Kimangu na Mubu ya Mbwaki

Kaka ntangu Faraoni kuwaka ti bantu ya Izraele me basika na Ezipte, yandi sobaka makanisi ya yandi na yina me tadila kubika ba kwenda. Yandi zonzaka na basoda ya yandi: ‘Beno bongisa bapusu-pusu ya munu nyonso ya mvita mpe beto landa bawu! Beto zolaka bika ve bawu ba kwenda.’ Yandi na basoda ya yandi bandaka kulanda bana ya Izraele.

Yehova vanda twadisa dikanda ya yandi na nzila ya dituti na kati ya kilumbu mpe ya tiya na mpimpa. Yandi nataka bawu tii na Mubu ya Mbwaki, mpe yandi zonzaka na bawu na kusala camp.

Na manima bana ya Izraele talaka Faraoni na basoda ya yandi vanda landa bawu. Bana ya Izraele kangamaka. Na mantwala ya bawu vandaka na mubu mpe na manima ya bawu basoda ya Ezipte. Ba dilaka na sika ya Moyize: ‘Ba ke kufwa beto! Nge zolaka bika kwandi beto na Ezipte.’ Kasi Moyize zonzaka: ‘Beno kuvanda ve na boma. Beno vingila mpe beno tala faso Yehova ke vuukisa beto.’ Moyize vandaka na kiminu ya ngolo na Yehova, faso yina ve?

Yehova zonzaka na bana ya Izraele na kukatula camp. Na mpimpa yina, Yehova tulaka dituti na kati-kati ya bantu ya Ezipte na bana ya Izraele. Kisika yina bantu ya Ezipte vandaka, vandaka mpimpa, kasi kisika yina bana ya Izraele vandaka, vandaka nsemo.

Yehova zonzaka na Moyize na kunanguna diboko ya yandi na zulu ya mubu. Mpe Yehova salaka ti mupepe ya ngolo sala mpimpa nyonso. Mubu kabukaka na bitini zole, mpe ya fungulaka nzila na kati-kati ya yawu. Ba millions ya bana ya Izraele tambulaka na zulu ya ntoto ya kuyuma na kati-kati ya bibaka zole ya maza tii na simu ya maza.

Basoda ya Faraoni landaka bana ya Izraele na kati-kati ya mubu. Kasi Yehova kotisaka mvwanzi na kati ya basoda. Makulu ya bapusu-pusu bandaka kukatuka. Basoda bandaka kuzonza na ndinga ya ngolo: ‘Beto basika awa! Yehova ke na nwanaka samu na bawu.’

Yehova zonzaka na Moyize: ‘Nanguna diboko ya nge na zulu ya mubu.’ Na mbala mosi bibaka ya maza bwidilaka basoda ya Ezipte. Faraoni na basoda ya yandi nyonso kufwaka. Ata muntu mosi ve na kati ya bawu vuukaka.

Na simu ya nkaka ya mubu, bana ya Izraele kembilaka Yehova na banzimbu: ‘Mu ke yimbila Yehova. Yandi me lakisa bunene ya yandi. Bampunda mpe ba yina ke nataka yawu, yandi me losa bawu na mubu.’ Ntangu bantu ke na yimbaka, bakento vanda bina mpe vanda bula ngoma ya fioti. Bantu nyonso vandaka na kilengi mingi samu ba basikaka na bungaamba.