Mutindu ya kubambuka baverse ya Biblia

Ya ke kwandi mpasi na nge na kubambuka baverse ya Biblia yina simbaka ntima ya nge? Ya lenda vanda mambu mosi yina pesaka nge ngolo, yina sadisaka nge na kunwana na makanisi ya yimbi, to yina nge ke na nsatu ya kukabula na muntu. (Nku. 119:11, 111) Awa beto zonzila mwa bamambu yina lenda sadisa nge na kubambuka baverse ya Biblia.

• Na JW Library^® sadila kisika yina nge ke bumbaka bamambu ya kulongoka ya nge mosi. Na kisika yina, bwela kitini yina nge ke bokila “Baverse yina me simba ntima ya munu.” Kuna, nge lenda bumba baverse yina nge zola kubambuka na yawu.

• Tula baverse yango na kisika yina nge lenda tala yawu. Sonika na mukanda verse yina nge zola kubambuka, mpe tula mukanda yango na kisika yina nge lenda tala yawu bambala mingi. Ya lenda vanda na kitala-tala, na frigo, to nge lenda baka foto ya yawu mpe kutula yawu mutindu kima ya ntete yina ke basikaka ntangu nge ke fungulaka telefone to ordinateur ya nge.

• Sadila mwa mukanda ya fioti. Sonika verse yango na lweka mosi ya mukanda, mpe na lweka ya nkaka, nge lenda sonika bamambu yina ke na kati ya verse. Nge lenda tanga verse mpe na manima kusosa kubambuka bamambu yina ke na kati ya yawu, to nge lenda tanga bamambu yina ke na kati ya verse mpe na manima, kumeka kubambuka ya ke na wapi buku, kikapu mpe verse.