NA BAFILIPI

1 Polo na Timote, bisadi ya Kristo Yesu, na basantu nyonso ya bwala ya Filipi yina ke na bumosi na Kristo Yesu, na mikengi mpe na basadisi:

2 Bika ti ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.

3 Mu ke vutulaka ntangu nyonso matondo na Nzambi ya munu ntangu mu ke kanisaka na beno. 4 Bantangu nyonso yina mu ke bondilaka Nzambi samu na beno nyonso, mu ke salaka yawu na kilengi, 5 samu beno tulaka diboko na kumwangisa nsangu ya mbote kubanda kilumbu ya ntete yina beno kuwaka yawu tii ntangu yayi. 6 Mu ke na kundima ti Nzambi yina bandaka kisalu ya mbote na kati ya beno ke bika ve kusala yawu tii na kilumbu yina Kristo Yesu ke vutuka. 7 Ya ke ya kulunga ti mu vanda na makanisi ya mutindu yayi samu na beno, samu ti mu ke zolaka beno na ntima mosi, mpe beno mpe ke kuzwaka kintwadi na munu ntima ya kulutila mbote ya Nzambi. Beno me sadisa munu ntangu yayi yina mu ke na boloko mpe samu na kumwangisa nsangu ya mbote mpe kusala nyonso samu bamfumu ya luyalu pesa munu nzila ya kuzonzila yawu.

8 Nzambi me zaba ti mu ke na nsatu ya ngolo ya kutala beno nyonso, samu ti luzolo ya munu samu na beno ke faso mosi na luzolo yina Kristo Yesu ke na yawu samu na beno. 9 Mu ke tatamanaka na kusambila Nzambi samu luzolo ya beno kula dyaka ya kulutila, samu beno zaba dyaka mbote-mbote matsyeleka mpe samu mayela ya beno ya kusala luswaswanu na mambu nyonso kula dyaka. 10 Lusambu ya munu ke ti beno bakula bamambu ya kulutila mfunu, samu beno vanda ya kuvedila mpe beno bwisa ve kiminu ya bampangi tii na kilumbu ya Kristo. 11 Na lubakusu ya Yesu Kristo, beno sala bisalu mingi ya kulunga, yina ke pesaka nkembo mpe lukumu na Nzambi.

12 Bampangi, mu zola beno zaba ti mambu yina me kumina munu me sala ti nsangu ya mbote mwangana dyaka ya kulutila. 13 Ni na yawu Basoda nyonso yina ke kengidilaka mfumu ya Roma mpe bantu nyonso ya nkaka zaba ti mu ke na boloko samu mu ke kilandi ya Kristo. 14 Samu mu ke na boloko, bampangi mingi yina ke sadilaka Mfumu me kuma na bukindi ya kulutila, mpe ba ke na zonzilaka dyaka mingi mambu ya Nzambi na bukindi nyonso.

15 Ya tsyeleka, ya ke na ba yina ke samunaka nsangu ya Kristo na musoki mpe na makanisi ya kuswana, kasi ba ya nkaka ke salaka yawu na makanisi ya mbote. 16 Ba ke samunaka nsangu yina me tadila Kristo na luzolo, samu ba zaba ti ba soolaka munu samu na kunwanina nsangu ya mbote. 17 Kasi ba yina ke samunaka samu na kutalana, ke na makanisi ya yimbi mpe ba ke na nsatu ya kubwela munu bampasi ntangu yayi yina mu ke na boloko. 18 Wapi mbuma ya me buta? Nsangu ya Kristo ke na mwanganaka kaka mpe mu ke na kilengi samu na yawu. Ata ti makanisi ya bawu vanda ya mbote to ya yimbi, mu ke bika ve kusepela samu na yawu, 19 samu mu me zaba ti ya ke vuukisa munu* kana beno bondila mpe mpeve ya Yesu Kristo ke sadisa munu. 20 Ya ke ya kukwelana na mambu yina mu ke na vingilaka na ntima mosi, mpe na kivuvu ti mu ke vanda ve na nsoni ata na mambu mosi. Mu ke na kundima ti mu ke vanda na makoki ya kutatamana na kuzonza na kimpwanza, samu mu lenda kupesa lukumu na Kristo bubu yayi, kaka faso ya vandaka ntangu nyonso na ntama, ya vanda mu ke na luzingu to mu me kufwa.

21 Samu na munu, kuzinga ni kusadila Kristo mpe kufwa ke difuta. 22 Kana mu ke ntete na luzingu na nzutu yayi, ya zola zonza ti mu ke lenda kutatamana na kusala kisalu ya munu ya mbote, kasi mu zaba ve yinki mu ke soola. 23 Mu zaba ve yinki mu ke soola na bamambu zole yayi, samu ti mu zola kubika nzutu yayi samu na kuvanda na Kristo. Ya tsyeleka, ni yina me lutila mbote. 24 Kasi ya ke samu na mbote ya beno mu vanda kaka moyo na nzutu yayi. 25 Mu ke na kiminu na mambu yayi, mu zaba ti mu ke vanda kaka na beno nyonso samu na kusadisa beno na kukwenda na mantwala mpe na kusepela na kiminu ya beno. 26 Ntangu mu ke vanda dyaka kintwadi na beno, kiminu ya beno na Kristo Yesu ke kula dyaka samu na munu.

27 Kasi beno dyatila na mutindu yina me fwanana na nsangu ya mbote ya Kristo. Na yawu, ya vanda ti mu kwiza tala beno to mu vanda ve, mu kuwa bansangu ya mbote na yina me tadila beno, ti beno ke ya kukangama mpe na bumosi, na dikanisi mosi, mpe beno ke na salaka kintwadi samu na kiminu na nsangu ya mbote. 28 Beno vanda ata fioti ve na boma ya bambeni ya beno. Samu na bawu, mambu yayi ke na lakisaka ti ba ke kufwa mpe samu na beno ya ke na lakisaka ti beno ke vuuka. Ya me katuka na Nzambi. 29 Beno me kuzwa ve kaka bweso ya kutula kiminu na Kristo, kasi ya kutala mpe mpasi samu na yandi. 30 Beno ke na nwanaka na bampasi yina beno talaka munu kunwana na yawu mpe yina beno ke na kuwaka ntangu yayi ti mu ke ntete na nwanaka na yawu.

2 Beno sala nyonso yina beno lenda sala samu na kukindisa bampangi na kati ya Kristo, na kupesaka bawu ngolo na luzolo, na kuvandaka na bumosi na kimpeve, mpe na kulakisaka luzolo mpe ntima ya kyadi. 2 Kana beno sala yawu, beno ke sala ti kilengi ya munu kuma mingi. Beno zinga na bumosi, beno zolasana, mpe beno vanda na bumosi na ndyatulu mpe na makanisi. 3 Beno kusala ve ata mambu mosi na makanisi ya kuswana to na nsatu ya kutalana, kasi na kukuluka nyonso, beno bakila bampangi mutindu bantu yina me lutila beno. 4 Beno kusosa ve kulungisa kaka bansatu ya beno mosi, kasi beno sosa mpe kulungisa bansatu ya bampangi.

5 Beno vanda mpe na dikanisi yayi yina vandaka mpe na Kristo Yesu. 6 Ata ti yandi vandaka kifwani ya Nzambi, yandi kanisaka ata fioti ve na kusosa kuvanda mutindu Nzambi. 7 Kasi yandi kukikumisaka mpamba mpe ndimaka kuvanda kisadi mpe zingaka mutindu muntu. 8 Ya kulutila, ntangu yandi kwizaka mutindu muntu,* yandi kulukaka mpe yandi tumamaka tii na lufwa, ee lufwa na zulu ya yinti ya mpasi.* 9 Ni na yawu Nzambi tulaka yandi na kisika ya kuzanguka, mpe na ntima mosi yandi pesaka yandi nkumbu ya kulutila bankumbu nyonso ya nkaka. 10 Nzambi salaka yawu samu bantu nyonso pesa lukumu* na nkumbu ya Yesu, ya vanda ba yina ke na zulu, ba yina ke na ntoto, mpe ba yina ke na yisi ya ntoto, 11 mpe yinwa nyonso ndima pwelele ti Yesu Kristo ke Mfumu samu na nkembo ya Nzambi, Tata.

12 Na yawu bampangi ya munu ya luzolo, beno ke tumamaka ntangu nyonso, kaka ve ntangu mu ke vandaka na beno, kasi beno ke salaka yawu mpe ntangu mu ke vandaka ve. Na yawu mu ke na lombaka na beno na kulemba ve kusala bangolo samu beno vuuka, mpe beno sala yawu na boma mpe kutekita. 13 Ya tsyeleka, ni Nzambi muntu ke pesaka beno bukindi samu na mambu yina ke pesaka yandi kilengi mpe yandi ke pesaka beno nsatu mpe ngolo ya kusala bamambu. 14 Beno sala nyonso ata kunyunguta mpe kusala ntembe, 15 samu beno kuma bana ya Nzambi, bantu yina me kondwa mambu ya yimbi, mpe yina me zaba ve mambu. Na kuvandaka bantu yina me kondwa mambu ya yimbi, beno ke ngenga mutindu bamwinda ya ngolo na kati ya bantu ya mayuya, bantu yina me bebaka. 16 Beno simba ngolo mambu yina ke pesaka luzingu. Na yawu, mu ke vanda na mambu ya kubula ntulu na kilumbu ya Kristo, samu mu zaba ti, mpasi yina mu me tala mpe kisalu ya munu ya ngolo vandaka ve ya mpamba. 17 Kasi ata ti mu kukipesa mutindu dikabu ya malafu yina ba me mwangisa na zulu ya munkayulu mpe ya kisalu ya santu yina kukangama ya beno me nata beno na kusala, mu ke na kilengi mpe mu ke na sepelaka kintwadi na beno nyonso. 18 Mu ke na lombaka na beno mpe na kusepela na munu.

19 Mu ke na kivuvu na Mfumu Yesu ti na bilumbu yina ke kwiza, mu ke filisa beno Timote. Na yawu, mu ke kuzwa bansangu ya beno mpe ya ke kindisa munu. 20 Mu ke ve na muntu ya nkaka mutindu yandi. Ya tsyeleka, yandi ke kanisaka mingi na mbote ya beno. 21 Samu bantu ya nkaka ke sosaka kaka bansatu ya bawu mosi, kasi ya Yesu Kristo ve. 22 Kasi beno me zaba mutindu yandi lakisaka ti, ya me lunga ba tula yandi ntima. Kaka mutindu mwana na tata ya yandi, yandi salaka kisalu ya ngolo na munu samu na kumwangisa nsangu ya mbote. 23 Ni yandi mu ke filisa beno ntangu mu ke zaba mambu yina ke na vingilaka munu. 24 Mu ke na kundima ti, na mwa ntangu fioti, Mfumu ke pesa munu nzila ya kukwiza tala beno munu mosi.

25 Kasi ntangu yayi, mu me tala ti ya ke vanda mfunu mingi mu filisa beno Epafrodite, yina ke ndiku ya munu, mpangi ya munu ya kisalu mpe soda mutindu munu, mpe muntu yina beno filisaka samu na kusadisa munu. 26 Yandi ke na nsatu mingi ya kutala beno nyonso. Yandi ke mpe na mawa samu beno kuwaka ti yandi vanda beela. 27 Ya tsyeleka, maladi ya yandi vandaka ngolo mpe yandi zola kufwa. Kasi Nzambi talaka yandi kyadi, kaka kyadi ya yandi ve, kasi ya munu mpe samu ya bwela ve munu mawa na zulu ya yina tekilaka. 28 Ni na yina mu ke na filisaka yandi na mbangu nyonso, samu ntangu beno ke tala yandi, beno vanda dyaka na kilengi. Ya ke sala ti mu bika kuvanda na mawa samu na beno. 29 Ni na yawu, beno yamba yandi na kilengi nyonso, mutindu beno ke yambaka bilandi ya Mfumu. Beno lakisa mpe ti bantu ya mutindu yayi ke mfunu mingi samu na beno. 30 Yandi zola kufwa samu na kisalu ya Kristo,* mpe yandi tulaka luzingu* ya yandi na mpasi samu na munu, samu beno vandaka ve awa na kusadisa munu.

3 Bampangi ya munu, na kumanisa, beno vanda na kilengi ntangu nyonso mutindu bilandi ya Mfumu. Ya ke ve na salaka munu mpasi na ntima na kusonikila beno bamambu yina mu sonikilaka ntete beno mpe ya ke samu na mbote ya beno.

2 Beno sala keba na bantu yina ke salaka bamambu mutindu bayimbwa. Beno sala keba na bantu yina ke salaka bamambu ya yimbi. Beno sala keba na bantu yina ke zengaka nzutu, 3 samu beto ke ba yina ba zengaka kibakala ya tsyeleka, beto ba yina ke sadilaka Nzambi na nzila ya mpeve ya yandi, mpe ba yina ke tulaka ve ntima ya bawu na mayela ya bantu,* kasi na Kristo Yesu. 4 Na kutala mbote, mu ke na mambu yina lenda nata munu na kutula ntima na nzutu ya munu, kulutila bantu nyonso.

Kana ya ke na muntu ya nkaka yina me kanisa ti yandi ke na mambu yina lenda nata yandi na kutula ntima na nzutu,* mu ke na yawu ya kulutila: 5 Ba zengaka munu kibakala na kilumbu ya 8, mu ke muntu ya Izraele ya dibuta ya Benzame, mu ke Muebre yina butamaka na dikanda ya Baebre, na yina me tadila musiku, mu vandaka Mufarize. 6 Na tiya nyonso mu nyokolaka kimvuka. Na yina me tadila kulanda misiku, mu talanaka muntu yina me kondwa mambu ya yimbi. 7 Kasi bima yina vandaka mfunu samu na munu, mu ke na bakilaka yawu ntangu yayi mutindu bima ya mpamba* samu na Kristo. 8 Ya tsyeleka, mu ke na talaka bima nyonso yayi mutindu bima ya mpamba samu na kimvwama ya kulutila mfunu, kuzaba Kristo Yesu Mfumu ya munu. Samu na yandi, mu me manga bima nyonso, mpe mu ke na bakilaka yawu mutindu bima ya nganzi* samu na kuzwa Kristo, 9 mpe samu na kuvanda na bumosi na yandi. Lunungu* ya munu ke ve samu mu salaka mambu nyonso ya kukwelana na misiku, kasi ya ke ya kuvanda na kiminu ya munu na Kristo. Lunungu yayi me katuka na Nzambi, na nzila ya kiminu. 10 Nsatu ya munu ke ni ya kuzaba Kristo mpe ngolo ya kuvumbuka ya yandi na lufwa, mpe ya kutala mpasi yina yandi talaka. Ata ti ya ke nata munu na lufwa, mu ke ndima na ntima mosi kufwa mutindu yandi. 11 Ni na yina munu mpe, mu ke na kivuvu ti, mu ke vumbuka na kuvumbuka ya ntete ya bantu ya kufwa yina ke salama.

12 Ya zola zonza ve ti mu me kuzwa yimeni difuta mpe ti mu me kuma muntu ya kulunga. Kasi mu ke na salaka yina ke na ngolo ya munu, na kusimba ngolo kima yina salaka ti Kristo Yesu soola* munu. 13 Bampangi, mu ke na kanisaka ve ti munu me kuzwa yimeni difuta yango. Kasi mambu ya tsyeleka ni yayi: Mu ke na zimbanaka mambu yina ke na manima mpe mu ke na tulaka meso na bamambu yina ke na mantwala. 14 Mu ke na salaka nyonso yina ke na ngolo ya munu, na kukwenda tii na nsuka samu na kuzwa difuta ya kukwenda zinga na zulu, difuta yina Nzambi me pesa na nzila ya Kristo Yesu. 15 Na yawu, bika ti ba yina nyonso ke ya kuyela na kati ya beto vanda na dikanisi yayi. Kana mosi na kati ya beno ke na dikanisi ya nkaka, Nzambi ke lakisa beno dikanisi ya mbote. 16 Ata nyonso yina beto me lenda kusala, beto tatamana na kudyatila kaka na nzila yina beto me dyatila tii ntangu yayi.

17 Bampangi, beno landa kifwani ya munu mpe beno tula meso na ba yina ke landaka kifwani yina beto me pesa beno. 18 Ya ke na bantu mingi bubu yayi ke na salaka bamambu mutindu bambeni ya Kristo mpe ya yinti ya mpasi.* Mu vanda zonzilaka mingi bankumbu ya bawu, kasi bubu yayi, mu ke zonzilaka bankumbu ya bawu na kudila nyonso. 19 Nsuka ya bawu ni lufwa, nzambi ya bawu ni kivumu ya bawu, ba ke na bulaka ntulu samu na mambu ya nsoni yina ba ke na salaka. Ba ke kanisaka kaka na bamambu ya ntoto. 20 Kasi beto ke bantu ya mazulu mpe beto ke na vingilaka na nsatu ya ngolo muvuukisi yina ke katuka na zulu, Mfumu Yesu Kristo. 21 Yandi ke kitula nzutu ya beto ya kulemba, samu ya kuma mutindu* nzutu ya yandi. Yandi ke sadila ngolo ya yandi samu na kulungisa yawu, ni ngolo yango ke sadisa yandi na kutula bima nyonso na yisi ya lutumu ya yandi.

4 Bampangi ya munu yina mu ke zolaka mingi mpe yina mu talaka ntama, beno ke kilengi ya munu mpe beno ke mutindu yimpu* samu na munu. Bampangi ya munu ya luzolo, mu ke na lombaka na beno na kuvanda ya kukangama na Mfumu.

2 Mu ke na lombaka na Evodi na Sentishe na kuwisana mutindu ya me lunga na bilandi ya Mfumu. 3 Mu ke na lombaka mpe na nge, mpangi ya munu ya kisalu, na kulemba ve na kusadisa bakento yayi, yina me sala kintwadi na munu na kumwangisa nsangu ya mbote, kintwadi na Klema mpe na bampangi nyonso yina me bikana, yina bankumbu ya bawu ke ya kusonama na buku ya luzingu.

4 Beno vanda ntangu nyonso na kilengi samu na Mfumu. Mu ke na zonzaka dyaka, beno vanda na kilengi! 5 Bika ti bukati-kati* ya beno talana na meso ya bantu nyonso. Mfumu ke pene-pene. 6 Beno kuvanda ve na manyongi, kasi beno sambila Nzambi ntangu nyonso. Na mambu nyonso, beno bondila Nzambi samu yandi twadisa beno, mpe beno vutula yandi ntangu nyonso matondo. 7 Kana beno sala yawu, kizunu ya Nzambi yina me lutila nyonso yina beto lenda bakula, ke bumba bantima ya beno mpe makanisi* ya beno na nzila ya Kristo Yesu.

8 Na kumanisa bampangi, beno tatamana na kukanisa* na mambu nyonso yina ke ya tsyeleka, na mambu nyonso yina ba lenda zitisa, na mambu nyonso yina ke ya lunungu, na mambu nyonso yina ke ya bunkete,* na mambu nyonso yina ke nataka na luzolo, na mambu nyonso yina ke ve ya nsoni, na mambu nyonso yina ke ya mbote, mpe na mambu nyonso yina me bonga kuzwa lukumu. 9 Mambu yina beno longokaka, yina beno ndimaka, yina beno kuwaka mpe yina beno talaka na munu, beno sala yawu, mpe Nzambi ya kizunu ke vanda na beno.

10 Mu ke na kilengi mingi mpe mu ke na vutulaka matondo na Mfumu samu beno lakisaka dyaka ti beno ke kanisaka na munu. Ata ti ntangu nyonso beno vanda kanisaka na munu, beno kuzwaka ve ntangu ya kulakisa munu yawu. 11 Mu ke na zonzaka ve yawu samu mu ke na nsatu ya lubakusu. Mu me longoka kusepela na yina mu ke na yawu na mambu nyonso. 12 Mu me longoka kuzinga na bima fioti mpe na bima mingi. Na mambu nyonso, mu me longoka kinsweki ya kuvanda ya kufuluka mpe ya kuvanda na nsatu, ya kuvanda na bima mingi mpe ya kuvanda ve na bima mingi. 13 Na mambu nyonso, mu ke na ngolo yina ke katukaka na Nzambi, muntu yina ke pesaka munu ngolo.

14 Kasi beno salaka mambu ya mbote ntangu beno vandaka na munu na kati ya bampasi ya munu. 15 Ya tsyeleka, beno bantu ya Filipi, beno me zaba mpe ti ntangu beno kuwaka nsangu ya mbote na mbala ya ntete, ntangu mu katukaka na Masedwane, kaka ni kimvuka ya beno ndimaka kusadisa munu. 16 Ntangu mu vandaka na Tesalonika, beno filisaka munu bima yina mu vandaka na yawu nsatu, kaka mbala mosi ve, kasi bambala zole. 17 Mu ke na sosaka ve makabu, kasi mu ke kaka na nsatu beno kuzwa difuta yina kifu ya kukabulaka ke nataka. 18 Mu ke na bima nyonso yina mu ke na yawu nsatu, mpe mu ke na yawu ya kulutila. Mu vandaka na kilengi mingi ntangu mu yambaka bima yina beno filisaka munu na nzila ya Epafrodite. Dikabu ya beno ke mutindu munkayulu ya nsunga ya kitoko yina ke sepelisaka Nzambi. 19 Nzambi ke sadila bimvwama ya yandi ya nene samu na kupesa beno nyonso yina beno ke na yawu nsatu na nzila ya Kristo Yesu. 20 Nkembo vanda mvula na mvula na Nzambi, Tata ya beto. Ameni.

21 Beno pesa bambote ya munu na basantu nyonso yina ke na bumosi na Kristo Yesu. Bampangi yina ke na munu me filisa beno bambote. 22 Basantu nyonso, mingi-mingi ba yina ke na yinzo ya Sezare, me filisa beno bambote.

23 Bika ti ntima ya kulutila mbote ya Mfumu Yesu Kristo vanda na beno, ntangu beno ke na lakisaka bifu ya mbote.