KILESO 27

Wapi mutindu biblioteke ya Yinzo ya Kimfumu kesadisaka beto?

Muntu mosi ke na sadila Bibliothèque ya Yinzo ya Kimfumu — Israël

Mbangi ya Yehova mosi kena sadisa ntuenia mosi na kusosasosa — République tchèque

Ntwenia mosi ya kento ke na sonika kumbu ya yandi na buku ya ba nzimbu — Bénin

Bakala mosi ke na sadila kisalulu Watchtower Library samu na kusosa — Îles Caïmans

Nge kesepela kusosasosa samu na kubuela nzayilu na nge ya Biblia? Nge kele na nsatu ya kubakula verse mosi ya Biblia, to kuzaba muntu mosi to kisika mosi yina Biblia metubila? To nge mekukiyuvusaka kana Mpova ya Nzambi lenda sadisa nge na diambu mosi yina kena kutungisa nge? Kana yau kele mutindu yina, kuenda sosa na biblioteke ya Yinzo ya Kimfumu.

Yau kele na mikanda mpe bima ya nkaka samu na kusosasosa. Ntembe ve, nge kele ve na mikanda nyonso ya Bambangi ya Yehova yina ketubilaka Biblia, yina mebasikaka na ndinga ya nge. Kansi na biblioteke ya Yinzo ya Kimfumu, yakele na mikanda mingi yina mekatuka kubasika. Yau lenda vuanda na bambangudulu ya nkaka ya Biblia, diksionere mosi ya mbote, mpe mikanda ya nkaka samu na kusosasosa. Nge lenda sadila bima nyonso yina kele na biblioteke tekila mpe na manima ya lukutakanu. Kana ordinatere kele, yau lenda vuanda na Watchtower Library. Yau kele biblioteke ya elektroniki yina kele na mikanda na beto mingi mpe yina kele pete samu na kusosasosa diambu, mpova to verse mosi.

Bana ya Lukolo ke sadilaka yawu na lukutakanu ya Luzingu mpe Kisalu. Nge lenda sadila mikanda ya biblioteke ya Yinzo ya Kimfumu ntangu nge kena bongisa masolo ya nge. Nkengidi ya lukutakanu ya Luzingu mpe Kisalu kele na kiyekua ya biblioteke yango. Yandi kele diaka na kiyekua ya kubuela mikanda nyonso mekatuka basika mpe kutula mikanda na mulongo. Yandi to mpangi yina kelongukaka na nge Biblia balenda lakisa nge muntindu nge lenda tala diambu nge kena kusosa. Kansi, muntu mosi ve fuana baka mukanda ya biblioteke ya Yinzo ya Kimfutu mpe kunata yau. Beto fuana kusadila mikanda yango na mayele mpe kusonika na kati ve.

Biblia metuba ti samu na kubaka ‘mbotembote nzayilu ya Nzambi,’ beto fuana sosasosa mutindu ‘bima ya mfunu yina mesuekama.’ (Bingana 2:1-5) Biblioteke ya Yinzo ya Kimfumu lenda sadisa nge samu nge banda kusosa nzayilu yango.

Na Yinzo ya Kimfumu, wapi bima lenda sadisa samu na kusosasosa?
Nani lenda sadisa nge samu nge zaba kusadila biblioteke mbote?