Davidi na Goliati

Yehova zonzaka na Samuele: ‘Kwenda na yinzo ya Yese, mosi ya bana ya yandi ya babakala ke vanda mfumu ya Izraele na manima ya Sawule.’ Na yawu, Samuele kwendaka kuna. Ntangu yandi talaka mwana ya yandi ya ntete ya bakala, yandi kanisaka: ‘Ya lenda vanda ni yandi yayi.’ Kasi Yehova zonzaka na Samuele ni yandi ve. Yehova bwelaka: ‘Mu ke talaka ntima ya muntu, kasi ve kaka faso yandi ke talanaka na meso.’

Yese lakisaka Samuele bana ya yandi 6 ya nkaka. Kasi Samuele zonzaka: ‘Yehova me soola ata muntu na kati ya bawu. Nge kele ve na mwana ya nkaka ya bakala?’ Yese zonzaka: ‘Mu ke dyaka na mwana mosi, mwana-nsuka, Davidi. Yandi kwendaka kipe mameme.’ Ntangu Davidi kwizaka, Yehova zonzaka na Samuele: ‘Ni yandi mu me soola!’ Samuele tulaka Davidi mafuta na zulu ya yintu samu na kulakisa ti yandi ke vanda mfumu na manima ya Sawule.

Na manima ya mwa bantangu, bana ya Izraele vandaka na mvita na bantu ya Filistia. Bantu ya Filistia vandaka na soda mosi yina vandaka na ngolo mingi mpe yandi vandaka nwanaka samu na bawu. Nkumbu ya yandi vandaka Goliati. Bilumbu nyonso Goliati vanda sekaka bana ya Izraele. Yandi vanda zonzaka na ndinga ya ngolo: ‘Beno filisa munu muntu mosi yina ke nwana na munu. Kana yandi nunga, beto ke kuma bangaamba ya beno. Kasi kana mu nunga, beno ke kuma bangaamba ya beto.’

Davidi kwendaka kisika yina basoda ya Izraele vandaka, samu na kupesa madya na bayaya ya yandi yina vandaka basoda. Yandi kuwaka mambu yina Goliati vanda zonza mpe yandi zonzaka: ‘Mu ke nwana na yandi!’ Mfumu Sawule zonzaka: ‘Nge ke kaka mwana ya fioti.’ Davidi vutulaka: ‘Yehova ke sadisa munu.’

Sawule mekaka kupesa Davidi kinwanunu ya yandi, kasi Davidi zonzaka: ‘Mu ke lenda ve kunwana na kima yayi.’ Davidi bakaka lanse ya yandi mpe kwendaka na maza. Yandi soolaka matadi tanu ya mbote mpe yandi tulaka yawu na saki ya yandi. Davidi kwendaka mbangu kisika yina vandaka Goliati. Goliati zonzaka na ndinga ya ngolo: ‘Kwiza awa, mwana ya fioti. Mu ke pesa musuni ya nge na bandeke mpe na bibulu ya brusu.’ Davidi vandaka ve na boma. Yandi vutulaka na ndinga ya ngolo: ‘Nge me kwiza na mbele ya yinda mpe na dikonga, kasi mu me kwiza na nkumbu ya Yehova. Ni beto ve nge ke na nwanisaka, kasi ni Nzambi nge ke na nwanisaka. Bantu nyonso awa ke tala ti Yehova ke na ngolo mingi kuluta mbele ya yinda to dikonga. Yandi ke pesa beno nyonso na maboko ya beto.’

Davidi tulaka ditadi na lanse ya yandi mpe yandi balulaka yawu na ngolo ya yandi nyonso. Na lubakusu ya Yehova, ditadi kwendaka kota na mbunzu ya Goliati. Goliati kubwaka mpe kufwaka. Na manima bantu ya Filistia kimaka samu na kubumba luzingu ya bawu. Nge ke tulaka kwandi ntima na Yehova mutindu Davidi salaka yawu?