NA TITE

1 Munu Polo, kisadi ya Nzambi mpe ntumwa ya Yesu Kristo na bumosi na kiminu ya ba yina Nzambi me soola mpe na bumosi na luzabu ya matsyeleka yina ke ya kukwelana na kukangama na Nzambi 2 mpe yina ke ya kuvanda na zulu ya kivuvu ya luzingu ya ntangu nyonso yina Nzambi, yina lenda vuna ve, pesaka nsilulu banda ntama. 3 Kasi na ntangu yina yandi soolaka, yandi salaka ti dyambu ya yandi zabana na nzila ya kisalu ya kusamuna yina yandi me pesa munu na bumosi na musiku ya Muvuukisi ya beto, Nzambi. 4 Na Tite mwana ya munu ya tsyeleka, na bumosi na kiminu yina beto nyonso ke na yawu:

Bika ti ntima ya kulutila mbote mpe kizunu ya Nzambi Tata mpe ya Kristo Yesu Muvuukisi ya beto vanda na nge.

5 Mu bikaka nge na Krete samu nge bongisa bamambu yina vanda tambula ve mbote mpe samu nge tula bakuluntu na konso mbanza mutindu mu lombaka nge: 6 Kana ya ke na bakala yina ke ve na mambu yina ba lenda funda yandi, bakala ya kento mosi, yina ke na bana yina ke bandimi mpe yina ba me fundaka ve ti ba ke nataka luzingu ya busafu to ke na yintu ngolo. 7 Mutindu kisadi ya Nzambi, mukengi me fwana kuvanda ve na mambu yina ba lenda funda yandi, muntu yina ke ve na yintu ngolo, muntu yina ke dasukaka ve kidi-kidi, muntu yina ke kolaka ve malafu, muntu yina zola ve mambu ya ngolo,* muntu yina ke ve na lukoso to yina ke sosaka kuzwa bima na nzila ya luvunu, 8 kasi muntu yina ke yambaka banzenza, muntu yina ke zolaka mambu ya mbote, muntu yina ke na makanisi ya mbote,* muntu ya lunungu, muntu ya kukwikama, muntu yina ke yalaka nzutu ya yandi mosi, 9 muntu yina ke ya kukangama ngolo na mambu ya kukwikama na yina me tadila mutindu ya yandi ya kulonga, samu yandi vanda na makoki ya kukindisa na nzila ya malongi yina ke mbote mpe kungala bantu yina ke na mangaka yawu.

10 Samu ya ke na bantu mingi yina ke na yintu ngolo, bantu yina ke zonzaka kidi-kidi mpe bantu ya luvunu, mingi-mingi bantu yina ke ya kukangama na mambu ya kuzengisa kibakala. 11 Ya ke mfunu ba kanga bawu bayinwa, samu babakala yayi ke na tatamanaka na kutula muvusu na kati ya makanda na kulongaka bamambu yina ba me lunga ve kulonga samu na kuzwa bima na nzila ya luvunu. 12 Muntu mosi na kati ya bawu, mbikudi ya bawu mosi, me zonza: “Bantu ya Krete ke vandaka ntangu nyonso bantu ya luvunu, ba ke bibulu ya brusu yina ke na nkele, bantu yina ke kudyaka mingi mpe yina ke ve na kisalu.”

13 Kimbangi yayi ke ya tsyeleka. Ni na yawu, tatamana na kungala bawu na ngolo samu ba lenda kuvanda ngolo na kiminu, 14 ba kutula ve dikebi na masolo ya Bazwife mpe na misiku ya bantu yina ke kwendaka ntama na matsyeleka. 15 Bamambu nyonso ke bunkete samu na bantu ya bunkete. Kasi na bantu yina ke na mvindu mpe yina me kondwa kiminu, ata kima ke bunkete, samu makanisi ya bawu mpe ndinga ya yisi ya bantima ya bawu kele mvindu. 16 Ba ke zonzaka pwelele na meso ya bantu nyonso ti ba zaba Nzambi, kasi ba ke mangaka yandi na bansalulu ya bawu samu ba ke bantu yina ba ke yiinaka, bantu ya kukondwa kutumama mpe ba me lunga ata fioti ve na kisalu ya mbote ya konso mutindu.

2 Kasi nge, tatamana na kuzonza bamambu yina ke ya kukwelana na malongi ya mbote. 2 Bika ti bantu ya kukula kulutisa ve bandilu na bifu ya bawu, ba fwana kuvanda bantu yina ba lenda zitisa, bantu yina ke na makanisi ya mbote, bantu ya ngolo na kiminu, na luzolo mpe na kukanga ntima. 3 Mutindu mosi mpe, bika ti bakento ya kukula kudyatila na mutindu yina ke lakisaka buzitu na Nzambi, ba fwana kuvanda ve na songi-songi, ba fwana kuvanda ve bangaamba ya vinu, kasi milongi ya mambu yina ke mbote, 4 samu na kulenda kupesa malongi na bantwenya ya bakento na kuzola babakala ya bawu, na kuzola bana ya bawu, 5 na kuvanda na makanisi ya mbote, na kuvanda bunkete, na kuvanda bantu ya bisalu na yinzo, na kuvanda bantu ya mbote, na kutumamaka na babakala ya bawu samu ba zonzila ve yimbi na mambu ya Nzambi.

6 Mutindu mosi mpe, tatamana na kukindisa bantwenya ya babakala na kuvanda na makanisi ya mbote. 7 Vanda kifwani na bisalu ya mbote na mambu nyonso, longa mambu ya bunkete na buzitu nyonso, 8 na nzonzolo ya mbote yina bantu lenda zonzila ve yimbi ya yawu samu bambeni kufwa nsoni, samu ba vanda ve na mambu ya yimbi ya kuzonza samu na beto. 9 Bika ti bisadi kutumama na bamfumu ya bawu na mambu nyonso, ba sosa kusepelisa bawu, ba zonzila ve bawu yimbi, 10 ba laba ve bamfumu ya bawu, kasi ba vanda bantu ya mbote mpe yina ba lenda tudila ntima, samu na mutindu nyonso, ba kumisa kitoko malongi ya Muvuukisi ya beto Nzambi.

11 Samu ntima ya kulutila mbote ya Nzambi me talana, ya ke sala ti bantu ya mutindu nyonso vuuka. 12 Ya ke longaka beto na kumanga kuvweza Nzambi, na kulosa bansatu ya yinza, na kuzinga na makanisi ya mbote, na kuzinga na lunungu* mpe na kuvanda ya kukangama na Nzambi na kati ya yinza* yayi, 13 ntangu beto ke na vingilaka kivuvu ya kilengi mpe kutalana ya nkembo ya Nzambi ya nene mpe ya Muvuukisi ya beto Yesu Kristo. 14 Yandi pesaka nzutu ya yandi samu na beto, samu na kubasisa beto* na mambu ya mutindu nyonso ya kufwa musiku mpe na kukumisa bunkete samu na yandi mosi bantu yina ke ya tsyeleka bantu ya yandi yina ke na manzangu samu na bisalu ya mbote.

15 Tatamana na kuzonzila bamambu yayi, na kukindisa, mpe na kungala na lutumu nyonso. Kubika ata muntu mosi ve kuvweza nge.

3 Tatamana na kubambula bawu na kuvanda ya kutumama mpe na kuwaka baluyalu mpe bantu yina ke na lutumu, na kuvanda ya kukubama na konso kisalu ya mbote, 2 na kuzonzaka ve yimbi ya muntu, na kuswanaka ve, na kuvandaka ve bantu yina ke kangamaka kaka na makanisi ya bawu, na kulakisaka lembami na bantu nyonso. 3 Beto mpe beto vandaka ntete bazoba, bantu yina vanda tumamaka ve, bantu yina vanda vunamaka, beto vandaka bangaamba ya bansatu ya mitindu mingi mpe ya mikembo, beto vanda zingaka na mambu ya yimbi mpe kimbanda, beto vandaka bantu yina ba vanda yiinaka, mpe beto vanda yiinaka bampangi.

4 Kasi, ntangu ntima ya mbote ya Muvuukisi ya beto Nzambi mpe luzolo ya yandi samu na bantu talanaka, 5 (samu na bisalu ya lunungu* yina beto salaka ve, kasi samu na ntima ya yandi ya mawa), yandi vuukisaka beto na kuyobisaka beto na maza yina ke pesaka luzingu mpe na kukumisaka beto bantu ya malu-malu na nzila ya mpeve ya santu. 6 Yandi mwangisaka mpeve yayi na mutindu ya kulutila na zulu ya beto, na nzila ya Yesu Kristo Muvuukisi ya beto. 7 Samu na manima ya kubakila beto mutindu bantu ya lunungu* na nzila ya ntima ya kulutila mbote ya muntu yina, beto kuma bantu yina ke kuzwa dikabu na bumosi na kivuvu ya luzingu ya ntangu nyonso.

8 Ba me fwana kutudila ntima na bamambu yayi mpe mu zola ti nge tatamana na kuzonzila bamambu yayi samu ba yina ke kwikilaka na Nzambi tula makanisi ya bawu kaka na kusala bisalu ya mbote. Bamambu yayi ke mbote mpe ya ke mfunu samu na bantu.

9 Kasi losa bantembe ya buzoba, masolo ya bankumbu ya bankooko, kuswana mpe kunwana samu na musiku, samu ya ke ve mfunu mpe ya ke mpamba. 10 Samu na muntu yina me basisa mwa dibuundu ya yandi, losa yandi, manga yandi na manima ya kukebisa yandi mbala ya ntete mpe mbala ya zole. 11 Samu nge zaba ti muntu ya mutindu yina me kwenda ntama na nzila, yandi me sala disumu mpe yandi me semba nzutu ya yandi mosi.

12 Ntangu mu ke filisa nge Artemase na Tishike, sala nyonso yina ke na ngolo ya nge na kukwiza na sika ya munu na Nikopolise, samu mu me baka mukanu ya kulutisa ntangu ya madidi ya ngolo kuna. 13 Sala nyonso samu na kusadisa Zenase yina zaba mbote-mbote musiku mpe Apolose samu ba kondwa ata kima na nzyetolo ya bawu. 14 Kasi bika ti bantu ya beto mpe longoka kutatamana na bisalu ya mbote samu ba lenda kusadisa na ntangu nsatu ke vanda ngolo, samu ba kondwa ve kubuta bambuma.

15 Bantu nyonso yina ke na munu me filisa nge bambote. Pesa mpe bambote ya munu na bantu nyonso yina ke zolaka beto na kati ya kiminu.

Bika ti ntima ya kulutila mbote vanda na beno nyonso.