NA BAEFEZE

1 Ni munu Polo, ntumwa ya Kristo Yesu na luzolo ya Nzambi. Mu ke na sonikaka na basantu yina ke na Efeze mpe yina ke ya kukwikama na bumosi na Kristo Yesu:

2 Bika ti ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.

3 Nkembo na Nzambi mpe Tata ya Mfumu ya beto Yesu Kristo, samu yandi me sakumuna beto na balusakumunu nyonso ya kimpeve na bisika ya zulu na bumosi na Kristo Yesu. 4 Nzambi soolaka beto samu beto vanda na bumosi na Yesu tekila yandi yidika yinza, samu beto vanda bantu ya santu mpe ya kukondwa mvindu na mantwala ya yandi na kati ya luzolo. 5 Nzambi bakaka mukanu ya kundima beto mutindu bana ya yandi na nzila ya Yesu Kristo, na mutindu yina ke ya kukwelana na kilengi mpe luzolo ya yandi. 6 Na yina, beto kembila yandi samu na bunene ya ntima ya yandi ya kulutila mbote, yina yandi lakisaka beto na nzila ya Mwana ya yandi yina yandi ke zolaka mingi. 7 Na nzila ya yandi, Nzambi sumbaka beto, pesaka beto kimpwanza mpe beto kuzwaka mulemvo ya masumu ya beto na nzila ya menga ya mwana ya yandi, na kutadilaka bunene ya ntima ya kulutila mbote ya Nzambi.

8 Yandi lakisaka beto ntima ya yandi ya kulutila mbote, na mutindu yina yandi pesaka beto ndwenga nyonso mpe mayela. 9 Na kusalaka mutindu yina, yandi lakisaka beto kinsweki ya santu ya dikanisi ya yandi. Ya ke ya kukwelana na mambu yina ke pesaka yandi kilengi, mambu yina yandi mosi bakaka mukanu. 10 Samu na kutwadisa bamambu tii na nsuka ya ntangu yina yandi soolaka na kuvukisa bima nyonso na Kristo, bima nyonso yina ke na mazulu mpe bima nyonso yina ke na ntoto. Ee, na yandi 11 muntu yina beto ke na bumosi mpe yina ba soolaka beto na kuzwa dikabu na yandi. Ba soolaka beto banda ntama samu na kulungisa dikanisi ya muntu yina ke lungisaka mambu nyonso yina yandi kanisaka kusala na mutindu yina ke ya kukwelana na luzolo ya yandi. 12 Ni na yina, beto ba yina ke bantu ya ntete na kuvanda na kivuvu na Kristo, beto fwana kupesa Nzambi lukumu mpe nkembo. 13 Kasi beno mpe beno kumaka na kivuvu na yandi ntangu beno kuwaka mambu ya matsyeleka, nsangu ya mbote na yina me tadila kuvuuka ya beno. Na manima ya kukwikila na yandi, Nzambi sadilaka mpeve ya santu yina yandi pesaka nsilulu na kutula kidimbu na zulu ya beno. Yandi sadilaka Kristo samu na kusala yawu. 14 Mpeve ya santu ke mutindu nsilulu yina ke lakisaka ti beto ke kuzwa mambu yina Nzambi pesaka beto nsilulu. Nzambi salaka yawu samu na kufuta ntalu ya kupesa dikanda ya yandi kimpwanza. Ya ke sala ti yandi kuzwa nkembo ya kulutila.

15 Ni na yawu, kubanda ntangu yina mu kuwaka nsangu ya kiminu ya beno na Mfumu Yesu mpe na luzolo yina beno ke lakisaka samu na basantu nyonso, 16 mu ke vutulaka ntangu nyonso matondo na Nzambi samu na beno. Mu ke bika ve na kutula beno na balusambu ya munu 17 samu Nzambi ya Mfumu ya beto Yesu Kristo, Tata ya nkembo, pesa beno mpeve ya ndwenga mpe ya luzabusu samu beno zaba yandi mbote-mbote. 18 Nzambi me fungula bantima ya beno samu beno lenda kutala mpe kuzaba kivuvu yina yandi me pesa beno, mpe bima ya mbote yina ba lenda fwanisa na ata kima mosi ve yina yandi me pesa nsilulu na basantu. 19 Beno zaba mpe bunene ya ngolo ya yandi yina yandi lakisaka na beto bantu yina ke kwikilaka. Ya talanaka pwelele na bisalu yina lunganaka na nzila ya ngolo ya yandi yina ke ve na ndilu, 20 ngolo yina yandi sadilaka na Kristo ntangu yandi vumbulaka yandi na lufwa mpe vandisaka yandi na diboko ya yandi ya bakala na mazulu. 21 Yandi zangulaka yandi na faso mosi ya kulutila na zulu ya baluyalu nyonso, na zulu ya bantu nyonso yina ke na lutumu, na zulu ya bantu nyonso yina ke yalaka, na zulu ya bamfumu nyonso mpe na zulu ya konso nkumbu yina bantu lenda zonzila na yinza* yayi, mpe na yinza yina ke kwiza. 22 Yandi tulaka mpe bima nyonso na yisi ya makulu ya yandi, mpe tulaka yandi mfumu na zulu ya bima nyonso ya dibuundu. 23 Dibuundu ke mutindu nzutu ya yandi, mpe yandi pesaka na dibuundu nyonso yina ya vandaka na yawu nsatu.

2 Dyaka, Nzambi vutulaka beno na luzingu na ntangu yina beno vandaka ya kufwa samu na bamambu ya beno ya yimbi mpe samu na masumu ya beno, 2 yina beno vanda salaka na ntama na kulandaka mutindu ya kuzinga ya yinza yayi, na kulandaka mfumu ya ngolo ya mupepe, ya mpeve yina ntangu yayi ke na salaka na kati ya bana ya kukondwa kutumama. 3 Ya tsyeleka, beto nyonso vanda dyatilaka na kulandaka bansatu ya nzutu ya beto, na kusalaka bamambu yina nzutu vandaka na nsatu ya yawu mpe na kudyatilaka na kulandaka makanisi ya beto. Banda ntangu yina beto butukaka, beto vandaka bantu yina bongaka kuzwa nkele ya Nzambi mutindu ba ya nkaka. 4 Kasi Nzambi, samu yandi ke ya kufuluka na ntima ya kyadi mpe samu na luzolo ya yandi ya kulutila yina yandi zolaka beto, 5 yandi me vutula beto na luzingu kintwadi na Kristo, ata na ntangu yina beto vandaka ya kufwa samu na bamambu ya beto ya yimbi. Ya ke ni samu na ntima ya yandi ya kulutila mbote beno vuukaka. 6 Dyaka, yandi vumbulaka beto kintwadi mpe vandisaka beto kintwadi na mazulu na bumosi na Kristo Yesu. 7 Nzambi me sala yawu samu na yinza* ya malu-malu yina ke kwiza. Yandi ke lakisa bumbote na faso ya kulutila ntangu yandi ke sala bamambu ya mbote samu na beto ba yina ke na bumosi na Kristo Yesu.

8 Ni samu na ntima ya kulutila mbote yina, beno vuukaka na nzila ya kiminu mpe kuvuuka yango me katuka ve na beno, kasi ya ke dikabu ya Nzambi. 9 Ve, ya me katuka ve na bisalu ya beno, samu ata muntu vanda na mambu ya kubula ntulu. 10 Beto kele mbuma ya kisalu ya Nzambi mpe ba yidikaka beto na bumosi na Kristo Yesu samu na bisalu ya mbote yina Nzambi yidikaka na mantwala samu beto sadila yawu.

11 Na yawu beno bantu ya makanda, beno kuzimbana ve ti na ntama ba vanda bokilaka beno “bantu yina ke ve ya kuzenga kibakala” na bantu yina ba vanda bokilaka “bantu yina ke ya kuzenga kibakala,” yina kuzenga kibakala ya bawu salamaka na kinsuni na maboko ya bantu. 12 Na ntangu yina beno vandaka ve na Kristo, beno vandaka ntama na dikanda ya Izraele mpe beno vandaka banzenza na luwawanu ya nsilulu. Beno vandaka ve na kivuvu mpe beno vandaka ve na Nzambi na yinza. 13 Kasi ntangu yayi, na bumosi na Kristo Yesu, beno ba yina vandaka ntama na Nzambi, beno me kuma pene-pene na yandi na nzila ya menga ya Kristo. 14 Samu yandi ke kizunu ya beto, yandi salaka ti bimvuka zole yina kuma kimvuka mosi mpe mwangisaka kibaka yina vandaka na kati-kati ya bimvuka yango. 15 Na nzila ya nzutu ya yandi, yandi katulaka mambu yina ke butaka nkele. Ya zola zonza, Musiku yina ke na misiku mpe banzengolo,* samu na kukumisa bimvuka zole yina muntu mosi ya malu-malu, yina ke na bumosi na yandi mpe samu na kutula kizunu, 16 samu na kuvutula kindiku na faso ya kulunga na kati ya Nzambi na makanda zole yayi, yina me kuma nzutu mosi na nzila ya yinti ya mpasi,* samu yandi kufwaka kimbeni na nzila ya yandi mosi. 17 Yandi kwizaka mpe yandi zonzilaka nsangu ya mbote ya kizunu na beno ba yina vandaka ntama na Nzambi, mpe kizunu na ba yina vandaka pene-pene na yandi. 18 Na nzila ya yandi, beto bantu ya makanda nyonso zole, beto lenda kwenda na mantwala ya Tata na mpeve mosi kaka.

19 Ni na yawu, beno ke dyaka ve banzenza, kasi beno ke bantu ya bwala mosi, mutindu basantu nyonso. 20 Ba tungaka beno na zulu ya fondasio ya bantumwa mpe ya bambikudi. Kristo Yesu yandi mosi ke ditadi ya nsongi ya fondasio. 21 Na bumosi na yandi, matadi nyonso ya yinzo ke kangamaka mbote kintwadi. Ya ke kulaka samu na kukuma tempelo ya santu samu na Yehova.* 22 Na bumosi na yandi, beno mpe ba ke na tungaka beno kintwadi samu beno kuma kisika Nzambi ke vandaka na mpeve.

3 Ni na yina, munu Polo yina ke na boloko samu na Kristo Yesu, samu na mbote ya beno bantu ya makanda . . . 2 ba soolaka munu samu na kusadisa beno na kuzwa ntima ya kulutila mbote ya Nzambi. 3 Ni na nzila ya kimona-meso ba zonzilaka munu kinsweki ya santu, mutindu mu zonzaka ntete yawu na bunkufi. 4 Na yawu, kana beno tanga mambu yayi, beno ke lenda kubakula ti mu me zaba kinsweki ya santu ya Kristo. 5 Na bantu ya bantangu ya nkaka, Nzambi zabisaka ve kinsweki yayi na bana ya bantu mutindu yandi me lakisa yawu ntangu yayi na bantumwa mpe bambikudi ya yandi ya santu na nzila ya mpeve. 6 Kinsweki ni yayi: Ba yina ke ve Bazwife mpe kele na bumosi na Kristo Yesu, ke kuzwa bima yina Yesu me kuzwa mpe ba ke kuma kitini ya nzutu. Ba ke kuzwa mpe bima yina Nzambi pesaka beto nsilulu samu na nsangu ya mbote. 7 Mu kumaka kisadi ya kinsweki yayi, na kutadilaka dikabu ya ofele ya ntima ya kulutila mbote ya Nzambi, yina yandi lakisaka munu na nzila ya ngolo ya yandi.

8 Ni na munu, muntu ya fioti kuluta muntu ya kulutila fioti na basantu nyonso, ba lakisaka ntima ya kulutila mbote yayi. Na yawu, mu me fwana kuzabisa nsangu ya mbote na makanda na yina me tadila bimvwama ya Kristo yina ke ve na nsuka, 9 mpe mu me fwana kusadisa bantu na kuzaba mutindu ba ke twadisa mambu ya kinsweki ya santu yina Nzambi bumbaka banda ntama, Nzambi yina yidikaka bima nyonso. 10 Ya salamaka mutindu yayi samu ti na nzila ya kimvuka, ndwenga ya kulutila nene ya Nzambi zabana na baluyalu mpe na bantu yina ke na lutumu na bisika ya mazulu. 11 Ya ke ya kukwelana na mukanu yina ke ve na nsuka yina yandi bongisaka na yina me tadila Kristo, Yesu Mfumu ya beto. 12 Na nzila ya yandi, beto ke zonzaka na bukindi mpe ke kwendaka na mantwala ya Nzambi na kundima na nzila ya kiminu ya beto na yandi. 13 Na yawu, mu ke na lombaka na beno na kubika ve ti mpasi yina mu ke na talaka samu na beno kulembisa beno. Samu ya zola zonza nkembo samu na beno.

14 Ni na yawu mu ke fukamaka na mantwala ya Tata, 15 muntu yina ke salaka ti makanda nyonso na zulu mpe na ntoto vanda. 16 Mu ke na sambilaka ti na lusalusu ya nkembo ya yandi ya nene, yandi pesa beno nzila ya kukuma ngolo na kimuntu ya beno ya kati, na nzila ya ngolo yina mpeve ya yandi ke pesaka, 17 mpe ti na nzila ya kiminu ya beno, Kristo zinga na kati ya bantima ya beno na luzolo. Beno vanda ya kusikama mpe ya kukangama ngolo na fondasio, 18 samu kintwadi na basantu nyonso, beno lenda kubakula mbote-mbote bunene, yinda, ntela, mpe sunda,* 19 samu beno zaba luzolo ya Kristo yina me lutila nzayilu mpe samu beno vanda ya kufuluka na bima nyonso ya mbote yina Nzambi ke pesaka.

20 Ntangu yayi Nzambi lenda sala mingi kulutila mambu nyonso yina beto ke lombaka to yina beto ke kanisaka. 21 Bika ti nkembo kuvanda na yandi na nzila ya kimvuka mpe na nzila ya Kristo Yesu na kati ya bantangu nyonso ya bantu tii mvula na mvula. Ameni.

4 Ni na yina, munu Polo yina ke na boloko samu na Mfumu, mu ke na bondilaka beno na kutambula na mutindu yina me fwanana na kubokila yina ba bokilaka beno. 2 Na kukuluka nyonso, na lembami mpe na ntima ya yinda, konso muntu me fwana kukanga ntima na bifu ya bampangi na luzolo. 3 Beno sala bangolo mingi na kubumba bumosi ya mpeve na kati ya kizunu. 4 Ya ke kaka na nzutu mosi mpe mpeve mosi, mutindu ya ke kaka na kivuvu mosi yina ba bokilaka beno. 5 Mfumu mosi, kiminu mosi, mbotokolo mosi. 6 Nzambi mosi mpe Tata ya bantu nyonso, yina ke na zulu ya bantu nyonso, yina ke salaka na nzila ya bantu nyonso mpe na bantu nyonso.

7 Mosi na mosi na kati ya beto kuzwaka ntima ya kulutila mbote yina katukaka na Nzambi mpe ni Kristo pesaka dikabu yayi na mosi na mosi ya beto. 8 Masonoko ke zonzaka: “Ntangu yandi kwendaka na zulu, yandi basisaka bantu na boloko, mpe yandi pesaka makabu ya bantu.” 9 Yinki zola zonza nzonzolo “yandi kwendaka na zulu,” kasi ntete-ntete yandi kulumukaka na bisika ya yisi, yina ke ntoto? 10 Muntu yina kulumukaka, ni yandi mpe kwendaka ntama kuluta zulu nyonso samu yandi lungisa mambu nyonso.

11 Yandi pesaka ba ya nkaka mutindu bantumwa, ba ya nkaka mutindu bambikudi, ba ya nkaka mutindu basamuni ya nsangu ya mbote, ba ya nkaka mutindu mivungi mpe balongi, 12 samu na kusungika basantu na kisalu ya kusadisa bantu ya nkaka, na kutunga nzutu ya Kristo, 13 tii ntangu beto ke kuma na bumosi na kiminu mpe ke zaba mbote-mbote Mwana ya Nzambi, samu na mutindu yina, beto kuma bantu ya kuyela mutindu Kristo kele. 14 Na yina, beto me fwana kuvanda dyaka ve bana ya fioti, samu muntu yina ke landaka malongi ya bantu yina ke vunaka bampangi, ke mutindu bwatu yina ke na mubu, yina mupepe na maza ke nataka kisika ni kisika. 15 Kasi beto zonza matsyeleka, beto kula na luzolo na mambu nyonso, tii na kukuma pene-pene na muntu yina ke yintu ya nzutu, Kristo. 16 Beto ke mutindu nzutu ya muntu mpe na nzila ya yandi binama nyonso ya nzutu yayi ke ya kuvukana mpe ke sadisaka nzutu na kusala. Kana konso kinama ya nzutu yayi ke lungisaka kisalu ya yawu, nzutu yango ke kula na faso mosi ya mbote mpe beto ke zolasana.

17 Yayi ni mambu yina mu ke na zonzaka mpe mu me ndima na Mfumu: Beno me fwana kutambula dyaka ve mutindu bantu ya makanda ke tambulaka, na kulandaka makanisi ya bawu yina ke ve malonga. 18 Makanisi ya bawu ke na kati ya kitombi mpe ba ke ntama na luzingu yina ke katukaka na Nzambi, samu ba me kondwa luzabu mpe samu ba ke na ntima-ngolo. 19 Ba ke talaka dyaka ve nsoni, ba ke kukipesaka na ndyatulu ya busafu mpe ya nko,* samu na kusala mvindu ya mutindu nyonso na lukoso.

20 Kasi ni yina ve beno longokaka samu na Kristo. 21 Ya tsyeleka, beno kuwaka yandi mpe ba longaka beno na nzila ya yandi ti matsyeleka ke ni na Yesu. 22 Ba longaka beno na kulosa kimuntu ya ntama yina ke ya kukwelana na ndyatulu ya beno ya ntama, mpe yina ke na bolaka na kulandaka bansatu ya yawu ya luvunu. 23 Beno fwana kubika ve kukuma bantu ya malu-malu na ngolo yina ke twadisaka makanisi ya beno.* 24 Mpe beno fwana kulwata kimuntu ya malu-malu yina ba yidikaka na kulandaka luzolo ya Nzambi, lunungu, mpe lukwikulu.

25 Ni na yawu, ntangu yayi yina beno me losa luvunu, konso muntu me fwana kuzonza matsyeleka na mpangi ya yandi, samu beto nyonso ke binama ya nzutu mosi. 26 Beno vanda na nkele, kasi beno kusala ve disumu. Beno kubumba ve nkele tii ntangu ke kota. 27 Beno kupesa ve nzila na Satana. 28 Bika ti muntu yina ke labaka, kulaba dyaka ve. Kasi bika yandi sala kisalu ya ngolo, na kusalaka kisalu ya mbote na maboko ya yandi samu yandi kuzwa kima ya kupesa na muntu yina me kondwa kima. 29 Ata mambu mosi ve ya kubola kubasika na bayinwa ya beno. Kasi beno basisa kaka mambu ya mbote samu na kukindisa bantu yina ke na yawu nsatu, samu ya natina lusakumunu na bantu yina ke kuwa yawu. 30 Dyaka, beno kunyongisa ve mpeve ya santu ya Nzambi. Ni na nzila ya yawu Nzambi tulaka beno kidimbu samu na kupesa beno kimpwanza na nzila ya munkayulu.

31 Beno katula na kati ya beno mitindu nyonso ya mambu ya yimbi, nkele, kudasuka, kuganga, kufinga mpe mambu nyonso ya yimbi. 32 Kasi beno lakisa ntima ya mbote beno na beno, beno vanda na mawa samu na bantu ya nkaka, beno lemvokila beno na beno na ntima mosi, mutindu Nzambi mpe na nzila ya Kristo lemvokilaka beno na ntima mosi.

5 Na yawu, beno tatamana na kulanda kifwani ya Nzambi mutindu bana yina yandi ke zolaka mingi. 2 Beno tatamana mpe na kuzinga na kati ya luzolo, kaka mutindu Kristo mpe zolaka beto* mpe pesaka luzingu ya yandi mutindu dikabu mpe munkayulu samu na beto,* mananasi ya nsunga ya kitoko na Nzambi.

3 Bika ti ba zonzila ata fioti ve na kati ya beno mambu ya kinsuza,* mambu ya mvindu ya mutindu nyonso to ya lukoso, mutindu ya me lunga samu na bantu ya santu. 4 Beno kuvanda mpe ve na ndyatulu ya nsoni, nzonzolo ya buzoba, kusakana ya nsoni, bamambu nyonso yina ke ve ya kulunga, kasi beno vutula matondo na Nzambi. 5 Samu beno zaba mambu yayi mpe beno zaba ti ata muntu mosi ve yina ke salaka kinsuza,* yina ke salaka mambu ya mvindu to muntu ya lukoso, yina zola zonza muntu yina ke sambilaka biteki, ke ve na dikabu na kati ya Kimfumu ya Kristo mpe ya Nzambi.

6 Bika ti ata muntu kuvuna beno na nzonzolo ya kukondwa mfunu, samu ya ke ni na bamambu ya mutindu yayi, nkele ya Nzambi ke kwizilaka na zulu ya bana ya kukondwa kutumama. 7 Na yawu, beno kuvukana ve na bawu. 8 Beno vandaka ntete kitombi, kasi ntangu yayi beno me kuma nsemo, na bumosi na Mfumu. Beno tatamana na kutambula mutindu bana ya nsemo, 9 samu mbuma ya nsemo ke mutindu nyonso ya bumbote mpe ya lunungu* mpe ya matsyeleka. 10 Beno tatamana na kusosa kuzaba mbote-mbote mambu yina mfumu ke ndimaka. 11 Beno bika mpe kuvukana na bisalu ya kitombi yina ke butaka ve mbuma, kasi beno tula yawu na nsemo ya matsyeleka. 12 Bamambu yina ba ke salaka na kinsweki ke nsoni mingi ata na kuzonzila yawu. 13 Ntangu yayi, nsemo ke na ngengaka na zulu ya bamambu yina ke ve ya kulunga mpe na mutindu yina, bamambu yina ke ya kulunga me talana pwelele. 14 Ni na yawu masonoko ya santu ke zonzaka: “Nge muntu ke ya kufwa mutindu muntu me lala pongi ya ngolo, vumbuka, telama, mpe Kristo ke pesa nge nsemo.”

15 Na yawu, beno sala keba na kuzinga ve mutindu bantu yina ke ve na ndwenga, kasi beno zinga mutindu bantu yina ke na ndwenga. 16 Beno sadila mbote-mbote ntangu ya beno, samu bilumbu kele yimbi. 17 Ni na yawu, beno bika kuvanda bazoba, kasi beno tatamana na kusosa kubakula wapi yina ke luzolo ya Yehova.* 18 Dyaka, beno kola ve vinu, samu ti kukola vinu ke nata beno na kusala bamambu ya kulutila yimbi. Kasi beno tatamana na kufuluka na mpeve ya santu ya Nzambi. 19 Beno kindisa bampangi* na bankunga, na kukembilaka Nzambi mpe na kuyimbaka banzimbu ya kimpeve. Beno yimbila Yehova* mutindu beno ke na kubulaka miziki na kati ya bantima ya beno. 20 Ntangu nyonso beno vutula matondo na Nzambi mpe Tata ya beto samu na mambu nyonso na nkumbu ya Mfumu ya beto Yesu Kristo.

21 Konso muntu kutumama na muntu ya nkaka na kati ya boma ya Kristo. 22 Bika ti bakento kutumama na babakala ya bawu, mutindu ba ke tumamaka na Mfumu, 23 samu bakala ke mfumu ya kento ya yandi, kaka mutindu Kristo ke Mfumu ya dibuundu, ni yandi ke muvuukisi ya nzutu yayi. 24 Na yawu, mutindu dibuundu ke tumamaka na Kristo, bakento fwana kutumama na babakala ya bawu na mambu nyonso. 25 Babakala, beno tatamana na kuzola bakento ya beno kaka mutindu Kristo zolaka dibuundu mpe pesaka luzingu ya yandi samu na yawu, 26 samu yandi katula mvindu na zulu ya yawu, yandi kumisa yawu bunkete, na kusukulaka yawu na maza ya dyambu ya Nzambi. 27 Yandi salaka yawu samu na kukumisa dibuundu kitoko na meso ya yandi. Yandi zola ti dibuundu vanda santu mpe ya vanda ve na mvindu.

28 Mutindu mosi, babakala fwana kuzola bakento ya bawu mutindu ba ke zolaka banzutu ya bawu mosi. Bakala yina ke zolaka kento ya yandi ke zolaka nzutu ya yandi mosi, 29 samu ata muntu mosi ve ke yiinaka nzutu* ya yandi mosi. Kasi yandi ke dikisaka yawu mpe ke kipeke yawu, kaka mutindu Kristo ke salaka samu na dibuundu, 30 samu beto ke binama ya nzutu ya yandi. 31 “Ni na yawu bakala ke bika tata na mama ya yandi, mpe yandi ke kangama na kento ya yandi, mpe bawu zole ke kuma musuni* mosi.” 32 Kinsweki ya santu yayi ke nene. Mu ke na zonzilaka mambu yina me tadila Kristo mpe dibuundu. 33 Kasi konso muntu na kati ya beno fwana kuzola kento ya yandi mutindu yandi ke zolaka nzutu ya yandi mosi. Mpe kento fwana kuvanda na buzitu ya mingi samu na bakala ya yandi.

6 Bana, beno tumama na bibuti ya beno na bumosi na Mfumu, samu ya ke mbote. 2 “Pesa tata ya nge na mama ya nge lukumu;” ya ke musiku ya ntete yina ke na nsilulu yayi: 3 “Samu bamambu kwenda mbote samu na nge mpe nge zinga ntangu mingi na ntoto.” 4 Batata, beno kupesa ve bana ya beno nkele, kasi beno tatamana na kukulisa bawu na malongi mpe balukebusu* ya Yehova.*

5 Bisadi, beno tumama na bamfumu ya beno awa na zulu ya ntoto* na boma mpe kutekita. Beno tumama na ntima ya beno nyonso mutindu beno ke tumamaka na Kristo. 6 Beno kusala ve yawu kaka ntangu ba ke talaka beno samu na kusepelisa bantu, kasi mutindu bisadi ya Kristo ke salaka luzolo ya Nzambi na mwela* ya bawu nyonso. 7 Beno sala kisalu ya beno na makanisi ya mbote mutindu samu na Yehova,* kasi ve samu na bantu, 8 samu beno zaba ti mambu ni mambu ya mbote yina muntu ni muntu ke sala, Yehova* muntu ke futa yandi. Ya vanda yandi kele kisadi to yandi ke na kimpwanza. 9 Dyaka, beno bamfumu, beno bakila bisadi ya beno na kulandaka malongi yina. Beno kupesa ve bawu boma, samu beno zaba ti Mfumu ya bawu mpe ya beno ke na zulu. Yandi ke soolaka ve bizizi.

10 Na kumanisa, beno tatamana na kuzwa ngolo na kati ya Mfumu mpe na bunene ya ngolo ya yandi. 11 Beno lwata mvwatulu nyonso ya mvita yina Nzambi ke pesaka samu beno lenda kuvanda ya kukubama na mantwala ya mayela ya yimbi ya Dyabulu, 12 samu beto ke nwanaka ve na menga mpe musuni. Kasi beto ke nwanaka na baluyalu, bantu yina ke na lutumu, bamfumu ya yinza yayi ya kitombi, mpe bampeve ya yimbi yina ke na bisika ya zulu. 13 Ni na yawu, beno baka mvwatulu nyonso ya mvita yina Nzambi ke pesaka, samu beno lenda kunwana ntangu kilumbu ya yimbi ke kuma. Na manima ya kulungisa mambu nyonso, beno telama ngolo.

14 Na yawu, beno vanda ya kutelama ngolo, beno lwata matsyeleka mutindu singa yina ba ke kangaka na luketo, beno lwata kinkuti ya kisengo ya lunungu* yina ke bumbaka ntulu 15 mpe beno lwata na makulu ya beno mapapa samu na kuvanda ya kubongama na kuzabisa nsangu ya mbote ya kizunu. 16 Dyaka, beno baka kikebolo ya nene ya nzutu ya kiminu, ya ke sadisa beno na kufwa madyonga nyonso ya tiya ya muntu ya yimbi. 17 Beno ndima mpe yimpu ya luvuukusu mpe mbele ya mpeve, yina zola zonza mambu ya Nzambi. 18 Na kumanisa, beno vanda ntangu nyonso ya kuvumbuka mpe beno bondila na lusambu samu na basantu. 19 Beno sambila mpe samu na munu, samu ntangu mu ke fungula yinwa, ba pesa munu mambu yina mu me fwana kuzonza, samu mu zonza na bukindi nyonso ntangu mu ke zabisa kinsweki ya santu ya nsangu ya mbote. 20 Ni Nzambi filisaka munu na kusamuna nsangu ya mbote. Ni na yawu ba me kanga munu na basinga ya bisengo. Beno sambila Nzambi samu na munu samu mu lenda kuzonzila nsangu ya mbote, kukondwa boma, na mutindu yina ya me lunga kusalama.

21 Beno zaba mpe mambu ya munu mpe yinki mu ke na salaka. Tishike yina ke mpangi yina beto ke zolaka mingi mpe kisadi ya kukwikama na Mfumu, ke zabisa beno mambu nyonso. 22 Mu ke na filisaka yandi na sika ya beno samu yandi zonza na beno mutindu beto kele, mpe samu yandi kindisa beno.

23 Bika ti kizunu mpe luzolo na kiminu yina ke katukaka na Nzambi Tata ya beno mpe ya Mfumu Yesu Kristo vanda na beno bampangi. 24 Bika ti ntima ya kulutila mbote vanda na ba yina nyonso ke zolaka Mfumu ya beto Yesu Kristo na luzolo yina ke ve na nsuka.