Nzambi yandi kele nani?

1. Samu na yinki beto fuana sambila Nzambi?

Nzambi ya kedika kele Mvangi ya bima nyonso. Yandi kele na mbandukulu ve, mpe yandi kele na nsuka ve. (Nkunga 90:2) Bansangu ya mbote yina kele na Biblia mekatuka na yandi. (1 Timote 1:11) Mutindu yandi pesaka beto luzingu, kaka yandi beto fuana sambila.​—Tanga Luzabusu 4:11.

2. Wapi mutindu Nzambi kele?

Ata muntu mosi ve metalaka Nzambi, samu yandi kele Mpeve. Yau melakisa ti yandi kele na mutindu ya luzingu yina meluta na ntama luzingu ya bivangu yayi kele na ntoto. (Yoane 1:18; 4:24) Ata mutindu yina, beto lenda tala bikadulu na yandi na nzila ya bima yina yandi mesalaka. Na kifuani, bambuma na bifulu mutindu na mutindu kelakisaka ti Nzambi kele luzolo, mpe yandi kele na nduenga. Bunene ya luyalanganu kelakisaka beto ngolo na yandi.​—Tanga Baroma 1:20.

Beto lenda mpe kulonguka mambu mingi yina metala bikadulu ya Nzambi ntangu beto kena kutanga Biblia. Na kifuani, yau ketubilaka beto yina Nzambi kezolaka mpe yina yandi kemangaka, mutindu yandi kesadilaka bantu mambu mpe mutindu yandi ketalaka kana beto mesala diambu mosi.​—Tanga Nkunga 103:7-10.

3. Nzambi kele na nkumbu?

Yesu tubaka: “Tata na beto kele na zulu, nkumbu na nge vuanda santu.” (Matayi 6:9, NW) Ata ti Nzambi kele na batitre mingi, kansi yandi kele na nkumbu mosi kaka. Nkumbu yango kebokuduluaka muntindu mosi ve na bandinga mutindu na mutindu. Na Kituba, yau kebokuduluaka mbala mingi “Yehova,” mpe bayankaka kebokidilaka yau “Yave.”​—Tanga Nkunga 83:18.

Babiblia mingi mekatulaka nkumbu ya Nzambi mpe na kisika na yau, bametulaka batitre mutindu Mfumu to Nzambi. Kansi ntangu Biblia sonamaka, nkumbu ya Nzambi vuandaka mbala kana 7 000. Yesu lakisaka bantu nkumbu yango ntangu yandi vuandaka longa bau mambu ya Nzambi.​—Tanga Yoane 17:26, NW.

Tala video Nzambi ke na nkumbu?

4. Yehova kekipeke beto?

Mutindu bantu mingi kena kutala mpasi, yau zola tuba ti Nzambi kekipeke beto ve? Bantu ya nkaka ketubaka ti Nzambi kebikaka beto beto tala mpasi samu na kumeka kiminu na beto, kansi, yau kele diambu ya kedika ve.​—Tanga Yobi 1:13.

Mutindu Nzambi mepesaka beto kimpuanza ya kusola, yau melakisa ti yandi kepesaka beto buzitu. Beto kesepelaka ve na kimpuanza yayi beto kele na yau ya kusola kusadila yandi? (Yosua 24:15) Kansi bantu mingi kesolaka kusadila bayankaka yimbi, yau yina bampasi mefuluka. Yehova ketalaka mpasi na ntima ntangu yandi ketalaka kukondua ludede ya mutindu yina.​—Tanga Kubanda 6:5, 6.

Yehova kele Nzambi yina kekipeke beto. Yandi kezolaka beto yangalala na luzingu. Yau mebikana kaka fioti yandi kekatula mpasi nyonso na bantu yina kebasisaka yau. Kansi na kilumbu yayi, Nzambi kele na mfunu yina yandi mebika bampasi samu na mua ntangu. Beto kezaba mfunu yango na dilongi 8.​—Tanga 2 Piere 2:9; 3:7, 13.

5. Wapi mutindu beto lenda pusana penepene na Nzambi?

Yehova kena kulomba beto beto pusana penepene na yandi na nzila ya lusambulu. Yandi kekipeke mosimosi na beto. (Nkunga 65:2; 145:18) Yandi kendimaka kulemvukila beto, mpe yandi ketalaka mutindu beto kesalaka ngolo samu na kuyangidika yandi, ata ti na bantangu ya nkaka, beto kesalaka masumu. Yau yina, ata beto kele bantu ya kukondua kulunga, beto lenda vuanda na nguisani ya mbote na Nzambi.​—Tanga Nkunga 103:12-14; Yobi 4:8.

Mutindu Yehova mepesaka beto luzingu, beto fuana zola yandi kuluta muntu nyonso. (Marke 12:30) Mingi nge kelakisa yandi luzolo na kulongukaka kuzaba yandi mpe na kusalaka mambu yina yandi kena kulomba nge, mingi nge kepusana penepena na yandi.​—Tanga 1 Timote 2:4; 1 Yoane 5:3.