Wapi mutindu nge lenda pusana penepene na Nzambi?

1. Nzambi kekuwaka bisambulu nyonso?

Nzambi kena kubokila bantu ya makanda nyonso bapusana penepene na yandi na nzila ya lusambu. (Nkunga 65:2) Ata mutindu yina, yandi kekuwaka mpe kendimaka bisambu nyonso ve. Na kifuani, yandi kemangaka kuwa bisambu ya bakala yina kena tadisa nketo na yandi mpasi. (1 Piere 3:7) Mpe, ntangu Baisraele tatamanaka kusala mambu ya yimbi, Nzambi mangaka kuwa bisambu na bau. Yau melakisa mbotembote ti lusambulu kele diluaku ya mbote Nzambi mepesa beto. Kansi, yandi lenda kuwa ata bisambulu ya bantu yina mesala masumu ya nene kana bau mevilula ntima.​—Tanga Izaya 1:15; 55:7.

Tala video Nzambi ke wà kwandi balusambu nyonso?

2. Wapi mutindu beto fuana sambidila?

Lusambu kele mosi ya mambu metala nsambudulu ya beto; yau yina beto fuana sambila kaka Yehova, Mvangi na beto. (Matayi 4:10; 6:9) Katula yau, mutindu beto kele bantu ya kokondua kulunga, beto fuana sambila na nkumbu ya Yesu samu yandi kufuaka samu na masumu na beto. (Yoane 14:6) Yehova zola ve beto vutukilaka kaka bisambu yina beto mekangaka na yintu to yina bamesonikaka na papye. Yandi kezolaka bisambu na beto katuka na ntima.​—Tanga Matayi 6:7; Bafilipi 4:6, 7.

Mvangi ya beto lenda kuwa bisambu yina mesalama ata na yinsi ya ntima. (1 Samuele 1:12, 13) Yandi kelombaka beto sambila yandi ntangu nyonso, na kifuani ntangu beto mevumbuka, na suka, na mpipa, kana beto zola lala, na ntangu beto zola kudia, mpe ntangu beto mekutana na diambu ya mpasi.​—Tanga Nkunga 55:22; Matayi 15:36.

3. Samu na yinki baklisto kekutakanaka?

Kupusana penepene na Nzambi kele pete ve samu beto mevuanda na bantu yina kendimaka Nzambi ve mpe kevuezaka nsilulu yina yandi mepesa ya kutula kiyenge na ntoto. (2 Timote 3:1, 4; 2 Piere 3:3, 13) Yau yina beto fuana kutakanaka kintuadi na bampangi ya beto samu beto kindasana.​—Tanga Baebre 10:24, 25.

Kukutakana na bantu yina kezolaka Nzambi kesadisa beto beto pusana penepene na Nzambi. Balukutakanu ya Bambangi ya Yehova kevuandaka ntangu ya mbote ya kukindusua na kiminu ya bankaka.​—Tanga Baroma 1:11, 12.

4. Wapi mutindu nge lenda pusana penepene na Nzambi?

Nge lenda pusana penepene na Yehova kana nge kena kuyindula mambu yina nge kena kulonguka na Mpova na yandi. Yindula bisalu na yandi, malongi mpe bansilulu na yandi. Kusambila mpe kuyindula na mpinda lenda sadisa beto vutula matondo samu na luzolo mpe nduenga ya Nzambi.​—Tanga Yosua 1:8; Nkunga 1:1-3.

Nge lenda pusana penepene na Nzambi kaka kana nge metudila yandi ntima mpe nge mendimina yandi. Kiminu kele mutindu kima nyonso yina kelombaka badikisa yau. Nge lenda kudisa kiminu na nge na kufiongoninaka ntangu nyonso malongi yina nge kendiminaka.​—Tanga Matayi 4:4; Baebre 11:1, 6.

5. Wapi mambote nge kezua kana nge mepusana penepene na Nzambi?

Yehova kekengidilaka bantu yina kezolaka yandi. Yandi kekengidilaka bau na mambu nyonso yina lenda bebisa kiminu na bau mpe kivuvu na bau ya luzingu ya mvula na mvula. (Nkunga 91:1, 2, 7-10) Yandi kekebisaka beto na bikadulu yina lenda bebisa nzutu ya beto mpe kumanisa kiese na beto. Yehova kelongaka beto bikadulu yina kesadisaka beto na kuvuanda na luzingu ya mbote tsyeleka.​—Tanga Nkunga 73:27, 28; Zaki 4:4, 8.