Tempelo samu na Yehova

Na manima ya kukuma mfumu na Izraele, Yehova yufulaka Salomo: ‘Yinki nge zola mu pesa nge?’ Yandi vutulaka: ‘Mu ke ntwenya, mpe mu zaba ve yinki mu ke na salaka. Mulemvo, pesa munu ndwenga samu na kukipe dikanda ya nge.’ Yehova vutulaka: ‘Samu nge me lomba ndwenga, nge ke kuma na ndwenga ya kulutila bantu nyonso na ntoto. Mu ke pesa mpe nge bimvwama mingi. Kana nge tumama na munu, nge ke vanda na luzingu ya yinda.’

Salomo bandaka kutunga tempelo. Yandi sadilaka wolo, arza, mabaya mpe matadi. Bantu mingi yina zabaka kisalu, salaka na kisalu ya kutunga tempelo. Na manima ya bamvula 7, ya kumaka ntangu ya kupesa tempelo na Yehova. Ya vandaka na kisika ya munkayulu, na zulu ya yawu, vandaka na minkayulu. Salomo fukamaka na mantwala ya kisika ya munkayulu mpe sambilaka: ‘O Yehova, tempelo yayi me lunga ve to ke ve kitoko samu na nge, kasi mulemvo, ndima bamambu nyonso yina ke salama awa mpe kuwa balusambu ya beto.’ Yinki Yehova kanisaka na tempelo mpe na lusambu ya Salomo? Kaka ntangu Salomo manisaka kusambila, tiya katukaka na zulu mpe yokaka bima yina vandaka na kisika ya minkayulu. Yehova ndimaka tempelo. Ntangu bana ya Izraele talaka yawu, ba vandaka na kilengi mingi.

Na Izraele mpe na bisika ya ntama, Salomo zabanaka na ndwenga ya yandi. Bantu vanda kwiza na sika ya yandi samu yandi sadisa bawu na bamambu ya bawu. Mfumu ya Sheba kwizaka na kyuvu mosi ya ngolo samu na kumeka yandi. Ntangu yandi kuwaka mvutu ya Salomo, yandi zonzaka: ‘Mu ndimaka ve mambu yina ba zonzaka na munu, kasi ntangu yayi mu me tala ti nge ke na ndwenga mingi kuluta yina ba zonzaka na munu. Nzambi ya nge, Yehova, me sakumuna nge.’ Bana ya Izraele vandaka na luzingu ya kitoko mpe ya kilengi. Kasi ya sobaka.