Mfumu ya malu-malu mpe bakento zole ya bukindi

Na manima ya kutwadisa dikanda ya Yehova na kati ya bamvula mingi, Yozue kufwaka na bamvula 110. Ntangu yandi vandaka ntete moyo, bana ya Izraele vanda sambilaka Yehova. Kasi na manima ya lufwa ya yandi, ba bandaka kusambila biteki, faso bantu ya Kanana. Samu ba vanda sambila dyaka ve Yehova, Yehova bikaka ti mfumu ya Kanana na nkumbu ya Yabini sala ti luzingu ya bawu kuma mpasi. Bana ya Izraele bondilaka Yehova yandi sadisa bawu. Na yawu, Yehova filisaka bawu mfumu ya malu-malu na nkumbu ya Baraki. Yandi zolaka sadisa bawu na kuvutukila Yehova.

Mbikudi mosi ya kento na nkumbu ya Debora, filisaka bantu na kukwenda bokila Baraki. Yandi vandaka na nsangu yina katukaka na Yehova: ‘Baka babakala 10 000 mpe beno kwenda kutana basoda ya Yabini na bwala ya Kishone. Kuna, nge ke nunga Sisera mfumu ya basoda ya Yabini.’ Baraki zonzaka na Debora: ‘Mu ke kwenda kaka kana nge kwiza na munu.’ Debora vutulaka: ‘Mu ke kwiza na nge. Kasi zaba ti ni nge ve muntu ke kufwa Sisera, Yehova me zonza ti ni kento ke kufwa yandi.’

Debora, Baraki na basoda ya Baraki kwendaka na Mongo ya Tabore samu na kunwana. Ntangu Sisera kuwaka yawu, yandi vukisaka bapusu-pusu ya yandi ya mvita mpe basoda ya yandi na dibenga. Debora zonzaka na Baraki: ‘Bubu yayi ke kilumbu yina Yehova ke sala ti nge nunga.’ Baraki na babakala 10 000 yina vandaka na yandi, kulumukaka na mongo samu na kukutana na basoda ya ngolo ya Sisera.

Na manima Yehova salaka ti maza ya Kishone kuma mingi. Bapusu-pusu ya Sisera kangamaka na poto-poto. Sisera bikaka pusu-pusu ya yandi mpe bandaka kukima. Baraki na basoda ya yandi, nungaka basoda ya Sisera, kasi Sisera kimaka. Yandi kwendaka bumbana na kati ya tenta ya kento mosi na nkumbu ya Yaele. Yaele pesaka yandi miliki ya kunwa mpe fukaka yandi divunga. Sisera vandaka ya kulemba mingi, na yawu yandi lalaka. Yaele kwizaka na malembe, bakaka yinti ya tenta mpe tobolaka yintu ya Sisera. Sisera kufwaka.

Baraki vanda sosa Sisera. Yaele vandaka ya kutelama na mantwala ya tenta ya yandi mpe yandi zonzaka: ‘Kwiza na kati. Mu ke lakisa nge bakala yina nge ke na sosaka.’ Baraki kotaka mpe talaka Sisera ya kufwa. Baraki na Debora kembilaka Yehova na banzimbu samu yandi salaka ti bana ya Izraele nunga. Na kati ya bamvula 40 yina landaka, ba vandaka na kizunu.