nsemo na mpimpa. Na yawu, mpimpa nyonso, bantu ya lweka mosi kwizaka ve na lweka ya nkaka.

21 Na yawu Moyize tambaka diboko ya yandi na zulu ya mubu, mpe Yehova salaka ti mupepe ya ngolo yina katukaka na esti fula mpimpa nyonso. Maza kabukaka, mpe yisi ya mubu kumaka ntoto ya kukawuka. 22 Na yawu, bantu ya Izraele lutaka na kati-kati ya mubu, na zulu ya ntoto ya kukawuka, ntangu maza salaka kibaka mosi na lweka ya bawu ya bakala mpe ya nkaka na lweka ya kento. 23 Bantu ya Ezipte landaka bawu. Bampunda nyonso ya Faraoni, bapusu-pusu ya yandi ya mvita mpe basoda ya yandi yina vanda nata bampunda landaka bawu na kati-kati ya mubu. 24 Ntangu mpimpa vanda manisa,* na kati ya dikunzi ya tiya mpe ya dituti, Yehova talaka bantu ya Ezipte, mpe kotisaka muvusu na kati ya bawu. 25 Yandi vanda katula makulu ya bapusu-pusu ya bawu. Na yawu, ya kumaka mpasi samu na bawu na kutambusa yawu, mpe bantu ya Ezipte zonzaka: “Beto kima bantu ya Izraele, samu ti Yehova ke na nwanisaka Ezipte samu na bawu.”

26 Na manima Yehova zonzaka na Moyize: “Tamba diboko ya nge na zulu ya mubu samu maza vutukila bantu ya Ezipte, bapusu-pusu ya bawu ya mvita mpe basoda ya bawu yina ke nataka bampunda.” 27 Na mbala mosi, Moyize tambaka diboko ya yandi na zulu ya mubu, mpe ntangu suka vanda kuma, mubu vutukaka mutindu ya ke vandaka. Ntangu bantu ya Ezipte vanda sosa kukima, Yehova manisaka bawu na kati-kati ya mubu. 28 Ntangu maza vanda vutuka, ya fukaka bapusu-pusu ya mvita, basoda yina vanda nata bampunda, mpe kimvuka nyonso ya basoda ya Faraoni yina landaka bantu ya Izraele na kati-kati ya mubu. Ata mosi na kati ya bawu vuukaka.

29 Kasi bantu ya Izraele tambulaka na zulu ya ntoto ya kukawuka na kati-kati ya mubu, mpe maza salaka kibaka mosi na lweka ya bawu ya bakala mpe ya nkaka na lweka ya kento. 30 Na yawu kilumbu yina, Yehova vuukisaka bantu ya Izraele na maboko ya bantu ya Ezipte, mpe bantu ya Izraele talaka bantu ya Ezipte ya kufwa na simu ya mubu. 31 Izraele talaka mpe ngolo* ya nene yina Yehova basisaka na ntadisi ya bantu ya Ezipte, mpe bantu bandaka kukima* Yehova mpe kuvanda na kiminu na Yehova mpe na kisadi ya yandi Moyize.

15 Na ntangu yina, Moyize na bantu ya Izraele yimbilaka Yehova nzimbu yayi:

“Bika mu yimbila Yehova, samu ti yandi me zanguka mingi.

Mpunda na muntu yina ke nataka yawu, yandi me losa bawu na mubu.

 2 Ngolo ya munu mpe bukindi ya munu ke ni Yah,* samu ti yandi me kuma muvuukisi ya munu.

Yayi ni Nzambi ya munu, mpe mu ke kumisa yandi; Nzambi ya tata ya munu, mpe mu ke zangula yandi.

 3 Yehova ke soda ya ngolo. Yehova ni nkumbu ya yandi.

 5 Bamaza ya kudasuka me fuka bawu; mutindu ditadi, ba me dyama na bisika ya sunda.

 9 Mbeni vanda zonza: ‘Mu ke landa bawu! Mu ke kuzwa bawu!

Mu ke kabula bimvwama yina mu ke botola bawu tii mu* ke yukuta!

Mu ke basisa mbele ya munu ya mvita! Diboko ya munu ke nunga bawu!

11 O Yehova, nani ke mutindu nge na kati ya banzambi?

Nani ke mutindu nge, nge yina ke lakisaka busantu ya kulutila?

Nge yina ba me fwana kukima mpe kukembila na banzimbu, Nge yina ke salaka bamambu ya ngitukulu.

12 Nge tambaka diboko ya nge ya bakala, mpe ntoto minaka bawu.

Ngolo ke manisa ba yina nyonso ke vandaka na Kanana.

16 Boma mpe matekita ke bwila bawu.

18 Yehova ke yala mvula na mvula.

20 Na yawu mbikudi ya kento Miriame, kibusi ya Aroni bakaka tambure ya fioti na diboko ya yandi, mpe bakento nyonso landaka yandi na batambure ya fioti mpe mabina. 21 Samu na kupesa mvutu na babakala, Miriame yimbaka mutindu yayi:

“Beno yimbila Yehova, samu ti yandi me zanguka mingi.

Mpunda na muntu yina ke nataka yawu, yandi me losa bawu na mubu.”

22 Na manima, Moyize twadisaka Izraele, ba katukaka na Mubu ya Mbwaki mpe ba kwendaka na ntoto ya kuyuma ya Shure. Ba tambulaka bilumbu tatu na ntoto ya kuyuma, kasi ba kuzwaka ve maza. 23 Ba kumaka na Mara, kasi ba lendaka ve kunwa maza ya Mara* samu ya vandaka ndudi. Ni na yawu yandi pesaka kisika yina nkumbu Mara. 24 Na yawu, dikanda bandaka kunyunguta na ntadisi ya Moyize na kuzonzaka: “Beto ke kunwa yinki?” 25 Yandi dilaka na sika ya Yehova, mpe Yehova lakisaka yandi yinti mosi. Ntangu yandi losaka yawu na kati ya maza, maza kumaka kitoko.

Kuna Nzambi tudilaka bawu musiku ya kulanda mpe mutindu ya kusambisa, mpe kuna yandi mekaka bawu. 26 Yandi zonzaka: “Kana nge kuwa mbote-mbote ndinga ya Yehova Nzambi ya nge mpe nge sala mambu yina ke ya kulunga na meso ya yandi, mpe nge teka dikebi na misiku ya yandi mpe nge tumama na mikanu ya yandi nyonso, mu ke nata ve na zulu ya nge ata kimbevo mosi yina mu nataka na zulu ya bantu ya Ezipte, samu ti munu Yehova, mu ke na belusaka nge.”

27 Na manima ba kumaka na Elime, kisika yina vandaka na mikelo 12 ya maza mpe maba 70. Ba vandaka kuna, pene-pene ya maza.

16 Na manima ya kukatuka na Elime, kimvuka nyonso ya bantu ya Izraele kwizaka kuma na ntoto ya kuyuma ya Sine, yina ke na kati-kati ya Elime na Sinayi, na kilumbu ya 15 ya ngonda ya zole na manima ya kukatuka ya bawu na bwala ya Ezipte.

2 Kimvuka nyonso ya bantu ya Izraele bandaka kunyunguta na ntadisi ya Moyize na Aroni na ntoto ya kuyuma. 3 Bantu ya Izraele vanda zonza na bawu: “Aa, kana diboko ya Yehova kufwaka ya yawu beto na Ezipte, ntangu beto vandaka ya kuvanda pene-pene na banzungu ya musuni, ntangu beto vanda kudya mampa tii na kuyukuta! Awa beno me nata beto na ntoto ya kuyuma yayi samu na kufwa kimvuka nyonso yayi na nsatu.”

4 Na yawu Yehova zonzaka na Moyize: “Mu ke nokisa beno mvula ya mampa yina ke katuka na zulu. Kilumbu na kilumbu, konso muntu fwana kubasika samu na kulokota yina ke lunga na yandi. Mutindu yina, mu ke meka bawu samu na kutala kana ba ke tumama to ve na musiku ya munu. 5 Kasi na kilumbu ya 6, ntangu ba ke lamba yina ba ke lokota, ya ke vanda bambala zole lutangu ya yina ba me lokota bilumbu ya nkaka.”

6 Na yawu Moyize na Aroni zonzaka na bantu nyonso ya Izraele: “Na nkokila yayi, beno ke zaba ti ya tsyeleka ni Yehova me basisa beno na bwala ya Ezipte. 7 Na suka, beno ke tala nkembo ya Yehova samu yandi me kuwa kunyunguta ya beno na ntadisi ya Yehova. Beto ke banani samu beno nyunguta na ntadisi ya beto?” 8 Moyize zonzaka dyaka: “Ntangu Yehova ke pesa beno musuni ya kudya na nkokila, mpe na suka mampa tii beno ke yukuta, beno ke zaba ti Yehova me kuwa kunyunguta ya beno na ntadisi ya yandi. Kasi beto, beto ke banani? Ni na ntadisi ya beto ve beno ke na nyungutaka, kasi na ntadisi ya Yehova.”

9 Na manima Moyize zonzaka na Aroni: “Zonza na kimvuka nyonso ya bantu ya Izraele, ‘Beno kwiza na mantwala ya Yehova, samu yandi me kuwa kunyunguta ya beno.’” 10 Ntangu Aroni zonzaka na kimvuka nyonso ya bantu ya Izraele, na mbala mosi ba balukaka mpe ba talaka na lweka ya ntoto ya kuyuma, mpe kuna nkembo ya Yehova talanaka na kati ya dituti.

11 Yehova zonzaka dyaka na Moyize: 12 “Mu me kuwa kunyunguta ya bantu ya Izraele. Zonza na bawu, ‘Tekila ntangu kota,* beno ke kudya musuni, mpe na suka beno ke yukuta mampa. Ya tsyeleka, beno ke zaba ti mu kele Yehova Nzambi ya beno.’”

13 Na yawu, na nkokila yina, bandeke* kwizaka mpe fulusaka kisika yina ba vandaka, mpe na suka maza ya kinoko vandaka zinga-zinga ya kisika yina. 14 Ntangu kinoko katukaka, ya vandaka na bima mosi mutindu bambuma ya fioti-fioti na zulu ya ntoto ya kuyuma, mutindu neje. 15 Ntangu bantu ya Izraele talaka yawu, ba vanda zonza na bampangi, “Yayi yinki?” samu ba zabaka ve yinki ya vandaka. Moyize zonzaka na bawu: “Ya ke mampa yina Yehova me pesa beno samu beno kudya. 16 Yayi ni musiku yina Yehova me pesa, ‘Konso muntu fwana kulokota yina yandi lenda kudya. Beno ke baka omere mosi* na muntu, na kutalaka lutangu ya bantu* yina mosi na mosi ya beno ke na yawu na yinzo ya yandi.’” 17 Bantu ya Izraele bandaka kusala mutindu yina. Ba lokotaka yawu. Ba ya nkaka lokotaka mingi, ba ya nkaka ndambu. 18 Ntangu ba vanda tula yawu na omere, muntu yina lokotaka mingi vandaka ve na yawu ya kulutila, mpe muntu yina lokotaka ndambu kondwaka ve kima. Muntu nyonso lokotaka yina yandi lenda kudya.

19 Na yawu, Moyize zonzaka na bawu: “Muntu mosi ve fwana kubika ata ndambu ya yawu tii na suka.” 20 Kasi ba kuwaka ve Moyize. Ntangu ba ya nkaka bikaka yawu tii na suka, ya basisaka bantunga, mpe ya vanda basika nsunga ya ngolo, mpe Moyize dasukilaka bawu. 21 Ba vanda lokota yawu konso suka. Muntu na muntu vanda lokota yina yandi lenda kudya. Ntangu ntangu vanda kuma ngolo, ya vanda sulumuka.

22 Na kilumbu ya 6, ba lokotaka mampa ya bilumbu zole, baomere zole samu na konso muntu. Na yawu bamfumu nyonso ya kimvuka kwizaka zabisa yawu na Moyize. 23 Moyize zonzaka na bawu: “Ni yawu Yehova zonzaka. Mbasi ke vanda kilumbu ya kupema,* saba ya santu samu na Yehova. Beno lamba yina beno ke lamba mpe beno tokisa yina beno ke tokisa. Yina ke bikana, beno bumba yawu tii na suka.” 24 Na yina, ba bumbaka yawu tii na suka kaka mutindu Moyize tumisaka. Ya basikaka ve nsunga mpe bantunga vandaka ve na kati. 25 Na manima Moyize zonzaka: “Beno kudya yawu bubu yayi, samu ti bubu yayi ke saba samu na Yehova. Bubu yayi beno ke tala ve yawu na ntoto. 26 Beno ke lokota yawu na kati ya bilumbu 6. Kasi kilumbu ya 7, kilumbu ya saba, ya ke vanda ve.” 27 Ata mutindu yina, bantu ya nkaka basikaka samu na kulokota yawu na kilumbu ya 7, kasi ba kuzwaka ata kima.

28 Na yawu Yehova zonzaka na Moyize: “Tii wapi ntangu beno ke manga kutumama na misiku ya munu mpe na mikanu ya munu? 29 Beno fwana kuzaba ti Yehova me pesa beno saba. Ni na yawu, na kilumbu ya 6 yandi ke na pesaka beno mampa ya bilumbu zole. Na yina, muntu nyonso fwana kubikana kisika yandi kele; ata muntu fwana kubasika kisika yandi kele na kilumbu ya 7.” 30 Na yawu dikanda zitisaka saba* na kilumbu ya 7.

31 Bantu ya Izraele pesaka mampa yango nkumbu “mane.”* Ya vandaka mpembe mutindu mbuma ya koriande, mpe na yinwa ya vandaka mutindu bipapala yina ba me lamba na mafuta ya nyosi. 32 Na manima Moyize zonzaka: “Yayi ni musiku Yehova me pesa, ‘Beno fulusa omere mosi na yawu, mpe beno bumba yawu samu ba yina ke kwiza na manima ya beno tala mampa yina mu pesaka beno na kudya na ntoto ya kuyuma, ntangu mu basisaka beno na bwala ya Ezipte.’” 33 Na yawu Moyize zonzaka na Aroni: “Baka diyuki, tula omere mosi ya mane na kati ya yawu, mpe tula yawu na mantwala ya Yehova mutindu kima ya kubumba samu na ba yina ke butuka na bilumbu yina ke kwiza.” 34 Mutindu Yehova tumisaka Moyize, Aroni tulaka yawu na mantwala ya Kimbangi samu na kubumba yawu. 35 Bantu ya Izraele kudyaka mane bamvula 40, tii ntangu ba kumaka na bwala yina bantu vanda zinga. Ba kudyaka mane tii ntangu ba kumaka na bwala ya Kanana. 36 Ntyo omere ke ndambu mosi na kati ya bandambu 10 ya efa.*

17 Kimvuka nyonso ya bantu ya Izraele katukaka na ntoto ya kuyuma ya Sine. Na nzyetolo ya bawu, ba vanda luta kisika na kisika mutindu Yehova vanda zonza na bawu, mpe ba vandaka na Refidime. Kasi kuna, ya vandaka ve na maza samu bantu kunwa.

2 Na yawu dikanda bandaka kuswanisa Moyize na kuzonzaka: “Pesa beto maza ya kunwa.” Kasi Moyize zonzaka na bawu: “Samu na yinki beno ke na swanisaka munu? Samu na yinki beno ke na bikaka ve kusombola* Yehova?” 3 Kasi dikanda vanda kufwa na nsatu ya maza, mpe ba vanda nyunguta na ntadisi ya Moyize na kuzonzaka: “Samu na yinki nge me basisa beto na Ezipte? Ya vandaka samu na kufwa beto, bana ya beto mpe bibulu ya beto na nsatu ya maza?” 4 Nsuka-nsuka Moyize dilaka na sika ya Yehova: “Yinki mu ke sala na dikanda yayi? Fioti kaka me bikana, ba ke bula munu matadi!”

5 Na yawu Yehova zonzaka na Moyize: “Luta na mantwala ya dikanda mpe nata mwa bakuluntu ya Izraele mpe yinti yina nge bulaka Nzadi ya Nile. Baka yawu na diboko ya nge mpe kwenda. 6 Tala! Mu ke telema na mantwala ya nge na zulu ya ditadi ya nene na Horebe. Nge ke bula ditadi yango mpe maza ke basika na yawu, mpe dikanda ke kunwa yawu.” Moyize salaka mutindu yina na mantwala ya bakuluntu ya Izraele. 7 Na yawu yandi bokilaka kisika yina Masa* mpe Meriba,* samu bantu ya Izraele swanisaka yandi mpe ba sombolaka Yehova na kuzonzaka: “Yehova ke kwandi na kati-kati ya beto to yandi kele ve?”

8 Na manima bantu ya Amaleke kwizaka nwanisa bantu ya Izraele na Refidime. 9 Na yawu Moyize zonzaka na Yozue: “Sosila beto babakala mpe kwenda nwanisa bantu ya Amaleke. Mbasi mu ke telama na nsongi ya mongo ya fioti, mpe mu ke vanda na yinti ya Nzambi ya tsyeleka na diboko.” 10 Yozue salaka mutindu Moyize zonzaka na yandi, mpe yandi nwanisaka bantu ya Amaleke. Moyize, Aroni, na Hure kwendaka na nsongi ya mongo ya fioti.

11 Ntangu nyonso yina Moyize vandaka ya kunanguna maboko, bantu ya Izaele vanda nunga, kasi ntangu yina yandi vanda bwisa maboko, na mbala mosi bantu ya Amaleke vanda nunga. 12 Ntangu maboko ya Moyize lembaka,* Aroni na Hure bakaka ditadi mpe ba tulaka yawu na yisi ya yandi mpe Moyize vandilaka ditadi yango. Ba simbaka maboko ya yandi, mosi na konso lweka. Ya salaka ti maboko ya yandi bikana kaka na zulu* tii ntangu kotaka. 13 Na yawu Yozue nungaka Amaleke na bantu ya yandi na mbele ya mvita.

14 Yehova zonzaka na Moyize: “Sonika mambu yayi na dibuku samu ba bambuka yawu,* mpe zabisa yawu na Yozue, ‘Mu ke manisa bantu ya Amaleke na zulu ya ntoto, mpe ba ke bambukila dyaka ve bawu moyo.’” 15 Na manima Moyize tungaka dikuku ya minkayulu mpe pesaka yawu nkumbu Yehova-nisi.* 16 Yandi zonzaka: “Samu maboko ya bantu ya Amaleke me telemina kiti ya kimfumu ya Yah, Yehova ke nwanisa bawu mpe mitekolo ya bawu.”

18 Ntyo Yetro, nganga-nzambi ya bwala ya Madyani, bokilo ya Moyize kuwaka mambu nyonso yina Nzambi salaka samu na Moyize mpe samu na dikanda ya yandi Izraele, mutindu Yehova basisaka bantu ya Izraele na Ezipte. 2 Yetro, bokilo ya Moyize kipeke Zipora kento ya Moyize, ntangu Moyize vutulaka yandi, 3 kintwadi na bana ya yandi ya babakala zole. Mwana mosi vandaka na nkumbu Gershome,* samu Moyize zonzaka: “Mu me kuma nzenza yina ke vandaka na yinsi ya bunzenza,” 4 mpe ya nkaka nkumbu ya yandi vandaka Eliezere,* samu yandi zonzaka: “Nzambi ya tata ya munu kele muntu yina ke sadisaka munu, yandi yina vuukisaka munu na mbele ya Faraoni.”

5 Na yawu Yetro bokilo ya Moyize, kwendaka na sika ya Moyize kintwadi na bana ya Moyize mpe kento ya yandi, ntangu Moyize vandaka na ntoto ya kuyuma, kisika yina vandaka mongo ya Nzambi ya tsyeleka. 6 Mpe yandi filisaka nsangu yayi na Moyize: “Munu Yetro, bokilo ya nge, mu ke na kwizaka na sika ya nge kintwadi na kento ya nge mpe bana ya yandi zole.” 7 Na mbala mosi, Moyize basikaka samu na kukwenda bwabana bokilo ya yandi. Yandi fukamaka na mantwala ya yandi mpe pesaka yandi babizu. Ba yufulaka bampangi bansangu, mpe na manima ba kotaka na yinzo ya balele.

8 Moyize zabisaka na bokilo ya yandi mambu nyonso yina Yehova salaka Faraoni mpe Ezipte samu na Izraele, bankokoso nyonso yina ba kutanaka na yawu na nzila, mpe mutindu Yehova vuukisaka bawu. 9 Yetro yangalalaka na mambu nyonso ya mbote yina Yehova salaka samu na Izraele, na yina yandi vuukisaka bawu na Ezipte.* 10 Na yawu Yetro zonzaka: “Bika Yehova kuzwa nkembo, yandi muntu me vuukisa beno na Ezipte mpe na Faraoni, mpe me basisa bantu ya Izraele na lutumu ya Ezipte. 11 Awa mu me kwiza zaba ti Yehova me lutila banzambi nyonso ya nkaka, samu na mambu yina yandi me sala na ba yina lakisaka lunangu na ntadisi ya bantu ya yandi.” 12 Na yawu Yetro, bokilo ya Moyize nataka dikabu ya kuyoka mpe minkayulu samu na Nzambi. Mpe Aroni na bakuluntu nyonso ya Izraele kwizaka mpe kudyaka kintwadi na bokilo ya Moyize na mantwala ya Nzambi ya tsyeleka.

13 Kilumbu yina landaka, mutindu ya vandaka kifu ya yandi, Moyize kwendaka vanda samu na kuzenga bamambu ya dikanda, mpe bantu vanda bika ve kukwiza tala yandi kubanda suka tii nkokila. 14 Ntangu bokilo ya Moyize talaka nyonso yina Moyize vanda sala samu na bantu, yandi zonzaka: “Yayi yinki nge na salaka bantu? Samu na yinki nge me vanda awa nge mosi na bantu nyonso yayi na mantwala ya nge kubanda suka tii nkokila?” 15 Moyize vutulaka na bokilo ya yandi: “Ya ke samu bantu ke na bikaka ve kukwiza na sika ya munu samu na kuyufula bamambu na Nzambi. 16 Kana bantu me kuzwa mambu, ba ke kwizaka na sika ya munu. Mu me fwana kuzenga mambu ya bawu mpe kuzabisa mikanu ya Nzambi ya tyseleka mpe misiku ya yandi.”

17 Bokilo ya Moyize zonzaka na yandi: “Faso ya nge ya kusala yayi ke ve mbote. 18 Ntembe kele ve ti nge ke lemba, nge na bantu yayi yina ke na nge, samu ti kisalu yayi ke mingi mpe ya me lutila nge, mpe nge ke lenda ve kusala yawu nge mosi. 19 Ntangu yayi, kuwa munu. Mu ke pesa nge dilongi mosi, mpe Nzambi ke vanda na nge. Nge, vanda mutindu nzonzi ya bantu na mantwala ya Nzambi, mpe nge me fwana kunata bamambu na mantwala ya Nzambi ya tsyeleka. 20 Nge me fwana kulongisa bawu mikanu mpe misiku, mpe kuzabisa bawu nzila yina ba me bonga kulanda, mpe kisalu yina ba me fwana kusala. 21 Kasi nge me fwana kusoola na kati ya dikanda babakala yina ke na makoki mpe yina ke kimaka Nzambi, babakala yina ba lenda tudila ntima mpe yina ke yiinaka kuzwa bima na mayuya. Tula bawu mutindu bamfumu ya bantu 1 000, bamfumu ya bantu 100, bamfumu ya bantu 50, mpe bamfumu ya bantu 10. 22 Ntangu* bantu ke kuzwa mambu, ba ke zenga yawu, mpe mambu nyonso yina ke lutila bawu, ba ke natina nge yawu. Kasi bamambu ya fioti-fioti, ba ke zenga yawu. Kabula kizitu yayi na bawu, samu bamambu vanda pete samu na nge. 23 Kana nge sala yawu, mpe ya kwelana na luzolo ya Nzambi, nge ke lemba ve, mpe bantu nyonso ke vutuka na bayinzo ya bawu na kyese.”

24 Na nswalu nyonso, Moyize kuwaka bokilo ya yandi mpe salaka nyonso yina yandi zonzilaka yandi. 25 Moyize soolaka babakala yina vandaka na makoki na kati ya dikanda nyonso ya Izraele, mpe yandi tulaka bawu na zulu ya dikanda mutindu bamfumu ya bantu 1 000, bamfumu ya bantu 100, bamfumu ya bantu 50, mpe bamfumu ya bantu 10. 26 Na yawu, ntangu bantu vandaka na mambu, ba vanda zenga yawu. Ba vanda nata mambu ya mpasi na sika ya Moyize, kasi mambu nyonso ya fioti-fioti, ba vanda zenga yawu. 27 Na manima ya mambu yayi, Moyize kwendaka filisa bokilo ya yandi, mpe bokilo ya yandi vutukaka na bwala ya yandi.

19 Na ngonda ya tatu na manima ya kubasika ya bantu ya Izraele na bwala ya Ezipte, kaka kilumbu yina, ba kumaka na ntoto ya kuyuma ya Sinayi. 2 Ba katukaka na Refidime mpe ba kumaka na ntoto ya kuyuma ya Sinayi. Ba vandaka na ntoto ya kuyuma. Dikanda ya Izraele vandaka kuna na mantwala ya mongo.

3 Na manima, Moyize kwendaka na zulu ya mongo samu na kukutana na Nzambi ya tsyeleka, mpe katuka na mongo Yehova bokilaka yandi mpe yandi zonzaka: “Yayi ni mambu nge ke zonza na yinzo ya Yakobi, mpe yina nge ke zabisa na bantu ya Izraele. 4 ‘Beno mosi talaka mambu yina mu salaka na bantu ya Ezipte, mutindu mu nataka beno na mapapu ya mbemba* mpe mu nataka beno na sika ya munu. 5 Ntangu yayi, kana beno tumama na munu na nyonso mpe beno zitisa luwawanu ya munu, ya tsyeleka beno ke kuma kima ya munu ya ntalu na kati ya makanda nyonso, samu ntoto nyonso ke ya munu. 6 Beno ke kuma samu na munu kimfumu ya banganga-nzambi mpe dikanda ya santu.’ Ni mambu yayi nge ke zonza na bantu ya Izraele.”

7 Na yawu Moyize kwendaka mpe bokilaka bakuluntu ya dikanda, mpe yandi zabisaka bawu mambu nyonso yina Yehova tumisaka yandi. 8 Na manima, dikanda nyonso vutulaka na bumosi: “Mambu nyonso yina Yehova me zonza, beto ke sala yawu.” Na mbala mosi Moyize kwendaka pesa Yehova mvutu ya dikanda. 9 Mpe Yehova zonzaka na Moyize: “Kuwa! Mu ke na kwizaka na sika ya nge na kati ya dituti ya ndombe, samu dikanda kuwa ntangu mu ke solola na nge, mpe samu ntangu nyonso ba tula mpe kiminu na nge.” Na manima, Moyize zabisaka Yehova mambu yina dikanda zonzaka.

10 Yehova zonzaka na Moyize: “Kwenda na sika ya dikanda mpe kumisa bawu santu bubu yayi mpe mbasi, mpe ba me fwana kusukula bilele ya bawu. 11 Mpe ba me fwana kuvanda ya kubongama samu na kilumbu ya tatu, samu ti na kilumbu ya tatu, Yehova ke kulumuka na mongo Sinayi na meso ya bantu nyonso. 12 Nge fwana kutula bandilu samu na dikanda zinga-zinga ya mongo, mpe nge ke zonza na bawu, ‘Beno keba na kukwenda na mongo mpe kusimba ndilu ya yawu. Muntu yina ke simba mongo, ba ke kufwa yandi. 13 Ata muntu mosi* ke simba muntu yina. Ba ke bula yandi matadi, to ba ke tobola yandi.* Ya vanda kibulu to muntu, ba ke bika ve yandi moyo. Kasi ntangu ba ke kuwa makelele ya dimpoka ya dimeme ya bakala, ba lenda kwiza na mongo.”

14 Na yawu Moyize kulumukaka na mongo mpe kwendaka na sika ya bantu, mpe yandi bandaka kukumisa dikanda santu, mpe ba sukulaka bilele ya bawu. 15 Yandi zonzaka na bantu: “Beno bongama samu na kilumbu ya tatu. Beno vukisa ve nzutu na bakento ya beno.”*

16 Kilumbu ya tatu na suka, ya vandaka na kidumu mpe bansemo ya kidumu. Ya vandaka na dituti ya nene na zulu ya mongo mpe makelele ya ngolo ya dimpoka. Mpe kisika yina ba vandaka, dikanda nyonso bandaka kutekita. 17 Na yawu Moyize basisaka dikanda na kisika yina ba vandaka samu ba kwenda bwabana Nzambi ya tsyeleka, mpe ba telamaka na yisi ya mongo. 18 Mongo Sinayi vanda basisa mulinga na bisika nyonso samu Yehova kwizaka na zulu ya yawu na kati ya tiya. Mulinga ya yawu vanda kwenda na zulu mutindu mulinga ya fure, mpe mongo nyonso vanda ningana na ngolo. 19 Ntangu makelele ya dimpoka vanda lutila kukuma ngolo, Moyize vanda zonza, mpe Nzambi ya tsyeleka vanda pesa yandi mvutu.

20 Na yawu Yehova kulumukaka na zulu ya Mongo Sinayi, na nsongi ya mongo. Mpe Yehova bokilaka Moyize na nsongi ya mongo, mpe Moyize kwendaka.* 21 Yehova zonzaka na Moyize: “Kulumuka, mpe kebisa bantu na kusosa ve kuluta bandilu samu na kutala Yehova. Kana ve, mingi na kati ya bawu ke kufwa. 22 Mpe bika banganga-nzambi yina ke kwizaka ntangu nyonso pene-pene na Yehova kumikumisa santu, samu Yehova kufwa* ve bawu.” 23 Na yawu Moyize zonzaka na Yehova: “Bantu lenda kwiza ve na Mongo Sinayi, samu nge mosi me kebisa beto ti, ‘Tula bandilu zinga-zinga ya mongo, mpe kumisa yawu santu.’” 24 Kasi Yehova zonzaka na yandi: “Kwenda, kulumuka mpe vutuka dyaka awa na zulu kintwadi na Aroni, kasi kubika ve banganga-nzambi mpe dikanda sosa kukwiza na sika ya Yehova samu yandi kufwa ve bawu.” 25 Na yina, Moyize kulumukaka na sika ya bantu mpe zonzilaka bawu mambu yango.

20 Na manima, Nzambi zonzaka bamambu nyonso yayi:

2 “Mu kele Yehova Nzambi ya nge, yina basisaka nge na bwala ya Ezipte, na yinzo ya bungaamba. 3 Nge me fwana ve kuvanda na banzambi ya nkaka, katula munu.*

4 “Nge me fwana ve kusala samu na nge mosi kiteki, to kima mosi yina me fwanana na* kima nyonso yina ke kuna na zulu, to yina ke awa na ntoto, to yina ke na maza, na yisi ya ntoto. 5 Nge me fwana ve kufukama na mantwala ya yawu to kubika ba nata nge na kusadila yawu, samu munu, Yehova Nzambi ya nge, mu ke Nzambi yina ke lombaka ti ba kangama kaka na yandi, Nzambi yina ke nataka kitumbu na bana samu na foti ya batata, na mbandu* ya tatu mpe na mbandu ya yiya ya bantu yina ke yiinaka munu, 6 kasi mu ke lakisaka luzolo ya kukwikama na mbandu ya 1 000 ya bantu yina ke zolaka munu mpe yina ke tumamaka na misiku ya munu.

7 “Nge me fwana ve kusadila nkumbu ya Yehova Nzambi ya nge na mutindu ya yimbi, samu ti Yehova ke pesa kitumbu na muntu yina ke sadila nkumbu ya yandi na mutindu ya yimbi.

8 “Bambuka moyo kilumbu ya saba samu ya vanda kaka santu. 9 Nge me fwana kusala, mpe kulungisa bisalu ya nge nyonso na kati ya bilumbu 6, 10 kasi kilumbu ya 7 ke saba samu na Yehova Nzambi ya nge. Nge me fwana kusala ata kisalu mosi, ya vanda nge, mwana ya nge ya bakala, mwana ya nge ya kento, kisadi ya nge ya bakala, kisadi ya nge ya kento, kibulu ya nge ya bwala, to nzenza yina ke na bisika yina nge ke vandaka,* 11 samu na bilumbu 6 Yehova salaka mazulu, ntoto, mubu mpe bima nyonso yina ke na kati ya yawu, mpe na kilumbu ya 7, yandi bandaka kupema. Ni na yawu Yehova sakumunaka kilumbu ya saba, mpe kumisaka yawu santu.

12 “Pesa tata ya nge na mama ya nge lukumu, samu nge zinga ntangu mingi na ntoto yina Yehova Nzambi ya nge me pesa nge.

13 “Nge fwana kufwa ve muntu.

14 “Nge fwana kusala ve kinsuza.*

15 “Nge fwana kulaba ve.

16 “Nge fwana kupesa ve kimbangi ya luvunu na yina me tadila mpangi ya nge.

17 “Nge fwana kulula ve yinzo ya mpangi ya nge. Nge fwana kulula ve kento ya mpangi ya nge, to kisadi ya yandi ya bakala, to kisadi ya yandi ya kento, to ngombe ya yandi, to mbuluku ya yandi, to kima ni kima yina ke ya mpangi ya nge.”

18 Dikanda nyonso vanda kuwa makelele ya kidumu mpe ya dimpoka, mpe ba vanda tala bansemo ya kidumu mpe mongo yina vanda basisa mulinga. Ntangu ba talaka nyonso yayi, ba tekitaka, mpe ba telamaka ntama. 19 Na yawu ba zonzaka na Moyize: “Nge mosi zonza na beto mpe beto ke kuwa, kasi Nzambi zonza ve na beto, samu beto ke na boma ti beto ke kufwa.” 20 Moyize vutulaka na bawu: “Beno bika kuvanda na boma, mpamba ve Nzambi ya tsyeleka me kwiza samu na kumeka beno, samu beno tatamana kukima yandi mpe beno sala ve disumu.” 21 Na yawu dikanda vanda kaka ya kutelama ntama, kasi Moyize kwendaka pene-pene na dituti ya ndombe, kisika Nzambi ya tsyeleka vandaka.

22 Na manima Yehova zonzaka na Moyize: “Yayi ni mambu yina nge ke zonza na bantu ya Izraele, ‘Beno me tala beno mosi ti mu me zonza na beno katuka na zulu. 23 Beno me fwana ve kuyidika banzambi ya arza samu na kusambila yawu kisika mosi na munu, mpe beno me fwana ve kuyidika banzambi ya wolo samu na beno mosi. 24 Nge me fwana kuyidikila munu dikuku ya minkayulu ya ntoto, mpe na zulu ya yawu nge ke pesa makabu ya nge ya kuyoka, minkayulu* ya nge ya kizunu, mameme ya nge mpe bangombe ya nge. Bisika nyonso yina mu ke sala ti ba bambuka moyo nkumbu ya munu, mu ke kwiza na sika ya nge mpe mu ke sakumuna nge. 25 Kana nge yidikila munu dikuku ya minkayulu ya matadi, nge me fwana kusadila ve matadi yina ba me zenga na bisalulu, samu ti kana nge sadila mbele ya nge na zulu ya yawu, nge ke kumisa yawu kima ya mpamba. 26 Nge me fwana kusadila ve eskalye samu na kukwenda na zulu* ya dikuku ya munu ya minkayulu, samu kimpene ya nge talana ve.’

21 “Yayi ke banzengolo yina nge me fwana kuzabisa bawu:

2 “Kana nge me sumba ngaamba mosi ya Muebre, yandi ke vanda ngaamba na kati ya bamvula 6, kasi na mvula ya 7, yandi ke kuzwa kimpwanza ata kufuta kima. 3 Kana yandi kwizaka yandi mosi, yandi fwana kukwenda yandi mosi. Kana yandi ke na kento, kento ya yandi fwana kukwenda na yandi. 4 Kana mfumu ya yandi me pesa yandi kento, mpe kento yango me butila yandi bana ya babakala mpe ya bakento, kento yango na bana ya yandi ke vanda ya mfumu ya yandi, mpe yandi ke kwenda yandi mosi. 5 Kasi, kana ngaamba yango ke na bikaka ve kuzonza, ‘Mu zola mfumu ya munu, kento ya munu mpe bana ya munu, mu ke ve na nsatu ya kimpwanza,’ 6 mfumu ya yandi fwana kunata yandi na mantwala ya Nzambi ya tsyeleka. Na manima, mfumu ya yandi fwana kunata yandi pene-pene na mwelo to dikunzi ya mwelo, mpe kutobola yandi dikutu na muntuma, mpe yandi ke vanda ngaamba ya yandi luzingu ya yandi nyonso.

7 “Kana muntu me tekisa mwana ya yandi ya kento mutindu ngaamba, mwana ya kento yango ke kuzwa ve kimpwanza mutindu bangaamba ya babakala ke kuzwaka yawu. 8 Kana mfumu ya mwana ya kento yango me sepela ve na yandi mpe mfumu yayi me baka ve yandi mutindu dikangu, kasi yandi me sala ti muntu ya nkaka sumba* mwana ya kento yango, mfumu yayi ke vanda ve na muswa ya kutekisa yandi na banzenza, samu yandi me vuna mwana ya kento yina. 9 Kana yandi me soola yandi samu na mwana ya yandi ya bakala, yandi ke pesa yandi muswa yina mwana ya kento ke vandaka na yawu. 10 Kana yandi me baka kento ya nkaka, yandi fwana kukatula ata kima na madya ya kento ya ntete, bilele ya yandi mpe bansatu ya yandi ya makwela. 11 Kana yandi sala ve bamambu tatu yayi samu na mwana ya kento yango, mwana ya kento yango ke na kimpwanza. Yandi lenda kwenda ata kufuta mbongo.

12 “Muntu yina me bula mpangi tii na kufwa yandi, ba fwana kufwa yandi. 13 Kasi kana yandi me sala ve yawu na nko, mpe ti Nzambi ya tsyeleka me bika ti ya salama, mu ke lakisa nge kisika yina yandi lenda kima. 14 Kana muntu me kuma na nkele mingi samu na mpangi ya yandi, mpe yandi me kufwa mpangi yango na nko, ba fwana kufwa yandi ata ti yandi me kwenda bumbana pene-pene na dikuku ya munu ya minkayulu. 15 Muntu yina me bula tata ya yandi to mama ya yandi, ba fwana kufwa yandi.

16 “Kana muntu me kanga muntu ya nkaka mpe me tekisa yandi, to ba me kuta muntu yina yandi me kanga na sika ya yandi, ba fwana kufwa yandi.

17 “Muntu yina me loka* tata ya yandi to mama ya yandi, ba fwana kufwa yandi.

18 “Yayi ni mambu ke salama kana bantu me swana mpe mosi me bula mpangi ditadi to dikofi,* mpe muntu yina ba me bula me kufwa ve kasi ke na katukaka dyaka ve na mfulu: 19 Kana yandi lenda telama, kubasika na ngaanda mpe kutambula na yinti, ba ke pesa ve kitumbu na muntu yina me bula yandi. Yandi ke futa kaka ntangu yina muntu yina ke na mputa me lenda ve kusala tii ntangu yandi ke beluka.

20 “Kana muntu me bula ngaamba ya yandi ya kento to ya bakala na yinti, mpe ngaamba yango me kufwa na maboko ya yandi, ba me fwana kuvutula yimbi na yimbi. 21 Kasi, kana ngaamba yango me zinga dyaka kilumbu mosi to bilumbu zole, ba ke vutula ve yimbi na yimbi, samu ti mfumu ya yandi sumbaka yandi na mbongo ya yandi mosi.

22 “Kana babakala ke na nwanaka mpe ba me tuta kento yina ke na kivumu, mpe kento yango me buta tekila bangonda ya yandi lunga,* kasi kana kututana yango me kufwa ve muntu,* muntu yina me sala yawu ke futa amande yina bakala ya kento yango ke lomba. Yandi ke futa yawu na manima ya bazuzi. 23 Kasi, kana kututana yayi me kufwa muntu, nge me fwana kupesa luzingu samu na luzingu,* 24 disu samu na disu, dinu samu na dinu, diboko samu na diboko, dikulu samu na dikulu, 25 kuya tiya samu na kuya tiya, mputa samu na mputa, dikofi samu na dikofi.

26 “Kana muntu me bula ngaamba ya yandi ya bakala to ya kento na disu, mpe yandi me tobola yandi yawu, yandi ke bika yandi kwenda; samu na disu ya yandi, yandi me kuzwa kimpwanza. 27 Mpe kana yandi me katula ngaamba ya yandi ya bakala to ya kento dinu, yandi ke bika yandi kwenda; samu na dinu ya yandi, yandi me kuzwa kimpwanza.

28 “Kana ngombe me bula bakala to kento mosi na mampoka ya yandi, mpe muntu yango me kufwa, ba me fwana kufwa ngombe yina na matadi, mpe ba ke kudya ve musuni ya yandi. Kasi ba ke pesa ve muntu ya kuzwa yawu kitumbu. 29 Kasi kana ngombe vandaka na kifu ya kubulaka bantu na mampoka ya yandi, mpe kana ba zabisaka yawu na muntu ya kuzwa yandi, kasi yandi bumbaka ve kibulu ya yandi mpe yandi me kufwa bakala to kento, ba me fwana kufwa ngombe yango na matadi, mpe muntu ya kuzwa yandi mpe, ba me fwana kufwa yandi. 30 Kana ba me lomba yandi ntalu ya kufuta,* yandi me fwana kufuta nyonso yina ba me lomba yandi samu na kusumba dyaka luzingu* ya yandi. 31 Kana ngombe me bula mwana ya bakala to mwana ya kento na mampoka ya yandi, ba ke sadila muntu ya kuzwa yandi nzengolo yayi. 32 Kana ngombe me bula na mampoka ya yandi ngaamba ya bakala to ya kento, muntu ya kuzwa ngombe me fwana kufuta bashekele* 30 na muntu ya kuzwa ngaamba, mpe ba fwana kufwa ngombe na matadi.

33 “Kana muntu me bika dibulu mwasi, to yandi me timuna dibulu mpe me kanga ve yawu, mpe kana ngombe to mbuluku me kubwa na kati, 34 muntu ya kuzwa dibulu me fwana kufuta. Yandi ke futa ntalu ya kibulu na muntu ya kuzwa kibulu, mpe kibulu yina me kufwa ke kuma ya yandi. 35 Kana ngombe ya muntu me tuta ngombe ya muntu ya nkaka mpe yandi me kufwa, ba fwana kutekisa ngombe ya moyo mpe kukabula mbongo. Ba fwana kukabula mpe ngombe ya kufwa. 36 To kana ya vandaka ya kuzabana ti ngombe mosi vandaka na kifu ya kubulaka bibulu ya nkaka na mampoka ya yandi, kasi muntu ya kuzwa yandi bumbaka ve yandi, yandi fwana kufuta ngombe samu na ngombe, mpe kibulu ya kufwa ke vanda ya yandi.

22 “Kana muntu me laba ngombe to dimeme, mpe yandi me kufwa yawu to yandi me tekisa yawu, yandi ke futa bangombe tanu samu na ngombe mosi, mpe mameme yiya samu na dimeme mosi.

2 (“Kana ba me bwila muyibi ke na fungulaka yinzo samu yandi laba, mpe kana ba me bula yandi mpe yandi me kufwa, menga ya yandi ke ve na yintu ya muntu yina me kufwa yandi. 3 Kasi, kana ya me salama na manima ya kubasika ya ntangu, menga ya yandi ke vanda na zulu ya yintu ya muntu yina me kufwa yandi.)

“Yandi me fwana kufuta. Kana yandi ke ve na kima, ba ke tekisa yandi samu na kufuta bima yina yandi me laba. 4 Kana ba me tala ti kima yina yandi labaka ke moyo na sika ya yandi, ya vanda ngombe, mbuluku to dimeme, yandi ke futa yawu bambala zole.

5 “Kana muntu me kwenda dikisa bibulu ya yandi na bilanga to na bilanga ya vinu, mpe yandi me bika ba kudya na bilanga ya muntu ya nkaka, yandi ke pesa bima ya kulutila mbote ya bilanga ya yandi mpe ya bilanga ya yandi ya vinu samu na kufuta yawu.

6 “Kana tiya me banda, mpe ya me kwenda tii na bayinti ya bansende, mpe ya me nyengisa bikunku ya matiti ya ble, to bambuma yina nabunu ba katula, to bilanga, muntu yina me tula tiya yango me fwana kufuta bima yina me nyengana.

7 “Kana muntu me bumbisa mbongo to bima na mpangi, mpe ba me laba yawu na yinzo ya yandi, kana ba me bwila muyibi yina, yandi fwana kufuta bambala zole. 8 Kana ba me bwila ve muyibi yango, ba ke nata muntu ya kuzwa yinzo na mantwala ya Nzambi ya tsyeleka, samu na kuzaba kana ni yandi bakaka bima ya mpangi ya yandi to ve. 9 Kana ba me funda muntu ti yandi ke na kima yina ke ve ya yandi, ya vanda ngombe, mbuluku, dimeme, kinkuti to kima ni kima yina me zimbana, mpe mpangi me zonza ti, ‘Ya ke ya munu,’ bawu nyonso zole me fwana kunata mambu yayi na mantwala ya Nzambi ya tsyeleka. Muntu yina Nzambi ke zonza ti yandi ke na foti ke futa mpangi ya yandi bambala zole.

10 “Kana muntu me bumbisa na sika ya mpangi ya yandi mbuluku, to ngombe, to dimeme, to kibulu ya nkaka ya bwala, mpe kibulu yango me kufwa to me zengana kinama, to ba me nata yawu mpe ata muntu me tala, 11 muntu yango me fwana kuzenga ndefi na mantwala ya Yehova ti yandi me baka ve bima ya mpangi ya yandi, mpe muntu ya kuzwa kibulu me fwana kundima yawu. Mpangi ya muntu yayi ke futa ve. 12 Kasi kana ba me yiba kibulu na sika ya yandi, yandi ke futa muntu ya kuzwa yawu. 13 Kana ni kibulu ya brusu pasulaka yawu, yandi ke nata yawu samu na kulakisa yawu mutindu kimbangi. Yandi ke futa ve samu na kibulu yina kibulu ya brusu me pasula.

14 “Kasi, kana muntu me defa kibulu ya mpangi ya yandi, mpe kibulu me zengana kinama to me kufwa ntangu muntu ya kuzwa yawu ke ve kuna, muntu yina me defa yawu fwana kufuta. 15 Kana muntu ya kuzwa yawu ke kuna, muntu yina me defa ke futa ve. Kana yandi futaka mbongo samu na kudefa yawu, mbongo yina me lunga.

16 “Kana bakala mosi me sosa makangu na mwana mosi ya kento yina zaba ntete ve babakala mpe yina ke ve na nsilulu ya makwela , mpe yandi me vukisa nzutu na yandi, bakala yango me fwana kufuta mbongo ya makwela samu yandi kuma kento ya yandi. 17 Kana tata ya yandi me manga ya yandi kupesa mwana ya yandi ya kento na bakala yayi, bakala yango me fwana kufuta ntalu yina ba me zenga samu na mbongo ya makwela.

18 “Nge me fwana ve kubika ndoki ya kento moyo.

19 “Muntu yina ke vukisa nzutu na kibulu, ya tsyeleka, ba me fwana kufwa yandi.

20 “Muntu yina ke pesa minkayulu na banzambi ya nkaka, na kisika ya kupesa kaka na Yehova, ba me fwana kufwa yandi.

21 “Nge me fwana ve kunyokola nzenza yina ke vandaka na bwala ya nge to kutalisa yandi mpasi, samu beno mpe vandaka banzenza na bwala ya Ezipte.

22 “Beno me fwana ve kunyokola mufwidi ya kento to mwana yina ke ve na tata.* 23 Kana nge me nyokola yandi ata mwa fioti, mpe yandi me dila na sika ya munu, ntembe ve, mu ke kuwa bidilu ya yandi, 24 mu ke dasuka mpe mu ke kufwa beno na mbele ya mvita, mpe bakento ya beno ke kuma mifwidi mpe bana ya beno ke kuma bana yina ke ve na batata.

25 “Kana nge defisa mbongo na muntu ya dikanda ya munu yina ke povre* mpe yina ke vandaka pene-pene na nge, nge fwana kukuma ve mutindu muntu yina ke defisaka mbongo.* Kulomba ve kima na zulu ya mbongo yina.

26 “Kana nge me simba kinkuti ya mpangi ya nge samu yandi ke na defaka nge, nge fwana kuvutula yandi yawu tekila ntangu kota, 27 samu kaka ni divunga yina ke na yandi, lele yina yandi ke fukaka nzutu.* Ntangu yandi ke lala, yandi ke fuka nzutu na yinki? Ntangu yandi ke dila na sika ya munu, ntembe ve, mu ke kuwa bidilu ya yandi, samu mu ke na ntima ya kyadi.

28 “Nge me fwana ve kuloka* Nzambi, to kuloka mfumu* mosi ya dikanda ya nge.

29 “Nge me fwana ve kuvingila na kupesa munu ndambu ya bambuma mingi yina bilanga ya nge me buta, to vinu mpe mafuta yina me lutila na bikamununu* ya nge. Nge ke pesa munu mwana ya ntete na kati ya bana ya nge ya babakala. 30 Yayi ni mambu yina nge ke sala na ngombe mpe dimeme ya nge: Yandi ke vanda na mama ya yandi bilumbu 7, mpe kilumbu ya 8, nge ke pesa munu yandi.

31 “Beno me fwana kuvanda bantu ya santu samu na munu, mpe beno me fwana kudya ve musuni ya kibulu yina kibulu ya brusu me pasula na bilanga. Beno ke losila yawu bayimbwa.

23 “Nge me fwana ve kumwangisa* nsangu ya luvunu. Kukuma ve mbangi ya luvunu samu na kusadisa muntu ya yimbi. 2 Nge me fwana ve kulanda bantu mingi samu na kusala mambu ya yimbi. Ntangu nge ke na pesaka kimbangi, nge me fwana ve kutengimisa lunungu* samu na kusepelisa bantu mingi.* 3 Nge me fwana ve kulakisa kifu ya kusoolaka bizizi na mambu yina me tadila muntu yina ke povre.

4 “Kana nge tala ngombe to mbuluku yina mbeni ya nge me zimbisa, nge fwana kunatina yandi yawu. 5 Kana nge me tala ti mbuluku ya muntu yina ke yiinaka nge me kubwa na yisi ya kifunda ya yandi, nge me fwana ve kusala mutindu nge me tala ve yawu mpe kukwenda. Nge me fwana kusadisa yandi na kutelemisa kibulu yango.

6 “Nge me fwana ve kutengimisa lusambusu na mambu yina me tadila muntu yina ke povre.

7 “Kukota ve na mambu ya kuvunina bantu bamambu, mpe kufwa ve muntu yina me sala ve mambu to muntu ya lunungu, samu mu ke zonza ve ti muntu ya yimbi ke muntu ya lunungu.*

8 “Nge me fwana ve kundima madeso ya bana, samu madeso ya bana ke kangaka meso ya bantu yina ke talaka mbote-mbote, mpe ya lenda tengimisa bamambu yina bantu ya lunungu ke zonzaka.

9 “Nge me fwana ve kunyokola nzenza yina ke zingaka na bwala ya nge. Beno me zaba yinki ya ke salaka kuvanda nzenza,* samu beno mpe vandaka banzenza na bwala ya Ezipte.

10 “Na kati ya bamvula 6, nge ke kunda bambuma na bilanga ya nge, mpe nge ke buka bima yina ya ke buta. 11 Kasi na mvula ya 7, nge ke kunda ve, nge ke bika bilanga pema. Bapovre ya dikanda ya nge ke kudya bambuma yina ke kula yawu mosi, mpe bibulu ya brusu ke kudya yina ba ke bika. Nge ke sala faso mosi na bilanga ya nge ya vinu, mpe bilanga ya nge ya bayinti ya olive.

12 “Nge ke sala kisalu ya nge na kati ya bilumbu 6. Kasi kilumbu ya 7, nge ke sala ve samu ngombe ya nge mpe mbuluku ya nge pema, mpe samu mwana ya bakala ya kisadi ya nge ya kento mpe nzenza yina ke vandaka na bwala ya nge kuzwa dyaka ngolo.

13 “Beno me fwana kusala ngolo na kusala bamambu nyonso yina mu me zonzila beno, mpe beno me fwana ve kutanguna bankumbu ya banzambi ya nkaka. Ba me fwana ve kuwa yawu na bayinwa ya beno.

14 “Bambala tatu na mvula, nge me fwana kusadila munu mukembo. 15 Nge ke sala Mukembo ya Mampa yina ke ve na levire. Nge ke kudya mampa yina ke ve na levire na kati ya bilumbu 7, kaka mutindu mu tumisaka nge, na ntangu ya yawu na ngonda ya Abibe,* samu ti ni na ntangu yina nge basikaka na Ezipte. Ata muntu ke kwiza na mantwala ya munu maboko mpamba. 16 Nge ke sala mpe Mukembo ya Kubuka bambuma* ya ntete yina kisalu ya nge me buta na bilanga yina nge kundaka, mpe Mukembo ya Kuyonzika bambuma* na nsuka ya mvula, ntangu nge ke kutika bambuma yina kisalu ya nge ya ngolo na bilanga me buta. 17 Bambala tatu na mvula, babakala nyonso ya dikanda ya nge me fwana kukwenda na mantwala ya Mfumu ya tsyeleka, Yehova.

18 “Nge me fwana ve kupesa menga ya munkayulu ya munu kintwadi na kima yina ke na levire. Mpe minkayulu ya mafuta yina ba ke pesaka na mikembo ya munu fwana kukuma ve tii na suka ya kilumbu yina ke landa.

19 “Nge ke nata na yinzo ya Yehova Nzambi ya nge bambuma ya kulutila mbote na kati ya bambuma ya ntete ya bilanga* ya nge.

“Nge me fwana ve kutokisa mwana ya nkombo na kati ya miliki ya mabene ya mama ya yandi.

20 “Mu ke na filisaka mbazi na mantwala ya nge samu na kubumba nge na nzila, mpe kukotisa nge na kisika yina mu me yidika. 21 Teka yandi dikebi mpe tumama na yandi.* Kusala ve yandi yintu ngolo samu yandi ke lemvokila ve bafoti ya nge, samu ti nkumbu ya munu ke na kati ya yandi. 22 Kasi kana nge tumama mbote-mbote na yandi* mpe nge sala mambu nyonso yina mu me zonza na nge, mu ke vanda mbeni ya bambeni ya nge, mpe mu ke telemina ba yina ke na teleminaka nge. 23 Mbazi ya munu ke tambula na mantwala ya nge, mpe ke nata nge na sika ya Baamorite, ya Bahitite, ya Baperizite, ya Bakanana, ya Bahivite, mpe ya Bayebuzite, mpe mu ke manisa bawu. 24 Nge me fwana ve kufukama na mantwala ya banzambi ya bawu, to kubika ba nata nge na kusambila bawu, mpe nge me fwana ve kulanda bansalulu ya bawu. Kasi, nge me fwana kumwangisa banzambi ya bawu mpe makunzi ya bawu ya lusambu. 25 Beno me fwana kusadila Yehova Nzambi ya beno, mpe yandi ke sakumuna dimpa ya beno mpe maza ya beno. Mu ke katula maladi na kati-kati ya beno. 26 Bivumu ya bakento ya bwala ya nge ke katuka ve, mpe ba ke vanda ve bisita, mpe mu ke pesa nge luzingu ya yinda.*

27 “Mu ke sala ti makanda vanda na boma ya munu tekila nge kuma kuna, mpe mu ke kotisa muvusu na kati ya makanda nyonso yina nge ke kutana na bawu, mpe mu ke sala ti bambeni ya nge nyonso kima na mantwala ya nge.* 28 Tekila nge kuma kuna, mu ke sala ti ba lemba,* mpe mu ke bingisa Bahivite, Bakanana, mpe Bahitite na mantwala ya nge. 29 Mu ke bingisa ve bawu na mantwala ya nge kaka na mvula mosi, samu ya kuma ve bwala yina ke ve na bantu mpe bibulu ya brusu kuma ve mingi mpe ba talisa ve nge mpasi. 30 Mu ke bingisa bawu na mantwala ya nge malembe-malembe tii ntangu nge ke buta mingi mpe nge ke baka bwala yango.

31 “Mu ke tula ndilu ya nge kubanda na Mubu ya Mbwaki tii na mubu ya bantu ya Filisti, mpe kubanda na ntoto ya kuyuma tii na Nzadi.* Ya tsyeleka, mu ke pesa bantu ya bwala yina na maboko ya nge, mpe mu ke bingisa bawu na mantwala ya nge. 32 Nge me fwana ve kusala luwawanu na bawu to na banzambi ya bawu. 33 Ba me fwana ve kuvanda na bwala ya nge, samu ba nata ve nge na kusumuka na ntadisi ya munu. Kana nge sadila banzambi ya bawu, ya ke kuma mutambu samu na nge.”

24 Na manima yandi zonzaka na Moyize: “Yuluka* na sika ya Yehova, nge na Aroni, Nadabi na Abiwu, mpe babakala 70 na kati ya bakuluntu ya Izraele, mpe beno fukama mwa ntama. 2 Kaka ni Moyize ke kwiza pene-pene ya Yehova; ba ya nkaka me fwana ve kukwiza pene-pene, mpe dikanda ke kwiza ve na zulu kintwadi na yandi.”

3 Moyize kwizaka zabisa dikanda bamambu nyonso yina Yehova zonzaka, mpe misiku* nyonso; mpe dikanda nyonso vukisaka bandinga mpe zonzaka: “Mambu nyonso yina Yehova me zonza, beto ke sala yawu.” 4 Na yawu Moyize sonikaka bamambu nyonso yina Yehova zonzaka. Na manima yandi telamaka na suka-suka, mpe na yisi ya mongo, yandi yidikaka dikuku ya minkayulu mpe makunzi 12 samu na mabuta 12 ya Izraele. 5 Na manima yandi filisaka bantwenya ya babakala ya Izraele, mpe ba pesaka makabu ya kuyoka, mpe bangombe ya babakala mutindu minkayulu ya kizunu samu na Yehova. 6 Moyize bakaka ndambu ya menga, mpe tulaka yawu na kati ya bandonga, mpe ndambu ya nkaka yandi mwangisaka yawu na zulu ya dikuku ya minkayulu. 7 Na manima yandi bakaka buku ya luwawanu mpe tangaka yawu na ndinga ya ngolo na mantwala ya dikanda. Ba zonzaka: “Mambu nyonso yina Yehova me zonza, beto ke sala yawu, mpe beto ke tumama.” 8 Na yawu Moyize bakaka menga, mwangisaka yawu na zulu ya dikanda mpe zonzaka: “Yayi ni menga ya luwawanu yina Yehova me sala na beno na kulandaka bamambu nyonso yayi.”

9 Moyize na Aroni, Nadabi na Abiwu, mpe babakala 70 na kati ya bakuluntu ya Izraele kwendaka,* 10 mpe ba talaka Nzambi ya Izraele. Na yisi ya makulu ya yandi vandaka na kima mutindu dale* ya matadi ya safire, mpe ya vandaka bunkete mutindu zulu. 11 Yandi salaka ve yimbi na babakala ya lukumu ya Izraele. Ba talaka Nzambi ya tsyeleka na kimona-meso, ba kudyaka mpe ba kunwaka.

12 Na manima Yehova zonzaka na Moyize: “Kwiza na zulu ya mongo, na sika ya munu, mpe vanda kuna. Mu ke pesa nge matadi yina ke na misiku mpe mikanu yina mu ke sonika samu na kulonga bawu.” 13 Na yawu Moyize telamaka na kisadi ya yandi Yozue, mpe Moyize kwendaka na zulu ya mongo ya Nzambi ya tsyeleka. 14 Kasi Moyize zonzaka na bakuluntu: “Beno vingila beto awa tii ntangu beto ke vutuka na sika ya beno. Aroni na Hure ke na beno. Kana muntu ke na dyambu ya kusambisa, yandi lenda kwenda tala bawu.” 15 Na manima Moyize kwendaka na zulu ya mongo ntangu dituti vanda fuka yawu.

16 Nkembo ya Yehova bikanaka na zulu ya Mongo Sinayi, mpe dituti fukaka yawu na kati ya bilumbu 6. Na kilumbu ya 7, yandi bokilaka Moyize katuka na kati-kati ya dituti. 17 Na meso ya bantu ya Izraele yina vanda tala, nkembo ya Yehova vanda talana mutindu tiya yina ke na nyengisaka bima na nsongi ya mongo. 18 Na yawu Moyize kotaka na kati ya dituti mpe kwendaka na zulu ya mongo. Moyize bikanaka na mongo bilumbu 40 mpe bampimpa 40.

25 Na manima Yehova zonzaka na Moyize: 2 “Zonza na bantu ya Izraele na kukatudila munu dikabu; beno ke bakila munu dikabu na sika ya muntu nyonso yina ntima ya yandi ke nata yandi na kupesa. 3 Yayi ni makabu yina beno ke ndima na sika ya bawu: wolo, arza, kwivre, 4 singa ya bleu, singa ya lene ya mbwaki-viole, singa ya mbwaki ya ngolo, singa ya lino ya kitoko, mika* ya nkombo, 5 bampusu ya mbwaki ya dimeme ya bakala, bampusu ya kibulu yina ba ke bokilaka foke, mabaya ya akasia, 6 mafuta samu na bamwinda, kima ya nsunga ya kitoko yina ba ke bokilaka balzame samu na kuyidika mafuta ya santu, mpe samu na ansan ya nsunga ya kitoko, 7 matadi ya oniksi, matadi ya nkaka yina ba ke tula na efode mpe na kitende ya ntulu. 8 Ba ke yidikila munu kisika ya santu, mpe mu ke zinga na kati-kati ya bawu. 9 Beno ke yidika tabernakle mpe bima ya yawu nyonso na kulandaka kifwani yina mu ke na lakisaka nge.

10 “Ba ke yidika sanduku na mabaya ya akasia. Yinda ya yawu ke vanda bakude* zole na ndambu, nene ya yawu kude mosi na ndambu, mpe ntela ya yawu kude mosi na ndambu. 11 Nge ke pakula yawu wolo yina ba me vukisa na ata kima. Nge ke pakula yawu na kati mpe na ngaanda, mpe nge ke sala ndilu ya wolo zinga-zinga ya yawu. 12 Nge ke sulumukisa wolo samu na kuyidikila sanduku milunga yiya, mpe nge ke tula milunga yango na zulu ya makulu yiya ya sanduku, milunga zole na lweka mosi mpe milunga zole na lweka ya nkaka. 13 Nge ke sala bayinti na mabaya ya akasia mpe nge ke pakula yawu wolo. 14 Nge ke lutisa bayinti na kati ya milunga yina ke na balweka ya Sanduku samu na kunanguna Sanduku na yawu. 15 Bayinti ke bikana na kati ya milunga ya Sanduku mpe ba ke katula ve yawu kuna. 16 Nge ke tula Kimbangi yina mu ke pesa nge na kati ya Sanduku.

17 “Nge ke yidika kitapu na wolo yina ba me vukisa na ata kima. Yinda ya yawu ke vanda bakude zole na ndambu mpe nene ya yawu kude mosi na ndambu. 18 Nge ke yidika basherube zole ya wolo; nge ke sadila marto samu na kusala yawu na bansongi zole ya kitapu. 19 Sala basherube na bansongi zole, sherube mosi na konso nsongi ya kitapu. 20 Basherube ke vanda ya kufungula mapapu ya bawu nyonso zole na zulu, mapapu yango ke fuka kitapu, mpe ba ke vanda ya kutalasana. Bizizi ya basherube ke tala kitapu. 21 Nge ke tula kitapu na zulu ya Sanduku, mpe nge ke tula na kati ya Sanduku Kimbangi yina mu ke pesa nge. 22 Mu ke talana na nge na zulu ya kitapu mpe ni kuna mu ke zonza na nge. Na kati-kati ya basherube zole yina ke na zulu ya Sanduku ya Kimbangi, mu ke zabisa nge bamambu nyonso yina mu ke tumisa nge na kuzonzila na bantu ya Izraele.

23 “Nge ke yidika mpe mesa na mabaya ya akasia. Yinda ya yawu ke vanda bakude zole, nene ya yawu kude mosi, mpe ntela ya yawu kude mosi na ndambu. 24 Nge ke pakula yawu wolo yina ba me vukisa na ata kima, mpe nge ke sala ndilu ya wolo zinga-zinga ya yawu. 25 Nge ke sadila yawu kadre yina ke vanda na nene ya misapi yiya ya kukangama,* mpe nge ke sala ndilu ya wolo zinga-zinga ya kadre yina. 26 Nge ke sadila yawu milunga yiya ya wolo, mpe nge ke tula milunga yango na bansongi yiya, kisika yina makulu kele. 27 Milunga ke vanda pene-pene na kadre mutindu bima yina ke simba bayinti samu na kunanguna mesa. 28 Nge ke sala bayinti na mabaya ya akasia mpe nge ke pakula yawu wolo. Ba ke sadila yawu samu na kunanguna mesa.

29 “Nge ke sala mpe bandonga ya yawu, bakopo ya yawu, mayuki ya yawu mpe bandonga ya yawu ya nene yina ba ke sadila samu na kutyamuna makabu ya malafu. Nge ke sala yawu na wolo yina ba me vukisa na ata kima. 30 Mpe nge ke tula mampa ya kulakisa* na zulu ya mesa na mantwala ya munu ntangu nyonso.

31 “Nge ke sala kima ya kutudila bamwinda na wolo yina ba me vukisa na ata kima. Ba ke sadila marto samu na kusala yawu. Yisi ya yawu, yinti ya yawu, babranshe ya yawu, bakopo ya yawu, bambuma ya yawu mpe bafololo ya yawu ke sala kaka kima mosi. 32 Babranshe 6 ke basika na yinti ya kima ya kutudila bamwinda, babranshe tatu na lweka mosi mpe babranshe tatu na lweka ya nkaka. 33 Na konso branshe, ya ke vanda na bakopo tatu yina ba me yidika mutindu bafololo ya yinti ya amande. Mpe na yisi ya konso kopo, ya ke vanda na mbuma mpe kima mutindu fololo yina ke na sosaka kufunguka. Ni mutindu yina ya ke vanda samu na babranshe 6 yina ke basika na yinti ya kima ya kutudila bamwinda. 34 Na yinti ya kima ya kutudila bamwinda, ya ke vanda na bakopo yiya yina ke mutindu bafololo ya yinti ya amande, mpe na yisi ya konso kopo, ya ke vanda na mbuma mpe kima mutindu fololo yina ke na sosaka kufunguka. 35 Ya ke vanda na mbuma na yisi ya babranshe zole ya ntete yina ke na basikaka na yinti, mpe mbuma na yisi ya babranshe zole yina ke landa, mpe mbuma na yisi ya babranshe zole ya nsuka. Ya ke vanda mutindu yina samu na babranshe 6 ya yinti. 36 Bambuma, babranshe mpe kima ya kutudila bamwinda yawu nyonso ke sala kaka kima mosi. Ba ke sala yawu na wolo yina ba me vukisa na ata kima mpe yina me bulama na marto. 37 Beno ke sadila yawu bamwinda 7, mpe ntangu beno ke namisa yawu, ya ke pesa nsemo na kisika yina ke na mantwala ya yawu. 38 Bisimbulu* ya yawu mpe bima ya yawu ya kutudila tiya, ba ke yidika yawu na wolo yina ba me vukisa na ata kima. 39 Samu na kusala yawu mpe bisalulu ya yawu, ba ke sadila talanta* mosi ya wolo yina ba me vukisa na ata kima. 40 Ntangu nge ke sala yawu, sala nyonso na kulanda kifwani yina ba lakisaka nge na mongo.

26 “Nge ke sala tabernakle na balele 10 ya singa ya lino ya kitoko yina me futamaka-futamaka, na singa ya bleu, na singa ya lene ya mbwaki-viole mpe na singa ya mbwaki ya ngolo. Nge ke tunga bizizi ya basherube na zulu ya balele. 2 Konso lele ke vanda na yinda ya bakude* 28 mpe nene ya bakude 4. Balele nyonso ke vanda nene mosi. 3 Ba ke vukisa balele tanu na mulonga mosi, mpe balele tanu ya nkaka na mulonga ya nkaka. 4 Nge ke sala mabulu na nsuka ya lele yina ke na nsuka ya mulonga ya ntete ya balele, mpe nge ke sala mutindu mosi samu na lele ya nsuka ya mulonga ya nkaka ya balele, kisika yina milonga zole ya balele ke vukana. 5 Nge ke sala mabulu 50 na lele mosi, mpe mabulu 50 na nsuka ya lele ya nkaka, samu ya talasana kisika yina ya ke vukana. 6 Nge ke sala bakroshe 50 ya wolo mpe nge ke vukisa balele ya tenta na bakroshe yina. Na yawu ya ke kuma lele mosi ya nene samu na tabernakle.

7 “Nge ke sala mpe balele na mika ya nkombo samu na kufuka tabernakle. Nge ke sala balele 11. 8 Konso lele ke vanda na yinda ya bakude 30 mpe na nene ya bakude 4. Balele nyonso 11 ke vanda nene mosi. 9 Nge ke vukisa balele 5, mpe nge ke vukisa balele ya nkaka 6, mpe nge ke futika lele ya 6 na mantwala ya tenta. 10 Nge ke sala mabulu 50 na nsuka ya lele mosi, lele yina ke na nsuka ya mulonga ya ntete, mpe mabulu 50 na nsuka ya lele ya mulonga ya nkaka, na kisika yina ya ke vukana. 11 Nge ke sala bakroshe ya kwivre 50, mpe nge ke tula bakroshe na kati ya mabulu, mpe kuvukisa balele, mpe ya ke kuma lele mosi samu na kufuka tabernakle. 12 Kitini ya balele yina ke bikana ke vanda ya kulelama. Ndambu ya lele yina ke bikana ke kubwa na manima ya tabernakle. 13 Na konso lweka ya tabernakle, kude mosi ya balele ke bikana, mpe ya ke kubwa samu na kufuka yawu.

14 “Nge ke sala mpe lele na mpusu ya mbwaki ya dimeme ya bakala samu na kufuka tenta, mpe na zulu ya yawu nge ke sala lele na mpusu ya kibulu yina ba ke bokilaka foke.

15 “Nge ke sala bakadre na mabaya ya akasia samu na tabernakle, mpe ya ke vanda ya kutelama. 16 Ntela ya konso kadre ke vanda bakude 10, mpe nene ya yawu ke vanda kude mosi na ndambu. 17 Konso kadre ke vanda na makulu* zole yina ke vanda pene-pene na bampangi. Ni mutindu yina nge ke sala bakadre nyonso ya tabernakle. 18 Nge ke sala bakadre 20 samu na lweka ya sude ya tabernakle.

19 “Nge ke sala bivwandulu 40 ya arza, yina ke na mabulu samu ya vanda na yisi ya bakadre 20. Ya ke vanda na bivwandulu zole na yisi ya kadre ya ntete samu na makulu ya yawu zole, mpe bivwandulu zole samu na makulu zole ya konso kadre yina ke landa. 20 Samu na lweka ya nkaka ya tabernakle, lweka ya nore, sala bakadre 20, 21 mpe bivwandulu ya yawu 40 ya arza, yina ke na mabulu. Bivwandulu zole ke vanda na yisi ya kadre ya ntete mpe bivwandulu zole na yisi ya konso kadre yina ke landa. 22 Samu na manima ya tabernakle, na westi, nge ke sala bakadre 6. 23 Nge ke sala bakadre zole samu ya vanda makunzi na bansongi zole na manima ya tabernakle. 24 Ya me fwana kuvanda zole kukatuka na yisi tii na zulu, tii na mulunga ya ntete. Nyonso zole ke vanda mutindu yina mpe ya ke kuma makunzi zole na bansongi. 25 Mpe ya ke vanda na bakadre 8 na bivwandulu ya yawu 16 ya arza, yina ke na mabulu. Bivwandulu zole ke vanda na yisi ya kadre ya ntete mpe bivwandulu zole na yisi ya konso kadre yina ke landa.

26 “Nge ke sala bayinti na mabaya ya akasia, bayinti tanu samu na bakadre ya lweka mosi ya tabernakle, 27 bayinti tanu samu na bakadre ya lweka ya nkaka ya tabernakle, mpe bayinti tanu samu na bakadre ya manima ya tabernakle, na lweka ya westi. 28 Yinti ya kati-kati yina ke luta na kati-kati ya bakadre ke banda na nsongi mosi tii na nsongi ya nkaka.

29 “Nge ke pakula bakadre wolo, mpe nge ke yidikila yawu milunga ya wolo samu ya simba bayinti, mpe nge ke pakula bayinti wolo. 30 Nge ke telemisa tabernakle na kulandaka kifwani yina ba lakisaka nge na mongo.

31 “Nge ke sala rido na singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. Ba ke tunga bizizi ya basherube na zulu ya yawu. 32 Nge ke tula yawu ya kulelama na makunzi yiya ya akasia yina ke ya kupakula wolo. Bakroshe ya yawu ke vanda ya wolo. Makunzi ke vanda ya kutelama na zulu ya bivwandulu yiya ya arza yina ke na mabulu. 33 Nge ke tula rido ya kulelama na yisi ya bakroshe, mpe nge ke kotisa sanduku ya Kimbangi kuna, na manima ya rido. Rido ke kabula Kisika ya santu na Kisika ya kulutila santu, samu na beno. 34 Nge me fwana kutula kitapu na zulu ya sanduku ya Kimbangi na Kisika ya kulutila santu.

35 “Nge ke tula mesa na kati ya Kisika ya santu.* Mesa ke vanda na lweka ya nore, mpe ya ke talasana na kima ya kutudila bamwinda. Kima ya kutudila bamwinda ke vanda na lweka ya sude ya tabernakle. 36 Nge ke sala lele* samu na kisika ya kukotila ya tenta. Samu na kutunga yawu nge ke vukisa singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. 37 Nge ke sala makunzi tanu ya akasia samu na lele* yango, mpe nge ke pakula makunzi yango wolo. Bakroshe ya yawu ke vanda ya wolo. Nge ke sulumukisa kwivre samu na kuyidika bivwandulu tanu yina ke na mabulu, samu na makunzi.

27 “Nge ke yidika dikuku ya minkayulu na mabaya ya akasia. Yinda ya yawu ke vanda bakude tanu mpe nene ya yawu ke vanda bakude* tanu. Yinda mpe nene ya yawu ke vanda faso mosi,* mpe ntela ya yawu ke vanda bakude tatu. 2 Na bansongi yiya ya yawu, nge ke yidika mampoka. Mampoka ke vanda ya kukangama na dikuku ya minkayulu, mpe nge ke pakula dikuku ya minkayulu kwivre. 3 Nge ke yidika bakantini samu na kukatula bombi,* na bapele, bandonga, bafurshete, mpe bima ya kutudila tiya. Bisalulu ya yawu nyonso, nge ke yidika yawu na kwivre. 4 Nge ke yidika kitalaka samu na dikuku ya minkayulu. Ya ke vanda bayinti ya kwivre yina ke na landasanaka. Na zulu ya kitalaka yina, nge ke sala milunga yiya ya kwivre, na bansongi yiya ya yawu. 5 Nge ke tula kitalaka na yisi ya kadre ya dikuku ya minkayulu, mpe ya ke vanda na kati-kati ya dikuku ya minkayulu. 6 Nge ke sala bayinti na mabaya ya akasia samu na dikuku ya minkayulu, mpe nge ke pakula yawu wolo. 7 Nge ke tula bayinti na kati ya milunga samu bayinti vanda na balweka zole ya dikuku ya minkayulu ntangu ba ke nanguna yawu. 8 Nge ke sala dikuku ya minkayulu mutindu kesi ya mabaya, mpe kati ya yawu ke vanda dibulu. Nge ke sala yawu kaka mutindu yandi lakisaka nge yawu na mongo.

9 “Nge ke yidika bima samu na kuzungisa lupangu ya tabernakle. Na lweka ya sude ya lupangu, ya ke vanda na barido yina ba me yidika na singa ya lino ya kitoko yina me futamaka-futamaka. Yinda ya yawu na lweka yango ke vanda bakude 100. 10 Ya ke vanda na makunzi 20 mpe bivwandulu ya kwivre 20 yina ke na mabulu. Bakroshe ya makunzi mpe bikangulu* ya yawu ke vanda ya arza. 11 Yinda ya barido na lweka ya nore ke vanda mpe bakude 100, na makunzi ya yawu 20 mpe bivwandulu ya yawu 20 ya kwivre yina ke na mabulu, na bakroshe mpe bikangulu* ya arza samu na makunzi. 12 Na yina me tadila nene ya lupangu, na lweka ya westi, ya ke vanda na barido ya bakude 50, makunzi 10 mpe bivwandulu 10 yina ke na mabulu. 13 Nene ya lupangu na lweka ya esti, kisika yina ntangu ke basikaka, ke vanda bakude 50. 14 Na lweka mosi, ya ke vanda na barido ya yinda ya bakude 15, na makunzi tatu mpe bivwandulu tatu yina ke na mabulu. 15 Mpe na lweka ya nkaka, ya ke vanda na barido ya yinda ya bakude 15, na makunzi tatu mpe bivwandulu tatu yina ke na mabulu.

16 “Kisika ya kukotila ya lupangu ke vanda na lele* ya yinda ya bakude 20. Samu na kutunga yawu ba ke vukisa singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. Ya ke vanda mpe na makunzi yiya mpe bivwandulu ya yawu yiya yina ke na mabulu. 17 Makunzi nyonso yina ke zinga-zinga ya lupangu ke vanda na bikangulu* ya arza mpe bakroshe ya arza, kasi bivwandulu ya yawu yina ke na mabulu ke vanda ya kwivre. 18 Yinda ya lupangu ke vanda bakude 100, nene ya yawu bakude 50 mpe ntela ya yawu bakude 5. Ba ke yidika barido ya yawu na singa ya lino ya kitoko yina me futamaka-futamaka, mpe ya ke vanda na bivwandulu ya kwivre yina ke na mabulu. 19 Bisalulu nyonso mpe bima yina ba ke sadila samu na kisalu ya tabernakle, bayinti ya nsongi ya tenta mpe bayinti nyonso ya nsongi yina ke zinga-zinga ya lupangu, ba ke yidika yawu na kwivre.

20 “Samu na bamwinda, nge ke tumisa bantu ya Izraele na kunatina nge mafuta ya kulutila kitoko ya bambuma ya olive yina ba me tuta, samu bamwinda pela ntangu nyonso. 21 Na tenta ya lukutakanu, na kisika yina ke na mantwala ya rido, pene-pene na Kimbangi, Aroni na bana ya yandi ke sala nyonso samu bamwinda pela ntangu nyonso, kubanda nkokila tii suka, na mantwala ya Yehova. Ya ke musiku ya mvula na mvula yina bantu ya Izraele fwana kuzitisa na bambandu* ya bawu nyonso.

28 “Na kati ya bantu ya Izraele, nge ke bokila Aroni mpangi ya nge mpe bana ya yandi, samu ba sadila munu mutindu banganga-nzambi: Aroni, kintwadi na Nadabi na Abiwu, Eleyazare na Itamare, bana ya Aroni. 2 Nge ke yidikila Aroni mpangi ya nge bilele ya santu, samu na nkembo mpe kitoko. 3 Nge ke zonza na ba yina nyonso zaba kisalu mbote-mbote,* ba yina mu me fulusa na mpeve ya ndwenga, mpe ba ke yidikila Aroni bilele samu na kukumisa yandi santu, samu yandi sadila munu mutindu nganga-nzambi.

4 “Yayi ni bilele yina ba ke yidika: kitende ya ntulu, efode, kinkuti yina ke ve na maboko, sutane yina ke na bakaro-karo, kitambala, mpe kitende ya luketo. Ba ke sala bilele ya santu yayi samu na mpangi ya nge Aroni mpe bana ya yandi, samu yandi sadila munu mutindu nganga-nzambi. 5 Bantu yina zaba kisalu mbote-mbote ke sadila wolo, singa ya bleu, singa ya lene ya mbwaki-viole, singa ya mbwaki ya ngolo, na singa ya lino ya kitoko.

6 “Ba ke yidika efode na wolo, singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka, mpe ya ke vanda na banzila ya kutengama-tengama. 7 Ya ke vanda na bitini zole ya balele yina ba ke kanga na mapeka samu na kuvukisa lele ya mantwala na lele ya manima. 8 Kitende ya luketo yina ba ke tunga mpe yina ke vanda ya kukangama na efode samu na kusimba yawu, ba ke sala yawu na bima ya faso mosi: wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka.

9 “Nge ke baka matadi zole ya oniksi mpe na zulu ya yawu, nge ke sonika bankumbu ya bana ya Izraele, 10 bankumbu 6 na zulu ya ditadi mosi, mpe bankumbu 6 ya nkaka na zulu ya ditadi ya nkaka, na kulandaka mutindu ba butukaka. 11 Muntu yina ke sonikaka na zulu ya matadi ke sonika bankumbu ya bana ya Izraele na matadi zole yina, mutindu yandi ke kotisaka bisoni na kinyemo,* mpe na manima, nge ke kotisa matadi yango na kati ya bisimbilu ya wolo. 12 Nge ke tula matadi zole yina na zulu ya bitini ya lele ya efode yina ke lutaka na mapeka, samu ya vanda matadi ya kubambuka moyo samu na bana ya Izraele. Mpe Aroni fwana kunata bankumbu ya bawu na mantwala ya Yehova na zulu ya bitini zole ya lele ya mapeka ya yandi, mutindu kima yina ke bambulaka moyo. 13 Nge ke yidika bisimbilu ya wolo samu na kukotisa matadi na kati, 14 mpe basinga zole yina ba ke kanga samu ya sala singa mosi. Nge ke yidika yawu na wolo yina ba me vukisa na ata kima, mpe nge ke kanga basinga yango na bisimbilu.

15 “Nge ke lomba na muntu yina ke tungaka bizizi na balele na kusala kitende ya ntulu samu na kusambisa. Yandi ke yidika yawu mutindu efode, na wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka. 16 Ntangu ba ke futika yawu, balweka nyonso ke vanda faso mosi. Yinda ya yawu ke vanda diboko mosi ya kufunguka nene,* mpe nene ya yawu ke vanda diboko mosi ya kufunguka nene. 17 Na zulu ya yawu, nge ke kotisa matadi ya ntalu. Ya ke vanda na milonga yiya ya matadi. Na mulonga ya ntete, ya ke vanda na matadi ya rubi, topaze na emerode. 18 Na mulonga ya zole, ya ke vanda na matadi ya turkwaze, safire na yasipe. 19 Na mulonga ya tatu, ya ke vanda na matadi ya leshʹem,* agate, na ametiste. 20 Na mulonga ya yiya, ya ke vanda na matadi ya krizolite, oniksi na jade. Ba ke kotisa yawu na bisimbilu ya wolo. 21 Matadi yango ke vanda na bankumbu ya bana 12 ya Izraele. Ba ke sala mosi na mosi ya yawu mutindu kinyemo.* Konso ditadi ke vanda na nkumbu ya dibuta mosi ya mabuta 12 ya Izraele.

22 “Samu na kitende ya ntulu, nge ke yidika basinga na wolo yina ba me vukisa na ata kima. Basinga yango ke vanda basinga yina ba me kanga zole-zole. 23 Nge ke sala milunga zole ya wolo samu na kitende ya ntulu, mpe nge ke tula milunga zole yina na bansongi zole ya kitende ya ntulu. 24 Nge ke lutisa basinga zole ya wolo na kati ya milunga zole yina ke na bansongi ya kitende ya ntulu. 25 Nge ke kotisa bansongi zole ya basinga zole na kati ya bisimbilu zole, mpe nge ke kanga yawu na mapeka ya lele ya efode, na mantwala. 26 Nge ke yidika milunga zole ya wolo mpe nge ke tula yawu na bansongi zole ya kitini ya kati ya kitende ya ntulu yina ke na talasanaka na efode. 27 Nge ke sala milunga zole ya nkaka ya wolo na mantwala ya efode, na yisi ya bitini zole ya lele yina ke lutaka na mapeka, pene-pene na kisika yina ya ke vukanaka, na zulu ya kitende ya luketo ya efode. 28 Singa ya bleu ke simba kitende ya ntulu, mpe ni yawu ke simba milunga ya kitende ya ntulu na milunga ya efode. Ya ke sala ti kitende ya ntulu bikana kaka na efode, na zulu ya kitende ya luketo yina ba me tunga.

29 “Aroni ke nata bankumbu ya bana ya Izraele na zulu ya kitende ya ntulu samu na kusambisa. Yandi ke nata yawu na zulu ya ntima ya yandi ntangu yandi ke kota na Kisika ya santu, samu ya vanda ntangu nyonso na mantwala ya Yehova mutindu kima yina ke bambulaka moyo. 30 Nge ke tula Urime na Tumime* na kati ya kitende ya ntulu samu na kusambisa, mpe ya me fwana kuvanda na zulu ya ntima ya Aroni ntangu yandi ke kota na mantwala ya Yehova. Mpe Aroni fwana kunata ntangu nyonso bisalulu ya kusambisa ya bana ya Izraele na zulu ya ntima ya yandi na mantwala ya Yehova.

31 “Nge ke yidika kinkuti yina ke ve na maboko, ya kulwata na yisi ya efode. Nge ke tunga yawu nyonso na singa ya bleu. 32 Na kati-kati ya yawu, ya ke vanda na dibulu samu na kukotisa yintu. Muntu yina ke tungaka bilele ke tunga zinga-zinga ya dibulu yina. Dibulu yango ke vanda mutindu dibulu ya kinkuti ya kisengo, samu ya pasuka ve. 33 Na kisika yina kinkuti ke suka na yisi, zinga-zinga ya yawu, nge ke sala bambuma ya grenade na singa ya bleu, singa ya lene ya mbwaki-viole mpe singa ya mbwaki ya ngolo; mpe bambuma ya grenade ke landasana na bangunga* ya fioti yina ba ke yidika na wolo. 34 Nge ke tula ngunga mosi ya wolo na mbuma mosi ya grenade, ngunga mosi ya wolo na mbuma mosi ya grenade, zinga-zinga ya kisika yina kinkuti yina ke ve na maboko ke suka na yisi. 35 Aroni me fwana kulwata yawu samu na kusala kisalu, mpe makelele ya yawu fwana kuwakana ntangu yandi ke kota na kisika ya santu na mantwala ya Yehova, mpe ntangu yandi ke basika kuna, samu yandi kufwa ve.

36 “Nge ke yidika mwa dinzanza yina ke ngenga na wolo yina ba me vukisa na ata kima, mpe mutindu ba ke kotisaka bisoni na kinyemo,* nge ke kotisa bisoni yayi na kati ya yawu: ‘Busantu kele ya Yehova.’ 37 Nge ke kanga yawu na zulu ya kitambala na singa ya bleu. Ya ke vanda na mantwala ya kitambala. 38 Ya ke vanda na mbunzu ya Aroni, mpe ntangu muntu ke sala foti na ntadisi ya bima ya santu yina bantu ya Izraele ke kumisaka santu ntangu ba ke pesaka yawu mutindu makabu ya santu, foti yina ke vanda na zulu ya yintu ya Aroni. Ya ke vanda ntangu nyonso na mbunzu ya Aroni samu Yehova ndima bawu.

39 “Nge ke tunga sutane na singa ya lino ya kitoko yina ke na bakaro-karo, nge ke yidika kitambala na singa ya lino ya kitoko, mpe nge ke tunga kitende ya luketo.

40 “Nge ke sala mpe basutane, bitende ya luketo mpe bima ya kulwata na yintu samu na bana ya Aroni, samu na nkembo mpe kitoko. 41 Nge ke lwatisa Aroni mpangi ya nge, mpe bana ya yandi, nge ke tula bawu mafuta, nge ke tula bawu na kisalu ya bawu,* mpe nge ke kumisa bawu santu, mpe ba ke sadila munu mutindu banganga-nzambi. 42 Nge ke yidikila mpe bawu bakaleson* na singa ya lino samu ya kanga kimpene ya bawu. Ya ke banda na luketo tii na kati-kati ya dikulu.* 43 Aroni na bana ya yandi ke lwata yawu ntangu ba ke kota na tenta ya lukutakanu, to ntangu ba ke kwiza pene-pene na dikuku ya minkayulu samu na kusala kisalu na kisika ya santu, samu foti vanda ve na yintu ya bawu mpe ba kufwa ve. Ya ke musiku ya ntangu nyonso samu na yandi, mpe samu na bana* ya yandi yina ke kwiza na manima ya yandi.

29 “Yayi ni mambu yina nge ke sala samu na kukumisa bawu santu, samu ba sadila munu mutindu banganga-nzambi: baka mwana mosi ya ngombe ya bakala, mameme zole ya babakala yina ke ve na bifuma, 2 mampa yina ke ve na levire, mampa yina ke ve na levire yina ke mutindu milunga mpe yina ba me vukisa na mafuta, mpe bipapala yina ke ve na levire, yina ba me tula mafuta na zulu ya yawu. Nge ke yidika yawu na farine ya kitoko ya ble, 3 nge ke tula yawu na kati ya kitunga, mpe nge ke pesila yawu na kitunga, kintwadi na ngombe ya bakala mpe mameme zole ya babakala.

4 “Nge ke nata Aroni na bana ya yandi na kisika ya kukotila ya tenta ya lukutakanu, mpe nge ke yobisa bawu na maza. 5 Na manima, nge ke baka bilele, mpe ke lwatisa Aroni sutane, kinkuti ya efode yina ke ve na maboko, efode, na kitende ya ntulu, mpe nge ke kanga luketo ya yandi mbote-mbote na kitende ya efode yina ba me tunga. 6 Nge ke tula yandi kitambala na zulu ya yintu, mpe nge ke tula kidimbu ya santu* ya kukipesa na Nzambi na zulu ya kitambala; 7 mpe baka mafuta ya santu,* tyamuna yandi yawu na zulu ya yintu, mpe tula yandi mafuta.

8 “Na manima, nge ke baka bana ya yandi, mpe nge ke lwatisa bawu basutane, 9 mpe nge ke tula bawu bitende na luketo; nge ke sala mpe yawu samu na Aroni mpe nge ke tula bawu bima ya kulwata na yintu. Na yawu kisalu ya bunganga-nzambi ke vanda ya bawu mutindu musiku ya ntangu nyonso. Ni mutindu yina nge ke tula Aroni na bana ya yandi mutindu banganga-nzambi.*

10 “Na manima, nge ke nata ngombe ya bakala na mantwala ya tenta ya lukutakanu, mpe Aroni na bana ya yandi ke tula maboko ya bawu na zulu ya yintu ya ngombe. 11 Kufwa ngombe na mantwala ya Yehova, na kisika ya kukotila ya tenta ya lukutakanu. 12 Baka mwa ndambu ya menga na musapi ya nge, mpe tula yawu na mampoka ya dikuku ya minkayulu, mpe mwangisa menga nyonso yina ke bikana na yisi ya dikuku ya minkayulu. 13 Na manima, baka mafuta nyonso yina ke fukaka mitsopo, mafuta yina ke na zulu ya dilanga,* mpe bikunku zole ya baronion mpe mafuta yina ke na zulu ya yawu, mpe nge ke yoka yawu samu ya basisa mulinga na zulu ya dikuku ya minkayulu. 14 Kasi musuni ya ngombe, mpusu ya yawu mpe matufi ya yawu, nge ke nyengisa yawu ntama ya kisika yina bantu ke vandaka. Ya ke dikabu samu na disumu.

15 “Na manima, baka mosi ya mameme ya babakala, mpe Aroni na bana ya yandi ke tula maboko ya bawu na zulu ya yintu ya dimeme ya bakala. 16 Kufwa dimeme ya bakala, baka menga ya yawu mpe mwangisa yawu na balweka nyonso ya dikuku ya minkayulu. 17 Zenga dimeme ya bakala na bitini ya yawu, sukula mitsopo ya yawu mpe makulu ya yawu, mpe tula bitini kintwadi na yintu ya yawu. 18 Nge me fwana kuyoka dimeme ya bakala ya muvimba, mpe kusala ti ya basisa mulinga na zulu ya dikuku ya minkayulu. Ya ke dikabu ya kuyoka samu na Yehova, nsunga mosi ya kitoko yina ke sepelisaka* yandi. Ya ke dikabu yina me yokama na tiya samu na Yehova.

19 “Na manima, nge ke baka dimeme ya nkaka ya bakala, mpe Aroni na bana ya yandi ke tula maboko ya bawu na zulu ya yintu ya dimeme ya bakala. 20 Kufwa dimeme ya bakala, mpe baka mwa ndambu ya menga ya yawu mpe tula yawu na nsongi ya dikutu ya Aroni na lweka ya bakala, mpe na nsongi ya makutu ya bana ya yandi na lweka ya bakala. Nge ke tula mpe yawu na musapi ya nene ya maboko ya bawu ya bakala, mpe na musapi ya nene ya makulu ya bawu ya bakala, mpe nge ke losa menga na balweka nyonso ya dikuku ya minkayulu. 21 Na manima, baka mwa ndambu ya menga yina ke na zulu ya dikuku ya minkayulu, mpe ndambu ya mafuta ya santu,* mpe losa yawu na zulu ya Aroni mpe bilele ya yandi, mpe na zulu ya bana ya yandi mpe bilele ya bawu, samu yandi na bilele ya yandi, mpe bana ya yandi na bilele ya bawu vanda santu.

22 “Na manima, baka mafuta ya dimeme ya bakala, mukila yina ke na mafuta, mafuta yina ke fukaka mitsopo, mafuta yina ke na zulu ya dilanga,* bikunku zole ya baronion mpe mafuta yina ke na zulu ya yawu, mpe dikulu ya bakala, samu ya ke dimeme ya bakala yina ba me pesa samu na kutula bawu na kisalu. 23 Na kati ya kitunga ya mampa yina ke ve na levire yina ke na mantwala ya Yehova, nge ke baka mpe dimpa ya ronde, na dimpa yina ba me vukisa na mafuta mpe yina ke mutindu mulunga, na kipapala mosi. 24 Nge me fwana kutula bima nyonso yayi na maboko ya Aroni mpe na maboko ya bana ya yandi, mpe nge ke ningisa yawu na mantwala mpe na manima mutindu dikabu ya kuningisa na mantwala ya Yehova. 25 Na manima nge ke baka yawu na maboko ya bawu mpe nge ke yoka yawu na zulu ya dikuku ya minkayulu, na zulu ya dikabu ya kuyoka, mutindu nsunga ya kitoko yina ke sepelisaka* na mantwala ya Yehova. Ya ke dikabu yina me yokama na tiya samu na Yehova.

26 “Na manima, baka ntulu ya dimeme ya bakala yina ba ke pesa samu na kutula bawu na kisalu, dimeme yina ba ke pesa samu na Aroni, mpe ningisa yawu na mantwala mpe na manima mutindu dikabu ya kuningisa na mantwala ya Yehova, mpe ya ke kuma kitini ya nge. 27 Nge ke kumisa santu ntulu ya dikabu ya kuningisa mpe dikulu ya kitini ya santu yina ba ningisaka mpe yina ba bakaka na dimeme yina ba pesaka samu na kutula bawu na kisalu, bima yina ba pesaka samu na Aroni mpe samu na bana ya yandi. 28 Ya ke vanda ya Aroni mpe ya bana ya yandi na kulandaka musiku ya ntangu nyonso yina bantu ya Izraele fwana kuzitisa, samu ya ke kitini ya santu mpe ya ke kuma kitini ya santu yina bantu ya Izraele fwana kupesa. Ya ke kitini ya bawu ya santu samu na Yehova, kitini yina ba me baka na minkayulu ya bawu ya kizunu.

29 “Bilele ya santu ya Aroni, bana ya yandi ke sadila yawu na manima ya yandi, ntangu ba ke tula bawu mafuta mpe ba ke tula bawu mutindu banganga-nzambi. 30 Na kati ya bana ya yandi, nganga-nzambi yina ke baka kisika ya yandi mpe yina ke kota na tenta ya lukutakanu samu na kusala kisalu na kati ya kisika ya santu, ke lwata yawu na kati ya bilumbu 7.

31 “Nge ke baka dimeme ya bakala yina ba me pesa samu na kutula bawu na kisalu, mpe nge ke tokisa yawu na kisika mosi ya santu. 32 Aroni na bana ya yandi ke kudya musuni ya dimeme ya bakala mpe mampa yina ke na kati ya kitunga, na kisika ya kukotila ya tenta ya lukutakanu. 33 Ba ke kudya bima yina ba pesaka samu na kufuka masumu ya bawu, samu ba tula bawu mutindu banganga-nzambi* mpe ba kumisa bawu santu. Kasi muntu yina ba me pesa ve muswa* lenda kudya ve yawu, samu ya ke bima ya santu. 34 Kana musuni ya munkayulu yina ba pesaka samu na kutula bawu na kisalu mpe mampa me kuma tii na suka ya kilumbu yina ke landa, ba me fwana kunyengisa bima yina me bikana na tiya. Ba me fwana kudya ve yawu samu ya ke kima ya santu.

35 “Nge ke sala mutindu yina samu na Aroni na bana ya yandi, na kulandaka mambu nyonso yina mu me tumisa nge. Nge ke baka bilumbu 7 samu na kutula bawu mutindu banganga-nzambi.* 36 Konso kilumbu, nge fwana kupesa ngombe ya bakala mutindu munkayulu samu na kufuka masumu, mpe nge ke kumisa santu dikuku ya minkayulu na kupesaka munkayulu yayi samu na kufuka masumu. Mpe nge me fwana kumwangisa mafuta na zulu ya dikuku ya minkayulu samu na kutula yawu na lweka mutindu kima ya santu. 37 Nge ke baka bilumbu 7 samu na kukumisa dikuku ya minkayulu santu, na kupesaka minkayulu samu na kufuka masumu. Mpe nge me fwana kukumisa yawu santu samu ya kuma dikuku ya minkayulu ya kulutila santu. Muntu nyonso yina ke simba yawu me fwana kuvanda santu.

38 “Yayi ni bima yina nge ke pesa na zulu ya dikuku ya minkayulu: konso kilumbu, mameme zole ya babakala ya mvula mosi, ntangu nyonso. 39 Pesa mwana ya dimeme mosi ya bakala na suka, mpe ya nkaka tekila ntangu kota.* 40 Nge ke nata ndambu mosi na kati ya bandambu 10 ya efa* ya farine ya kitoko yina ba me vukisa na ndambu mosi na kati ya bandambu yiya ya hini* ya mafuta ya bambuma ya olive yina ba me tuta, mpe ndambu mosi na kati ya bandambu yiya ya hini ya vinu mutindu makabu ya malafu. Nge ke pesa bima yayi kintwadi na mwana ya dimeme ya ntete ya bakala. 41 Nge ke pesa mwana ya zole ya dimeme ya bakala tekila ntangu kota,* kintwadi na farine mpe dikabu ya malafu mutindu mosi na ya suka. Nge ke pesa yawu mutindu nsunga ya kitoko yina ke sepelisaka,* dikabu yina me yokama na tiya samu na Yehova. 42 Ya ke vanda dikabu ya kuyoka ya kupesa ntangu nyonso, yina nge na mitekolo ya nge ke banda kupesa na kisika ya kukotila ya tenta ya lukutakanu na mantwala ya Yehova, kisika yina mu ke banda kutalana na beno samu na kuzonza na nge.

43 “Ni kuna mu ke banda kutalana na bantu ya Izraele, mpe nkembo ya munu ke kumisa kisika yina santu. 44 Mu ke kumisa santu tenta ya lukutakanu mpe dikuku ya minkayulu, mpe mu ke kumisa santu Aroni na bana ya yandi samu ba sadila munu mutindu banganga-nzambi. 45 Mu ke zinga* na kati-kati ya dikanda ya Izraele, mpe mu ke vanda Nzambi ya bawu. 46 Mpe ya tsyeleka, ba ke zaba ti mu kele Yehova Nzambi ya bawu yina basisaka bawu na bwala ya Ezipte samu na kuzinga na kati-kati ya bawu. Mu kele Yehova, Nzambi ya bawu.

30 “Nge ke sala mesa samu na kuyoka ansan. Nge ke sala yawu na mabaya ya akasia. 2 Ya ke vanda mutindu mosi na balweka ya yawu nyonso, yinda ya yawu kude* mosi, nene ya yawu kude mosi, mpe ntela ya yawu bakude zole. Mampoka ya yawu ke sala kima mosi na yawu. 3 Nge ke pakula yawu wolo yina ba me vukisa na ata kima: zulu ya yawu, balweka ya yawu nyonso mpe mampoka ya yawu; mpe nge ke sala ndilu ya wolo zinga-zinga ya yawu. 4 Na yisi ya ndilu ya yawu, na balweka zole yina ke na talasanaka, nge ke yidikila mesa milunga ya wolo, zole na konso lweka. Na kati ya milunga yina, ba ke kotisa bayinti yina ba ke sadila samu na kunanguna mesa. 5 Yidika bayinti na mabaya ya akasia mpe pakula yawu wolo. 6 Nge ke tula yawu na mantwala ya rido yina ke pene-pene na sanduku ya Kimbangi, na mantwala ya kitapu yina ke na zulu ya Kimbangi, kisika yina mu ke talana na nge.

7 “Aroni ke yoka ansan ya nsunga ya kitoko na zulu ya mesa, mpe yandi ke sala ti ya basisa mulinga na zulu ya mesa ntangu yandi ke kipe bamwinda konso suka. 8 Dyaka, ntangu Aroni ke namisa bamwinda tekila ntangu kota,* yandi ke yoka ansan. Ya ke dikabu ya ansan ya ntangu nyonso na mantwala ya Yehova, na bambandu* ya beno nyonso. 9 Beno me fwana ve kupesa na zulu ya mesa ansan yina ba me pesa ve nzila ya kupesa, to dikabu ya kuyoka, to dikabu ya bambuma,* mpe beno me fwana ve kumwangisa dikabu ya malafu na zulu ya yawu. 10 Mbala mosi na mvula, Aroni ke tula na zulu ya mampoka ya mesa ndambu ya menga ya kibulu ya munkayulu ya kufuka masumu samu na kukumisa mesa santu. Yandi ke sala mutindu yina mbala mosi na mvula samu na kukumisa mesa santu na bambandu* ya beno nyonso. Ya ke mesa ya kulutila santu samu na Yehova.”

11 Yehova zonzaka dyaka na Moyize: 12 “Bambala nyonso yina nge ke sonikisa bana ya Izraele mpe nge ke tanga lutangu ya bawu, konso muntu fwana kupesa na Yehova ntalu ya kufuta samu na luzingu* ya yandi, na ntangu ya kusonikisa. Ya ke samu mambu ya yimbi kumina ve bawu ntangu ba ke sonikisa bawu. 13 Yayi ni kima yina ba yina nyonso ba ke sonikisa ke pesa: ndambu ya shekele* mosi na kulandaka shekele ya kisika ya santu.* Bagera* 20 ke pesaka shekele mosi. Ndambu ya shekele mosi ke dikabu samu na Yehova. 14 Muntu nyonso yina ba me sonikisa, yina ke na bamvula 20 tii na zulu ke pesa dikabu ya Yehova. 15 Mvwama ke pesa ve ya kulutila, mpe povre ke pesa ve mbongo fioti yina ke na yisi ya ndambu ya shekele* mosi, mutindu dikabu na Yehova, samu na kufuta samu na luzingu* ya beno. 16 Nge ke baka mbongo* yina bantu ya Izraele me futa samu na luzingu ya bawu, mpe nge ke pesa yawu samu na bisalu ya tenta ya lukutakanu. Mbongo yango ke samu ti ba bambukila bantu ya Izraele moyo na mantwala ya Yehova, mpe samu na kufuta samu na luzingu* ya beno.”

17 Yehova zonzaka dyaka na Moyize: 18 “Yidika ndonga ya nene ya kwivre mpe kivwandulu ya yawu, samu na kuyobila. Tula yawu na kati-kati ya tenta ya lukutakanu mpe dikuku ya minkayulu, mpe tula maza na kati. 19 Aroni na bana ya yandi ke sukula maboko ya bawu mpe makulu ya bawu na maza yina. 20 Ntangu ba ke kota na tenta ya lukutakanu to ntangu ba ke kwiza pene-pene na dikuku ya minkayulu samu na kusala kisalu, kupesa makabu ya tiya mpe kusala ti mulinga basika samu na Yehova, ba ke yobila na maza samu ba kufwa ve. 21 Ba me fwana kusukula maboko ya bawu mpe makulu ya bawu samu ba kufwa ve, mpe ya me fwana kuvanda musiku ya ntangu nyonso samu na bawu, samu na yandi mpe mitekolo ya yandi, na bambandu* ya bawu nyonso.”

22 Yehova landilaka kuzonza na Moyize: 23 “Na manima, baka mananasi ya kulutila kitoko: bashekele 500 ya mire ya kukangama, mpe kati-kati ya lutangu yayi, bashekele 250 ya sinamome, bashekele 250 ya kanele, 24 mpe bashekele 500 ya kase na kulandaka shekele ya kisika ya santu,* kintwadi na hini* mosi ya mafuta ya olive. 25 Na manima, sala mafuta ya santu na yawu. Ba me fwana kuvukisa bima yayi mbote-mbote.* Ya ke vanda mafuta ya santu.*

26 “Nge ke tula tenta ya lukutakanu mpe sanduku ya Kimbangi mafuta yango. 27 Nge ke sala mpe yawu samu na mesa mpe bisalulu ya yawu nyonso, kima ya kutudila bamwinda mpe bisalulu ya yawu, mesa ya ansan, 28 dikuku ya dikabu ya kuyoka mpe bisalulu ya yawu nyonso, ndonga ya nene mpe kivwandulu ya yawu. 29 Nge me fwana kukumisa bima yayi santu samu ya kuma bima ya kulutila santu. Muntu nyonso yina ke simba yawu me fwana kuvanda santu. 30 Nge ke tula Aroni na bana ya yandi mafuta, mpe nge ke kumisa bawu santu samu ba sadila munu mutindu banganga-nzambi.

31 “Nge ke zonza mambu yayi na bantu ya Izraele, ‘Mafuta yayi ke vanda mafuta ya santu samu na munu na bambandu* ya beno nyonso. 32 Ba ke sadila ve yawu na nzutu ya bantu, mpe beno me fwana ve kuyidika kima ya nkaka na kuvukisaka bima yina ba sadilaka samu na mafuta yayi. Ya ke kima ya santu. Ya me fwana kuvanda kaka kima ya santu samu na beno. 33 Muntu nyonso yina ke yidika mananasi ya mutindu yayi mpe ke tula yawu na nzutu ya muntu yina ba me pesa ve muswa,* ba me fwana kufwa yandi.’”*

34 Na manima Yehova zonzaka na Moyize: “Baka bandambu ya faso mosi ya mananasi yayi: mabete ya sitakite, onika, galabanume ya nsunga ya kitoko, mpe maaka ya nsunga ya kitoko yina ba me vukisa na ata kima. 35 Yidika ansan na yawu; ba me fwana kuvukisa bima ya nsunga ya kitoko yayi mbote-mbote,* mpe kutula yawu mungwa. Ya me fwana kuvanda bunkete mpe santu. 36 Nge ke nika ndambu ya yawu samu ya kuma pudre, mpe nge ke tula ndambu ya yawu na mantwala ya Kimbangi, na kati ya kisika ya lukutakanu, kisika yina mu ke talana na nge. Ya me fwana kuvanda santu ya kulutila samu na beno. 37 Beno me fwana ve kusadila bima yayi samu na kuyidika ansan samu na beno mosi. Nge me fwana kubakila yawu mutindu kima ya santu samu na Yehova. 38 Muntu yina ke sala ansan ya mutindu yayi samu na kusepela na nsunga ya yawu, ba me fwana kufwa yandi.”*

31 Yehova landilaka kuzonza na Moyize: 2 “Kuwa, mu me soola* Bezalele mwana ya Uri, mwana ya Hure ya dibuta ya Yuda. 3 Mu ke fulusa yandi na mpeve ya Nzambi, mu ke pesa yandi ndwenga, mayela, mpe luzabu ya bisalu ya maboko ya mutindu nyonso, 4 samu na kuzaba kusala bizizi ya bima, samu na kusadila wolo, arza mpe kwivre, 5 samu na kuzenga matadi ya ntalu mpe kukangimisa yawu na bima, mpe samu na kusala bima ya mabaya ya mutindu nyonso. 6 Dyaka samu na kusadisa yandi, mu me soola Oholiabe, mwana ya Ayisamake ya dibuta ya Dane, mpe mu ke na tulaka ndwenga na kati ya ntima ya ba yina nyonso zaba kusala kisalu mbote-mbote,* samu ba sala bima nyonso yina mu me tumisa nge: 7 tenta ya lukutakanu, sanduku ya Kimbangi mpe kitapu yina ke na zulu ya yawu, bima nyonso yina ke na kati ya tenta, 8 mesa mpe bisalulu ya yawu, kima ya kutudila bamwinda yina ba me yidika na wolo yina ba me vukisa na ata kima, mpe bisalulu ya yawu nyonso, mesa ya ansan, 9 dikuku ya dikabu ya kuyoka mpe bisalulu ya yawu nyonso, ndonga ya nene mpe kivwandulu ya yawu, 10 bilele ya kitoko yina ba me tunga, bilele ya santu samu na nganga-nzambi Aroni, bilele ya bana ya yandi samu na kusala mutindu banganga-nzambi, 11 mafuta ya santu* mpe ansan ya nsunga ya kitoko samu na kisika ya santu. Ba ke sala nyonso yina mu me tumisa nge.”

12 Yehova zonzaka dyaka na Moyize: 13 “Zonza na bantu ya Izraele, mpe zabisa bawu mambu yayi, ‘Na zulu ya nyonso yayi, beno me fwana kuzitisa basaba ya munu, samu ya kele kidimbu na kati-kati ya munu na beno na kati ya bambandu* ya beno, samu beno kwiza zaba ti munu, Yehova, mu ke na kumisaka beno santu. 14 Beno me fwana kuzitisa saba, samu ya kele kima ya santu samu na beno. Muntu yina ke vweza yawu, ba me fwana kufwa yandi. Kana muntu sala kisalu ni kisalu kilumbu yina, muntu* yina, ba me fwana kufwa yandi.* 15 Na kati ya bilumbu 6, bantu lenda sala. Kasi kilumbu ya 7 kele saba, kilumbu ya mfunu samu na kupema. Ya ke kima ya santu samu na Yehova. Muntu yina ke sala kisalu na kilumbu ya saba, ba me fwana kufwa yandi. 16 Bantu ya Izraele me fwana kuzitisa saba; ba me fwana kuzitisa saba na bambandu* ya bawu nyonso. Ya ke luwawanu ya ntangu nyonso. 17 Ya ke kidimbu ya ntangu nyonso na kati-kati ya munu na bantu ya Izraele, samu ti na kati ya bilumbu 6, Yehova salaka mazulu na ntoto, mpe na kilumbu ya 7, yandi bikaka kusala mpe yandi pemaka.’”

18 Kaka na ntangu yina yandi manisaka kusolola na Moyize na Mongo Sinayi, yandi pesaka Moyize matadi zole ya Kimbangi, matadi yina Nzambi sonikaka na musapi ya yandi.

32 Na ntangu yina, bantu talaka ti Moyize vanda lutisa ntangu mingi, mpe yandi vanda kulumuka ve na mongo. Na yawu dikanda vukanaka zinga-zinga ya Aroni mpe ba zonzaka na yandi: “Yidikila beto nzambi yina ke tambula na mantwala ya beto, samu beto zaba ve yinki me kumina Moyize yayi, muntu yina basisaka beto na bwala ya Ezipte.” 2 Na yawu Aroni zonzaka na bawu: “Beno baka binzembele ya wolo yina ke na makutu ya bakento ya beno, ya bana ya beno ya babakala mpe ya bana ya beno ya bakento, mpe beno natina munu yawu.” 3 Na yawu, bantu nyonso bandaka kukatula binzembele ya wolo yina vandaka na makutu ya bawu, mpe ba natinaka Aroni yawu. 4 Aroni bakaka wolo yina ba natinaka yandi, yandi yidikaka yawu na kisalulu mosi ya kisengo, mpe yandi salaka kiteki mosi ya mwana ya ngombe.* Na manima, ba bandaka kuzonza: “O Izraele, yayi ni Nzambi ya nge, yina basisaka nge na bwala ya Ezipte.”

5 Ntangu Aroni talaka mambu yayi, yandi tungaka dikuku ya minkayulu na mantwala ya kiteki yina, mpe yandi zonzaka na ndinga ya ngolo: “Mbasi, ya ke vanda na mukembo samu na Yehova.” 6 Na yawu, kilumbu yina landaka, ba vumbukaka na suka-suka mpe ba bandaka kupesa makabu ya kuyoka mpe minkayulu ya kizunu. Na manima, ba vandaka samu na kudya mpe kunwa. Mpe, ba telamaka samu na kusakana.

7 Na yawu Yehova zonzaka na Moyize: “Kwenda, kulumuka, samu ti bantu ya nge yina nge basisaka na bwala ya Ezipte me bebana. 8 Ba me katuka na mbangu na nzila yina mu tumisaka bawu na kulanda. Ba me yidika samu na bawu mosi kiteki mosi ya mwana ya ngombe,* ba ke na fukamaka na mantwala ya yawu, ba ke na pesaka yawu minkayulu mpe ba ke na zonzaka, ‘O Izraele, yayi ni Nzambi ya nge, yina basisaka nge na bwala ya Ezipte.’” 9 Yehova zonzaka dyaka na Moyize: “Mu me kwiza tala ti dikanda yayi ke na yintu ngolo.* 10 Na yawu, ntangu yayi bika munu mu sala. Na nkele ya munu ya ngolo, mu ke manisa na kufwa bawu, mpe mu ke sala ti nge kuma dikanda ya nene na kisika ya bawu.”

11 Na manima Moyize bondilaka* Yehova Nzambi ya yandi mpe zonzaka: “O Yehova, samu na yinki nge ke dasukila bantu ya nge na manima ya kusadila ngolo ya nge ya nene mpe diboko ya nge ya ngolo samu na kubasisa bawu na bwala ya Ezipte? 12 Kana nge sala mutindu yina, bantu ya Ezipte ke zonza, ‘Ntangu yandi basisaka bawu, yandi vandaka na mabanza ya yimbi. Yandi vanda sosa kufwa bawu na bamongo mpe kuzimbisa bawu na zulu ya ntoto?’ Bika nkele ya nge ya ngolo mpe tadila dyaka* mukanu ya nge ya kunata mpasi yayi na zulu ya bantu ya nge. 13 Bambukila moyo bisadi ya nge Abrahami, Izaki na Izraele, ba yina nge zengaka ndefi na nkumbu ya nge mosi mpe nge zonzaka: ‘Mu ke sala ti bana* ya beno kuma mingi mutindu bambwetete ya mazulu, mpe mu ke pesa bana* ya beno bwala nyonso yayi yina mu zonzilaka, samu ba kuzwa yawu samu na ntangu nyonso.’”

14 Na yawu Yehova sobaka* mukanu ya yandi ya kunata mpasi na zulu ya bantu ya yandi.

15 Na manima, Moyize balukaka mpe kulumukaka na mongo, na matadi zole ya Kimbangi na diboko. Matadi yango vandaka ya kusonama na balweka nyonso zole. Ya vandaka ya kusonama na mantwala mpe na manima. 16 Matadi yango vandaka kisalu ya Nzambi, mpe bisoni vandaka bisoni ya Nzambi yina yandi sonikaka na zulu ya matadi. 17 Ntangu Yozue kuwaka makelele ya dikanda mutindu ba vanda ganga, yandi zonzaka na Moyize: “Makelele ya mvita ke na wakanaka kisika yina dikanda kele.” 18 Kasi Moyize zonzaka:

19 Kaka na ntangu yina Moyize kumaka pene-pene na kisika yina bantu vanda vanda, mpe yandi talaka mwana ya ngombe mpe bantu vanda bina, yandi fulukaka na nkele. Yandi losaka matadi yina vandaka na maboko ya yandi, mpe mwangisaka yawu na yisi ya mongo. 20 Yandi bakaka mwana ya ngombe yina ba salaka, yandi nyengisaka yawu mpe nikaka yawu. Na manima, yandi mwangisaka fundu-fundu yango na kati ya maza mpe nwikisaka yawu bantu ya Izraele. 21 Mpe Moyize zonzaka na Aroni: “Yinki dikanda yayi me sala nge, samu nge nata bawu na kusala disumu ya nene yayi?” 22 Aroni vutulaka: “Kudasuka ve, mfumu ya munu. Nge zaba mbote-mbote ti dikanda yayi ke vandaka kaka na mabanza ya kusala mambu ya yimbi. 23 Ba zonzaka na munu, ‘Yidikila beto nzambi yina ke tambula na mantwala ya beto, samu beto zaba ve yinki me kumina Moyize yayi, muntu yina basisaka beto na bwala ya Ezipte.’ 24 Na yawu mu zonzaka na bawu, ‘Muntu nyonso yina ke na bima ya wolo me fwana kukatula yawu, mpe kupesa munu yawu.’ Na manima, mu losaka yawu na tiya mpe mwana ya ngombe yayi basikaka.”

25 Moyize talaka ti bantu vanda sala bamambu kidi-kidi samu ti Aroni bikaka bawu ba sala bamambu kidi-kidi. Na yawu ba kumaka kima ya nsoni na mantwala ya bambeni ya bawu. 26 Na yawu Moyize telamaka na mwelo ya kisika yina ba vanda vanda, mpe yandi zonzaka: “Banani ke na lweka ya Yehova? Beno kwiza na sika ya munu!” Balevi nyonso vukanaka zinga-zinga ya yandi. 27 Yandi zonzaka na bawu: “Yayi ni mambu yina Yehova Nzambi ya Izraele me zonza, ‘Konso muntu na kati ya beno me fwana kubaka mbele ya yandi ya mvita, kuluta na bisika nyonso yina bantu ke vandaka, kubanda na nsuka mosi tii na nsuka ya nkaka,* mpe kufwa mpangi ya yandi, muntu yina ke zingaka pene-pene ya yandi, mpe ndiku ya yandi ya ntima.’” 28 Balevi salaka mutindu Moyize zonzaka. Mpe kilumbu yina, ba kufwaka babakala pene-pene na 3 000. 29 Na yawu Moyize zonzaka: “Bubu yayi, beno pesama* samu na kisalu ya Yehova, samu konso muntu na kati ya beno me telemina mwana ya yandi ya bakala mpe mpangi ya yandi ya bakala; bubu yayi, yandi ke pesa beno lusakumunu.”

30 Kaka kilumbu yina landaka, Moyize zonzaka na dikanda: “Beno me sala disumu ya nene mingi. Awa mu ke na kwendaka na mongo, na sika ya Yehova samu na kutala kana mu lenda sala kima samu yandi lemvokila disumu ya beno.” 31 Na yawu Moyize vutukaka na sika ya Yehova mpe zonzaka: “Ya tsyeleka dikanda yayi me sala disumu ya nene. Ba me sala nzambi ya wolo samu na bawu mosi. 32 Kasi ntangu yayi, kana nge me zola, lemvokila disumu ya bawu; kasi kana nge me zola ve, mulemvo, kusuna nkumbu ya munu na buku yina nge me sonika.” 33 Kasi Yehova zonzaka na Moyize: “Muntu yina me sumuka na ntadisi ya munu, ni nkumbu ya yandi mu ke kusuna na buku ya munu. 34 Ntangu yayi, kwenda mpe twadisa dikanda na kisika yina mu zonzaka na nge. Mbazi ya munu ke tambula na mantwala ya nge, mpe kilumbu yina mu ke lomba ba pesa mvutu samu na disumu ya bawu, mu ke pesa bawu kitumbu samu na yawu.” 35 Na yawu, Yehova bandaka kunatina dikanda bampasi samu ba salaka mwana ya ngombe, mwana ya ngombe yina Aroni yidikaka.

33 Yehova zonzaka dyaka na Moyize: “Katuka awa mpe kwenda, nge na bantu yina nge basisaka na bwala ya Ezipte. Kwenda na bwala yina mu zengaka ndefi na Abrahami, na Izaki mpe na Yakobi ntangu mu zonzaka, ‘Mu ke pesa yawu na mitekolo* ya nge.’ 2 Mu ke filisa mbazi mosi na mantwala ya nge, mpe mu ke bingisa Bakanana, Baamorite, Bahitite, Baperizite, Bahivite, mpe Bayebuzite. 3 Kwenda na ntoto yina ke ya kufuluka na miliki mpe mafuta ya nyosi. Kasi mu ke kwenda ve na kati-kati ya beno, samu beno ke dikanda ya yintu ngolo,* mpe mu lenda manisa beno na nzila.”

4 Ntangu dikanda kuwaka bamambu ya ngolo yayi, ba bandaka kudila, mpe ata mosi na kati ya bawu lwataka bima ya yandi ya kubongisa nzutu. 5 Yehova zonzaka na Moyize: “Zonza na bantu ya Izraele, ‘Beno ke dikanda ya yintu ngolo.* Na mbala mosi mu lenda luta na kati-kati ya beno mpe kumanisa beno. Na yawu, beno bika kulwata bima ya beno ya kubongisa nzutu na ntangu mu ke na kanisaka yinki mu ke sala beno.’” 6 Na yawu, kubanda na Mongo Horebe, bantu ya Izraele vanda lwata dyaka ve* bima ya bawu ya kubongisa nzutu.

7 Na manima, Moyize bakaka yinzo ya yandi ya balele mpe tulaka yawu na ngaanda, mwa ntama ya kisika yina bantu vanda vandaka. Muntu nyonso yina vandaka na mambu ya kulomba na Yehova vanda basika mpe kukwenda na tenta ya lukutakanu, yina vandaka na ngaanda ya kisika yina bantu vanda vandaka. 8 Na ntangu Moyize vanda basika samu na kukwenda na tenta, bantu nyonso vanda telama mpe kubikana ya kutelama na mantwala ya bayinzo ya bawu, mpe ba vanda bika ve kutala Moyize tii ntangu yandi vanda kota na tenta. 9 Na ntangu Moyize vanda kota na tenta, dikunzi ya dituti vanda kulumuka mpe kutelama na kisika ya kukotila ya tenta, ntangu Nzambi vanda solola na Moyize. 10 Ntangu dikanda nyonso vanda tala dikunzi ya dituti kutelama na kisika ya kukotila ya tenta, konso muntu vanda telama mpe kufukama na kisika ya kukotila ya yinzo ya yandi. 11 Yehova vanda solola na Moyize meso na meso, kaka mutindu muntu ke sololaka na muntu ya nkaka. Ntangu Moyize vanda vutuka na kisika yina bantu vanda vandaka, kisadi ya yandi Yozue, mwana ya Nune, vanda katukaka ve na tenta.

12 Ntyo Moyize zonzaka na Yehova: “Tala, nge ke na zonzaka na munu, ‘Nata dikanda yayi,’ kasi nge me zabisa ve munu nani nge ke filisa kintwadi na munu. Dyaka, nge me zonza, ‘Mu zaba nge na nkumbu ya nge* mpe mu me ndima nge.’ 13 Mulemvo ya nge, kana mu me ndimama na meso ya nge, sala ti mu zaba banzila ya nge, samu mu zaba nge mpe mu tatamana na kuvanda ya kundimama na meso ya nge. Bakila mpe dikanda yayi mutindu bantu ya nge.” 14 Na yawu yandi zonzaka: “Munu mosi* ke kwenda na nge kintwadi, mpe mu ke pemisa nge.” 15 Moyize zonzaka na yandi: “Kana nge mosi, nge* kwiza ve na beto, kukatula ve beto na kisika yayi. 16 Wapi mutindu bantu ke zaba ti mu me ndimama na meso ya nge, munu na dikanda ya nge? Ya ke ve ni ntangu nge ke kwenda na beto muntu ke sala ti munu na dikanda ya nge, beto vanda ve mutindu mosi na makanda nyonso ya nkaka yina ke na zulu ya ntoto?”

17 Yehova zonzaka dyaka na Moyize: “Mu ke sala mpe mambu yayi yina nge me lomba, samu mu me ndima nge, mpe mu zaba nge na nkumbu ya nge.” 18 Moyize zonzaka: “Mulemvo, lakisa munu nkembo ya nge.” 19 Yandi vutulaka: “Mu ke sala ti bumbote ya munu nyonso luta na mantwala ya kizizi ya nge, mpe mu ke zonzila nkumbu ya Yehova na mantwala ya nge. Mu ke ndima muntu yina mu ke ndima, mpe mu ke vanda na mawa ya muntu yina mu ke vanda na mawa.” 20 Kasi yandi bwelaka: “Nge lenda tala ve kizizi ya munu, samu ti ata muntu lenda tala munu mpe kubikana na luzingu.”

21 Yehova zonzaka dyaka: “Tala kisika yayi yina ke pene-pene na munu. Telama na zulu ya ditadi. 22 Ntangu nkembo ya munu ke luta, mu ke tula nge na dibulu ya ditadi, mpe mu ke tula diboko ya munu samu ya bumba nge, tii ntangu mu ke manisa kuluta. 23 Na manima, mu ke katula diboko ya munu, mpe nge ke tala mukongo ya munu. Kasi kizizi ya munu, ba lenda tala ve yawu.”

34 Na manima Yehova zonzaka na Moyize: “Yidika matadi zole mutindu mosi na ya ntete, mpe mu ke sonika na zulu ya matadi yango bamambu yina vandaka na zulu ya matadi ya ntete yina nge mwangisaka. 2 Bongama samu na mbasi na suka, samu ti na suka nge ke kwenda na Mongo Sinayi, mpe nge ke telama kuna na mantwala ya munu, na nsongi ya mongo. 3 Kasi ata muntu ke kwenda na nge, mpe ata muntu ya nkaka me fwana kutalana na bisika ya nkaka ya mongo. Ata mameme to bangombe me fwana ve kudya matiti na mantwala ya mongo yayi.”

4 Na yawu Moyize yidikaka matadi zole mutindu mosi na ya ntete. Yandi telamaka na suka-suka mpe kwendaka na Mongo Sinayi, kaka mutindu Yehova tumisaka yandi, mpe yandi nataka matadi zole na diboko ya yandi. 5 Na yawu Yehova kulumukaka na kati ya dituti mpe telamaka kuna na yandi, mpe yandi zonzilaka nkumbu ya Yehova. 6 Yehova vanda luta na mantwala ya yandi mpe vanda zonza: “Yehova, Yehova, Nzambi ya ntima ya kyadi* mpe yina ke kuwaka bantu mawa, yina ke dasukaka ve na mbangu, mpe yina ke ya kufuluka na luzolo ya kukwikama* mpe matsyeleka,* 7 yina ke lakisaka luzolo ya kukwikama na mafunda ya bantu, yina ke lemvokilala foti, yimbi mpe disumu, kasi yandi ke bika ata fioti ve ti muntu yina me sala yimbi kuzwa ve kitumbu, yandi ke nataka kitumbu samu na foti ya batata na zulu ya bana mpe na zulu ya mitekolo, na zulu ya mbandu* ya tatu mpe na zulu ya mbandu ya yiya.”

8 Na mbangu nyonso, Moyize kondamaka tii na ntoto, mpe fukamaka. 9 Na manima yandi zonzaka: “Ntangu yayi O Yehova, kana mu me ndimama na meso ya nge, mulemvo Yehova, tambula na kati-kati ya beto ata ti beto ke dikanda ya yintu ngolo,* mpe lemvokila foti ya beto mpe disumu ya beto, mpe baka beto mutindu kima ya nge mosi.” 10 Na yawu yandi zonzaka: “Awa mu ke na salaka luwawanu: Na mantwala ya bantu ya nge, mu ke sala bamambu ya ngitukulu yina nabunu ntete ya salama* na ntoto nyonso to na kati ya makanda nyonso, mpe makanda nyonso yina beno ke na zingaka na kati ya bawu ke tala kisalu ya Yehova, samu mambu yina mu ke na salaka na beno ke mambu yina ke pesaka boma.

11 “Tula dikebi na mambu yina mu ke na tumisaka nge bubu yayi. Awa mu ke na bingisaka na mantwala ya nge Baamorite, Bakanana, Bahitite, Baperizite, Bahivite, mpe Bayebuzite. 12 Keba, kusala ve luwawanu na bantu yina ke na zingaka na bwala yina nge ke na kwendaka, samu ya lenda kuma mutambu na kati-kati ya beno. 13 Kasi beno fwana kubwisa makuku ya bawu ya minkayulu, beno ke mwangisa makunzi ya bawu ya lusambu, mpe beno ke zenga bayinti* ya bawu ya lusambu. 14 Nge me fwana ve kufukama na mantwala ya nzambi ya nkaka, samu ti Yehova ke ya kuzabana mutindu Nzambi yina ke* lombaka ti ba kangama kaka na yandi.* Ya tsyeleka, yandi ke lombaka ti ba kangama kaka na yandi. 15 Keba, kusala ve luwawanu na bantu yina ke zingaka na bwala yina, samu ti ntangu ba ke sala kinsuza na banzambi ya bawu mpe ba ke pesa minkayulu na banzambi ya bawu, muntu ke bokila nge, mpe nge ke kudya munkayulu ya yandi. 16 Ntembe ve, nge ke baka bana ya bawu ya nkaka ya bakento samu na bana ya nge ya babakala, mpe bana ya bawu ya bakento ke sala kinsuza na banzambi ya bawu, mpe ba ke nata bana ya nge ya babakala na kusala kinsuza na banzambi ya bawu.

17 “Nge me fwana ve kuyidika banzambi ya bisengo yina ba me sulumukisa.

18 “Nge ke sala Mukembo ya Mampa yina ke ve na levire. Nge ke kudya mampa yina ke ve na levire, kaka mutindu mu tumisaka nge; sala yawu na kati ya bilumbu 7 na ntangu ya yawu, na ngonda ya Abibe,* samu ti ni na ngonda ya Abibe nge basikaka na Ezipte.

19 “Konso mwana ya ntete ya bakala* ke ya munu, mutindu mosi mpe na bana nyonso ya ntete ya babakala ya bibulu ya beno, ya vanda ya bangombe to ya mameme. 20 Nge fwana kusumba dyaka mwana ya ntete ya mbuluku na kupesaka dimeme na kisika ya yandi. Kasi kana nge sumba dyaka ve yandi, nge fwana kubuka yandi laka. Nge fwana kusumba dyaka konso mwana ya nge ya ntete ya bakala. Ata muntu ke kwiza na mantwala ya munu maboko mpamba.

21 “Nge fwana kusala na kati ya bilumbu 6, kasi na kilumbu ya 7, nge ke pema.* Ata na ntangu ya kubulumuna ntoto mpe kuyonzika bambuma, nge ke pema.

22 “Mpe nge ke sala Mukembo ya Balumingu na bambuma ya ntete ya ble yina nge ke buka, mpe Mukembo ya Kuyonzika bambuma* na nsuka ya mvula.

23 “Bambala tatu na mvula, babakala nyonso ya dikanda ya nge me fwana kukwenda na mantwala ya Mfumu ya tsyeleka, Yehova, Nzambi ya Izraele. 24 Ya tsyeleka mu ke bingisa makanda na mantwala ya nge, mpe mu ke kumisa bwala ya nge nene, mpe ata muntu ke lula* bwala ya nge ntangu nge ke kwenda tala kizizi ya Yehova Nzambi ya nge bambala tatu na mvula.

25 “Nge me fwana ve kupesa menga ya munkayulu ya munu kintwadi na kima yina ke na levire. Munkayulu ya mukembo ya Pake me fwana kukuma ve tii na suka ya kilumbu yina ke landa.

26 “Nge ke nata na yinzo ya Yehova Nzambi ya nge bambuma ya kulutila mbote na kati ya bambuma ya ntete ya bilanga* ya nge.

“Nge me fwana ve kutokisa mwana ya nkombo na kati ya miliki ya mabene ya mama ya yandi.”

27 Yehova zonzaka dyaka na Moyize: “Sonika bamambu yayi, samu mu ke na salaka luwawanu na nge mpe bantu ya Izraele, na kulandaka bamambu yayi.” 28 Mpe yandi bikanaka kuna kintwadi na Yehova bilumbu 40 mpe bampimpa 40. Yandi kudyaka ata dimpa, mpe yandi kunwaka ve maza. Yandi sonikaka na zulu ya matadi bamambu ya luwawanu, Misiku 10.*

29 Na manima Moyize kulumukaka na Mongo Sinayi, mpe matadi zole ya Kimbangi vandaka na diboko ya yandi. Ntangu yandi kulumukaka na mongo, Moyize vanda zaba ve ti mpusu ya kizizi ya yandi vanda ngenga na ngolo, samu yandi sololaka na Nzambi. 30 Ntangu Aroni mpe bantu nyonso ya Izraele talaka Moyize, ba talaka ti mpusu ya kizizi ya yandi vanda ngenga na ngolo, mpe ba kumaka na boma ya kukwenda pene-pene ya yandi.

31 Kasi Moyize bokilaka bawu. Na yawu Aroni na bamfumu nyonso ya kimvuka kwizaka na sika ya yandi, mpe Moyize sololaka na bawu. 32 Na manima, bantu nyonso ya Izraele kwizaka na sika ya yandi, mpe yandi pesaka bawu misiku nyonso yina Yehova pesaka yandi na Mongo Sinayi. 33 Ntangu Moyize vanda manisaka kusolola na bawu, yandi vanda tulaka lele na kizizi ya yandi. 34 Kasi ntangu Moyize vanda kotaka na mantwala ya Yehova samu na kusolola na yandi, yandi vanda katulaka lele tii ntangu yandi ke basika. Na manima, yandi vanda basikaka, mpe vanda zonzaka na bantu ya Izraele misiku yina yandi kuzwaka. 35 Mpe bantu ya Izraele vanda tala ti mpusu ya kizizi ya Moyize vanda ngenga na ngolo. Na manima, Moyize vanda vutulaka lele na kizizi ya yandi tii ntangu yandi ke kota dyaka samu na kusolola na Nzambi.*

35 Na manima Moyize vukisaka kimvuka nyonso ya bantu ya Izraele mpe yandi zonzaka na bawu: “Yayi ni bamambu yina Yehova me tumisa ti beto sala: 2 Bantu lenda sala kisalu na kati ya bilumbu 6, kasi kilumbu ya 7 ke vanda kima ya santu samu na beno. Ya ke vanda saba, kilumbu ya mfunu ya kupema samu na Yehova. Muntu yina ke sala kisalu kilumbu yina, ba ke kufwa yandi. 3 Kisika ni kisika yina beno ke zinga, beno me fwana ve kunamisa tiya na kilumbu ya saba.”

4 Moyize zonzaka dyaka na kimvuka nyonso ya bantu ya Izraele: “Yayi ni mambu yina Yehova me tumisa, 5 ‘Beno katudila Yehova dikabu na kati ya bima ya beno. Bika ti muntu nyonso yina ntima ya yandi me zola, natina Yehova wolo, arza, kwivre, 6 singa ya bleu, singa ya lene ya mbwaki-viole, singa ya mbwaki ya ngolo, singa ya lino ya kitoko, mika* ya nkombo, 7 bampusu ya mbwaki ya dimeme ya bakala, bampusu ya kibulu yina ba ke bokilaka foke, mabaya ya akasia, 8 mafuta samu na bamwinda, kima ya nsunga ya kitoko yina ba ke bokilaka balzame samu na kuyidika mafuta ya santu, mpe samu na ansan ya nsunga ya kitoko, 9 matadi ya oniksi, mpe matadi ya nkaka yina ba ke tula na efode mpe na kitende ya ntulu.

10 “Bika ti ba yina nyonso na kati ya beno yina zaba kusala kisalu mbote-mbote* kwiza, mpe ba sala mambu nyonso yina Yehova me tumisa, 11 ya zola zonza tabernakle na tenta ya yawu mpe lele samu na kufuka yawu, bakroshe ya yawu mpe bakadre ya yawu, bayinti ya yawu, makunzi ya yawu, mpe bivwandulu ya yawu yina ke na mabulu, 12 Sanduku mpe bayinti ya yawu, kitapu mpe rido yina ke kabulaka, 13 mesa na bayinti ya yawu, bisalulu ya yawu nyonso mpe mampa ya kulakisa; 14 kima ya kutudila bamwinda samu na nsemo, mpe bisalulu ya yawu, bamwinda ya yawu mpe mafuta samu na nsemo; 15 mesa ya ansan mpe bayinti ya yawu; mafuta ya santu mpe ansan ya nsunga ya kitoko; lele* samu na kisika ya kukotila ya tabernakle; 16 dikuku ya dikabu ya kuyoka mpe kitalaka ya yawu ya kwivre, bayinti ya yawu mpe bisalulu ya yawu nyonso; ndonga ya nene mpe kivwandulu ya yawu; 17 barido ya lupangu, makunzi ya yawu mpe bivwandulu ya yawu yina ke na mabulu, lele* samu na kisika ya kukotila ya lupangu; 18 bayinti ya nsongi ya tabernakle mpe bayinti ya nsongi ya lupangu na basinga ya yawu; 19 bilele ya kitoko yina ba ke tunga samu na kisalu ya kisika ya santu, bilele ya santu samu na nganga-nzambi Aroni, mpe bilele ya bana ya yandi samu na kusala mutindu banganga-nzambi.’”

20 Na yawu, kimvuka nyonso ya bantu ya Izraele katukaka na mantwala ya Moyize. 21 Na yina, ba yina nyonso ntima ya bawu vanda pesa, mpe ba yina nyonso mpeve ya bawu vanda tinda bawu, kwizaka, mpe ba nataka makabu ya bawu samu na Yehova, makabu yina ba zola sadila samu na tenta ya lukutakanu, samu na kisalu ya yawu nyonso mpe samu na bilele ya santu. 22 Ba vanda bika ve kukwiza, bakento na babakala, konso muntu yina ntima ya yandi zolaka. Ba nataka babarete ya kitoko yina ba ke tulaka na bilele, binzembele, milunga, babiju ya nkaka mpe bima ya wolo ya mutindu nyonso. Bawu nyonso nataka makabu ya bawu* ya wolo na Yehova. 23 Ba yina nyonso vandaka na singa ya bleu, singa ya lene ya mbwaki-viole, singa ya mbwaki ya ngolo, singa ya lino ya kitoko, mika* ya nkombo, bampusu ya mbwaki ya dimeme ya bakala, mpe bampusu ya kibulu yina ba ke bokilaka foke, nataka yawu. 24 Ba yina nyonso zolaka kupesa arza mpe kwivre nataka dikabu samu na Yehova. Ba yina nyonso vandaka na mabaya ya akasia nataka yawu samu na bisalu nyonso.

25 Bakento nyonso yina zabaka kisalu ya kuyidika basinga na maboko, nataka bima yina ba yidikaka: singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko. 26 Mpe bakento nyonso yina zabaka kisalu mbote-mbote, mpe yina ntima ya bawu vanda pesa, yidikaka singa na mika ya nkombo.

27 Mpe bamfumu nataka matadi ya oniksi mpe matadi ya nkaka yina ba zola tula na efode mpe na kitende ya ntulu, 28 kima ya nsunga ya kitoko yina ba ke bokilaka balzame mpe mafuta samu na nsemo mpe samu na kuyidika mafuta ya santu, mpe samu na ansan ya nsunga ya kitoko. 29 Bakento mpe babakala nyonso yina ntima ya bawu vanda nata bawu, pesaka kima samu na kisalu yina Yehova, na nzila ya Moyize, tumisaka ti ba sala. Bantu ya Izraele nataka makabu na luzolo ya bawu mosi na sika ya Yehova.

30 Na manima Moyize zonzaka na bantu ya Izraele: “Beno kuwa. Yehova me soola Bezalele mwana ya Uri, mwana ya Hure ya dibuta ya Yuda. 31 Yandi me fulusa yandi na mpeve ya Nzambi, yandi me pesa yandi ndwenga, mayela, mpe luzabu ya bisalu ya maboko ya mutindu nyonso, 32 samu na kuzaba kusala bizizi ya bima, samu na kusadila wolo, arza mpe kwivre, 33 samu na kuzenga matadi ya ntalu mpe kukangimisa yawu na bima, mpe samu na kusala bima ya kitoko ya mutindu nyonso na mabaya. 34 Mpe yandi me tula na kati ya ntima ya yandi mpe ya Oholiabe, mwana ya Ayisamake ya dibuta ya Dane, mayela ya kulonga bantu ya nkaka. 35 Yandi me fulusa bawu na mayela ya kusala mbote-mbote* bisalu nyonso ya muntu yina ke salaka kisalu ya maboko, ya muntu yina ke tungaka bizizi na balele, ya muntu yina ke yidikaka balele na singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko, mpe kisalu ya mutindu nyonso ya muntu yina ke yidikaka balele. Babakala yayi ke sala bisalu ya mutindu nyonso mpe ba ke bongisa bisalu nyonso ya kuyidika bima.

36 “Bezalele ke sala kintwadi na Oholiabe mpe babakala nyonso yina zaba kusala kisalu mbote-mbote,* ba yina Yehova me pesa ndwenga mpe mayela samu na kuzaba faso ya kusala bisalu nyonso ya kisika ya santu kaka mutindu Yehova me tumisa yawu.”

2 Na yawu Moyize bokilaka Bezalele na Oholiabe mpe babakala nyonso yina zabaka kisalu mbote-mbote, yina Yehova tulaka ndwenga na ntima ya bawu, babakala nyonso yina ntima nataka na kusala kisalu na luzolo ya bawu mosi. 3 Ba bakaka na sika ya Moyize makabu nyonso yina bantu ya Izarele nataka samu na kisalu ya kisika ya santu. Kasi konso suka, bantu vanda bika ve kunata makabu na luzolo ya bawu mosi.

4 Na manima ya kubanda kisalu, bantu nyonso yina zabaka kusala kisalu mbote-mbote vanda kwiza, mosi-mosi, 5 mpe ba vanda zonza na Moyize: “Bantu ke na nataka bima kulutila yina me lunga samu na kusala kisalu yina Yehova me tumisa na kusala.” 6 Na yawu Moyize tumisaka ti ba mwangisa nsangu yayi na bisika nyonso yina bantu vanda vanda: “Babakala, bakento, beno bika dyaka kunata bima samu na makabu ya santu.” Ni mutindu yina ba niminaka bantu na kunata dyaka bima. 7 Bima vandaka ya kulunga samu na kisalu nyonso yina ba zola sala, mpe ya kulutila yina ba vandaka na yawu nsatu.

8 Na yawu, bantu nyonso yina zabaka kisalu mbote-mbote yidikaka tabernakle na balele 10 ya singa ya lino ya kitoko yina me futamaka-futamaka, na singa ya bleu, na singa ya lene ya mbwaki-viole mpe na singa ya mbwaki ya ngolo; yandi* tungaka bizizi ya basherube na zulu ya balele. 9 Konso lele vandaka na yinda ya bakude* 28 mpe nene ya bakude 4. Balele nyonso vandaka nene mosi. 10 Yandi vukisaka balele tanu kintwadi, mpe balele tanu ya nkaka kintwadi. 11 Na manima, na singa ya bleu, yandi salaka mabulu na nsuka ya lele yina ke na nsuka ya mulonga ya ntete ya balele. Yandi salaka mutindu mosi samu na lele ya nsuka ya mulonga ya nkaka ya balele, kisika yina milonga zole ya balele zola vukana. 12 Yandi salaka mabulu 50 na lele mosi, mpe mabulu 50 na nsuka ya lele ya nkaka, na kisika yina ya zola vukana, samu mabulu talasana. 13 Na kumanisa, yandi salaka bakroshe 50 ya wolo mpe yandi vukisaka balele ya tenta na bakroshe yina. Na yawu ya kumaka lele mosi ya nene samu na tabernakle.

14 Na manima, yandi salaka balele na mika ya nkombo samu na kufuka tabernakle. Yandi salaka balele 11. 15 Konso lele vandaka na yinda ya bakude 30 mpe na nene ya bakude 4. Balele nyonso 11 vandaka nene mosi. 16 Yandi vukisaka balele 5, mpe yandi vukisa balele ya nkaka 6. 17 Na manima, yandi salaka mabulu 50 na nsuka ya lele yina ke na nsuka ya mulonga ya ntete, na kisika yina balele zola vukana, mpe yandi salaka mabulu 50 na nsuka ya lele ya mulonga ya nkaka yina zola vukana na yawu. 18 Mpe yandi salaka bakroshe ya kwivre 50 samu balele vukana mpe ya kuma lele mosi.

19 Yandi salaka lele na mpusu ya mbwaki ya dimeme ya bakala samu na kufuka tenta, mpe na zulu ya yawu yandi salaka lele na mpusu ya kibulu yina ba ke bokilaka foke.

20 Na manima, yandi salaka bakadre na mabaya ya akasia samu na tabernakle, mpe ya vandaka ya kutelama. 21 Ntela ya konso kadre vandaka bakude 10, mpe nene ya yawu vandaka kude mosi na ndambu. 22 Konso kadre vandaka na makulu* zole yina vandaka pene-pene na bampangi. Ni mutindu yina yandi salaka bakadre nyonso ya tabernakle. 23 Na yawu, yandi salaka bakadre 20 samu na lweka ya sude ya tabernakle. 24 Na manima, yandi salaka bivwandulu 40 ya arza yina vandaka na mabulu samu ya vanda na yisi ya bakadre 20. Ya vandaka na bivwandulu zole na yisi ya kadre ya ntete samu na makulu ya yawu zole, mpe bivwandulu zole samu na makulu zole ya konso kadre yina vanda landa. 25 Samu na lweka ya nkaka ya tabernakle, lweka ya nore, yandi salaka bakadre 20, 26 mpe bivwandulu ya yawu 40 ya arza, yina vandaka na mabulu. Bivwandulu zole vandaka na yisi ya kadre ya ntete mpe bivwandulu zole na yisi ya konso kadre ya nkaka.

27 Samu na manima ya tabernakle, na westi, yandi salaka bakadre 6. 28 Yandi salaka bakadre zole samu ya vanda makunzi na bansongi zole na manima ya tabernakle. 29 Makunzi vandaka zole kukatuka na yisi tii na zulu, tii na mulunga ya ntete. Ni mutindu yina yandi salaka samu na makunzi zole yina vandaka na bansongi. 30 Na yawu, nyonso vandaka bakadre 8 na bivwandulu ya yawu 16 ya arza, yina vandaka na mabulu. Bivwandulu zole vandaka na yisi ya konso kadre.

31 Na manima, yandi salaka bayinti na mabaya ya akasia, bayinti tanu samu na bakadre ya lweka mosi ya tabernakle 32 mpe bayinti tanu samu na bakadre ya lweka ya nkaka ya tabernakle, mpe bayinti tanu samu na bakadre ya manima ya tabernakle, na lweka ya westi. 33 Yandi salaka yinti ya kati-kati yina zola luta na kati-kati ya bakadre kubanda na nsongi mosi tii na nsongi ya nkaka. 34 Yandi pakulaka bakadre wolo, mpe yandi yidikilaka yawu milunga ya wolo samu ya simba bayinti, mpe yandi pakulaka bayinti wolo.

35 Na manima, yandi salaka rido na singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. Yandi tungaka bizizi ya basherube na zulu ya yawu. 36 Yandi yidikilaka rido makunzi yiya ya akasia, kintwadi na bakroshe ya wolo mpe yandi pakulaka makunzi wolo. Yandi sulumukisaka bisengo ya arza samu na kuyidika bivwandulu yiya yina vandaka na mabulu, samu na makunzi. 37 Na manima yandi salaka lele* samu na kisika ya kukotila ya tenta. Samu na kutunga yawu yandi vukisaka singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. 38 Yandi salaka mpe makunzi tanu ya akasia mpe bakroshe ya yawu samu na lele yango. Yandi pakulaka zulu ya makunzi mpe bikangulu* ya yawu wolo, kasi bivwandulu ya yawu tanu yina vandaka na mabulu, vandaka ya kwivre.

37 Na manima, Bezalele yidikaka Sanduku na mabaya ya akasia. Yinda ya yawu vandaka bakude* zole na ndambu, nene ya yawu kude mosi na ndambu, mpe ntela ya yawu kude mosi na ndambu. 2 Yandi pakulaka kati ya yawu mpe ngaanda ya yawu wolo yina ba me vukisa na ata kima, mpe yandi salaka ndilu ya wolo zinga-zinga ya yawu. 3 Yandi sulumukisaka wolo samu na kuyidikila sanduku milunga yiya, samu na kutula yawu na zulu ya makulu yiya ya sanduku, milunga zole na lweka mosi mpe milunga zole na lweka ya nkaka. 4 Na manima yandi salaka bayinti na mabaya ya akasia mpe yandi pakulaka yawu wolo. 5 Yandi lutisaka bayinti na kati ya milunga yina vandaka na balweka ya Sanduku, samu na kunanguna Sanduku.

6 Yandi yidikaka kitapu na wolo yina ba me vukisa na ata kima. Yinda ya yawu vandaka bakude zole na ndambu, mpe nene ya yawu kude mosi na ndambu. 7 Na manima, na bansongi zole ya kitapu, yandi yidikaka basherube zole ya wolo yina ba bulaka na marto. 8 Sherube mosi vandaka na nsongi mosi, mpe sherube ya nkaka vandaka na nsongi ya nkaka. Yandi yidikaka basherube na bansongi zole ya kitapu. 9 Basherube zole vandaka ya kufungula mapapu ya bawu na zulu, mpe mapapu yango vanda fuka kitapu. Ba vandaka ya kutalasana, mpe bizizi ya bawu vanda tala kitapu.

10 Na manima, yandi yidikaka mesa na mabaya ya akasia. Yinda ya yawu vandaka bakude zole, nene ya yawu kude mosi, mpe ntela ya yawu kude mosi na ndambu. 11 Yandi pakulaka mesa wolo yina ba me vukisa na ata kima, mpe yandi salaka ndilu ya wolo zinga-zinga ya yawu. 12 Na manima, yandi sadilaka yawu kadre yina vandaka na nene ya misapi yiya ya kukangama,* mpe yandi salaka ndilu ya wolo zinga-zinga ya kadre yina. 13 Dyaka, yandi sulumukisaka wolo samu na kuyidikila mesa milunga yiya, mpe yandi tulaka milunga yango na bansongi yiya, bisika yina makulu yiya vandaka ya kukangama. 14 Milunga vandaka pene-pene na kadre, mutindu bisimbilu samu na kunanguna mesa. 15 Yandi salaka bayinti na mabaya ya akasia samu na kunanguna mesa, mpe yandi pakulaka bayinti yango wolo. 16 Na manima, na wolo yina ba me vukisa na ata kima, yandi salaka bisalulu ya kutula na zulu ya mesa: bandonga ya yawu, bakopo ya yawu, bandonga ya yawu ya nene mpe biyuki ya yawu samu na kutyamuna makabu ya malafu.

17 Na manima, yandi salaka kima ya kutudila bamwinda na wolo yina ba me vukisa na ata kima. Yandi sadilaka marto samu na kusala yawu. Yisi ya yawu, yinti ya yawu, bakopo ya yawu, bambuma ya yawu mpe bafololo ya yawu vanda sala kaka kima mosi. 18 Babranshe 6 vanda basika na yinti ya yawu, babranshe tatu na lweka mosi ya kima ya kutudila bamwinda mpe babranshe tatu na lweka ya nkaka. 19 Na konso branshe, ya vandaka na bakopo tatu yina ba yidikaka mutindu bafololo ya yinti ya amande. Mpe na yisi ya konso kopo, ya vandaka na mbuma mpe kima mutindu fololo yina ke na sosaka kufunguka. Ni mutindu yina ya vandaka samu na babranshe 6 yina vanda basika na yinti ya kima ya kutudila bamwinda. 20 Mpe na yinti ya kima ya kutudila bamwinda, ya vandaka na bakopo yiya mutindu bafololo ya yinti ya amande, mpe na yisi ya konso kopo, ya vandaka na mbuma mpe kima mutindu fololo yina ke na sosaka kufunguka. 21 Ya vandaka na mbuma na yisi ya babranshe zole ya ntete yina vanda basika na yinti, mpe mbuma na yisi ya babranshe zole yina vanda landa, mpe mbuma na yisi ya babranshe zole ya nsuka. Ya vandaka mutindu yina samu na babranshe 6 ya yinti ya kima ya kutudila bamwinda. 22 Bambuma, babranshe mpe kima ya kutudila bamwinda yawu nyonso vanda sala kaka kima mosi. Ba salaka yawu na wolo yina ba me vukisa na ata kima mpe yina bulamaka na marto. 23 Na manima, na wolo yina ba me vukisa na ata kima, yandi salaka bamwinda 7 na bisimbilu* ya yawu mpe bima ya yawu ya kutudila tiya. 24 Samu na kusala yawu mpe bisalulu ya yawu nyonso, yandi sadilaka talanta* mosi ya wolo yina ba me vukisa na ata kima.

25 Na manima, yandi salaka mesa ya ansan na mabaya ya akasia. Ya vandaka mutindu mosi na balweka ya yawu nyonso, yinda ya yawu kude mosi, nene ya yawu kude mosi, mpe ntela ya yawu bakude zole. Mampoka ya yawu vanda sala kima mosi na yawu. 26 Yandi pakulaka yawu wolo yina ba me vukisa na ata kima: zulu ya yawu, balweka ya yawu nyonso mpe mampoka ya yawu; mpe yandi salaka ndilu ya wolo zinga-zinga ya yawu. 27 Na yisi ya ndilu ya yawu, na balweka zole yina vanda talasana, yandi yidikilaka mesa milunga ya wolo, zole na konso lweka, samu na kukotisa bayinti yina ba zola sadila samu na kunanguna mesa. 28 Na manima, yandi salaka bayinti na mabaya ya akasia mpe yandi pakulaka yawu wolo. 29 Yandi salaka mpe mafuta ya santu, mpe ansan ya siki-siki ya nsunga ya kitoko. Samu na kusala konso kima yayi, ba vukisaka bima mbote-mbote.*

38 Yandi yidikaka dikuku ya dikabu ya kuyoka na mabaya ya akasia. Yinda mpe nene ya yawu vandaka faso mosi. Yinda ya yawu vandaka bakude* tanu mpe nene ya yawu bakude tanu, mpe ntela ya yawu bakude tatu. 2 Na bansongi yiya ya yawu, yandi yidikaka mampoka. Mampoka ya dikuku vanda sala kima mosi na yawu, mpe yandi pakulaka dikuku kwivre. 3 Na manima, yandi salaka bisalulu nyonso ya dikuku: bakantini, bapele, bandonga, bafurshete, mpe bima ya kutudila tiya. Bisalulu ya yawu nyonso, yandi yidikaka yawu na kwivre. 4 Yandi salaka mpe kitalaka samu na dikuku. Ya vandaka bayinti ya kwivre yina ke na landasanaka na yisi ya kadre ya dikuku, na kati-kati ya yawu. 5 Yandi salaka milunga yiya na bansongi yiya pene-pene na kitalaka ya kwivre, samu ya vanda bisimbilu samu na bayinti. 6 Na manima, yandi salaka bayinti na mabaya ya akasia mpe yandi pakulaka yawu wolo. 7 Yandi tulaka bayinti na kati ya milunga na balweka ya dikuku samu na kunanguna yawu. Yandi yidikaka dikuku mutindu kesi ya mabaya, mpe kati ya yawu vandaka dibulu.

8 Na manima, yandi yidikaka ndonga ya nene ya kwivre mpe kivwandulu ya yawu; yandi sadilaka bitala-tala* ya bakento yina vanda salaka na kisika ya kukotila ya tenta ya lukutakanu, na kulandaka mutindu ba bongisaka bamambu.

9 Na manima, yandi yidikaka bima samu na kuzungisa lupangu. Na lweka ya sude ya lupangu, yandi salaka barido na yinda ya bakude 100 na singa ya lino ya kitoko yina me futamaka-futamaka. 10 Ya vandaka na makunzi 20 mpe bivwandulu ya kwivre 20 yina ke na mabulu. Bakroshe ya makunzi mpe bikangulu* ya yawu vandaka ya arza. 11 Dyaka, na lweka ya nore ya vandaka na barido mpe yinda ya yawu vandaka bakude 100. Makunzi ya yawu 20 mpe bivwandulu ya yawu 20 yina ke na mabulu, vandaka ya kwivre. Bakroshe ya makunzi mpe bikangulu* ya yawu vandaka ya arza. 12 Kasi na lweka ya westi, barido vandaka na nene ya bakude 50. Ya vandaka na makunzi 10 mpe bivwandulu 10 yina ke na mabulu. Bakroshe ya makunzi mpe bikangulu* ya yawu vandaka ya arza. 13 Nene ya lupangu na lweka ya esti, kisika yina ntangu ke basikaka, vandaka bakude 50. 14 Na lweka mosi, ya vandaka na barido ya yinda ya bakude 15, na makunzi tatu mpe bivwandulu tatu yina ke na mabulu. 15 Mpe na lweka ya nkaka, na lweka mosi ya kisika ya kukotila ya lupangu, ya vandaka na barido ya yinda ya bakude 15, na makunzi tatu mpe bivwandulu tatu yina ke na mabulu. 16 Barido nyonso yina vandaka ya kulelama zinga-zinga ya lupangu, ba salaka yawu na basinga ya lino ya kitoko yina me futamaka-futamaka. 17 Bivwandulu yina ke na mabulu samu na makunzi vandaka ya kwivre; bakroshe ya makunzi mpe bikangulu* ya yawu vandaka ya arza. Ba pakulaka bansongi ya yawu arza, mpe ya vandaka na bikangulu ya arza samu na makunzi nyonso ya lupangu.

18 Samu na kutunga lele* ya kisika ya kukotila ya lupangu, ba vukisaka singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. Yinda ya yawu vandaka bakude 20, mpe ntela ya yawu bakude 5. Ya vandaka ntela mosi na barido ya lupangu. 19 Makunzi ya yawu yiya mpe bivwandulu yiya ya yawu yina vandaka na mabulu, vandaka ya kwivre. Bakroshe ya makunzi mpe bikangulu* ya yawu vandaka ya arza, mpe ba pakulaka bansongi ya yawu arza. 20 Bayinti nyonso ya nsongi samu na tabernakle mpe samu na lupangu, vandaka ya kwivre.

21 Yayi lutangu ya bima yina ba sadilaka samu na kutunga tabernakle. Ni Moyize tumisaka ti ba tanga bima yina. Balevi salaka kisalu yayi na yisi ya lutwadusu ya Itamare, mwana ya nganga-nzambi Aroni. 22 Bezalele mwana ya Uri, mwana ya Hure ya dibuta ya Yuda, salaka mambu nyonso yina Yehova tumisaka na Moyize. 23 Yandi vandaka kintwadi na Oholiabe, mwana ya Ayisamake ya dibuta ya Dane, muntu ya kisalu ya maboko, muntu yina vanda tunga bizizi na balele, mpe yina vanda yidika balele na singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko.

24 Wolo nyonso yina ba sadilaka na kisalu ya kisika ya santu vandaka lutangu ya wolo ya dikabu ya kuningisa: batalanta* 29 mpe bashekele* 730 na kulandaka shekele ya kisika ya santu.* 25 Lutangu ya arza ya bantu ya kimvuka yina ba sonikisaka vandaka batalanta 100 mpe bashekele 1 775 na kulandaka shekele ya kisika ya santu.* 26 Ndambu ya shekele samu na konso muntu vandaka ndambu ya shekele na kulandaka shekele ya kisika ya santu* samu na konso bakala yina ba sonikisaka. Bantu yina ba sonikisaka, ba yina vandaka na bamvula 20 tii na zulu vandaka na lutangu ya 603 550.

27 Ba sulumukisaka batalanta 100 ya arza samu na kuyidika bivwandulu yina ke na mabulu samu na kisika ya santu mpe bivwandulu yina ke na mabulu samu na rido. Bivwandulu 100 yina ke na mabulu ke pesaka batalanta 100, talanta mosi samu na konso kivwandulu. 28 Na bashekele 1 775, yandi salaka bakroshe samu na makunzi, yandi pakulaka bansongi ya makunzi arza mpe vukisaka yawu kintwadi.

29 Kwivre ya dikabu* vandaka batalanta 70 mpe bashekele 2 400. 30 Na kwivre yina, yandi salaka bivwandulu yina ke na mabulu samu na kisika ya kukotila ya tenta ya lukutakanu, dikuku ya kwivre mpe kitalaka ya yawu ya kwivre, bisalulu nyonso ya dikuku, 31 bivwandulu yina ke na mabulu zinga-zinga ya lupangu, bivwandulu yina ke na mabulu samu na kisika ya kukotila ya lupangu, bayinti nyonso ya nsongi samu na tabernakle, mpe bayinti nyonso ya nsongi zinga-zinga ya lupangu.

39 Na singa ya bleu, singa ya lene ya mbwaki-viole mpe singa ya mbwaki ya ngolo, ba yidikaka bilele ya kitoko samu na kisalu ya kisika ya santu. Ba yidikaka bilele ya santu samu na Aroni kaka mutindu Yehova tumisaka Moyize.

2 Yandi yidikaka efode na wolo, singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. 3 Ba bulaka manzanza* ya wolo na marto samu na kukumisa yawu makasa ya kupetama, mpe yandi zengaka yawu mutindu basinga yina ba zola vukisa na singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko. Ba tungaka efode na basinga yina. 4 Ba yidikilaka efode bitini ya balele yina ba kangaka na mapeka samu na kuvukisa lele ya mantwala na lele ya manima. 5 Mpe kitende ya luketo yina ba tungaka mpe yina vandaka ya kukangama na efode samu na kusimba yawu, ba salaka yawu na bima ya faso mosi: wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka, kaka mutindu Yehova tumisaka Moyize.

6 Ba kotisaka matadi ya oniksi na kati ya bisimbilu ya wolo, mpe ba sonikaka bankumbu ya bana ya Izraele na zulu ya yawu, mutindu ba ke kotisaka bisoni na kinyemo.* 7 Yandi tulaka yawu na zulu ya bitini ya lele ya efode yina ke lutaka na mapeka, samu ya vanda matadi ya kubambuka moyo samu na bana ya Izraele, kaka mutindu Yehova tumisaka Moyize. 8 Na manima, yandi salaka kitende ya ntulu. Mutindu efode, ya vandaka kisalu ya muntu yina ke tungaka bizizi na balele. Yandi salaka yawu na wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka. 9 Ntangu ba vanda futika yawu, balweka nyonso vandaka faso mosi. Ba salaka kitende ya ntulu, mpe ntangu ba vanda futika yawu, yinda ya yawu mpe nene ya yawu vandaka diboko mosi ya kufunguka nene.* 10 Na zulu ya yawu, ba salaka milonga yiya ya matadi ya ntalu. Na mulonga ya ntete, ya vandaka na matadi ya rubi, topaze na emerode. 11 Na mulonga ya zole, ya vandaka na matadi ya turkwaze, safire na yasipe. 12 Na mulonga ya tatu, ya vandaka na matadi ya leshʹem,* agate, na ametiste. 13 Mpe na mulonga ya yiya, ya vandaka na matadi ya krizolite, oniksi na jade. Ba kotisaka yawu na bisimbilu ya wolo. 14 Matadi yango vandaka na bankumbu ya bana 12 ya Izraele. Ba salaka bankumbu yango mutindu kinyemo,* mpe konso ditadi vandaka na nkumbu ya dibuta mosi ya mabuta 12 ya Izraele.

15 Na manima, ba yidikaka basinga na wolo yina ba me vukisa na ata kima. Basinga yango vandaka basinga yina ba kangaka zole-zole. 16 Ba salaka bisimbilu zole ya wolo mpe milunga zole ya wolo, mpe ba tulaka milunga zole yina na bansongi zole ya kitende ya ntulu. 17 Na manima, ba lutisaka basinga zole ya wolo na kati ya milunga zole yina vandaka na bansongi ya kitende ya ntulu. 18 Ba kotisaka bansongi zole ya basinga zole na kati ya bisimbilu zole, mpe ba kangaka yawu na mapeka ya lele ya efode, na mantwala. 19 Na manima, ba yidikaka milunga zole ya wolo mpe ba tulaka yawu na bansongi zole ya kitini ya kati ya kitende ya ntulu yina vanda talasana na efode. 20 Ba salaka milunga zole ya nkaka ya wolo, mpe ba tulaka yawu na mantwala ya efode, na yisi ya bitini zole ya lele yina vanda luta na mapeka, pene-pene na kisika yina ya vanda vukana, na zulu ya kitende ya luketo ya efode. 21 Na kumanisa, ba kangaka kitende ya ntulu na singa ya bleu yina vanda luta na milunga ya kitende ya ntulu mpe na milunga ya efode. Ya vanda sala ti kitende ya ntulu bikana kaka na efode, na zulu ya kitende ya luketo yina ba tungaka, kaka mutindu Yehova tumisaka Moyize.

22 Na manima, yandi yidikaka kinkuti yina ke ve na maboko, ya kulwata na yisi ya efode. Ya vandaka kisalu ya muntu yina ke yidikaka balele. Yandi yidikaka yawu nyonso na singa ya bleu. 23 Na kati-kati ya yawu, ya vandaka na dibulu samu na kukotisa yintu, mutindu dibulu ya kinkuti ya kisengo. Ba tungaka zinga-zinga ya dibulu yango, samu ya pasuka ve. 24 Na manima, na kisika yina kinkuti yina ke ve na maboko vanda suka na yisi, ba salaka bambuma ya grenade na singa ya bleu, singa ya lene ya mbwaki-viole mpe singa ya mbwaki ya ngolo, yina ba kangaka kintwadi. 25 Mpe ba salaka bangunga* ya fioti na wolo yina ba me vukisa na ata kima. Ba tulaka bangunga yango na kati-kati ya bambuma ya grenade, zinga-zinga ya kisika yina kinkuti yina ke ve na maboko vanda suka na yisi, na kati-kati ya bambuma ya grenade. 26 Ba tulaka ngunga mosi na mbuma mosi ya grenade, ngunga mosi na mbuma mosi ya grenade, zinga-zinga ya kisika yina kinkuti yina ke ve na maboko vanda suka na yisi, kinkuti yina ba salaka samu na kisalu, kaka mutindu Yehova tumisaka Moyize.

27 Mpe ba salaka basutane na singa ya lino ya kitoko samu na Aroni mpe bana ya yandi. Ya vandaka kisalu ya muntu yina ke yidikaka balele. 28 Ba salaka mpe kitambala na singa ya lino ya kitoko, bima ya kulwata na yintu yina ke bongisaka nzutu na singa ya lino ya kitoko, bakaleson* ya lino yina ba salaka na singa ya lino ya kitoko yina me futamaka-futamaka, 29 mpe kitende ya luketo yina ba tungaka na kuvukisaka singa ya lino ya kitoko yina me futamaka-futamaka, singa ya bleu, singa ya lene ya mbwaki-viole mpe singa ya mbwaki ya ngolo, kaka mutindu Yehova tumisaka Moyize.

30 Na kumanisa, na wolo yina ba me vukisa na ata kima, ba yidikaka kidimbu ya santu ya kukipesa na Nzambi,* mwa dinzanza yina vanda ngenga, mpe ba kotisaka bisoni yayi na kati ya yawu mutindu muntu ke kotisaka bisoni na kinyemo:* “Busantu kele ya Yehova.” 31 Ba kangaka yawu na singa ya bleu samu na kutula yawu na zulu ya kitambala, kaka mutindu Yehova tumisaka Moyize.

32 Na yawu ba manisaka kisalu nyonso ya tabernakle, tenta ya lukutakanu, mpe bantu ya Izraele salaka mambu nyonso mutindu Yehova tumisaka Moyize. Ni mutindu yina ba salaka.

33 Na manima, ba nataka tabernakle na sika ya Moyize, tenta mpe bima ya yawu nyonso: bakroshe ya yawu, bakadre ya yawu, bayinti ya yawu, makunzi ya yawu, mpe bivwandulu ya yawu yina ke na mabulu; 34 lele ya mpusu ya mbwaki ya dimeme ya bakala samu na kufuka tenta, lele ya mpusu ya kibulu yina ba ke bokilaka foke samu na kufuka yawu, rido yina ke kabulaka; 35 sanduku ya Kimbangi, bayinti ya yawu mpe kitapu; 36 mesa, bisalulu ya yawu nyonso mpe mampa ya kulakisa; 37 kima ya kutudila bamwinda yina ba yidikaka na wolo yina ba me vukisa na ata kima, bamwinda ya yawu yina ba tulaka na mulonga, bisalulu ya yawu nyonso mpe mafuta samu na nsemo; 38 mesa ya wolo ya ansan,* mafuta ya santu, ansan ya nsunga ya kitoko, lele* samu na kisika ya kukotila ya tenta; 39 dikuku ya kwivre ya minkayulu mpe kitalaka ya yawu ya kwivre, bayinti ya yawu, bisalulu ya yawu nyonso, ndonga ya nene mpe kivwandulu ya yawu; 40 barido ya ngaanda ya lupangu, makunzi ya yawu mpe bivwandulu ya yawu yina ke na mabulu, lele* ya kisika ya kukotila ya lupangu, basinga ya tenta na bayinti ya yawu ya nsongi, mpe bisalulu nyonso samu na kisalu ya tabernakle, tenta ya lukutakanu; 41 bilele ya kitoko yina ba tungaka samu na kisalu ya kisika ya santu, bilele ya santu samu na nganga-nzambi Aroni, mpe bilele ya bana ya yandi samu na kusala mutindu banganga-nzambi.

42 Bantu ya Izraele salaka kisalu nyonso na kulandaka mambu nyonso yina Yehova tumisaka Moyize. 43 Ntangu Moyize talaka kisalu nyonso yina ba salaka, yandi talaka ti ba salaka yawu kaka mutindu Yehova tumisaka; mpe Moyize sakumunaka bawu.

40 Na manima Yehova zonzaka na Moyize: 2 “Kilumbu ya ntete ya ngonda ya ntete, nge ke telemisa tabernakle, tenta ya lukutakanu. 3 Tula sanduku ya Kimbangi na kati, mpe kanga Sanduku na rido. 4 Nge ke kotisa mesa mpe nge ke tula bima ya yawu na zulu ya yawu. Nge ke kotisa mpe kima ya kutudila bamwinda mpe nge ke namisa bamwinda ya yawu. 5 Na manima, tula mesa ya wolo ya ansan na mantwala ya sanduku ya Kimbangi, mpe tula lele* samu na kisika ya kukotila ya tabernakle.

6 “Nge ke tula dikuku ya dikabu ya kuyoka na mantwala ya kisika ya kukotila ya tabernakle, tenta ya lukutakanu, 7 mpe nge ke tula ndonga ya nene na kati-kati ya tenta ya lukutakanu mpe dikuku ya minkayulu, mpe nge ke tula maza na kati. 8 Na manima, nge ke tula barido zinga-zinga ya lupangu, mpe nge ke tula lele* na kisika ya kukotila ya lupangu. 9 Nge ke baka mafuta ya santu mpe nge ke tula tabernakle mpe bima ya yawu nyonso mafuta yango. Kumisa yawu mpe bisalulu ya yawu nyonso santu, samu ya kuma santu. 10 Nge ke tula dikuku ya dikabu ya kuyoka mpe bisalulu ya yawu nyonso mafuta, mpe nge ke kumisa kisika yango santu, samu ya kuma kisika mosi ya minkayulu ya kulutila santu. 11 Nge ke tula ndonga ya nene mpe kivwandulu ya yawu mafuta, mpe nge ke kumisa yawu santu.

12 “Na manima, nge ke nata Aroni mpe bana ya yandi pene-pene na kisika ya kukotila ya tenta ya lukutakanu, mpe nge ke yobisa bawu na maza. 13 Nge ke lwatisa Aroni bilele ya santu, nge ke tula yandi mafuta, mpe nge ke kumisa yandi santu, mpe yandi ke sadila munu mutindu nganga-nzambi. 14 Na manima, nata bana ya yandi pene-pene, mpe lwatisa bawu basutane. 15 Nge ke tula bawu mafuta kaka mutindu nge ke tula tata ya bawu mafuta, mpe kutula mafuta yango ke pesa bawu nzila samu ba sala kisalu ya bunganga-nzambi ntangu nyonso, na bambandu* ya bawu.”

16 Moyize salaka mambu nyonso mutindu Yehova tumisaka yandi. Ni mutindu yina yandi salaka.

17 Na ngonda ya ntete, na mvula ya zole, na kilumbu ya ntete ya ngonda, ba telemisaka tabernakle. 18 Ntangu Moyize telemisaka tabernakle, yandi tulaka bivwandulu ya yawu yina ke na mabulu, yandi telemisaka bakadre, yandi tulaka bayinti ya yawu mpe yandi telemisaka makunzi ya yawu. 19 Yandi tandaka tenta na zulu ya tabernakle mpe yandi tulaka lele ya kufuka tenta na zulu ya yawu, kaka mutindu Yehova tumisaka yandi.

20 Na manima, yandi bakaka Kimbangi mpe tulaka yawu na kati ya Sanduku. Yandi tulaka bayinti samu na kunanguna Sanduku mpe yandi tulaka kitapu na zulu ya Sanduku. 21 Yandi kotisaka Sanduku na kati ya tabernakle, yandi tulaka rido ya kukabula mpe yandi kangaka sanduku ya Kimbangi, kaka mutindu Yehova tumisaka yandi.

22 Na manima, yandi kotisaka mesa na kati ya tenta ya lukutakanu, na lweka ya nore ya tabernakle, na kisika yina ke na mantwala ya rido, 23 mpe yandi tulaka mulonga ya mampa na zulu ya yawu na mantwala ya Yehova, kaka mutindu Yehova tumisaka yandi.

24 Yandi tulaka kima ya kutudila bamwinda na kati ya tenta ya lukutakanu, na kisika yina vanda talasana na mesa, na lweka ya sude ya tabernakle. 25 Yandi namisaka bamwinda na mantwala ya Yehova kaka mutindu Yehova tumisaka yandi.

26 Na manima, yandi tulaka mesa ya wolo ya ansan na kati ya tenta ya lukutakanu, na mantwala ya rido, 27 samu na kuyoka ansan ya nsunga ya kitoko na zulu ya yawu kaka mutindu Yehova tumisaka yandi.

28 Na manima, yandi tulaka lele* samu na kisika ya kukotila ya tabernakle.

29 Yandi tulaka dikuku ya dikabu ya kuyoka na kisika ya kukotila ya tabernakle, tenta ya lukutakanu, samu na kupesa dikabu ya kuyoka mpe dikabu ya bambuma* na zulu ya yawu kaka mutindu Yehova tumisaka yandi.

30 Na manima, yandi tulaka ndonga ya nene na kati-kati ya tenta ya lukutakanu mpe dikuku ya minkayulu, mpe yandi tulaka maza na kati, samu na kuyobila. 31 Moyize, Aroni mpe bana ya yandi sukulaka maboko mpe makulu ya bawu na maza yina. 32 Bambala nyonso yina ba vanda kota na tenta ya lukutakanu, to ba vanda kwiza pene-pene na dikuku ya minkayulu, ba vanda yobila, kaka mutindu Yehova tumisaka Moyize.

33 Na kumanisa, yandi tulaka barido zinga-zinga ya lupangu ya tabernakle mpe dikuku ya minkayulu, mpe yandi tulaka lele* samu na kisika ya kukotila ya lupangu.

Mutindu yina, Moyize manisaka kisalu. 34 Mpe ditudi bandaka kufuka tenta ya lukutakanu, mpe nkembo ya Yehova fulukaka na tabernakle. 35 Moyize vanda lenda ve kukota na tenta ya lukutakanu samu dituti vandaka kaka na zulu ya yawu, mpe nkembo ya Yehova vanda fuluka na tabernakle.

36 Ntangu nyonso yina ba vanda sala nzyetolo ya bawu, ntangu dituti vanda katuka na zulu ya tabernakle, mpe ya vanda nanguka, bantu ya Izraele vanda kanga bima ya bawu mpe ba vanda kwenda. 37 Kasi, ntangu dituti vanda nanguka ve, ba vanda kanga ve bima ya bawu samu na kukwenda, tii kilumbu yina dituti ke nanguka. 38 Ya tsyeleka, dituti ya Yehova vandaka na zulu ya tabernakle na ntangu, mpe tiya vandaka na zulu ya yawu na mpimpa, na meso ya bantu nyonso ya Izraele. Ya vandaka mutindu yina ntangu nyonso yina ba vanda sala nzyetolo ya bawu.