MUKANDA YA NTETE YA PIERE

1 Munu Piere, ntumwa ya Yesu Kristo, mu ke na sonikilaka beno ba yina ke ya kumwangana na mbanza ya Ponti, ya Galate, ya Kapadose, ya Aziya mpe ya Bitiniya. Ee, na beno ba yina ke mutindu banzenza mpe ba yina ba soolaka. 2 Yandi ke Tata ya mazulu mpe yandi me soola beno na mutindu yina ke ya kukwelana na mambu yina yandi kanisaka. Yandi me pesa beno mpeve ya santu samu na kukumisa beno santu. Yandi salaka mutindu yina samu beno tumama na yandi, mpe samu na kukumisa beno bunkete na menga ya Yesu Kristo.

Mu ke na sambilaka ti Nzambi lakisa beno ntima ya kulutila mbote mpe yandi sadisa beno na kuvanda na kizunu.

3 Bika ti nkembo kuvanda na Nzambi mpe Tata ya Mfumu ya beto Yesu Kristo. Samu na mutindu yina ke ya kukwelana na ntima ya yandi ya kyadi, yandi pesaka beto kubutuka ya malu-malu samu na kivuvu ya moyo na nzila ya kuvumbuka na lufwa ya Yesu Kristo, 4 samu na dikabu yina ke bolaka ve, yina ke kumaka ve mvindu mpe yina ke fusaka ve. Ba bumbaka yawu na mazulu samu na beno 5 ba yina ke ya kubumbana na ngolo ya Nzambi na nzila ya kiminu samu na kuvuuka yina me kuma pene na kutalana na ntangu ya nsuka. 6 Ni na yawu beno ke na sepelaka mingi, ata ti ya ke lomba beno vanda na mawa samu na bankwamusu ya mutindu na mutindu samu na ntangu fioti. 7 Samu kiminu ya beno yina ba me meka, yina ke ntalu mingi kuluta wolo yina ke bebaka mpe yina ba me meka* na tiya, kuma mambu yina ba lenda kembila mpe yina ba lenda pesa nkembo mpe lukumu na kilumbu yina Yesu Kristo ke vanda.* 8 Ata ti nabunu beno tala yandi, beno ke zolaka yandi. Ata ti beno ke na talaka ve yandi ntangu yayi, beno ke na tulaka kiminu na yandi mpe ke na sepelaka mingi na nkembo mpe kilengi, yina ba lenda zaba ve mutindu ya kuzonzila yawu, 9 ntangu yayi yina beno ke na lungisaka mukanu ya kiminu ya beno, kuvuuka ya beno.*

10 Samu na kuvuuka yango, bambikudi yina bikulaka na yina me tadila ntima ya kulutila mbote yina ba bumbilaka beno, yufulaka mbote-mbote byuvu mpe sosaka mbote-mbote. 11 Ba longokaka mbote-mbote ntangu mpe na wapi ntangu bamambu yina mpeve ya santu yina ke na kati ya bawu bikulaka, ke lungana na kimuntu ya Kristo. Mpeve yina beto me zonzila bikulaka na mantwala mutindu Kristo ke tala mpasi, mpe na manima, wapi mutindu ba ke zangula yandi. 12 Ba lakisaka bawu pwelele ti kisalu yina ba vanda sala vandaka ve samu na bawu mosi kasi samu na beno, samu na mambu yina ba me zabisa beno ntangu yayi na bantu yina zonzilaka beno nsangu ya mbote, na mpeve ya santu yina ba me filisa yina katukaka na mazulu. Ni na bamambu yayi ya tsyeleka, bambazi ke na sosaka kutula meso.

13 Na yawu beno bongisa makanisi ya beno samu na kisalu. Beno bumba mabanza ya beno. Beno tula kivuvu na ntima ya kulutila mbote yina ba ke lakisa beno na ntangu ya kuvanda* ya Yesu Kristo. 14 Mutindu bana ya kutumama, beno bika kulanda bansatu yina vandaka ntete na beno ntangu beno vandaka ntete ve na luzabu. 15 Kasi mutindu Santu yina bokilaka beno, beno kuma santu na ndyatulu ya beno nyonso, 16 samu ya ke ya kusonama: “Beno fwana kuvanda santu samu mu ke santu.”

17 Kana beno ke na bokilaka Tata yina ke sambisaka kukondwa luswaswanu na yina me tadila kisalu ya konso muntu, beno dyatila na boma na ntangu yina beno ke na zingaka samu na mwa ntangu fioti. 18 Samu beno zaba ti ya vandaka ve samu na bima yina ke bebaka, na arza to na wolo, ba pesaka beno kimpwanza* na luzingu ya mpamba yina bankooko ya beno bikilaka beno. 19 Kasi ya vandaka na menga ya ntalu mutindu menga ya mwana ya dimeme yina ke na mavimpi ya mbote, mpe yina ke ve mvindu, menga ya Kristo. 20 Ya tsyeleka, ba soolaka yandi na mantwala tekila kubanda ya yinza, kasi yandi talanaka na nsuka ya bantangu samu na beno. 21 Na nzila ya yandi beno ke kwikilaka na Nzambi, muntu yina vumbulaka yandi na lufwa mpe pesaka yandi nkembo, samu kiminu mpe kivuvu ya beno vanda na Nzambi.

22 Ntangu yayi beno me kumisa beno mosi* bunkete, na kutumamaka na matsyeleka yina me buta luzolo ya tsyeleka samu na bampangi. Beno zolasana ngolo na ntima nyonso. 23 Samu beno kuzwaka kubutuka ya malu-malu, ya vandaka ve na nzila ya mbuma* yina ke bolaka, kasi na nzila ya mbuma yina ke bolaka ve, na nzila ya dyambu ya Nzambi ya moyo mpe ya ntangu nyonso. 24 Samu “bantu* nyonso ke mutindu matiti, mpe nkembo ya bawu nyonso ke mutindu fololo ya bilanga. Matiti ke yumaka mpe fololo ke kubwaka. 25 Kasi dyambu ya Yehova* ke bikana ntangu nyonso.” mpe “dyambu” yango ni nsangu ya mbote yina ba zonzilaka beno.

2 Na yawu, beno katula mambu nyonso ya yimbi ya luvunu, mayela ya luvunu, kimbanda mpe mitindu nyonso ya kutonga. 2 Mutindu bana yina me butuka malu-malu, beno vanda na nsatu ya ngolo ya mabene ya bunkete ya dyambu ya Nzambi samu na nzila ya yawu beno kula mpe beno vuuka, 3 mpe beno ke lenda kusala yawu kana beno zaba mbote ntima ya mbote ya Mfumu.

4 Yina beno ke na kwizaka na yandi, ditadi ya moyo yina bantu losaka, kasi yina Nzambi soolaka mpe yina ke mfunu na meso ya yandi, 5 beno mosi mutindu matadi ya moyo yina ba ke na tungaka yinzo ya kimpeve samu na kuvanda na kinganga-nzambi ya santu, samu na kupesa munkayulu ya kimpeve yina Nzambi ke ndimaka na nzila ya Yesu Kristo. 6 Samu Masonoko ke zonzaka: “Beno tala! mu ke na tulaka na Siyoni ditadi yina mu soolaka, ditadi ya nsongi ya fondasio mpe muntu yina ke kwikila na yawu ke kufwa ata fioti ve nsoni.”

7 Na yawu, ya ke mfunu samu na beno samu beno ke bandimi, kasi samu na ba yina ke ve bandimi, “ditadi yina bantu yina ke tungaka losaka, ni yawu me kuma ditadi ya kulutila mfunu yina ke simbaka yinzo” 8 mpe “ditadi yina ke budisaka dibaku mpe ditadi yina ke bwisaka.” Ba ke na bulaka dibaku samu ba ke tumamaka ve na mambu ya Nzambi. Ni yawu lungaka kukumina bawu. 9 Kasi beno ke “dikanda yina ba me soola, banganga-nzambi yina ke vanda bantinu, dikanda ya santu, bantu yina ke vanda kima ya Nzambi yandi mosi, samu beno zabisa bisika nyonso bifu ya kulutila mbote” ya Muntu yina bokilaka beno na kukatuka na kitombi samu beno kota na nsemo ya yandi ya ngitukulu. 10 Beno vandaka ve dikanda ya Nzambi, kasi ntangu yayi beno me kuma dikanda ya Nzambi. Ba lakisaka ve beno ntima ya mawa, kasi ntangu yayi ba me lakisa beno ntima ya mawa.

11 Bampangi ya luzolo, mu ke na lombaka na beno ba yina ke banzenza mpe ke na zingaka samu na ntangu fioti, na kutatamana na kumanga bansatu ya kinsuni yina ke nwanisaka beno.* 12 Beno vanda na ndyatulu ya mbote na kati ya makanda samu ntangu ba ke funda beno ti beno ke bantu ya yimbi, ba tala na meso ya bawu mosi bisalu ya beno ya mbote mpe ba pesa Nzambi nkembo na kilumbu yina yandi ke kwiza tala.

13 Samu na Mfumu beno tumama na bima nyonso yina bantu me sala, ya vanda ntinu samu yandi ke na zulu ya beno, 14 to bilandi ya yandi* yina yandi ke filisaka na kusemba bantu yina ke salaka mambu ya yimbi to na kupesa masiika na bantu yina ke salaka mambu ya mbote. 15 Samu luzolo ya Nzambi ke ti, na kusalaka mambu ya mbote, beno kangisa yinwa ya bazoba samu ba ke zonzaka kukondwa kuzaba. 16 Beno vanda bantu ya kimpwanza, beno sadila kimpwanza ya beno. Beno kusadila ve yawu mutindu kitapu samu na kukanga mambu ya yimbi, kasi mutindu bisadi ya Nzambi. 17 Beno pesa bantu ya mutindu nyonso lukumu, beno zola kimvuka nyonso ya bampangi, beno vanda na boma ya Nzambi, beno pesa ntinu lukumu.

18 Bika ti bisadi kutumama na bamfumu ya bawu na boma nyonso yina me fwanana, kaka ve na bamfumu yina ke mbote to yina ke ve na mambu ya ngolo, kasi mpe na bamfumu yina ke na ntima ya yimbi. 19 Na yawu, ya ke mambu ya mbote ntangu muntu ke kangaka ntima na bankwamusu* mpe ke talaka mpasi ata ti yandi me sala ve mambu ya yimbi samu na kubumba ntima ya kuvedila na mantwala ya Nzambi. 20 Samu wapi yina ke mambu ya mbote kana beno ke na kangaka ntima na kubula yina ba ke na bulaka beno samu beno me sala disumu? Kasi, kana beno ke na kangaka ntima na bampasi samu beno ke na salaka mambu ya mbote, ya ke mambu ya mbote na meso ya Nzambi.

21 Ya tsyeleka, ni na nzila yayi ba bokilaka beno samu Kristo mpe talaka mpasi samu na beno, yandi bikilaka beno kifwani samu beno landa mbote-mbote mitambi ya yandi. 22 Yandi salaka ve disumu mpe ba kuzwaka ve mambu ya yimbi na yinwa ya yandi. 23 Ntangu ba vanda fingaka yandi,* yandi vanda vutulaka ve bifingu,* ntangu yandi vanda talaka mpasi, yandi kanisaka ve muntu, kasi yandi vutulaka nyonso na maboko ya Muntu yina ke sambisaka na lunungu.* 24 Yandi nataka yandi mosi masumu ya beto na nzutu ya yandi na zulu ya yinti, samu beto kufwa na yina me tadila disumu mpe beto zinga na yina me tadila lunungu.* Mpe “na nzila ya bamputa ya yandi beno me beluka.” 25 Samu beno vandaka mutindu mameme yina vanda bika nzila, kasi ntangu yayi, beno me vutukila mvungi mpe mukengi ya bamwela* ya beno.

3 Mutindu mosi mpe beno bakento, beno tumama na babakala ya beno, samu kana ba ya nkaka ke tumamaka ve na dyambu ya Nzambi, ba vanda na kundima na dyambu ya Nzambi na nzila ya ndyatulu ya bakento ya bawu, 2 samu ba me tala na meso ya bawu mosi ndyatulu ya beno ya mbote na buzitu ya kulutila. 3 Kitoko ya beno kuvanda ve ya ngaanda—kukanga bansuki, kulwata bima ya wolo, to bilele ya kitoko— 4 kasi ya vanda kimuntu ya kubumbana ya ntima na kitoko yina ke bolaka ve ya mpeve ya kizunu mpe ya lembami yina ke mfunu mingi na meso ya Nzambi. 5 Samu ni mutindu yayi bakento ya santu ya ntama yina vandaka na kivuvu na Nzambi, vanda salaka samu na kukikumisa kitoko. Ba vanda tumamaka na babakala ya bawu. 6 Kaka mutindu Sara vanda tumamaka na Abrahami mpe vanda bokilaka yandi mfumu. Beno me kuma bana ya yandi, kana beno tatamana na kusala mambu ya mbote mpe na kuvanda ve na boma.

7 Mutindu mosi beno babakala, beno tatamana na kuzinga na bawu na mutindu yina ke ya kukwelana na luzabu.* Beno pesa bawu lukumu mutindu na ndonga ya kukondwa ngolo yina ke ya bukento, samu bawu mpe ke kuzwa na beno dikabu ya luzingu ya ntima ya kulutila mbote, samu kima mosi ve kanga nzila na balusambu ya beno.

8 Na kumanisa, beno nyonso beno vanda na bumosi na makanisi, beno vanda na kifu ya kuvandaka na kisika ya bampangi, beno vanda na luzolo ya bampangi, beno vanda na mawa ya bampangi mpe beno vanda ya kukuluka. 9 Beno kuvutula ve yimbi na yimbi to bifingu na bifingu. Kasi beno vutula lusakumunu samu ba bokilaka beno na nzila yayi, samu na kuzwa lusakumunu mutindu dikabu.

10 Na yawu “muntu yina ke zola kusepela na luzingu mpe kutala bilumbu ya mbote, fwana kubumba ludimi ya yandi na mambu ya yimbi mpe bikoba ya yandi na kuzonza ve mambu ya luvunu. 11 Kasi yandi bika mambu ya yimbi mpe yandi sala mambu yina ke ya mbote, bika yandi sosa kizunu mpe yandi landa yawu, 12 samu meso ya Yehova* ke na zulu ya bantu ya lunungu* mpe makutu ya yandi ke kuwaka kubondila ya bawu, kasi kizizi ya Yehova* ke ntama na bantu yina ke salaka mambu ya yimbi.”

13 Ya tsyeleka, nani ke sala beno yimbi kana beno kuma na manzangu ya kusala mambu ya mbote? 14 Kasi ata ti beno ke na talaka mpasi samu na lunungu,* beno kele na kilengi. Ata faso yina, beno kuvanda ve na boma ya mambu yina ba ke na boma* mpe beno kuvanda ve na makanisi ya kidi-kidi. 15 Kasi beno pesa Kristo lukumu mutindu Mfumu na bantima ya beno, beno vanda ntangu nyonso ya kuyidama samu na kunwanina kivuvu ya beno na mantwala ya konso muntu yina ke yufula beno mfunu ya kivuvu yina beno kele na yawu. Kasi beno sala yawu na lembami mpe na buzitu ya mingi.

16 Beno bumba ntima ya kuvedila samu na mutindu nyonso yina bantu ke zonzaka mambu ya yimbi na nkumbu ya beno, ba kufwa nsoni samu na ndyatulu ya beno ya mbote mutindu bilandi ya Kristo, 17 samu ya ke mbote na kutala mpasi samu beno ke na salaka mambu ya mbote, kana ya ke luzolo ya Nzambi na kubika nzila na bamambu ya mpasi yayi, na kisika ya kutala mpasi samu beno ke na salaka mambu ya yimbi. 18 Ni na yawu Kristo kufwaka mbala mosi samu na ntangu nyonso samu na masumu, muntu ya lunungu samu na bantu ya kukondwa lunungu, samu na kunata beno na Nzambi. Ba kufwaka yandi na kinsuni kasi ba vutulaka yandi na luzingu na mpeve. 19 Mpe ni na mutindu yayi yandi kwendaka mpe samunaka na bampeve yina ke na boloko, 20 bampeve yina na ntama tumamaka ve ntangu Nzambi vanda vingila na ntima ya yinda nyonso* na kilumbu ya Nowe, na ntangu ba vanda tunga masuwa yina na kati ya yawu bantu ndambu, ya zola zonza bamwela* 8 vuukaka na maza.

21 Mbotokolo yina me fwanana na mambu yayi, ke na vuukisaka mpe beno ntangu yayi (ya kele ve kukatuka ya mvindu ya nzutu, kasi kulomba Nzambi kimuntu ya kati ya mbote), na nzila ya kuvumbuka na lufwa ya Yesu Kristo. 22 Yandi ke na diboko ya bakala ya Nzambi, samu yandi kwendaka na zulu mpe ba tulaka bambazi, balutumu, mpe bangolo na yisi ya yandi.

4 Samu Kristo talaka mpasi na musuni, beno mpe beno vanda na makanisi* ya mutindu mosi, samu muntu yina me tala mpasi na musuni me bika masumu, 2 samu yandi lutisa ntangu yina me bikana na yandi na kuzinga na musuni, yandi zinga dyaka ve samu na kulungisa bansatu ya bantu kasi samu na luzolo ya Nzambi. 3 Samu na ntangu ya ntama beno lutisaka ntangu mingi na kulungisaka luzolo ya makanda ntangu beno vanda sala bamambu ya yimbi kukondwa nsoni,* beno vandaka na makanisi ya yimbi, na kunwaka malafu na mutindu ya kulutila, na kusalaka mikembo ya kidi-kidi, na kukolaka malafu, mpe lusambu ya yimbi ya biteki. 4 Ba ke na yitukaka samu beno ke na kimaka dyaka ve kintwadi na bawu na bamambu ya busafu, ni na yawu ba ke na zonzilaka yimbi ya beno. 5 Kasi ba ke sambisa bantu yayi na muntu yina ke ya kuyidama samu na kusambisa bantu yina ke moyo mpe bantu ya kufwa, na kutadilaka bisalu ya bawu. 6 Ya tsyeleka, ya ke ni samu na yawu ba samunaka mpe nsangu ya mbote na bantu yina ke ya kufwa, samu ata ti ba ke na sambisaka bawu na kinsuni na mutindu ya bantu ya kutadila bamambu, ba ke zinga na bumosi na mpeve na mutindu ya Nzambi ya kutadila bamambu.

7 Kasi nsuka ya bima nyonso me kuma pene-pene. Na yawu, beno vanda bantu ya makanisi ya mbote mpe beno vanda ekenge na yina me tadila lusambu. 8 Ya kulutila nyonso, beno zolasana mingi samu luzolo ke fukaka masumu mingi. 9 Beno vanda na kifu ya kuyambaka bampangi beno na beno kukondwa kunyunguta. 10 Na mutindu yina konso muntu me kuzwa dikabu, beno salasana beno na beno mutindu bisadi yina ke sadisaka bantu ya nkaka na kuzwa ntima ya kulutila mbote ya Nzambi, yina me talana na mitindu mingi. 11 Kana muntu ke na zonzaka, yandi zonza mutindu yandi ke na zonzaka mambu yina ke katukaka na Nzambi. Kana muntu ke na sadilaka bantu ya nkaka, bika yandi tula ntima ya yandi na ngolo yina Nzambi ke pesaka. Na yawu, na mambu nyonso Nzambi kuzwa nkembo na nzila ya Yesu Kristo. Nkembo mpe ngolo ke ya yandi mvula na mvula. Ameni.

12 Bampangi ya luzolo, beno kuyituka ve na bankwamusu ya ngolo yina ke na kuminaka beno, mutindu ya ke kima ya malu-malu ke na kuminaka beno. 13 Kasi beno tatamana na kusepela samu beno ke na talaka mpe bampasi yina Kristo talaka, samu beno sepela mpe beno yangalala na ntangu nkembo ya yandi ke talana. 14 Kana ba ke na fingaka beno samu na nkumbu ya Kristo, beno ke bantu ya kilengi samu mpeve ya nkembo, ee mpeve ya Nzambi me vanda na zulu ya beno.

15 Kasi ata muntu na kati ya beno kutala mpasi mutindu muntu yina ke kufwaka bantu to muyibi to muntu yina ke salaka mambu ya yimbi to muntu yina ke kotaka na mambu ya bangana. 16 Kasi kana muntu ke na talaka mpasi mutindu mukristo, bika yandi kuvanda ve na nsoni, kasi yandi tatamana na kupesa Nzambi nkembo na ntangu yina yandi ke na nataka nkumbu ya yandi. 17 Samu ya ke ntangu yina tulamaka samu lusambusu banda na yinzo ya Nzambi. Ntangu yayi, kana ya banda ntete na beto, wapi mutindu ya ke vanda samu na bantu yina ke tumamaka ve na nsangu ya mbote ya Nzambi? 18 “Mpe kana muntu ya lunungu* ke na vuukaka na mpasi, yinki ke kumina muntu yina ke vwezaka Nzambi mpe musumuki?” 19 Na yawu, bika ti ba yina ke na talaka mpasi na mutindu yina ke ya kukwelana na luzolo ya Nzambi, tatamana na kupesa luzingu ya bawu* na Mvangi* ya kukwikama na ntangu yina ba ke na salaka mambu ya mbote.

5 Na yawu, samu mu ke kuluntu mutindu beno, mbangi ya bampasi ya Kristo mpe muntu yina ke kuzwa nkembo yina me lunga kutalana, mu ke na lombaka na bakuluntu yina ke na kati ya beno: 2 Beno bumba mameme ya Nzambi yina ba pesaka beno, beno sala mutindu mikengi,* beno kusala ve yawu mutindu ba ke na nataka beno na ngolo na kusala yawu, kasi beno sala yawu na ntima nyonso na mantwala ya Nzambi, na luzolo ya kuzwa ve bima na luvunu, kasi na ntima ya kilengi. 3 Beno kusala mpe ve yawu mutindu bantu yina ke yalaka na ngolo bantu yina ke dikabu ya Nzambi, kasi beno kuma kifwani samu na mameme. 4 Mpe ntangu Muvungi ya nene ke talana, beno ke kuzwa yimpu ya nkembo yina ke bebaka ve.

5 Mutindu mosi mpe beno bantwenya, beno tumama na bantu ya kukula.* Kasi beno nyonso beno lwata kukuluka na mutindu ya beno ya kuvanda na bantu ya nkaka, samu Nzambi ke teleminaka bantu ya lunangu, kasi yandi ke pesaka ntima ya kulutila mbote na bantu ya kukuluka.

6 Na yawu, beno vanda ya kukuluka na yisi ya diboko ya Nzambi, samu yandi zangula beno na ntangu yina me lunga, 7 na ntangu beno ke na losaka manyongi* ya beno nyonso na yandi, samu yandi ke tudilaka beno dikebi. 8 Beno bumba makanisi ya beno, beno vanda ekenge, mbeni ya beno Dyabulu ke na tambulaka kisika na kisika mutindu nkosi yina ke na gangaka mpe ke na sosaka kudya muntu.* 9 Kasi beno telemina yandi, beno vanda ngolo na kiminu, samu beno zaba ti kimvuka nyonso ya bampangi ya beno na yinza* ke na kutanaka mpe na bampasi ya mutindu mosi. 10 Kasi na manima ya kutala mpasi mwa ntangu fioti, Nzambi ya ntima ya kulutila mbote nyonso yina bokilaka beno na nkembo yayi ya ntangu nyonso na bumosi na Kristo, yandi mosi ke manisa kulonga beno. Yandi ke kindisa beno, yandi ke kumisa beno ngolo, yandi ke sala ti beno vanda ya kusikama. 11 Ngolo kuvanda na yandi mvula na mvula. Ameni.

12 Na nzila ya Silvanuse* yina mu ke bakilaka mutindu mpangi ya kukwikama, mu me sonikila beno bamambu ya nkufi, samu na kukindisa beno mpe kupesa beno kimbangi na bukindi ti yayi ke ya tsyeleka ntima ya kulutila mbote ya Nzambi. Beno kangama ngolo na yawu. 13 Kento* yayi yina ba soolaka mutindu beno, yina ke na Babiloni me filisa beno bambote ya yandi, mpe mwana ya munu Marke me filisa mpe beno bambote. 14 Beno pesana bambote na bizu ya luzolo.

Bika ti kizunu vanda na beno nyonso yina ke na bumosi na Kristo.