Yehova pesaka Samsone ngolo

Bantu mingi ya Izraele vutukilaka dyaka lusambu ya biteki. Na yawu, Yehova bikaka bantu ya Filistia kuyala bawu. Kasi ya vandaka na mwa ndambu ya bantu ya Izraele yina vanda zolaka Yehova, mutindu Manoa. Yandi na kento ya yandi vandaka ve na bana. Kilumbu mosi Yehova filisaka mbazi na kento ya Manoa. Mbazi zonzaka na yandi: ‘Nge ke buta mwana ya bakala. Yandi ke vuukisa Izraele na maboko ya bantu ya Filistia. Yandi ke vanda Munazire.’ Nge zaba banani vandaka Banazire? Ya vandaka bantu yina Yehova soolaka samu na kusadila yandi. Banazire zolaka zenga ve bansuki ya bawu.

Na manima, Manoa kuzwaka mwana ya bakala mpe nkumbu ya yandi vandaka Samsone. Ntangu Samsone kulaka, Yehova pesaka yandi ngolo mingi. Yandi kufwaka nkosi na maboko. Kilumbu mosi Samsone kufwaka bantu 30 ya Filistia kaka yandi mosi. Bantu ya Filistia vanda yiinaka yandi mpe vanda sosa kufwa yandi. Na mpimpa mosi na Gaza ntangu Samsone vandaka ya kulala, bantu ya Filistia kwendaka na mwelo ya mbanza mpe vingilaka kuna samu ba lenda kufwa yandi na suka. Kasi na kati-kati ya mpimpa, Samsone telamaka, kwendaka na mwelo ya mbanza, mpe yandi katulaka yawu. Yandi nangunaka mwelo na zulu ya mapeka ya yandi mpe yandi kwendaka na yawu tii na zulu ya mongo yina vandaka pene-pene na Ebroni!

Na manima, bantu ya Filistia kwendaka tala dikangu ya Samsone, na nkumbu ya Dalila mpe zonzaka na yandi: ‘Beto ke futa nge mbongo mingi ya bisengo kana nge zonza na beto samu na yinki Samsone ke na ngolo mingi. Beto ke na nsatu ya kukanga yandi mpe kutula yandi na boloko.’ Dalila vandaka na lukoso ya mbogo, na yawu yandi ndimaka. Na kubanda, Samsone mangaka kuzonza na Dalila samu na yinki yandi vandaka na ngolo mingi. Kasi Dalila kwamisaka yandi, tii ntangu Samsone zonzilaka yandi yawu. Samsone zonzaka na yandi: ‘Nabunu ba zenga bansuki ya munu samu mu kele Munazire. ‘Kana ba zenga yawu, ngolo ya munu ke manisa.’ Samsone salaka buzoba mosi ya nene ntangu yandi zonzilaka yandi yawu. Faso yina ve?

Na mbala mosi, Dalila zonzaka na bantu ya Filistia: ‘Mu zaba samu na yinki yandi ke na ngolo!’ Yandi lalisaka Samsone pongi na zulu ya makulu ya yandi mpe na manima yandi lombaka na muntu na kuzenga yandi bansuki. Dalila zonzaka na ndinga ya ngolo: ‘Samsone, bantu ya Filistia kele awa!’ Samsone vumbukaka mpe ngolo ya yandi vandaka dyaka ve. Bantu ya Filistia kangaka yandi, tobolaka yandi meso mpe ba tulaka yandi na boloko.

Kilumbu mosi bantu mingi ya Filistia vukanaka na tempelo ya nzambi ya bawu Dagoni, ba vanda zonza na ndinga ya ngolo: ‘Nzambi ya beto me pesa beto Samsone! Beno basisa yandi awa! Bika beto sakana na yandi.’ Ba telemisaka yandi na kati-kati ya makunzi zole mpe ba vanda seka yandi. Samsone bokilaka Yehova: ‘O Yehova, mulemvo pesa dyaka munu ngolo.’ Na ntangu yina, bansuki ya Samsone kumaka dyaka yinda. Yandi puseke makunzi ya tempelo na ngolo ya yandi nyonso. Yinzo nyonso kubwaka, ya kufwaka bantu nyonso na tempelo, Samsone mpe kufwaka.