Rute na Naomi

Ntangu nsatu ya nene bulaka bwala ya Izraele, kento mosi na nkumbu ya Naomi kwendaka na bwala ya Moabi na bakala ya yandi mpe bana ya bawu zole ya babakala. Na manima bakala ya Naomi kufwaka. Bana ya yandi kwelanaka na Rute mpe Orpa. Bakento yayi vandaka bantu ya Moabi. Mambu ya kyadi kele ti na manima ya mwa bantangu, bana ya Naomi kufwaka.

Ntangu Naomi kuwaka ti nsatu ya nene yina vanda bula bwala ya Izraele manisaka, yandi bakaka mukanu ya kuvutuka kuna. Rute na Orpa kwendaka na yandi, kasi na nzila, Naomi zonzaka na bawu: ‘Beno me vanda bakento ya mbote samu na bana ya munu mpe babokilo ya mbote samu na munu. Mu zola ti beno kwela dyaka. Beno vutuka na Moabi.’ Bakento yayi zonzaka na Naomi: ‘Beto zola nge! Beto ke ve na nsatu ya kubika nge.’ Naomi vanda bika ve kuzonza na bawu na kukwenda. Nsuka-nsuka Orpa vutukaka, kasi Rute bikanaka. Naomi zonzaka na Rute: ‘Orpa ke na vutukaka na dikanda ya yandi mpe na banzambi ya yandi. Vutuka na yandi mpe kwenda na yinzo ya mama ya nge.’ Kasi Rute zonzaka na yandi: ‘Mu ke bika ve nge. Dikanda ya nge ke vanda dikanda ya munu, mpe Nzambi ya nge ke vanda Nzambi ya munu.’ Na nge, yinki ya salaka Naomi na ntima ntangu Rute zonzaka mambu yayi?

Rute na Naomi kumaka na Izraele na ntangu ya kukatula bambuma ya Orze na bilanga. Kilumbu mosi, Rute kwendaka lokota bambuma yina bikanaka na bilanga ya bakala mosi na nkumbu ya Boaze, mwana ya Rahabi. Yandi kuwaka ti Rute vandaka muntu ya Moabi mpe ti yandi vandaka ya kukangama na Naomi. Yandi zonzaka na bisadi ya yandi na kubika mwa bambuma mingi na bilanga samu Rute lokota yawu.

Na nkokila yina, Naomi yufulaka Rute: ‘Na wapi bilanga nge me sala bubu yayi?’ Rute vutulaka: ‘Na bilanga ya bakala mosi na nkumbu ya Boaze.’ Naomi zonzaka na yandi: ‘Boaze ke muntu ya dikanda ya bakala ya munu. Tatamana na kusala kuna na bantwenya ya nkaka ya bakento. Kuna mambu ya mpasi ke kumina ve nge.’

Rute bikaka ve kusala na bilanga ya Boaze tii ntangu ba manisaka kulokota bambuma na bilanga. Boaze talaka ti Rute salaka kisalu ya ngolo mpe yandi vandaka kento ya mbote. Na ntangu yina, kana bakala yina kele ve na bana ya babakala kufwa, muntu mosi ya dikanda ya yandi ke kwela kento yina yandi me bika. Na yawu Boaze kwelaka Rute. Ba butaka mwana ya bakala na nkumbu ya Obede, yina na manima kumaka nkooko ya mfumu Davidi. Bandiku ya Naomi vandaka na kilengi. Ba zonzaka: ‘Na kubanda, Yehova me pesa nge Rute, yina me lakisa nge ntima ya mbote na faso ya kulutila, mpe ntangu yayi nge me kuzwa mutekolo ya bakala. Bika Yehova kuzwa nkembo.’