Yehova me nwanina Yehozafati

Yehozafati mfumu ya Yuda, mwangisaka bisika ya minkayulu ya Baale mpe biteki na bwala. Yandi vandaka na nsatu bantu zaba misiku ya Yehova. Na yawu, yandi filisaka bamfumu ya fioti mpe balevi na bwala nyonso ya Yuda samu na kulonga bantu misiku ya Yehova.

Babwala yina vandaka pene-pene, vandaka na boma ya kwiza nwanisa bwala ya Yuda samu ba zabaka ti Yehova vandaka na bawu. Ba vanda natinaka mfumu Yehozafati makabu. Kasi bantu ya Moabi, bantu ya Amoni, mpe bantu ya kizunga ya Seire kwizaka nwanisa bantu ya Yuda. Yehozafati zabaka ti yandi vandaka na nsatu ya lubakusu ya Yehova. Yandi vukisaka babakala, bakento mpe bana na Yeruzalemi. Na mantwala ya bawu nyonso, yandi sambilaka: ‘Yehova, kana nge bika beto, beto lenda nunga ve. Mulemvo zonza na beto yinki ya kusala.’

Yehova pesaka mvutu na balusambu ya yandi: ‘Beno kuvanda ve na boma. Mu ke sadisa beno. Beno ke telama kaka kuna, beno ke tala mutindu mu ke vuukisa beno.’ Wa’ faso Yehova vuukisaka bawu?

Na suka ya kilumbu yina landaka, Yehozafati soolaka bantu yina ke yimbaka mpe zonzaka na bawu na kutambula na mantwala ya basoda. Ba tambulaka kubanda na Yeruzalemi tii na kisika ya mvita, na kisika yina ba vanda bokilaka Tekoa.

Ntangu bantu yina vanda yimba vanda kembila Yehova na ndinga ya ngolo na kilengi nyonso, Yehova vanda nwana samu na dikanda ya yandi. Yandi kotisaka mvwanzi na kati ya bantu ya Amoni mpe ya Moabi. Ya salaka ti ba banda kunwanisa bampangi bawu na bawu, mpe ata muntu mosi na kati ya bawu vuukaka. Kasi Yehova bumbaka bantu ya Yuda, basoda mpe banganga-nzambi. Bantu nyonso ya babwala yina vandaka pene-pene, kuwaka mambu yina Yehova salaka mpe ba zabaka ti Yehova vanda nwana kaka samu na dikanda ya yandi. Wa’ faso Yehova ke sadisaka bantu ya yandi? Na bafaso mingi. Yandi ke ve na nsatu muntu sadisa yandi na kusala yawu.