Bibaka ya Yeruzalemi

Beto vutuka mwa bamvula na manima. Nehemi vanda salaka na mfumu Artazeresesi. Yandi vandaka muntu ya Izraele mpe yandi vanda zinga na Persia na mbanza ya Suze. Mpangi ya Nehemi katukaka na Yuda na nsangu ya yimbi yayi: ‘Bantu yina vutukaka na Yeruzalemi ke ve na zingaka na kizunu. Nabunu ba tunga dyaka bibaka ya mbanza mpe bamwelo yina bantu ya Babiloni mwangisaka.’ Ya salaka Nehemi mpasi mingi. Yandi vandaka na nsatu ya kwenda sadisa na Yeruzalemi. Na yawu yandi sambilaka Nzambi samu mfumu pesa yandi nzila ya kukwenda.

Na manima, mfumu talaka ti Nehemi vandaka na mawa. Yandi zonzaka: ‘Nabunu mu tala nge faso yayi. Yinki kaka?’ Nehemi zonzaka: ‘Mbanza ya munu Yeruzalemi kele ya kumwangana. Wa’ faso mu ke vanda ve na mawa?’ Mfumu zonzaka na yandi: ‘Yinki nge zola mu sala samu na nge?’ Na mbala mosi, Nehemi sambilaka na yisi ya ntima. Na manima yandi zonzaka: ‘Mulemvo, bika mu vutuka na Yeruzalemi samu na kutunga dyaka bibaka ya yawu.’ Mfumu Artazeresesi bikaka Nehemi kwenda, mpe yandi salaka nyonso samu ti nzyetolo ya Nehemi luta na faso ya mbote. Yandi tulaka mpe Nehemi mfumu ya kizunga ya Yuda, mpe yandi pesaka yandi mabaya samu na kuyidika bamwelo ya mbanza.

Ntangu Nehemi kumaka na Yeruzalemi, yandi bandaka kutala mbote-mbote bibaka ya mbanza. Na manima, yandi vukisaka bamfumu na banganga-nzambi mpe yandi zonzaka na bawu: ‘Ya ke mambu ya mpasi. Beto me bonga kubanda kisalu.’ Bantu ndimaka mpe ba bandaka kutunga dyaka bibaka.

Kasi bambeni ya nkaka ya Izraele vanda sombola bawu na kuzonzaka: ‘Ata mubaku ke bwisa bibaka yina beno ke na tungaka.’ Ba yina vanda sala vanda kipe ve bawu, ba vanda tatamana na kutunga. Bibaka yango vanda kuma kaka yinda mpe ngolo.

Bambeni ya bawu bakaka mukanu ya kukatuka na bisika mingi samu na kwiza nwanisa Yeruzalemi na ntangu yina ba vanda vingila ve. Ntangu Bazwife kuwaka yawu, ba kumaka na boma. Kasi Nehemi zonzaka na bawu: ‘Beno kuvanda ve na boma. Yehova ke na beto.’ Yandi tulaka bakengidi samu na kubumba ba yina vanda sala, mpe bambeni lendaka ve kunwanisa bawu.

Kaka na bilumbu 52 ba manisaka kutunga bibaka mpe bamwelo. Nehemi nataka Balevi nyonso samu na kusala mukembo yina vanda lakisa ti ba me manisa kutunga bibaka. Yandi kabulaka bawu na bikunku zole samu na kuyimba. Ba sadilaka baeskalye yina vandaka na mwelo ya mukelo (source) samu na kukwenda na zulu ya bibaka. Ba kabukaka na bikunku zole, ba ya nkaka kwendaka na diboko ya kento mpe ba ya nkaka na diboko ya bakala na kuzungaka mbanza. Ba vanda bula bampungi, ba vanda bula manzanza, ba vanda bula gitare mpe vanda yimba samu na Yehova. Esdrase kwendaka na kikunku mosi mpe Nehemi kwendaka na kikunku ya nkaka tii ntangu ba vukanaka na tempelo. Bantu nyonso, babakala, bakento, mpe bana pesaka minkayulu na Yehova mpe salaka mukembo. Makelele ya bawu ya kilengi vanda wakana na bisika ya ntama.