Soda mosi na ntwenya mosi ya kento

Na bwala ya Siri, ya vandaka na ntwenya mosi ya kento ya bwala ya Izraele yina vandaka ntama na dikanda ya yandi. Basoda ya Siri bakaka yandi na ngolo na maboko ya dikanda ya yandi, mpe ntangu yayi, yandi vandaka kisadi ya kento ya mfumu ya basoda na nkumbu ya Naamani. Ntwenya yango vanda sambilaka Yehova ata ti bantu ya nkaka kisika yina yandi vandaka vanda salaka ve yawu.

Naamani vandaka na kimbevo mosi ya ngolo, mpe ya vanda kwamisaka yandi ntangu nyonso. Ntwenya yayi ya kento vandaka na nsatu ya kusadisa yandi. Yandi zonzaka na kento ya Naamani: ‘Mu zaba muntu mosi yina lenda belusa bakala ya nge. Na Izraele ya ke na mbikudi mosi ya Yehova na nkumbu ya Elize. Yandi lenda belusa bakala ya nge.’

Kento ya yandi zonzaka na yandi mambu yina ntwenya yayi zonzaka. Naamani ndimaka na ntima mosi na kumeka kima ni kima. Na yawu, yandi kwendaka na yinzo ya Elize na Izraele. Naamani vanda vingila ti Elize yamba yandi mutindu muntu ya mfunu. Kasi na kisika ya kusolola na yandi, Elize filisaka kisadi ya yandi na kuyamba Naamani mpe na kupesa yandi nsangu yayi: ‘Kwenda yobila bambala 7 na Nzadi ya Yordani. Na manima nge ke beluka.’

Naamani nyongaka mingi. Yandi zonzaka: ‘Mu vanda kanisa ti mbikudi yayi zolaka belusa munu na kubokilaka Nzambi ya yandi mpe na kulutisaka maboko ya yandi na nzutu ya munu. Kasi yandi ke na zonzaka na munu na kukwenda na nzadi yayi na Izraele. Beto ke na banzadi ya kitoko na Siri. Samu na yinki mu lenda kwenda ve kuna?’ Naamani vandaka ya kudasuka, mpe yandi bikaka yinzo ya Elize.

Bisadi ya Naamani sadisaka yandi na kukanisa mbote-mbote. Ba zonzaka na yandi: ‘Nge lenda sala kima ni kima samu na kubeluka, ni faso yina ve? Mambu yina mbikudi yayi me zonza na nge na kusala ke ve mpasi. Samu na yinki kusala ve yawu?’ Naamani kuwaka bawu. Yandi kwendaka na Nzadi ya Yordani mpe dyamisaka nzutu na kati ya maza bambala 7. Na manima, Naamani basikaka na maza mpe yandi belukaka. Yandi vandaka na kilengi mingi mpe yandi vutukaka na Elize samu na kuvutula yandi matondo. Naamani zonzaka: ‘Ntangu yayi, mu me zaba ti Yehova ke Nzambi ya tsyeleka.’ Na nge, yinki ya salaka ntwenya ya Izraele ntangu yandi talaka Naamani kuvutuka na yinzo ya kubeluka?