MUKANDA YA ZOLE NA TIMOTE

1 Munu Polo, ntumwa ya Kristo Yesu na luzolo ya Nzambi, na yina me tadila nsilulu ya luzingu yina ke lungana na nzila ya Kristo Yesu, 2 na Timote mwana ya munu yina mu ke zolaka mingi:

Bika ti ntima ya kulutila mbote, mawa mpe kizunu ya Nzambi Tata mpe ya Kristo Yesu mfumu ya beto vanda na nge.

3 Mu ke na vutulaka matondo na Nzambi yina mu ke sadilaka kisalu ya santu, mutindu bankooko ya munu vanda salaka yawu. Na ntima ya kuvedila, mu ke bambukilaka nge moyo ntangu nyonso ntangu mu ke bondilaka Nzambi mpimpa na ntangu. 4 Mu ke na bambukaka moyo na mansangasa ya nge mpe mu ke na nsatu ya kulutila ya kutala dyaka nge samu mu vanda ya kufuluka na kilengi. 5 Mu ke na bambukilaka moyo na kiminu ya nge ya tsyeleka, yina vandaka ntete na nkooko ya nge Loyise mpe na mama ya nge Enice mpe yina mu ke na kiminu ti ya kele mpe na nge.

6 Ni na yawu, mu ke na kubambulaka nge na kuvumbula mutindu tiya, dikabu ya Nzambi yina kele na nge mpe yina nge kuzwaka ntangu mu tulaka maboko na zulu ya nge. 7 Nzambi pesaka ve beto mpeve ya boma kasi mpeve ya ngolo mpe ya luzolo mpe ya makanisi ya mbote. 8 Kuvanda ve na nsoni ya kuzonzila kimbangi ya Mfumu ya beto to ya munu, muntu yina ke na boloko samu na yandi, kasi ndima kutala mpasi samu na nsangu ya mbote na kutulaka ntima na ngolo ya Nzambi. 9 Yandi vuukisaka beto mpe yandi bokilaka beto na kubokila mosi ya santu, ya vandaka ve samu na bisalu ya beto, kasi samu na mukanu ya yandi mpe ya ntima ya kulutila mbote ya yandi. Yandi pesaka beto yawu na bumosi na Kristo Yesu tekila bantangu ya kulutila ntama. 10 Kasi, ntangu yayi yandi me lakisa yawu pwelele na nzila ya kutalana ya Muvuukisi ya beto Kristo Yesu, yina me katula lufwa mpe yina me lakisa beto na nzila ya nsangu ya mbote mutindu ya kuvanda na luzingu mpe na nzutu yina ke bolaka ve. 11 Nzambi me soola munu na kuvanda musamuni, ntumwa mpe mulongi.

12 Ni na yawu, munu mpe ke na talaka mpasi na bamambu yayi, kasi mu ke ve na nsoni samu mu zaba Muntu yina mu ke kwikilaka na yandi mpe mu ke na kundima ti yandi ke na makoki ya kubumba bima yina mu bumbaka na sika ya yandi tii na kilumbu yina. 13 Tatamana na kusimba kifwani ya mambu ya mbote yina nge kuwaka na sika ya munu na kiminu mpe luzolo yina ke katukaka na bumosi na Kristo Yesu. 14 Bumba mbote bima ya ntalu yina nge me kuzwa na nzila ya mpeve ya santu yina ke zingaka na kati ya beto.

15 Nge zaba ti babakala nyonso ya kizunga ya Aziya me pesa munu mukongo, na kati ya bawu ke mpe na Figele na Ermozene. 16 Bika ti Mfumu lakisa ntima ya mawa na yinzo ya Onezifore samu bambala mingi yandi kindisaka munu mpe yandi vandaka ve na nsoni ya munu samu mu vandaka na boloko. 17 Kasi, ntangu yandi vandaka na Roma, yandi sosaka munu mbote-mbote mpe yandi talaka munu. 18 Bika ti Mfumu kupesa yandi nzila samu Yehova* lakisa yandi ntima ya mawa na kilumbu yina. Nge zaba mbote bisalu nyonso yina yandi salaka na Efeze.

2 Na yawu nge mwana ya munu, tatamana na kuzwa ngolo na nzila ya ntima ya kulutila mbote yina kele na Kristo Yesu, 2 mpe bamambu yina nge kuwaka na sika ya munu, yina bambangi mingi mpe ke zonzilaka. Bamambu yayi, zonza yawu na bantu ya kukwikama yina bawu mpe na ntangu ya bawu, ke vanda ya kubongama samu na kulonga bantu ya nkaka. 3 Samu nge ke soda ya mbote ya Kristo Yesu, vanda ya kuyidama samu na kutala mpasi. 4 Muntu yina me kuma soda ke salaka ve kisalu ya nkaka* samu na kusosa luzingu, samu yandi ke na nsatu ya kusepelisa muntu yina salaka ti yandi kuma soda. 5 Ata na bansaka, muntu yina ke salaka yawu, ke kuzwaka difuta kaka kana yandi me sala yawu na kulandaka misiku. 6 Muntu yina ke salaka kisalu ya ngolo na bilanga, fwana kuvanda muntu ya ntete na kuzwa bambuma. 7 Kanisa ntangu nyonso na mambu yayi mu ke na zonzaka, Mfumu ke pesa nge mayela ya kubakula bamambu nyonso.

8 Kuzimbana ve ti ba vumbulaka Yesu Kristo na lufwa mpe yandi vandaka mutekolo ya Davidi* na bumosi na nsangu ya mbote yina mu ke na samunaka. 9 Samu na yawu, mu ke na talaka mpasi mpe mu ke na boloko mutindu muntu yina ke salaka yimbi. Kasi dyambu ya Nzambi ke ve ya kukangama. 10 Ni na yawu, mu ke na tatamanaka na kukanga ntima na mambu nyonso samu na ba yina ba soolaka, samu bawu mpe ba kuzwa mvuukulu yina ke na nzila ya Kristo Yesu na nkembo ya ntangu nyonso. 11 Ba me fwana kutula ntima na mambu yayi: Ya tsyeleka kana beto kufwaka kintwadi, beto ke zinga mpe kintwadi. 12 Kana beto tatamana na kukanga ntima, beto ke yala mpe kintwadi mutindu bamfumu. Kana beto manga yandi, yandi ke manga mpe beto. 13 Kana beto kele ve ya kukwikama, yandi ke bikana ya kukwikama, samu yandi lenda vanda ve mambu nyonso ya nkaka katula yina yandi kele.

14 Tatamana na kubambula bawu bamambu yayi, longa bawu* na mantwala ya Nzambi na kunwana ve samu na bampova.* Ya ke ata fioti ve mfunu samu ya ke salaka mpasi na ba yina ke na kuwaka. 15 Sala nyonso yina ke na ngolo ya nge na kutalana na mantwala ya Nzambi mutindu muntu yina yandi ke ndimaka, bakala ya kisalu yina ke na ata mambu ya kuvanda na nsoni, muntu yina ke longaka mpe ke zonzilaka mbote-mbote dyambu ya tsyeleka. 16 Kasi losa banzonzolo ya mpamba yina ke vwezaka mambu ya santu samu ya ke nataka na kuvweza Nzambi na mutindu ya kulutila, 17 mpe mambu yina ba ke zonzaka ke mwanganaka mutindu mputa yina ke na kudyaka nzutu. Imene na Filete ke na kati ya bawu. 18 Babakala yayi me bika matsyeleka, ba ke na zonzaka ti vumbukulu ya bantu ya kufwa salamaka yimeni, mpe ba ke na salaka ti bantu ya nkaka vanda dyaka ve ya kukwikama na kiminu. 19 Ata mutindu yina, fondasio ya ngolo ya Nzambi ke kaka ya kutelama, mpe ya ke na kidimbu yayi: “Yehova* me zaba bantu ya yandi,” mpe “Bika ti konso muntu yina ke bokilaka nkumbu ya Yehova* kubika mambu ya kukondwa lunungu.”

20 Na yinzo ya nene ya ke vandaka ve kaka na bandonga ya wolo mpe ya arza, kasi ya ke vandaka mpe na bandonga ya mabaya mpe ya ntoto. Ba ya nkaka ke samu na nsalulu ya mfunu, kasi ba ya nkaka ke samu na nsalulu ya kukondwa mfunu. 21 Ni yawu yina, kana muntu vanda ntama na bandonga yina ke samu na nsalulu ya kukondwa mfunu, yandi ke vanda ndonga samu na nsalulu ya mfunu, yina ba me kumisa santu, yina ke mfunu samu na mfumu ya yawu, yina ba me bongisa samu na konso kisalu ya mbote. 22 Kima bansatu ya buntwenya, kasi landa lunungu, kiminu, luzolo, kizunu, kintwadi na bantu yina ke bokilaka Mfumu na ntima ya bunkete.

23 Dyaka, losa bantembe ya buzoba mpe ya kukondwa mfunu samu nge zaba ti ya ke nataka na kunwana. 24 Samu kisadi ya Mfumu ke ve na nsatu ya kunwana, kasi yandi fwana kuvanda ya kulembama na bantu nyonso, na makoki ya kulonga mpe yina zaba kukutika nzutu kana ba me sala yandi mambu ya yimbi. 25 Yandi fwana kulonga na lembami bantu yina ke mangaka kuwa yandi. Ntangu ya nkaka, Nzambi lenda pesa bawu nzila ya kubalula ntima mpe ya ke sadisa bawu na kuzaba mbote-mbote matsyeleka, 26 mpe ba lenda kuvutukila mabanza ya bawu mpe kukima mutambu ya Dyabulu yina me kanga bawu ya moyo samu ba sala luzolo ya yandi.

3 Kasi zaba mambu yayi, na bilumbu ya nsuka bamambu ke vanda mpasi mingi mpe luzingu ke vanda mpasi, 2 samu bantu ke kuma bantu yina ke zolaka kaka banzutu ya bawu mosi, bantu yina ke zolaka mbongo, bantu ya lunangu, bantu ya lulendo, bantu yina ke vwezaka Nzambi mpe bantu, bantu yina ke tumamaka ve na bibuti, bantu yina ke vutulaka ve matondo, bantu ya kukondwa kukwikama, 3 bantu yina ke zolasanaka ve na kati ya dikanda, bantu ya kukondwa kiwisa, bantu yina ke vuninaka bampangi bamambu, bantu yina ke kutikaka ve banzutu ya bawu, bantu yina ke salaka mambu ya yimbi, bantu yina ke zolaka ve mambu ya mbote, 4 bantu yina ke tekaka bampangi, bantu ya yintu ngolo, bantu ya kufuluka na lulendo, bantu yina ke zolaka mikembo na kisika ya kuzola Nzambi, 5 ba ke zonzaka ti ba ke sadilaka Nzambi kasi ba ke lakisaka ve yawu na mutindu ya bawu ya kuzinga. Vanda ntama na bantu ya mutindu yayi. 6 Samu na kati ya bawu ke na babakala yina ke kotaka na bayinzo na mayela ya yimbi mpe ba ke nataka mutindu bangaamba bakento yina ke ve ngolo, yina me fuluka na masumu mpe yina ke landaka bansatu ya mutindu na mutindu, 7 yina ke longokaka ntangu nyonso kasi ke lendaka ata fioti ve na kuzaba mbote-mbote matsyeleka.

8 Mutindu Zanese na Zambrese teleminaka Moyize, mutindu mosi mpe, ba ke na tatamanaka na kutelemina matsyeleka. Bantu ya mutindu yayi ke ya tsyeleka ya kubeba na mabanza ya bawu, Nzambi ke ndimaka ve bawu samu ba ke dyatilaka ve na mutindu yina ke ya kukwelana na kiminu. 9 Na yawu, ba ke kwenda ve na mantwala, samu buzoba ya bawu me talana pwelele na meso ya bantu nyonso, kaka mutindu ya vandaka samu na babakala zole yayi. 10 Kasi nge me landa mbote-mbote malongi ya munu, mutindu ya munu ya kuzinga, mukanu ya munu, kiminu ya munu, ntima ya munu ya yinda, luzolo ya munu, kukanga ntima ya munu, 11 bankwamusu mpe bampasi ya mutindu yina mu kutanaka na yawu na Antyose, na Ikoniumi, na Listre. Mu kangaka ntima na bankwamusu yayi, mpe Mfumu vuukisaka munu na bankwamusu yango nyonso. 12 Bantu nyonso yina ke zola kuzinga na kukangama na Nzambi na bumosi na Kristo Yesu, ba ke talisa bawu mpe mpasi. 13 Bantu ya yimbi mpe bantu ya luvunu ke sala dyaka yimbi na mutindu ya kulutila, ba ke vuna bantu mpe bantu ke vuna mpe bawu.

14 Kasi nge, kubika ve kukwikila na bamambu yina ba longaka nge mpe yina ba ndimisaka nge, samu nge zaba na banani nge longokaka yawu, 15 mpe ti banda bumwana ya nge, nge me zaba masonoko ya santu yina lenda kumisa nge mayela samu nge vuuka na nzila ya kiminu na Kristo Yesu. 16 Masonoko nyonso ke ya kusonama na lutwadusu ya mpeve ya Nzambi, ya ke mfunu samu na kulonga, samu na kungala, samu na kusemba, mpe samu na kusungika muntu na kuzinga na mutindu ya lunungu,* 17 samu muntu ya Nzambi vanda ya tsyeleka na makoki mpe yandi vanda na nyonso yina me lunga samu na konso kisalu ya mbote.

4 Na mantwala ya Nzambi mpe ya Kristo Yesu yina ke sambisa bantu yina ke moyo mpe bantu ya kufwa, na nzila ya kuvanda* ya yandi mpe ya Kimfumu ya yandi mu ke na zonzaka na nge ti, 2 samuna Dyambu ya Nzambi ntangu nyonso, sala yawu na ntangu ya mbote mpe na ntangu ya mpasi. Ngala, semba, mpe kindisa na ntima ya yinda nyonso mpe na mutindu ya mbote ya kulonga. 3 Samu ya ke vanda na ntangu yina bantu ke manga kuwa malongi ya mbote, kasi na mutindu yina ke ya kukwelana na bansatu ya bawu mosi, ba ke sosa milongi yina ke zonzila bawu bamambu yina makutu ya bawu ke na nsatu ya kuwa. 4 Ba ke bika kuwa matsyeleka mpe ke tula dikebi na masolo ya luvunu. 5 Kasi nge, bumba mabanza ya nge na mambu nyonso, kanga ntima na bampasi, sala kisalu ya musamuni,* lungisa mbote-mbote kisalu ya nge.

6 Samu munu, mu me kukipesa mutindu makabu ya malafu yina ba ke tyamunaka mpe ntangu yina mu ke kuzwa kimpwanza me kuma pene-pene. 7 Mu me nwana mvita ya mbote, mu me kima mbangu tii na nsuka, mu me bumba kiminu. 8 Kubanda ntangu yayi, ba me bumbila munu yimpu ya kimfumu ya lunungu,* yina Mfumu, zuzi ya lunungu ke pesa munu mutindu matabisi na kilumbu yina, kaka na munu ve, kasi mpe na bantu nyonso yina ke na vingilaka na nsatu ya ngolo kutalana ya yandi.

9 Sala nyonso yina ke na ngolo ya nge na kukwiza kisika yina mu kele na mbangu. 10 Demase bikaka munu samu yandi zolaka bamambu ya yinza* yayi mpe yandi kwendaka na Tesalonika. Kresense kwendaka na Galate mpe Tite kwendaka na Damatiya. 11 Kaka Luke ke na munu. Kwiza kintwadi na Marke samu yandi ke sadisa munu na kisalu. 12 Kasi mu me filisa Tishike na Efeze. 13 Ntangu nge ke kwiza, natina munu kinkuti* ya munu ya madidi yina mu bikaka na Trowase na yinzo ya Karpuse mpe barulo, mingi-mingi yina ba salaka na mpusu ya kibulu.

14 Alezandre yina ke salaka bima ya bisengo salaka munu mambu mingi ya yimbi. Yehova* ke futa yandi na kutadilaka bisalu ya yandi. 15 Nge mpe nge fwana kusala keba na yandi, samu yandi teleminaka nsangu ya beto na mutindu mosi ya kulutila.

16 Ntangu mu vanda nwanina nzutu ya munu na mbala ya ntete na mantwala ya luyalu, ata muntu vandaka na lweka ya munu, kasi bawu nyonso bikaka munu. Bika Nzambi lemvokila bawu. 17 Kasi Mfumu vandaka ya kutelama pene-pene na munu mpe yandi pesaka munu ngolo samu na nzila ya munu, kisalu ya kusamuna lungana na faso mosi ya kulutila mpe makanda nyonso kuwa yawu. Mpe Mfumu vuukisaka munu na yinwa ya nkosi. 18 Mfumu ke katula munu na konso kisalu ya yimbi mpe yandi ke vuukisa munu samu na Kimfumu ya yandi ya mazulu. Nkembo kuvanda na yandi mvula na mvula. Ameni.

19 Pesa mbote na Priska na Akila mpe na bantu ya yinzo ya Onezifore.

20 Eraste bikanaka na Korinto, kasi mu bikaka Trofime na Mileti samu yandi vanda beela. 21 Sala nyonso yina ke na ngolo ya nge na kukwiza tekila ntangu ya madidi ya ngolo banda.

Ebuluse me filisa nge bambote ya yandi, Pudence, Linuse, mpe Klodia na bampangi nyonso ya nkaka me filisa mpe nge bambote.

22 Bika ti Mfumu vanda na mpeve yina beno ke na lakisaka. Bika ti ntima ya kulutila mbote ya yandi vanda na beno.