Kulongoka balumingu nyonso

Ya ke kwandi mpasi na nge kulongoka Biblia balumingu nyonso? To, nge ke kuzwaka ve kilengi ya kulongoka Biblia? Beto nyonso bantangu ya nkaka ya ke kuminaka beto. Kasi, nge lenda kanisa na bamambu yina beto ke salaka bilumbu nyonso, mutindu kuyobila. Kuyobila ke lombaka ntangu mpe bangolo, ata faso yina beto ke salaka yawu samu ti na manima, ya ke pesaka dyaka nzutu ngolo. Mutindu mosi mpe “maza ya dyambu ya Nzambi,” yina ke Biblia ke ‘sukulaka’ beto ntangu beto ke longokaka yawu. Na yawu, beto ke kuzwaka ngolo. (Ef. 5:26, NWT) Beto tala mwa bamambu yina lenda sadisa nge:

• Sala programme. Kulongoka ya Biblia ke mosi “ya bamambu ya kulutila mfunu” yina mukristo me fwana kusala. (Flp. 1:10, NWT) Samu na kulanda mbote-mbote programme ya nge, ya ke vanda kwandi mbote na kutula yawu kisika yina ya ke vanda ve mpasi na nge na kutala yawu? To nge lenda sala alarme na telefone ya nge samu ya bambula nge ntangu yina nge soolaka samu na kulongoka ya nge.

• Soola ntangu mpe faso nge ke longoka. Wa’ faso nge ke zolaka kulongoka? Yinki ke sadisa nge na kuzunisa makanisi ya nge ntangu nge ke longokaka? Kulutisa ngunga mosi na kulongoka to kusala yawu ndambu-ndambu? Nge me bonga kuzaba wapi yina ke ntangu ya mbote samu na nge. Na yawu, bongisa bamambu samu na kulongoka ya nge mpe kuzimbana ve yawu. Mpe ata ti nge baka kaka baminiti 10, nge lenda zaba bamambu mingi. Ntangu nge ke banda, nge ke vanda na kilengi ya kubika ve.—Flp. 2:13.

• Tekila nge longoka, kanisa na yina nge ke longoka. Kana nge me vingila tii ntangu ya nge ya kulongoka samu na kusosa yinki nge ke longoka, ya lenda vanda ti, nge ke sadila ve “mbote-mbote ntangu” ya nge. (Ef. 5:16) Nge lenda sala kwandi liste ya bamambu yina nge zola kulongoka? Kana nge ke na kyuvu na mambu yina nge ke na bakulaka ve mbote-mbote, nge lenda bwela yawu na liste yango. Na nsuka ya konso kulongoka, nge lenda bwela mwa makanisi ya nkaka yina nge zola kulongoka na liste yango.

• Kana nge ke na nsatu ya kusala bansobolo, sala yawu. Mambu ya mfunu ke ti nge me lunga kulongoka konso kilumbu. Samu na kulenda kusala yawu, nge me lunga kubongisa ntangu nge ke longoka, bantangu nge ke lutisa mpe bamambu nge ke longoka. Kasi ni yawu ve ke mambu ya kulutila mfunu na kusala. Mambu ya kulutila mfunu ke ni kusala yawu balumingu nyonso.

Kana beto longoka balumingu nyonso, bamambu ya mbote ke kumina beto. Beto ke kuma pene-pene ya Yehova, ke sala bamambu na ndwenga nyonso mpe beto ke vanda na ngolo.—Yos. 1:8.