Yesu me soola bantumwa 12

Na manima ya kulutisa mvula mosi na ndambu na kisalu ya kusamuna, Yesu vandaka na mukanu mosi ya mfunu ya kubaka. Banani yandi ke soola samu ba sala kintwadi na yandi? Banani yandi ke longa samu ba twadisa kimvuka ya bakristo? Samu na kubaka mukanu yayi, Yesu vandaka na nsatu Yehova twadisa yandi. Na yawu, yandi kwendaka na mongo kisika yandi lenda vanda yandi mosi, mpe yandi sambilaka mpimpa nyonso. Na suka, Yesu bokilaka bilandi ya yandi ya nkaka mpe yandi soolaka bantumwa 12 na kati ya bawu. Bankumbu ya banani nge ke na zabaka dyaka? Ya vandaka Piere, Andre, Zaki, Yoane, Filipe, Bartelemi, Toma, Matayi, Zaki mwana ya Alfe, Tade, Simoni, mpe Yuda Iskayote.

Bawu nyonso 12 vanda sala banzyetolo kintwadi na Yesu. Na manima ya kulonga bawu, Yesu filisaka bawu na kwenda samuna. Yehova pesaka bawu makoki ya kubingisa bampeve ya yimbi mpe ya kubelusa bambevo.

Yesu bokilaka bantumwa 12 yayi bandiku ya yandi, mpe yandi vanda tulaka bawu ntima. Bafarize vanda kanisaka ti bantumwa vandaka bantu yina kuzwaka ve malongi mpe bantu ya mpamba. Kasi Yesu longaka bawu samu ba lenda kusala kisalu ya bawu. Ba vandaka na Yesu na bantangu ya mfunu mingi ya luzingu ya yandi. Na kifwani, tekila Yesu kufwa mpe na manima ya kuvumbuka ya yandi na lufwa. Mutindu Yesu, mingi ya bantumwa 12 yayi vandaka bantu ya Galile. Ba ya nkaka na kati ya bawu vandaka ya kukwela.

Bantumwa vandaka mpe bantu ya masumu yina vanda salaka bafoti. Bantangu ya nkaka ba vanda zonzaka tekila ba kanisa, ba vanda bakaka mikanu ya yimbi, ba lakisaka ve ntima ya yinda, mpe ba vanda sosaka kuzaba nani ke mfunu kulutila bampangi. Kasi ba vandaka bantu ya mbote yina vanda zolaka Yehova. Ni bawu zolaka vanda fondasio ya kimvuka ya bakristo ntangu Yesu zolaka vutuka na zulu.