Elizabeti kuzwaka mwana

Bamvula 400 lutaka na manima ya kutunga dyaka bibaka ya Yeruzalemi. Nganga-nzambi mosi na nkumbu ya Zakari na kento ya yandi Elizabeti, vanda zingaka pene-pene ya Yeruzalemi. Ba vandaka ya kukwelana na kati ya bamvula mingi, kasi ba vandaka ve na mwana. Kilumbu mosi, mbazi Gabriele basikilaka Zakari ntangu yandi vanda yoka ansan na kisika ya santu ya tempelo. Zakari vandaka na boma mingi, kasi Gabriele zonzaka na yandi: ‘Kuvanda ve na boma. Mu me natina nge nsangu ya mbote yina me katuka na Yehova. Kento ya nge, Elizabeti ke buta mwana ya bakala mpe nkumbu ya yandi ke vanda Yoane. Yehova me soola Yoane samu na kisalu mosi ya mfunu.’ Zakari zonzaka: ‘Wa’ faso mu lenda kwikila na mambu yina nge ke na zonzaka? Beto me kuma biboba, beto lenda buta dyaka ve.’ Gabriele zonzaka: ‘Ni Nzambi muntu me filisa munu samu na kupesa nge nsangu yayi. Kasi samu nge me kwikila ve na munu, nge ke kuma dibaba tii ntangu mwana ke butuka.’

Zakari lutisaka ntangu mingi na kisika ya santu. Na yawu ntangu yandi basikaka, bantu yina vanda vingila na ngaanda vandaka na nsatu ya kuzaba yinki salamaka. Kasi Zakari vanda lenda dyaka ve kuzonza. Yandi vanda sala kaka bidimbu na maboko. Na manima, bantu kwizaka zaba ti Zakari kuzwaka nsangu yina katukaka na Nzambi.

Na manima, Elizabeti kuzwaka kivumu mpe butaka mwana ya bakala kaka mutindu mbazi zonzaka. Bandiku ya Elizabeti mpe bantu ya dikanda kwizaka tala mwana. Ba vandaka na kilengi mingi samu na yandi. Elizabeti zonzaka: ‘Nkumbu ya yandi ke vanda Yoane.’ Ba zonzaka na yandi: ‘Ya ke ve na muntu na dikanda ya nge yina ke na nkumbu ya Yoane. Pesa yandi nkumbu ya tata ya yandi Zakari.’ Kasi Zakari sonikaka na dibaya: ‘Nkumbu ya yandi Yoane.’ Kaka na ntangu yina, ndinga ya Zakari fungukaka! Nsangu ya mwana mwanganaka na bwala nyonso ya Zude, mpe bantu vanda yufula: ‘Mwana yayi ke vanda nani ntangu yandi ke kula?’

Na manima Zakari kumaka ya kufuluka na mpeve ya santu. Yandi bikulaka: ‘Bika Yehova kuzwa nkembo. Yandi pesaka nsilulu na Abrahami ti yandi ke filisa muvuukisi, Masiya, samu na kuvuukisa beto. Yoane ke vanda mbikudi, mpe yandi ke bongisa nzila samu na Masiya.’

Mambu ya nkaka ya ngitukulu salamaka na kento mosi ya dikanda ya Elizabeti na nkumbu ya Maria. Beto ke zonzila yawu na disolo yina ke landa.