Wapi kivuvu kele samu na bantu ya kufua?

1. Wapi nsangu ya mbote kele samu na bantu yina mekufuaka?

Ntangu Yesu vuandaka awa na ntoto, yandi vuandaka na nkundi mosi, Lazare, yina vuandaka vuanda na Betania, penepene ya Yerusaleme. Kilumbu mosi, ntangu Yesu kumaka na Betania, yandi kutaka nkundi na yandi Lazare mekufua yameluta bilumbu yiya. Yesu kuendaka na ndiamu, kintuadi na Marta na Maria, bampangi ya Lazare. Yau zingilaka ve, bantu mingi kuizaka kuna. Yindula kiese yina Marta na Maria vuandaka na yau ntangu Yesu futumunaka Lazare!​—Tanga Yoane 11:21-24, 38-44.

Marta zabaka nsangu ya mbote yina metadila bantu ya kufua. Yandi zabaka ti Yehova kefutumuna bantu ya kufua samu bavuanda diaka awa na ntoto.​—Tanga Yobi 14:14, 15.

2. Wapi mutindu muntu kekumaka kana yandi mekufua?

Bantu salamaka na fundufundu ya ntoto. (Kubanda 2:7; 3:19) Beto kele ve bampeve yina kevuandaka na kati ya nzutu ya kinsuni. Beto kele bivangu ya kinsuni; yau yina, kitini mosi ve ya nzutu na beto ketatamanaka kuzinga na manina ya lufua. Kana beto mekufua, ntonvi ya beto mpe kekufuaka, mpe bangindu na beto kekufuaka. Yau yina ntangu Lazare futumukaka, yandi tubaka ve ti yandi talaka diambu mosi, samu bantu ya kufua bakezabaka kima mosi ve.​—Tanga Nkunga 146:4; Longi 9:5, 6, 10.

Nzambi ketadisaka bantu mpasi na tiya kana bamekufua? Mutindu Biblia lakisa ti bantu ya kufua kezabaka kima ve, yau melakisa mbote ti dilongi ya bilungi kele ya luvunu mpe yau kefingisaka nkumbu ya Nzambi. Nzambi kemangaka kutu ata dibanza ya kutadisa bantu mpasi na tiya.​—Tanga Yeremia 7:31.

Tala video Yinki ke kumina bantu na manima ya lufwa?

3. Beto lenda solola na bantu ya kufua?

Bantu ya kufua balenda zonza ve, balenda kuwa mpe ve. (Nkunga 115:17) Kansi bambasi ya nkaka ya yimbi balenda tuba na kisika ya bantu ya kufua mpe kusolola na bantu. (2 Piere 2:4) Yehova menimina diambu metala kusolola na bantu ya kufua.​—Tanga kulonga Misiku 18:10, 11.

4. Nani kefutumuka?

Bamilio ya bantu yina mekufuaka bau kevutuka na luzingu awa na ntoto. Ata ti bantu ya nkaka yina zabaka Nzambi ve mpe basalaka mambu ya yimbi bau kefutumuka.​—Tanga Luke 23:43; Bisalu 24:15.

Bantu yina kefutumuka bau kevuanda na diluaku ya kulonguka kedika metala Nzambi, kundimina Yesu mpe kuzitisa yandi. (Luzabusu 20:11-13) Bayina kevutuka na luzingu mpe kesala mambu ya mbote balenda zinga mvula na mvula awa na ntoto.​—Tanga Yoane 5:28, 29.

5. Yinki futumukunu melakisa beto samu na Yehova?

Nzambi pesaka kivuvu samu na bantu ya kufua na mutindu yandi fidisaka Muana na yandi kufua samu na beto. Yau yina futumukunu kena lakisa beto luzolo ya Yehova mpe lemvo na yandi ya nene. Ntangu bantu ya kufua kefutumuka, nani nge kezola kutala ya ntete?​—Tanga Yoane 3:16; Baroma 6:23.