Nsilulu ya Zefete

Bana ya Izraele bikaka dyaka Yehova mpe ba bandaka kusambila banzambi ya luvunu. Ntangu bantu ya Amoni kwizaka nwanisa bawu, banzambi ya luvunu yina salaka ata kima mosi ve samu na kusadisa bawu. Na kati ya bamvula mingi, bana ya Izraele talaka mpasi. Nsuka-nsuka ba zonzaka na Yehova: ‘Beto me sumuka. Mulemvo, vuukisa beto na maboko ya bambeni ya beto.’ Ba mwangisaka biteki ya banzambi ya luvunu mpe bandaka kusambila dyaka Yehova. Yehova vandaka ve na nsatu ba tatamana na kutala mpasi.

Ba soolaka soda mosi ya ngolo na nkumbu ya Zefete samu na kutwadisa dikanda na mvita na bantu ya Amoni. Zefete zonzaka na Yehova: ‘Mu me sala nge nsilulu, kana nge sadisa beto na kununga, ntangu mu ke vutuka na yinzo, mu ke pesa nge muntu ya ntete yina ke basika na kwiza bwabana munu.’ Yehova kuwaka lusambu ya Zefete mpe sadisaka yandi na kununga mvita.

Ntangu Zefete vutukaka na yinzo, muntu ya ntete yina basikaka na kukwiza bwabana yandi, vandaka mwana ya yandi kaka mosi ya kento. Yandi vanda bina mpe vanda bula ngoma. Yinki Zefete zolaka sala? Yandi bambukaka nsilulu yina yandi salaka na Yehova mpe zonzaka: ‘O ve mwana ya munu ya kento! Nge me lwalisa ntima ya munu. Mu salaka nsilulu na Yehova. Samu na kulungisa yawu, mu me fwana kufilisa nge na kwenda sala na tabernakle na Shilo.’ Mwana ya yandi vutulaka: ‘Tata, kana nge me sala nsilulu na Yehova nge me fwana kulungisa yawu. Nyonso yina mu ke lomba, ni kubika mu kwenda lutisa bangonda zole na zulu ya bamongo na bandiku ya munu ya bakento. Na manima mu ke kwenda.’ Mwana ya Zefete salaka na kukwikama nyonso na tabernakle luzingu ya yandi nyonso. Bamvula nyonso, bandiku ya yandi vanda kwendaka talaka yandi na Shilo.