MUKANDA YA ZOLE YA PIERE

1 Simoni Piere, kisadi mpe ntumwa ya Yesu Kristo, na ba yina me kuzwa kiminu ya mfunu mutindu ya beto na nzila ya lunungu ya Nzambi mpe ya Muvuukisi Yesu Kristo.

2 Bika ti ntima ya kulutila mbote mpe kizunu kubwelama na sika ya beno na nzila ya luzabu ya tsyeleka ya Nzambi mpe ya Yesu Mfumu ya beto. 3 Samu na ngolo ya yandi ya bunzambi, yandi pesaka beto* bima nyonso yina ke sadisaka na luzingu mpe na kukangama na Nzambi, na nzila ya luzabu ya tsyeleka ya Muntu yina bokilaka beto na nkembo ya yandi mpe na bifu ya yandi ya mbote. 4 Na nzila ya bima yango, mutindu beto me kima bamambu ya yimbi ya yinza, yina ke katukaka na bansatu ya yimbi,* yandi me pesa beto* bansilulu ya kitoko mpe ya nene mingi, samu na nzila ya yawu, beno kuma mutindu Nzambi.

5 Na yawu, beno sala ya tsyeleka bangolo samu beno bwela na kiminu ya beno bifu ya mbote, na bifu ya beno ya mbote luzabu, 6 na luzabu ya beno kukutika nzutu, na kukutika nzutu ya beno kukanga ntima, na kukanga ntima ya beno kukangama na Nzambi, 7 na kukangama ya beno na Nzambi luzolo ya bampangi, na luzolo ya beno ya bampangi luzolo. 8 Samu kana bifu yayi ke na beno mpe beno ke ya kufuluka na yawu, ya ke kanga beno nzila na kukuma ve bantu yina ke salaka ve bisalu to yina ke butaka ve mbuma na yina me tadila luzabu ya tsyeleka ya Mfumu ya beto Yesu Kristo.

9 Kana muntu ke ve na bamambu yayi, yandi ke muntu ya meso ya kufwa, yandi me kanga meso na nsemo* mpe yandi me zimbana ti ba katulaka masumu ya yandi. 10 Beno sala dyaka bangolo mingi, mpe beno bumba kubokila yina ba bokilaka beno mpe kusoola yina ba soolaka beno, samu kana beno tatamana na kusala bamambu yayi, beno ke kubwa ata fioti ve. 11 Ya tsyeleka, ni na mutindu yayi ba ke pesa beno na faso ya kulutila, nzila ya kukota na Kimfumu ya ntangu nyonso ya Mfumu ya beto mpe Muvuukisi Yesu Kristo.

12 Ni na yawu, ntangu nyonso mu ke ya kubongama samu na kubambula beno bamambu yayi ata ti beno zaba yawu mpe beno kele ya kukangama ngolo na matsyeleka yina kele na kati ya beno. 13 Kasi mu me tala ti ya ke mbote ntangu nyonso yina mu kele na tabernakle* yayi, na kubambulaka beno moyo samu na kuvumbula beno. 14 Samu mu zaba ti ya me bikana kaka ntangu fioti ba ke katula tabernakle ya munu, kaka mutindu Mfumu ya beto Yesu Kristo lakisaka munu yawu pwelele. 15 Mu ke sala ntangu nyonso yina mu ke na ngolo ya kusala samu na manima ya kukwenda ya munu, beno lenda kukanisa na* bamambu yango.

16 Ya tsyeleka, ya ke ve ni na kulandaka masolo ya luvunu yina salamaka na mayela ya bantu ti beto lakisaka beno ngolo mpe kuvanda* ya Mfumu ya beto Yesu Kristo, kasi ya ke samu beto talaka bunene ya yandi na meso ya beto mosi. 17 Samu yandi kuzwaka lukumu mpe nkembo na sika ya Nzambi Tata, ntangu bamambu yayi* kwizaka tii na sika ya yandi na nkembo ya nene: “Yayi ni Mwana ya munu yina mu ke zolaka mingi, yina munu mosi me ndima.” 18 Ee, bamambu yayi yina beto kuwaka katukaka na mazulu ntangu beto vandaka na yandi na zulu ya mongo ya santu.

19 Na yawu, mambu yina ba bikulaka me kuma ya tsyeleka na mutindu ya kulutila, mpe beno ke salaka mbote ntangu beno ke tudilaka yawu dikebi mutindu mwinda yina ke na ngengaka na kisika ya kitombi (tii bwisi ke kutya mpe mbwetete ya suka ke basika) na bantima ya beno, 20 samu beno me zaba ntete-ntete ti ata mbikudulu mosi ya Masonoko me katuka na mbangudulu ya muntu yandi mosi. 21 Ya tsyeleka mbikudulu kwizaka ata fioti ve na luzolo ya muntu, kasi bantu zonzaka mambu yina katukaka na Nzambi mutindu mpeve ya santu vanda twadisa* bawu.

2 Kasi ya vandaka mpe na bambikudi ya luvunu na kati ya bantu ya Izraele, mutindu mosi mpe, ya ke vanda na milongi ya luvunu na kati-kati ya beno. Ba ke kotisa na mayela nyonso binzambi-nzambi yina ke bebisaka, ba ke kwenda tii na kumanga mfumu yina sumbaka bawu. Kusala mutindu yina ke sala ti ba natina bawu mosi lufwa na mbangu. 2 Dyaka, mingi ke landa ndyatulu ya bawu ya nsoni,* mpe samu na bawu, ba ke zonzila yimbi ya nzila ya matsyeleka. 3 Dyaka, na lukoso nyonso ba ke leba beno na banzonzolo ya bawu ya luvunu, kasi masembo ya bawu yina ba zengilaka bawu banda ntama, ke kwiza ve na malembe mpe lufwa ya bawu ke lala ve pongi.

4 Ya tsyeleka, Nzambi pesaka kitumbu na bambazi yina sumukaka mpe yandi losaka bawu na Tartare.* Yandi kangaka bawu basinga* na kitombi ya ngolo tii na kilumbu ya lusambusu ya bawu. 5 Mpe yandi pesaka yinza mosi ya ntama kitumbu, kasi yandi bumbaka Nowe, musamuni ya lunungu, na bantu 7 ya nkaka ntangu yandi nokisaka mvula ya nene na yinza ya bantu yina vanda tumama ve na Nzambi. 6 Na kukumisaka mbanza ya Sodome na ya Gomore bombi ya tiya, yandi pesaka bawu kitumbu mpe na mutindu yina, yandi pesaka na bantu yina ke tumamaka ve na Nzambi kifwani ya bamambu yina ke kwiza. 7 Yandi vuukisaka Loti muntu ya lunungu yina vanda nyokwama mingi samu na ndyatulu ya nsoni* ya bantu yina vanda kufwa musiku— 8 samu kilumbu na kilumbu muntu ya lunungu yayi vanda nyokwama na mwela* ya yandi ya lunungu samu na bamambu ya yimbi yina yandi vanda tala mpe kuwa ntangu yandi vanda zinga na kati ya bawu. 9 Na yawu, Yehova* zaba mutindu ya kubasisa na bampasi ba yina ke ya kukangama na yandi, kasi kubumba bantu ya kukondwa lunungu samu na kufwa bawu na kilumbu ya lusambusu, 10 mingi-mingi ba yina ke sosaka kukumisa mvindu banzutu ya ba ya nkaka mpe kuvweza lutumu.*

Samu ba ke ve na boma mpe ke na yintu ngolo, ba ke talaka ve boma ya kuzonza yimbi ya bantu ya nkembo, 11 kasi bambazi ata ti ba ke na ngolo mingi, ba fundaka ve bawu na banzonzolo ya bifingu, samu ba vandaka na buzitu na* Yehova.* 12 Kasi mutindu bibulu yina ke ve na mayela, mpe yina ke salaka bamambu kaka faso yina, yina butamaka samu ba kanga bawu mpe kufwa bawu, bantu yayi ke zonzaka yimbi ya bamambu yina ba zaba ve. Mambu ya yimbi yina ba ke salaka ke nata bawu na lufwa. 13 Mambu ya yimbi ke kumina bawu mutindu difuta samu na bamambu ya bawu ya yimbi.

Ba ke sepelaka na kukipesa na luzingu ya bilengi, ata na ntangu. Ba ke na bifu ya yimbi mpe ya mvindu, bantu yayi ke sepelaka na malongi ya bawu mosi ya luvunu, ntangu ba ke na salaka mukembo na beno. 14 Meso ya bawu ke ya kufuluka na kinsuza mpe ke lendaka ve kubika disumu, mpe ba ke lebaka ba* yina ke ve ya kusikama. Ba ke na ntima yina ke ya kumesana na nsatu ya kuzwa mingi. Ba ke bana yina ba lokaka. 15 Ba me bika nzila ya kusungama mpe ba me kwenda ntama. Ba me landa nzila ya Balami mwana ya Beore, yina zolaka difuta yina ba vanda pesa yandi samu na kusala yimbi. 16 Kasi ba sembaka yandi samu yandi zitisaka ve musiku. Kibulu yina ke nataka bakilo mpe yina ke zonzaka ve, zonzaka na ndinga ya muntu mpe ya kangaka nzila na mbikudi na kusala mambu ya buzoba.

17 Bantu yayi ke mikelo* ya maza yina ke ve na maza mpe mabungi* yina mupepe ya ngolo ke na nataka, ba me bumbila bawu kitombi ya ngolo. 18 Ba ke zonzaka bamambu mingi yina ke ve na mfunu. Na nzila ya bansatu ya kinsuni mpe na ndyatulu ya nsoni,* ba ke na lebaka bantu yina me katuka kukima ntama mingi ve ba yina ke salaka mambu ya yimbi. 19 Ba ke na pesaka bawu bansilulu ya kimpwanza na ntangu yina bawu mosi kele bangaamba ya mambu ya yimbi, samu muntu nyonso yina ba me nunga na muntu ya nkaka, me kuma ngaamba ya muntu yango.* 20 Ya tsyeleka, kana na manima ya kukima mvindu nyonso ya yinza, na nzila ya nzayilu ya tsyeleka ya Mfumu mpe Muvuukisi Yesu Kristo, ba me kukipesa dyaka na mambu yango mpe ya me nunga bawu, nsuka ya bawu me kuma yimbi kulutila kubanda. 21 Ya zolaka vanda mbote na bawu na kuzaba ve mbote-mbote nzila ya lunungu, na kisika ya kuzaba yawu mpe na manima kupesa mukongo na musiku ya santu yina ba kuzwaka. 22 Mambu yayi yina kingana ya tsyeleka ke zonzaka me lungana na bawu: “Yimbwa me vutuka na bilusi ya yandi, mpe ngulu yina ba me yobisa me vutuka kubaluka na poto-poto.”

3 Bampangi ya luzolo, yayi ke mukanda ya zole mu ke na sonikilaka beno, yina na kati ya yawu mutindu na mukanda ya munu ya ntete, mu ke na bambulaka beno bamambu yayi, samu na kuvumbula makoki ya beno ya kukanisa mbote-mbote, 2 samu na kubambula beno moyo bamambu yina bambikudi ya santu zonzaka* na ntama mpe musiku ya Mfumu mpe Muvuukisi yina kwizaka na nzila ya bantumwa ya beno. 3 Mambu yina beno me fwana kuzaba ni yayi: Na bilumbu ya nsuka bantu ke seka bamambu ya mbote mpe ke sala bamambu ya yimbi yina ba ke zolaka bawu mosi 4 mpe ba ke zonza: “Wapi kuvanda ya yandi yina yandi pesaka nsilulu? Samu ti banda kilumbu yina bankooko ya beto lalaka na lufwa, bamambu nyonso ke kaka faso ya vandaka katuka ntangu yina ba yidikaka bima nyonso.”

5 Ba ke na zolaka ve na nkoo kubambuka moyo ti zulu vandaka banda ntama mpe ti na ndinga ya Nzambi, ntoto kabukaka na maza mpe na kati-kati ya maza, 6 mpe na nzila ya bima yango, yinza ya ntangu yina kufwaka ntangu ya dyamaka na maza, 7 mpe kaka na nzila ya ndinga yina, ba me bumba zulu na ntoto ya ntangu yayi samu na kufwa yawu na tiya mpe ba me bumba yawu tii na kilumbu ya kusambisa mpe ya lufwa ya bantu yina ke zitisaka ve Nzambi.

8 Kasi bampangi ya luzolo, beno kuzimbana ve mambu yayi, na meso ya Yehova* kilumbu mosi ke mutindu bamvula 1 000 mpe bamvula 1 000 mutindu kilumbu mosi. 9 Yehova* ke na lutisaka ve ntangu na yina me tadila nsilulu ya yandi mutindu bantu ya nkaka ke kanisaka yawu, kasi yandi ke na ntima ya yinda samu na beno samu yandi zola ve ti ata muntu mosi kufwa, kasi yandi zola ti bantu nyonso balula ntima. 10 Kasi kilumbu ya Yehova* ke kwiza mutindu muyibi. Na kilumbu yango, zulu ke luta na mbangu na makelele ya ngolo, kasi bima yina me kuma tiya mingi ke sulumuka mpe ntoto na bisalu yina ke na kati ya yawu ke talana pwelele.

11 Samu bima nyonso yayi me fwana kusulumuka na faso yayi, beno kanisa na mutindu ya bantu yina beno me fwana kuvanda, bantu yina ke vandaka na bisalu ya kuvedila mpe bisalu yina ke lakisaka ndyatulu ya kukangama na Nzambi, 12 ntangu beno ke na vingilaka mpe beno ke na bumbaka na makanisi* kuvanda* ya kilumbu ya Yehova.* Na ntangu yina zulu ke mwangana, mpe na tiya ya ngolo, bima ya yawu ke sulumuka. 13 Beto ke na vingilaka zulu ya malu-malu mpe ntoto ya malu-malu mutindu yandi pesaka nsilulu, kisika yina lunungu* ke vanda.

14 Ni na yawu bampangi ya luzolo, samu beno ke na vingilaka bima yayi, beno sala nyonso yina beno lenda sala samu yandi kuta beno na ata kima ya yimbi, na ata mvindu mpe na kati ya kizunu. 15 Dyaka, beno bakila ntima ya yinda ya Mfumu ya beto mutindu luvuukusu kaka mutindu mpangi ya beto ya luzolo Polo sonikilaka mpe beno na kulandaka ndwenga yina ba pesaka yandi 16 ntangu yandi vanda zonzila bamambu yayi mutindu yandi salaka yawu na mikanda ya yandi nyonso. Kasi bamambu ya nkaka yina ke na kati ke mpasi na kubakula, bamambu yina bazoba* mpe bantu yina ke ve ya kusikama ke tengimisaka mutindu ba ke salaka mpe yawu na Masonoko nyonso ya nkaka samu na lufwa ya bawu mosi.

17 Kasi bampangi ya luzolo, beno ba yina me zaba bamambu yayi tekila ya salama, beno vanda ekenge samu bantu yina ke mangaka kutumama na musiku, kuvuna ve beno mpe beno kubwa ve ntangu yayi yina beno ke ya kusikama. 18 Kasi beno tatamana na kukula na ntima ya kulutila mbote mpe na luzabu ya Mfumu ya beto mpe Muvuukisi Yesu Kristo. Bika nkembo vanda na yandi bubu yayi mpe samu na ntangu nyonso. Ameni.