Yinki kesalamaka na biro ya filiale?

Bampangi ya Betele kepesaka maboko na badepartema mutindu na mutindu, mpe kisalu ya bau kesimbaka kisalu ya kusamuna na buala mosi to mingi. Balenda sala na baekipi ya kubangula mikanda, kubasisa bazulunale na masini, kukubika mikanda, kutinda mikanda na bisika ya nkaka, kubasisa ba CD to bavideo, to kusala mambu ya nkaka.

Komite ya filiale ketuadisaka kisalu. Kimvuka ya Bantuadisi ketulaka Komite ya filiale yina kele na bakuluntu tatu to kuluta, yina mefuanana, samu batuadisa biro ya filiale. Bampangi yango kezabisaka Kimvuka ya Bantuadisi mutindu mambu kena kutambudila mpe mambu ya mpasi nyonso yina kebasikaka na buala yina bau kena kutuadisila kisalu. Yau kesadisaka Kimvuka ya Bantuadisi basola mambu yina bau ketubila na mikanda yina kebasika mpe na balukutakanu ya kimvuka mpe na balukutakanu ya nene. Mbala na mbala, Kimvuka ya Bantuadisi kefidisaka bantalani na yau samu na kutala babiro ya filiale mpe kupesa bampangi ya bakomite ya filiale malongi samu na kulungisa biyekua na bau. (Bingana 11:14) Na lukutakanu mosi ya nene, ntalani yango kepesaka diskur samu na kukindisa bampangi ya yinsi yina.

Yau kesadisaka bimvuka ya yinsi yango. Bampangi ya babakala ya nkaka na biro ya filiale kele na kiyekua ya kundima ti bimvuka ya malumalu zibuka mpe bau ketadilaka kusolama ya bakuluntu na basadisi na kisalu. Yakele diaka na bampangi yina ketadilaka kisalu ya bampasudi-nzila, ya bamisionere, ya bankengidi batambudi yina kena sala na terituare ya filiale yango. Bakekubikaka balukutakanu ya fioti mpe ya nene, baketuadisaka bisalu ya kutunga Bayinzo ya Kimfumu ya malumalu, mpe bau kesalaka nyonso samu mikanda kumina bimvuka na kulanda bansatu na bau. Nyonso yina kesalamaka na biro ya filiale kele samu kisalu ya kusamuna salama na kudedama.​—1 Bakorinto 14:33, 40.

• Wapi mutindu Komite ya filiale kesadisaka Kimvuka ya Bantuadisi?

• Wapi mambu kesalamaka na biro ya filiale?