Nzambi yidikaka zulu na ntoto

Ni Yehova yidikaka beto. Yandi yidikaka bima nyonso, bima yina beto lenda tala mpe bima yina beto lenda tala ve. Tekila yandi yidika bima yina beto lenda tala, yandi yidikaka bambazi mingi. Nge zaba kwandi banani ke bambazi? Bambazi ke bantu yina Yehova yidikaka, mpe ba ke mutindu Yehova yandi mosi. Beto lenda tala ve bawu, kaka mutindu beto lenda tala ve Nzambi. Mbazi ya ntete yina Yehova yidikaka, kumaka sadisi ya yandi. Mbazi yango sadisaka Yehova ntangu yandi yidikaka bambwetete, mpe bima nyonso ya nkaka. Mosi ya bima ya nkaka yina yandi salaka, ni ntoto, kisika ya kitoko samu na bantu.

Na manima, Yehova bongisaka ntoto samu ya vanda kisika ya kuzinga samu na bibulu mpe samu na bantu. Yandi salaka ti ntangu ngenga na zulu ya ntoto. Yandi salaka mpe bamongo, bamubu, banzadi mpe bamwila.

Yinki salamaka na manima? Yehova zonzaka: ‘Mu ke sala matiti, bayinti yina ke butaka bambuma mpe bayinti ya nkaka.’ Bambuma ya bafaso mingi, bandunda, mpe bafololo bandaka kumena. Na manima Yehova yidikaka bibulu nyonso: Bibulu yina ke pulumukaka, bibulu yina ke vandaka na maza, mpe bibulu yina ke tambulaka kivumu na ntoto. Yandi yidikaka bibulu ya fioti, mutindu ba lapins, mpe bibulu ya nene, mutindu banzawu (éléphants). Na bibulu nyonso yayi, wapi yina nge ke zolaka mingi?

Na manima Yehova zonzaka na mbazi ya ntete: “Beto sala muntu.” Bantu ke vanda ve faso mosi na bibulu. Bantu ke yidika bima, ba ke zonza, ba ke seka, mpe ba ke sambila. Bantu ke kipe ntoto mpe bibulu. Nge zaba nani vandaka muntu ya ntete? Beto tala yawu.