KILESO 24

Wapi kekatukaka mbongo samu na kisalu ya beto na yinza ya mvimba?

Muntu mosi kena kutula makabu na luzolo ya yandi mosi

Ba Mbangi ya Yehova na kati ya kisalu ya kusamuna — Népal

Bantu me kukipesama na kutunga Yinzo ya Kimfumu ya Togo — Togo

Bantu yina kukipesamaka na kusala na Biro ya Grande-Bretagne — Grande-Bretagne

Mvula na mvula, nkubukulu ya beto kebasisaka bamilio ya Bablia na mikanda ya nkaka, mpe beto kekabulaka yau ofele. Beto ketungaka Bayinzo ya Kimfumu, babiro ya filiale, mpe beto kekengidilaka yau. Beto kesadisaka mafunda ya bampangi ya dibuta ya Betele na bamisionere, mpe beto kesadisaka bantu na ntangu ya mambu ya mpasi. Ntembe kele ve, nge lenda kuyuvusa: ‘Wapi kekatukaka mbongo nyonso yina?’

Beto kelombaka dime ve, mpe beto kesalaka bansisani ve. Ata ti kisalu ya beto ya kusamuna nsangu ya mbote kelombaka mbongo mingi, beto kelombaka bantu mbongo ve. Yameluta bamvula nkama mosi, nimero ya zole ya zulunale Nzozulu ya Nkengi tubaka ti beto mendima ti Yehova muntu kena sadisa beto, mpe ti beto “lenda ve kulomba to kusosa mbongo na bantu samu na kusadisa beto,” mpe beto melombaka mbongo ata kilumbu mosi ve!—Matayi 10:8.

Kisalu ya beto mesimbama na makabu yina bantu kepesaka na luzolo ya bau mosi. Bantu mingi ketalaka kilengi na kisalu na beto ya kulonga Biblia, mpe bakepesaka makabu samu na yau. Bambangi bau mosi mpe ketalaka kilengi na kupesa na kiese ntangu na bau, ngolo na bau, mbongo na bau mpe bima na bau ya nkaka samu luzolo ya Nzambi salama na ntoto ya mvimba. (1 Bansangu 29:9) Na Yinzo ya Kimfumu, beto kele na bakesi ya makabu kisika yina bantu yina zola tula makabu lenda tula yau. To makabu lenda salama na site ya beto, jw.org. Mbongo mingi kekatukaka na bantu kena mbongo mingi ve, bayina mefuanana na nkento yina ya mputu mefuilaka bakala, yina Yesu kumisaka samu yandi tulaka mbongo ya bisengo zole na kesi ya makabu na tempelo. (Luke 21:1-4) Yau yina, muntu na muntu lenda “katula ndambu ya mbongo na yandi” samu na kupesa “mutindu yandi [mekanisa] kupesa.”—1 Bakorinto 16:2; 2 Bakorinto 9:7.

Beto mendima ti Yehova ketatamana kusimba bantima ya bayina mezola kukumisa yandi na ‘bima na bau ya mfunu’ samu na kupesa maboko na kisalu ya Kimfumu, samu luzolo na yandi lungama.—Bingana 3:9.

Yinki kesuasikisaka nkubukulu ya beto na mabundu ya nkaka?
Wapi mutindu mbongo ya makabu kesadiluaka?