Estere me vuukisa dikanda ya yandi

Estere vandaka ntwenya ya Zwife yina vanda zinga na Persia na mbanza ya Suze. Bamvula mingi na manima, Nebukadenezare katulaka dikanda ya Estere na Yeruzalemi. Estere kulaka na sika ya Mordekai, mpangi ya yandi yina vanda salaka na mfumu Asuerusi ya Persia.

Mfumu Asuerusi vanda sosa kukwela kento ya nkaka. Bisadi ya yandi natinaka yandi bana ya kento ya kitoko ya bwala nyonso, Estere mpe vandaka na kati. Ni yandi mfumu soolaka. Mordekai niminaka Estere na kuzonza ti yandi vandaka Zwife.

Amani vandaka bakala mosi ya lulendo. Yandi vandaka na zulu ya bamfumu ya fioti nyonso. Yandi vanda zolaka ti bantu nyonso fukama na mantwala ya yandi. Mordekai mangaka kusala yawu. Na yawu, Amani dasukaka mingi mpe yandi vanda sosa kufwa Mordekai. Ntangu Amani zabaka ti Mordekai vandaka Zwife, yandi bongisaka bamambu samu na kufwa Bazwife nyonso ya bwala. Yandi zonzaka na mfumu: ‘Bazwife ke bantu ya yimbi, nge me bonga kufwa bawu.’ Asuerusi vutulaka yandi: ‘Sala nyonso yina nge zola kusala,’ mpe yandi pesaka yandi muswa ya kutula musiku. Amani tulaka musiku yina vanda zonza na bantu na kufwa Bazwife nyonso na kilumbu ya 13 ya ngonda ya Adare. Yehova vanda tala mambu yayi.

Estere zabaka ve mambu yina vanda luta. Na yawu, Mordekai filisaka yandi mukanda yina vandaka na musiku yango mpe zonzaka na yandi: ‘Kwenda solola na mfumu.’ Estere zonzaka: ‘Muntu nyonso yina ke kwendaka na mfumu kana mfumu me bokila ve yandi, ba ke kufwa yandi. Ya me sala bilumbu 30 yina mfumu me bokila ve munu! Kasi mu ke kwenda kaka. Kana yandi nanguna yinti ya yandi ya bumfumu mu ke vuuka.’ Kana ve, ba ke kufwa munu.’

Estere kwendaka na lupangu ya mfumu. Ntangu mfumu talaka yandi, yandi nangunaka yinti ya yandi ya bumfumu. Yandi kwendaka pene-pene ya mfumu, mpe mfumu yufulaka yandi: ‘Yinki mu lenda sala samu na nge, Estere?’ Yandi vutulaka: ‘Mu ke na nsatu ya kubokila nge na Amani na feti yina mu ke na sosaka kusala.’ Na feti yango, Estere zonzaka na bawu na kukwiza dyaka na feti ya nkaka yina yandi ke sala. Na feti ya zole yina, mfumu yufulaka dyaka na Estere: ‘Yinki mu lenda sala samu na nge?’ Estere zonzaka: ‘Ya ke na muntu ke na sosaka kufwa munu na bantu ya munu. Mulemvo vuukisa beto.’ Mfumu yufulaka: ‘Nani ke na sosaka kufwa nge?’ Yandi zonzaka: ‘Ni Amani bakala ya ntima ya yimbi yayi.’ Asuerusi dasukaka mingi mpe na mbala mosi yandi lombaka ba kufwa Amani.

Kasi ata muntu vandaka na luve ya kukatula musiku yina Amani tulaka; ata mfumu mpe vandaka ve na luve ya kusala yawu. Na yawu, mfumu tulaka Mordekai na zulu ya bamfumu ya fioti mpe pesaka yandi luve ya kutula musiku ya malu-malu. Mordekai tulaka musiku yina vanda pesa Bazwife nzila ya kunwanina banzutu ya bawu. Na kilumbu ya 13 ya ngonda ya Adare, Bazwife nungaka bambeni ya bawu. Banda kilumbu yina, Bazwife vanda salaka mukembo konso mvula samu na kubambuka kilumbu yina ba nungaka bambeni ya bawu.