Yehova me soola Yozue

Na manima ya kutwadisa dikanda ya Izraele na kati ya bamvula mingi, lufwa ya Moyize kumaka pene-pene. Yehova zonzaka na yandi: ‘Ni nge ve ke kumisa bana ya Izraele na ntoto ya nsilulu. Kasi nge ke tala kaka ntoto yango na ntama.’ Na yawu Moyize lombaka na Yehova na kusoola ntwadisi ya malu-malu yina ke kipe dikanda ya yandi. Yehova zonzaka na Moyize: ‘Kwenda na Yozue, mpe zonza na yandi ti ni yandi ke vanda ntwadisi ya malu-malu.’

Moyize zonzaka na bana ya Izraele ti ntama mingi ve yandi ke kufwa, mpe ti Yehova me soola Yozue samu na kukumisa bawu na ntoto ya nsilulu. Moyize zonzaka na Yozue: ‘Kuvanda ve na boma. Yehova ke sadisa nge.’ Ntangu fioti na manima, Moyize kwendaka na Mongo ya Nebo. Kuna, Yehova lakisaka yandi na ntama ntoto yina yandi pesaka nsilulu na Abrahami, Izaki, mpe Yakobi. Moyize vandaka na bamvula 120 ntangu yandi kufwaka.

Yehova zonzaka na Yozue: ‘Sabuka Mwila ya Yordani, mpe kwenda na Kanana. Mu ke sadisa nge mutindu mu sadisaka Moyize. Nge me fwana kutanga Musiku ya munu konso kilumbu. Kuvanda ve na boma. Vanda na bukindi. Kwenda mpe sala mambu yina mu ke lomba na nge na kusala.’

Yozue filisaka bantu zole na kwenda tala mbanza ya Yeriko. Na disolo yina ke landa, beto ke longoka mingi na mambu yina salamaka kuna. Ntangu bantu zole yayi vutukaka, ba nataka nsangu ti ya vandaka ntangu ya mbote ya kukwenda na Kanana. Kilumbu yina landaka, Yozue zonzaka na bantu nyonso na kubongama samu ba kwenda. Yandi zonzaka na banganga-nzambi yina vanda nataka sanduku ya luwawanu, na kukwenda na mantwala samu na kusabuka Mwila ya Yordani. Mwila vandaka ya kufuluka na maza. Kasi ntangu makulu ya banganga-nzambi kotaka na maza, maza kumaka swi mpe ya bandaka kukawuka! Banganga-nzambi tambulaka tii na kati-kati ya maza mpe ba telamaka kuna ntangu bana ya Izraele nyonso vanda luta. Ntembe ve, kimangu yayi bambulaka bawu mambu yina Yehova salaka na Mubu ya Mbwaki.

Na manima ya bamvula nyonso yayi, bana ya Izraele kumaka na ntoto ya nsilulu. Ba vandaka na bweso ya kutunga bayinzo mpe bambanza, ya kusala bilanga, ya kukunda bayinti ya vinu, mpe bayinti yina ke butaka bambuma. Ya vandaka ntoto yina vandaka ya kufuluka na miliki mpe mafuta ya nyosi.