Ntangu Yesu vandaka ntwenya

Yozefi na Maria mpe Yesu na bana ya bawu ya nkaka ya bakento na ya babakala vanda zingaka na Nazareti. Yozefi vanda lungisaka bansatu ya dikanda ya yandi na kusalaka mutindu kisadi-mabaya, mpe yandi vanda longaka bawu na kuzaba Yehova mpe Musiku ya yandi. Ba vanda kwendaka ntangu nyonso na sinagoge samu na kusambila. Ba vanda kwendaka mpe na Yeruzalemi bamvula nyonso samu na mukembo ya Pake.

Ntangu Yesu vandaka na bamvula 12, dikanda ya yandi salaka nzyetolo ya yinda na Yeruzalemi mutindu ba vandaka na kifu ya kusalaka yawu. Mbanza vandaka ya kufuluka na bantu yina kwizaka samu na mukembo ya Pake. Na manima, Yozefi na Maria bandaka kusala nzyetolo samu na kuvutuka na yinzo ya bawu. Ba vanda kanisa ti Yesu vandaka kintwadi na bawu. Kasi ntangu ba bandaka kusosa yandi na kati ya dikanda ya bawu, ba talaka ve yandi.

Ba vutukaka na Yeruzalemi, mpe na kati ya bilumbu tatu, ba sosaka mwana ya bawu. Na manima, ba kwendaka na tempelo. Ni kuna Yesu vandaka. Yandi vandaka ya kuvanda na kati-kati ya milongisi. Yandi vanda kuwa bawu mbote-mbote mpe vanda yufula bawu byuvu ya mbote. Yesu kamwisaka mingi milongisi yayi. Na yawu, ba bandaka kuyufula yandi byuvu mingi. Bamvutu ya Yesu vanda kamwisa bawu mingi samu ti yandi vanda bakula mbote Musiku ya Yehova.

Yozefi na Maria vandaka na boma mingi. Maria zonzaka: ‘Mwana ya munu, beto me sosa nge bisika nyonso! Wapi kisika nge vandaka?’ Yesu vutulaka: ‘Beno me zaba ve ti mu me fwana kuvanda awa na yinzo ya Tata ya munu?’

Yesu vutukaka na bibuti ya yandi na Nazareti. Yozefi lakisaka Yesu kisalu ya mabaya. Wapi mutindu ya muntu nge me kanisa ti Yesu vandaka na buntwenya ya yandi? Ntangu Yesu vanda kula, ndwenga ya yandi vanda kuma dyaka ya kulutila. Nzambi mpe bantu vanda sepela na yandi.