Yonatani vandaka na bukindi mpe ya kukwikama

Mwana ya ntete ya mfumu Sawule, Yonatani, vandaka soda mosi ya bukindi. Davidi zonzaka ti Yonatani vandaka na mbangu kulutila aigle mpe ngolo kulutila nkosi. Kilumbu mosi Yonatani talaka basoda 20 ya Filistia na zulu ya mongo ya fioti. Yandi zonzaka na muntu yina vanda nataka kinwanunu ya yandi: ‘Beto ke kwenda nwanisa bawu kaka kana Yehova lakisa beto kidimbu. Kana bantu ya Filistia zonza na beto, beno kwiza na zulu awa, ya ke lakisa ti beto lenda kwenda nwanisa bawu.’ Bantu ya Filistia zonzaka na ndinga ya ngolo: ‘Beno kwiza na zulu awa mpe beto nwana!’ Na yawu, ba kwendaka na mongo mpe nungaka bawu.

Samu yandi vandaka mwana ya ntete ya Sawule, Yonatani zolaka kuma mfumu na manima ya yandi. Kasi Yonatani zabaka ti Yehova soolaka Davidi na kuvanda mfumu ya Izraele na manima ya Sawule, kasi yandi vandaka ve na kimbanda. Yonatani na Davidi kumaka na kindiku ya ngolo. Ba salaka nsilulu ya kubumba mpe ya kunwanina bampangi. Yonatani pesaka Davidi kinkuti ya yandi, mbele ya yandi ya yinda, munduki ya yandi ya madyonga mpe singa ya yandi yina ke kangaka luketo mutindu kidimbu samu na kindiku ya bawu.

Ntangu Davidi vanda kima Sawule, Yonatani kwendaka tala yandi mpe zonzaka: ‘Vanda ngolo mpe vanda na bukindi. Yehova me soola nge na kuvanda mfumu. Tata ya munu mpe zaba yawu.’ Nge ke kwandi na nsatu ya kuzwa ndiku ya mbote mutindu Yonatani?

Dyaka, bambala mingi Yonatani tulaka luzingu ya yandi na mpasi samu na kusadisa ndiku ya yandi. Yandi zabaka ti Sawule vanda sosa kufwa Davidi. Na yawu, yandi zonzaka na tata ya yandi: ‘Kufwa Davidi ke vanda disumu samu na nge. Yandi me sala ata kima ya yimbi.’ Sawule dasukilaka Yonatani. Mwa bamvula na manima, Sawule na Yonatani kufwaka na mvita.

Na manima ya lufwa ya Yonatani, Davidi sosaka mwana ya Yonatani, Mefibosheti. Ntangu Davidi talaka yandi, yandi zonzaka na yandi: ‘Samu tata ya nge vandaka ndiku ya mbote samu na munu, mu ke kipe nge luzingu ya nge nyonso. Nge ke zinga na yinzo ya munu mpe nge ke kudya na mesa ya munu.’ Davidi zimbanaka ata fioti ve ndiku ya yandi Yonatani.