Yesu ke na samunaka nsangu ya Kimfumu

Ntangu fioti na manima ya mbotokolo ya yandi, Yesu bandaka kusamuna: ‘Kimfumu ya Nzambi me kuma pene-pene.’ Bilandi ya yandi vanda landa yandi ntangu yandi vanda sala banzyetolo na Galile mpe na Zude. Ntangu Yesu vutukaka na bwala ya yandi na Nazareti, yandi kwendaka na sinagoge, yandi fungulaka rulo ya Izayi mpe tangaka yawu na ndinga ya ngolo: ‘Yehova me pesa munu mpeve ya santu samu mu samuna nsangu ya mbote.’ Yinki ya zola zonza? Ata ti bantu vanda sosa kutala Yesu kusala bimangu, mambu ya ntete yina salaka ti yandi kuzwa mpeve ya santu vandaka ni na kusamuna nsangu ya mbote. Na manima, yandi zonzaka na bantu yina vanda kuwa yandi: ‘Bubu yayi mbikudu u yayi me lungana.’

Na manima, Yesu kwendaka na Mubu ya Galile, kisika yina yandi kutanaka na bilandi ya yandi yiya, yina vandaka bilobi-mbisi. Yandi bokilaka bawu mpe zonzaka: ‘Beno kwiza na munu, mpe mu ke kumisa beno bantu yina ke lobaka bantu.’ Ya vandaka Piere, Andre, Zaki, mpe Yoane. Na mbala mosi ba bikaka kisalu ya bawu ya kuloba bambisi mpe ba landaka yandi. Ba tambulaka na Galile nyonso mpe ba vanda samuna Kimfumu ya Yehova. Ba vanda samuna na basinagoge, na bazandu, mpe na banzila. Kimvuka ya nene ya bantu vanda landa bawu kisika nyonso yina ba vanda kwenda. Nsangu ya Yesu mwanganaka bisika nyonso, ata tii na Siri.

Na manima, Yesu pesaka bilandi ya yandi ya nkaka makoki ya kubelusa bantu mpe ya kubingisa bampeve ya yimbi. Ba ya nkaka kwendaka na yandi ntangu yandi vanda samuna mbanza na mbanza mpe bwala na bwala. Bakento ya nkaka ya kukwikama, mutindu Maria ya Magdala, Yoana, Suzana, mpe ba ya nkaka, vanda kipeke Yesu mpe bilandi ya yandi.

Na manima ya kulonga bilandi ya yandi, Yesu filisaka bawu na kwenda samuna. Ntangu ba vanda tambula na kati ya Galile nyonso, bantu mingi kumaka bilandi mpe kuzwaka mbotokolo. Bantu mingi vanda sosa kukuma bilandi. Na yawu, Yesu fwanisaka bawu na bilanga yina bambuma ya yawu me yela. Yandi zonzaka: ‘Beno sambila Yehova samu yandi filisa bisadi mingi na kisalu ya kubuka bambuma.’ Na manima, yandi soolaka bantu 70 na kati ya bilandi ya yandi mpe yandi filisaka bawu zole-zole na kukwenda samuna na bwala nyonso ya Zude. Ba longaka nsangu ya Kimfumu na bantu ya mutindu nyonso. Ntangu bilandi vutukaka, ba vandaka na nsatu ya ngolo ya kuzonza na Yesu mambu yina salamaka. Dyabulu vandaka ve na kima ya kusala samu na kukanga kisalu ya kusamuna.

Yesu yidikaka bamambu samu bilandi ya yandi tatamana na kisalu yayi ya mfunu ata ntangu yandi ke vutuka na zulu. Yandi zonzaka na bawu: ‘Beno samuna nsangu ya mbote na ntoto nyonso, beno longa bantu Dyambu ya Nzambi mpe beno pesa bawu mbotokolo.’