Gideoni nungaka bantu ya Madiani

Na manima ya bantangu, bana ya Izraele bikaka dyaka kusambila Yehova mpe bandaka kusambila banzambi ya luvunu. Na kati ya bamvula 7, bantu ya Madiani vanda labaka bibulu ya bantu ya Izraele mpe vanda bebisaka bima ya bawu na bilanga. Samu na kukima bawu, bantu ya Izraele vanda bumbanaka na kati ya mabulu mpe na bamongo. Ba bondilaka Yehova na kuvuukisa bawu. Na yawu, Yehova filisaka mbazi mosi na sika ya ntwenya mosi ya bakala na nkumbu ya Gideoni. Mbazi zonzaka na yandi: ‘Yehova me soola nge na kuvanda soda ya ngolo.’ Gideoni vutulaka: ‘Wa’ faso mu ke lenda kuvuukisa Izraele? Mu ke kaka muntu ya mpamba.’

Wa’ faso Gideoni ke zaba ti Yehova me soola yandi? Yandi tulaka bansuki ya kibulu na ntoto mpe zonzaka na Yehova: ‘Kana mabete ya maza ya suka kubwa kaka na zulu ya bansuki ya kibulu mpe ntoto vanda ya kuyuma, mu ke zaba ti nge zola mu vuukisa Izraele.’ Na suka ya kilumbu yina landaka, bansuki ya kibulu vandaka na maza mpe ntoto vandaka ya kuyuma! Kasi na manima Gideoni lombaka dyaka ti na suka ya kilumbu yina ke landa, bansuki ya kibulu vanda ya kuyuma kasi ntoto vanda na maza. Ntangu ya salamaka mutindu yandi lombaka yawu, Gideoni kumaka na kundima ti Yehova me soola yandi. Yandi vukisaka basoda ya yandi na kwenda nwanisa bantu ya Madiani.

Yehova zonzaka na Gideoni: ‘Mu ke sala ti bana ya Izraele nunga bantu ya Madiani. Kasi samu nge ke na basoda mingi, beno lenda kanisa ti beno me nunga na ngolo ya beno mosi. Zonza na muntu nyonso yina ke na boma na kuvutuka na yinzo.’ Na yawu, basoda 22 000 vutukaka na bayinzo ya bawu mpe 10 000 bikanaka. Na manima Yehova zonzaka dyaka: ‘Basoda ke kaka mingi. Nata bawu na maza mpe zonza na bawu na kunwa maza. Bumba kaka ba yina ke na talaka kisika bambeni kele, ntangu ba ke na kunwaka maza.’ Kaka basoda 300 vandaka ekenge ntangu ba vanda kunwa maza. Yehova pesaka bawu nsilulu ti basoda 300 yayi ke nunga basoda 135 000 ya Madiani.

Na mpimpa yina, Yehova zonzaka na Gideoni: ‘Ya me kuma ntangu ya kukwenda nwanisa bantu ya Madiani!’ Gideoni pesaka basoda ya yandi bampungi mpe ba pots ya nene yina ba yidikaka na ntoto na bamwinda na kati. Yandi zonzaka na bawu: ‘Beno tala munu, mpe beno sala mutindu mu ke sala.’ Gideoni bulaka mpungi ya yandi, yandi mwangisaka pot ya yandi, yandi ningisaka mwinda ya yandi, mpe zonzaka na ndinga ya ngolo: ‘Mbele ya yinda ya Yehova mpe ya Gideoni!’ Basoda 300 yina vandaka na yandi salaka mpe mutindu mosi. Bantu ya Madiani vandaka na boma mpe ba vanda kima kidi-kidi na bisika nyonso. Na kati ya muvusu yina, ba bandaka kufwa bampangi bawu na bawu. Dyaka, Yehova me sadisa bana ya Izraele na kununga bambeni ya bawu.