MUKANDA YA NTETE YA YOANE

1 Yina vandaka katuka mbandukulu, yina beto kuwaka, yina beto talaka na meso ya beto, yina beto tudilaka meso mpe simbaka na maboko ya beto, na yina me tadila ndinga ya luzingu, 2 (ee, luzingu talanaka, mpe beto talaka mpe beto ke na pesaka kimbangi, mpe beto ke na zabisaka beno luzingu ya ntangu nyonso, yina vandaka na Tata mpe yina talanaka na beto), 3 yina beto talaka mpe kuwaka, ni yawu beto ke na zonzilaka mpe beno, samu beno mpe, beno vanda na bumosi* na beto. Bumosi yayi yina ke ya beto, beto ke na yawu na Tata mpe na Mwana ya yandi Yesu Kristo. 4 Mpe beto ke na sonikaka bamambu yayi samu kilengi ya beto vanda ya kulunga.

5 Yayi ni nsangu yina beto kuwaka na sika ya yandi, mpe yina beto ke na zonzilaka beno: Nzambi ke nsemo, mpe kitombi ke ata fioti ve na kati ya yandi.* 6 Kana beto zonza, “Beto ke na bumosi na yandi,” kasi beto ke na bikaka ve kutambula na kati ya kitombi, beto ke na vunaka mpe beto ke na landaka ve matsyeleka. 7 Kasi kana beto ke na tambulaka na kati ya nsemo mutindu yandi mosi ke na kati ya nsemo, beto ke na bumosi beto na beto, mpe menga ya Mwana ya yandi Yesu ke na kumisaka beto ya kuvedila na disumu nyonso.

8 Kana beto zonza, “Beto ke ve na disumu,” beto ke na vunamaka mpe matsyeleka ke ve na kati ya beto. 9 Kana beto fungula masumu ya beto, yandi ke ya kukwikama mpe ya kudedama samu na kulemvokila masumu ya beto mpe kuvedisa beto na mambu nyonso ya kukondwa lunungu.* 10 Kana beto zonza, “Beto me sala ve disumu,” beto ke na kumisaka yandi muntu ya luvunu mpe dyambu ya yandi ke ve na kati ya beto.

2 Bana ya munu ya fioti, mu ke na sonikilaka beno bamambu yayi samu beno sala ve disumu. Kasi kana muntu me sala disumu, beto ke na kisadisi* mosi na sika ya Tata, Yesu Kristo, muntu ya lunungu.* 2 Yandi ke munkayulu ya kuvutula kindiku* samu na masumu ya beto, kaka ve samu na masumu ya beto, kasi mpe samu na masumu ya yinza ya muvimba. 3 Mpe na mambu yayi beto me tala ti beto me zaba yandi, kana beto ke na tatamanaka na kutumama na misiku ya yandi. 4 Muntu yina ke zonzaka, “Mu me zaba yandi,” kasi ke tumamaka ve na misiku ya yandi, yandi ke muntu ya luvunu, mpe matsyeleka ke ve na kati ya muntu yayi. 5 Kasi muntu yina ke tumamaka na dyambu ya yandi, luzolo ya Nzambi me kuma ya kulunga na kati ya muntu yina. Ni mutindu yina beto zaba ti beto ke na bumosi na yandi. 6 Muntu yina ke zonzaka ti yandi ke na bikanaka na bumosi na yandi, yandi me fwana kutatamana na kutambula kaka mutindu muntu yango tambulaka.

7 Bampangi ya munu ya luzolo, mu ke ve na sonikilaka beno musiku ya malu-malu, kasi musiku ya ntama yina beno kuzwaka katuka mbandukulu. Musiku yango ya ntama ke mambu yina beno kuwaka. 8 Dyaka, mu ke na sonikilaka beno musiku ya malu-malu yina ke ya tsyeleka samu na yandi mpe samu na beno, samu kitombi ke na lutaka, mpe nsemo ya matsyeleka ke na ngengaka yimeni.

9 Muntu yina ke zonzaka ti yandi ke na kati ya nsemo, kasi yandi ke na yiinaka mpangi ya yandi, yandi ke ntete na kati ya kitombi. 10 Muntu yina ke zolaka mpangi ya yandi ke bikanaka na kati ya nsemo, mpe na kati ya yandi ya ke ve na kima yina ke budisaka dibaku. 11 Kasi muntu yina ke yiinaka mpangi ya yandi ke na kati ya kitombi, mpe yandi ke na tambulaka na kati ya kitombi, mpe yandi zaba ve kisika yina yandi ke na kwendaka, samu kitombi me kufwa yandi meso.

12 Mu ke na sonikilaka beno, bana ya fioti, samu ba me lemvokila masumu ya beno samu na nkumbu ya yandi. 13 Mu ke na sonikilaka beno, batata, samu beno me zaba yandi, yina kele katuka mbandukulu. Mu ke na sonikilaka beno, bantwenya, samu beno me nunga muntu ya yimbi. Mu ke na sonikilaka beno, bana, samu beno me zaba Tata. 14 Mu ke na sonikilaka beno, batata, samu beno me zaba yandi, yina kele katuka mbandukulu. Mu ke na sonikilaka beno, bantwenya, samu beno ke ngolo mpe dyambu ya Nzambi me bikana na kati ya beno mpe beno me nunga muntu ya yimbi.

15 Beno kuzola ve yinza mpe bima yina ke na kati ya yinza. Kana muntu zola yinza, luzolo ya Tata ke ve na kati ya yandi, 16 samu mambu nyonso yina ke na kati ya yinza, nsatu ya nzutu mpe nsatu ya meso, mpe kulakisa na lulendo nyonso bima yina muntu ke na yawu samu na kuzinga,* ke katukaka ve na Tata, kasi ya ke katukaka na yinza. 17 Dyaka, yinza ke na lutaka, mpe nsatu ya yawu mpe ke na lutaka, kasi muntu yina ke salaka luzolo ya Nzambi ke bikana samu na ntangu nyonso.

18 Bana ya fioti, yayi ke ngunga ya nsuka. Beno kuwaka ti mbeni ya Kristo ke na kwizaka, mpe ntangu yayi bambeni mingi ya Kristo me basika. Ni na yawu beto me zaba ti yayi ke ngunga ya nsuka. 19 Ba basikaka na kati-kati ya beto, kasi ba vandaka ve bantu ya beto.* Samu kana ba vandaka bantu ya beto, ba zola bikana na beto, kasi ba basikaka samu ya talana pwelele ti bantu nyonso ve ke bantu ya beto. 20 Muntu ya santu me tula beno mafuta, mpe beno nyonso ke na nzayilu. 21 Kana mu ke na sonikilaka beno, ya ke ve samu beno zaba ve matsyeleka, kasi samu beno zaba yawu mpe samu ata luvunu mosi ke katukaka na matsyeleka.

22 Nani ke muntu ya luvunu? Ya ke kwandi ve muntu yina ke mangaka ti Yesu ke Kristo? Ni yandi ke mbeni ya Kristo, muntu yina ke mangaka Tata mpe Mwana. 23 Muntu nyonso yina ke mangaka Mwana ke mpe ve na Tata. Kasi muntu yina ke ndimaka Mwana ke mpe na Tata. 24 Kasi beno, mambu yina beno kuwaka katuka mbandukulu, me fwana kubikana na kati ya beno. Kana mambu yina beno kuwaka katuka mbandukulu bikana na kati ya beno, beno ke bikana mpe na bumosi na Mwana mpe na bumosi na Tata. 25 Dyaka, yayi ni mambu yina yandi mosi pesaka beto nsilulu: luzingu ya ntangu nyonso.

26 Mu ke na sonikilaka beno bamambu yayi samu na ba yina ke na sosaka kuvuna beno. 27 Kasi beno, Nzambi me tula beno mafuta na mpeve ya yandi, mpe mpeve yango me bikana na kati ya beno, mpe beno ke ve na nsatu ti muntu mosi longa beno. Kasi mafuta yina yandi tulaka beno ke na longaka beno mambu nyonso, mpe ya ke tsyeleka, ya ke ve luvunu. Kaka mutindu ya me longa beno, beno bikana na bumosi na yandi. 28 Na yawu, ntangu yayi bana ya fioti, beno bikana na bumosi na yandi, samu ntangu yandi ke talana, beto lenda kuzonza na ata boma, mpe beto kwenda ve ntama na yandi na nsoni, ntangu yandi ke vanda. 29 Kana beno zaba ti yandi ke muntu ya lunungu, beno zaba mpe ti muntu nyonso yina ke salaka mambu ya lunungu* butukaka na yandi.

3 Beno tala mutindu ya luzolo Tata me lakisa beto, samu ba bokila beto bana ya Nzambi! Mpe ni yawu beto kele. Ni na yawu yinza zaba ve beto, samu ya* longokaka ve na kuzaba yandi. 2 Bampangi ya munu ya luzolo, ntangu yayi beto ke bana ya Nzambi, kasi mutindu beto ke vanda, nabunu ntete ya talana pwelele. Beto zaba ti ntangu ya ke talana, beto ke vanda mutindu yandi, samu beto ke tala yandi kaka mutindu yandi kele. 3 Mpe muntu nyonso yina ke na kivuvu yayi na yandi, ke kumisaka yandi mosi ya kuvedila, kaka mutindu muntu yango ke ya kuvedila.

4 Muntu nyonso yina ke na kifu ya kusalaka disumu, ke tumamaka mpe ve na musiku, samu disumu ni kutumama ve na musiku. 5 Beno zaba mpe ti Yesu kwizaka samu na kukatula masumu ya beto, mpe yandi ke ve na disumu na kati ya yandi. 6 Muntu nyonso yina ke bikanaka na bumosi na yandi ke ve na kifu ya kusalaka disumu. Muntu nyonso yina ke na kifu ya kusalaka disumu me tala ve yandi mpe me longoka ve na kuzaba yandi. 7 Bana ya fioti, bika ti ata muntu vuna beno. Muntu yina ke salaka mambu ya lunungu ke muntu ya lunungu, kaka mutindu muntu yango ke muntu ya lunungu.* 8 Muntu yina ke na kifu ya kusalaka disumu me katuka na Dyabulu, samu Dyabulu ke salaka disumu katuka mbandukulu.* Ni na yawu Mwana ya Nzambi talanaka, samu na kumwangisa* bisalu ya Dyabulu.

9 Muntu nyonso yina me butuka na Nzambi ke ve na kifu ya kusalaka disumu, samu mbuma* ya Nzambi ke na kati ya muntu yango mpe yandi lenda vanda ve na kifu ya kusalaka disumu, samu yandi me butuka na Nzambi. 10 Tala wapi mutindu beto lenda zaba bana ya Nzambi mpe bana ya Dyabulu: Muntu yina ke salaka ve mambu ya lunungu* me katuka ve na Nzambi, mutindu mosi na muntu yina ke zolaka ve mpangi ya yandi. 11 Samu yayi ni nsangu beno kuwaka katuka mbandukulu: ti beto me fwana kuzolasana. 12 Ya vanda ve mutindu Kayini yina katukaka na muntu ya yimbi mpe yina kufwaka mpangi ya yandi. Mpe samu na yinki yandi kufwaka yandi? Samu ti bisalu ya yandi vandaka ya yimbi, kasi ya mpangi ya yandi vandaka ya lunungu.*

13 Bampangi, beno pamuka ve kana yinza ke na yiinaka beno. 14 Beto zaba ti beto katukaka na lufwa samu na kukuma na luzingu, samu beto ke zolaka bampangi. Muntu yina ke zolaka ve, me bikana na kati ya lufwa. 15 Muntu nyonso yina ke yiinaka mpangi ya yandi ke muntu yina ke kufwaka bantu. Mpe beno zaba ti ata muntu mosi ve yina ke kufwaka bantu ke na luzingu ya ntangu nyonso na kati ya yandi. 16 Ni na mambu yayi beto me kwiza zaba luzolo, samu Yesu Kristo pesaka luzingu* ya yandi samu na beto, beto mpe beto me fwana kupesa luzingu* ya beto samu na bampangi ya beto. 17 Kasi kana muntu yina ke na bimvwama ya yinza yayi mpe me tala mpangi ya yandi ke na nsatu ya kima mpe me manga kulakisa yandi ntima ya kyadi, wapi mutindu luzolo ya Nzambi lenda bikana na kati ya yandi? 18 Bana ya fioti, beto me fwana kuzola kaka ve na nzonzolo to na yinwa, kasi na bisalu mpe na matsyeleka.

19 Ni mutindu yayi beto ke zaba ti beto me katuka na matsyeleka, mpe beto ke zunisa* bantima ya beto na mantwala ya yandi, 20 na mambu nyonso yina bantima ya beto lenda funda beto, samu Nzambi kele nene kulutila bantima ya beto mpe yandi zaba mambu nyonso. 21 Bampangi ya munu ya luzolo, kana bantima ya beto ke na fundaka ve beto, beto lenda zonza na mantwala ya Nzambi na ata boma. 22 Mpe nyonso yina beto ke lombaka, beto ke kuzwaka yawu na sika ya yandi, samu beto ke na tumamaka na misiku ya yandi mpe ke na salaka mambu yina ke mbote na meso ya yandi. 23 Ya tsyeleka, yayi ni musiku ya yandi: ti beto vanda na kiminu na nkumbu ya Mwana ya yandi Yesu Kristo mpe beto zolasana, kaka mutindu yandi pesaka beto musiku. 24 Dyaka, muntu yina ke tumamaka na misiku ya yandi me bikana na bumosi na yandi, mpe yandi na bumosi na muntu yango. Mpe na nzila ya mpeve yina yandi pesaka beto, beto me zaba ti yandi me bikana na bumosi na beto.

4 Bampangi ya munu ya luzolo, beno kwikila ve na nzonzolo nyonso yina me katuka na mpeve.* Kasi beno meka banzonzolo yina me katuka na mpeve* samu na kutala kana ya me katuka na Nzambi, samu bambikudi mingi ya luvunu me basika na yinza.

2 Ni mutindu yayi beno ke zaba ti nzonzolo ya mpeve me katuka na Nzambi: Nzonzolo nyonso ya mpeve yina ke ndimaka ti Yesu kwizaka na nzutu ya kinsuni,* me katuka na Nzambi. 3 Kasi nzonzolo nyonso ya mpeve yina ke ndimaka ve Yesu, me katuka ve na Nzambi. Yayi ni nzonzolo ya mpeve ya mbeni ya Kristo, yina beno kuwaka ti ya ke na kwizaka, mpe ntangu yayi ya me kwiza yimeni na yinza.

4 Bana ya fioti, beno me katuka na Nzambi mpe beno me nunga bawu, samu ti muntu yina ke na bumosi na beno me lutila muntu yina ke na bumosi na yinza. 5 Ba me katuka na yinza, ni na yawu ba ke na zonzaka mambu yina me katuka na yinza, mpe yinza ke na kuwaka bawu. 6 Beto, beto me katuka na Nzambi. Muntu yina me zaba Nzambi ke kuwaka beto. Muntu yina me katuka ve na Nzambi, ke kuwaka ve beto. Ni na mambu yayi beto ke salaka luswaswanu na nzonzolo ya mpeve yina ke ya tsyeleka mpe nzonzolo ya mpeve yina ke ya luvunu.

7 Bampangi ya munu ya luzolo, bika beto tatamana na kuzolasana, samu luzolo ke katukaka na Nzambi, mpe muntu nyonso yina ke zolaka me butuka na Nzambi mpe yandi zaba Nzambi. 8 Muntu yina ke zolaka ve, zaba ve Nzambi, samu Nzambi ke luzolo. 9 Ni na mambu yayi luzolo ya Nzambi me zabana na ntadisi ya beto: Nzambi filisaka Mwana ya yandi kaka mosi na yinza samu beto kuzwa luzingu na nzila ya yandi. 10 Luzolo na mambu yayi ke ve ti beto zolaka Nzambi, kasi ti Nzambi zolaka beto mpe filisaka Mwana ya yandi mutindu munkayulu ya kuvutula kindiku* samu na masumu ya beto.

11 Bampangi ya munu ya luzolo, kana ni mutindu yayi Nzambi zolaka beto, beto mpe beto me fwana kuzolasana. 12 Ata muntu me talaka Nzambi. Kana beto tatamana na kuzolasana, Nzambi me bikana na kati ya beto mpe luzolo ya yandi me kuma ya kulunga na kati ya beto. 13 Na mambu yayi beto me zaba ti beto ke na bikanaka na bumosi na yandi mpe yandi na bumosi na beto, samu yandi me pesa beto mpeve ya yandi. 14 Dyaka, beto mosi me tala, mpe ke na pesaka kimbangi ti Tata filisaka Mwana ya yandi mutindu Muvuukisi ya yinza. 15 Muntu yina me ndima ti Yesu ke Mwana ya Nzambi, Nzambi me bikana na bumosi na muntu yango, mpe yandi na bumosi na Nzambi. 16 Mpe beto me kwiza zaba mpe beto me kwikila na luzolo yina Nzambi ke na yawu samu na beto.

Nzambi ke luzolo, mpe muntu yina me bikana na kati ya luzolo me bikana na bumosi na Nzambi, mpe Nzambi me bikana na bumosi na yandi. 17 Ni na mutindu yayi luzolo me kuma ya kulunga na kati ya beto, samu beto lenda zonza na ata boma* na kilumbu ya lusambusu, samu kaka mutindu muntu yango kele, ni mutindu yina beto kele na yinza yayi. 18 Boma kele ve na kati ya luzolo, kasi luzolo ya kulunga ke katulaka* boma, samu boma ke kangaka beto nzila.* Ya tsyeleka, muntu yina ke na boma me kuma ve ya kulunga na kati ya luzolo. 19 Beto ke zolaka samu yandi zolaka beto ya ntete.

20 Kana muntu me zonza, “Mu zola Nzambi,” kasi yandi ke na yiinaka mpangi ya yandi, yandi ke muntu ya luvunu. Samu muntu yina ke zolaka ve mpangi ya yandi yina yandi ke talaka, lenda zola ve Nzambi yina yandi ke talaka ve. 21 Mpe beto me kuzwa musiku yayi na yandi ti, muntu yina ke zolaka Nzambi me fwana mpe kuzola mpangi ya yandi.

5 Muntu nyonso yina ke kwikilaka ti Yesu ke Kristo, me butuka na Nzambi, mpe muntu nyonso yina ke zolaka Nzambi, muntu yina ke salaka ti kubutuka salama, ke zolaka muntu yina me butuka na yandi. 2 Ni na mambu yayi beto zaba ti beto ke zolaka bana ya Nzambi, ntangu beto ke zolaka Nzambi mpe ke sadilaka misiku ya yandi. 3 Samu kuzola Nzambi zola zonza kuzitisa misiku ya yandi. Mpe misiku ya yandi ke ve kilo, 4 samu muntu nyonso* yina me butuka na Nzambi me nunga yinza. Mpe yayi ni kima yina me sadisa beto na kununga yinza: kiminu ya beto.

5 Nani lenda nunga yinza? Ya ke ve ni muntu yina ke na kiminu ti Yesu ke Mwana ya Nzambi? 6 Ni yandi kwizaka na nzila ya maza mpe menga, Yesu Kristo. Kaka ve na maza, kasi na maza mpe na menga. Mpe mpeve ke na pesaka kimbangi samu mpeve ke matsyeleka. 7 Samu ya ke na bima tatu yina ke pesaka kimbangi: 8 mpeve, maza mpe menga, mpe nyonso tatu ke wisanaka.

9 Kana beto me ndima kimbangi ya bantu, kimbangi ya Nzambi me lutila. Yayi ni kimbangi yina Nzambi ke pesaka, kimbangi yina yandi me pesa na yina me tadila Mwana ya yandi. 10 Muntu yina ke tulaka kiminu ya yandi na Mwana ya Nzambi ke na kimbangi na kati ya yandi mosi. Muntu yina ke ve na kiminu na Nzambi me kumisa yandi muntu ya luvunu, samu yandi me tula ve kiminu na kimbangi yina Nzambi me pesa na yina me tadila Mwana ya yandi. 11 Mpe yayi ni kimbangi: Nzambi me pesa beto luzingu ya ntangu nyonso, mpe luzingu yango ke na kati ya Mwana ya yandi. 12 Muntu yina ke na bumosi na Mwana ke na luzingu yango. Muntu yina ke ve na bumosi na Mwana ya Nzambi, ke ve na luzingu yango.

13 Mu ke na sonikilaka beno bamambu yayi samu beno zaba ti beno ke na luzingu ya ntangu nyonso, beno ba yina me tula kiminu na nkumbu ya Mwana ya Nzambi. 14 Mpe yayi ni kundima yina beto ke na yawu na ntadisi ya yandi: kima ni kima yina beto ke lombaka ya kukwelana na luzolo ya yandi, yandi ke kuwaka beto. 15 Mpe kana beto zaba ti yandi ke kuwaka beto samu na mambu nyonso yina beto ke lombaka, beto zaba ti beto ke kuzwa bima yina beto me lomba, samu beto me lomba yandi yawu.

16 Kana muntu me tala mpangi ya yandi ke na salaka disumu yina ke nataka ve na lufwa, bika yandi sambila, mpe Nzambi ke pesa mpangi yango luzingu. Yandi ke pesa yawu na ba yina ke salaka ve disumu yina ke nataka na lufwa. Ya ke na disumu yina ke nataka na lufwa. Ya ke ve samu na disumu yina mu ke na lombaka yandi na kusambila. 17 Mambu nyonso ya kukondwa lunungu* ke disumu, kasi ya ke na disumu yina ke nataka ve na lufwa.

18 Beto zaba ti muntu nyonso yina me butuka na Nzambi ke ve na kifu ya kusalaka disumu, kasi muntu yina me butuka na Nzambi* ke kengidilaka yandi, mpe muntu ya yimbi lenda sala yandi ata kima.* 19 Beto zaba ti beto me katuka na Nzambi, kasi yinza nyonso ke na lutumu ya muntu ya yimbi. 20 Kasi beto zaba ti Mwana ya Nzambi me kwiza mpe yandi me pesa beto mayela* samu beto zaba muntu yina ke ya tsyeleka. Mpe beto ke na bumosi na muntu yina ke ya tsyeleka, na nzila ya Mwana ya yandi Yesu Kristo. Yandi ke Nzambi ya tsyeleka mpe luzingu ya ntangu nyonso. 21 Bana ya fioti, beno kima biteki.