Bansangu ya mbote yau mekatuka tsyeleka na Nzambi?

1. Biblia kele mukanda ya Nani?

Nsangu ya mbote yina metuba ti bantu kevuanda na luzingu ya mvula na mvula awa na ntoto yakele na kati ya Biblia. (Nkunga 37:29) Biblia kele na mikanda ya fiotifioti 66. Nzambi sadilaka babakala ya kukuikama kana 40 samu basonika yau. Mikanda tanu ya ntete sonamaka na Moize bamvula 3 500 meluta. Mukanda ya nsuka sonamaka na ntumua Yoane bamvula 1 900 meluta. Bangindu ya nani bansoniki ya Biblia sonikaka? Nzambi tubilaka bau mambu na nzila ya mpeve ya longo na yandi (2 Samuele 23:2) Bau sonikaka bangindu ya Nzambi, kansi ya bau mosi ve. Na yau, Biblia kele mukanda ya Yehova.​—Tanga 2 Timote 3:16; 2 Piere 1:20, 21.

Tala video Biblia ke mukanda ya nani?

2. Yinki lenda ndimisa beto ti Biblia ketubaka kedika?

Beto mezaba ti Biblia kele mukanda ya Nzambi samu yau kesamunaka mambu yina kekuiza, mpe mutindu yina yau kesalamina. Muntu mosi ve lenda sala yau. (Yosua 23:14) Kaka Nzambi Nkua-Ngolo-Nyonso lenda zaba na busikisiki mambu kekumina bantu na bilumbu kena kuiza.​—Tanga Izaya 42:9; 46:10.

Yamebonga ti mukanda yina mekatuka na Nzambi yasuasana na mikanda nyonso ya nkaka, mpe yau kele mutindu yina samu na Biblia. Bamiliare ya Babiblia mekukabulua na bankama ya bandinga. Ata ti bantu ya nkaka ketadilaka Biblia mutindu mukanda ya ntama, mambu Biblia ketubaka kele na nguisani na siansi. Mpe bansoniki na yau kana 40 bavuandaka na nguisani na bampova na bau.a Mpe, yina Biblia metuba samu na luzolo yafuana katuka kaka na Nzambi ya kedika yina kele Nzambi ya luzolo. Tii bubu yayi, mukanda yango kele kaka na ngolo ya kuvilula luzingu ya bantu mpe kubongisa yau. Mambu nyonso yina kena kutumisa mafunda ya bantu bandima ti Biblia kele Mpova ya Nzambi.​—Tanga 1 Batesalonika 2:13.

Tala video Wapi faso beto lenda zaba ti Biblia ke zonza tsyeleka?

3. Wapi mambu Biblia ketubilaka?

Biblia ketubilaka mingi nsangu ya mbote yina melakisa ti Nzambi kena zola kusala mambu ya mbote samu na bantu. Masonukua kena kulakisa mutindu bantu zimbisaka na ntonono ya luzingu ya bau diluaku ya mbote yina bavuandaka na yau ya kuvuanda na paladiso awa na ntoto, mpe mutindu nsukansuka, paladiso kevutuka diaka.​—Tanga Luzabusu 21:4, 5.

Na kati ya Mpova ya Nzambi, beto kekuta diaka bansiku, minsiku, mpe malongi. Mpe, Biblia kele na bifuani yina kena kulakisa mutindu yina Nzambi kesadilaka bantu mambu. Bifuani yango kena sadisa beto beto zaba kana yandi kele muntu ya wapi mutindu. Na yau, Biblia lenda sadisa nge nge zaba Nzambi. Yau kena kulakisa diaka yina nge lenda sala samu na kukuma nkundi na yandi.​—Tanga Nkunga 19:7, 11; Zaki 2:23; 4:8.

4. Wapi mutindu nge lenda bakula Biblia?

Mua mukanda yayi lenda sadisa nge nge bakula Biblia na kusadilaka mayele yina Yesu sadilaka. Yandi vuandaka tubila kapu mosi na manima ya nkaka mpe kubangula ‘mfunu ya Masonukua.’​—Tanga Luke 24:27, 45.

Yakele na diambu mosi ve kele kitoko kulutila nsangu ya mbote yina mekatuka na Nzambi. Kansi bantu ya nkaka ketalaka yau mfunu mosi ve, mpe bayankaka ketalaka yau mutindu nkuamusu. Kulemba nzutu ve. Kivuvu na nge ya kuvuanda na luzingu ya mvula na mvula na bilumbu kena kuiza metadila ngolo yina nge kena kusala samu na kuzaba Nzambi.​—Tanga Yoane 17:3.