Basoda ya tiya ya Yehova

Mfumu ya Siri, Bene-adade, vanda bika ve kunwanisa Izraele. Kasi ntangu nyonso mbikudi Elize vanda zonzaka na mfumu ya Izraele ti yandi sala keba; ya vanda sala ti mfumu ya Izraele lenda kuvuuka. Na yawu, Bene-adade bakaka mukanu ya kukanga Elize. Ba zonzaka na yandi ti Elize vandaka na mbanza ya Dotane. Yandi filisaka basoda ya Siri kuna samu na kukanga Elize.

Bantu ya Siri kwendaka na Dotane na mpimpa. Na suka ya kilumbu yina landaka, kisadi ya Elize basikaka na ngaanda mpe yandi talaka basoda mingi ya kuzunga mbanza. Yandi vandaka na boma mingi mpe yandi zonzaka na ndinga ya ngolo: ‘Elize, yinki beto ke sala?’ Elize zonzaka na yandi: ‘Bantu yina ke na beto ke mingi kuluta bantu yina ke na bawu.’ Na ntangu yina, Yehova fungulaka meso ya kisadi ya Elize mpe yandi talaka ti bamongo yina vandaka pene-pene ya mbanza vandaka ya kufuluka na bampunda mpe na bapusu-pusu ya tiya ya mvita.

Ntangu basoda ya Siri mekaka kukanga Elize, yandi sambilaka: ‘Yehova, mulemvo kufwa bawu meso.’ Na mbala mosi, basoda vanda zaba ve kisika ba vandaka ata ti ba vanda tala. Elize zonzaka na basoda: ‘Beno me zimbana bwala yina beno vanda sosa. Beno landa munu, mu ke nata beno na bakala yina beno ke na sosaka.’ Ba landaka Elize tii na Samariya, kisika yina mfumu ya Izraele vandaka.

Na manima, bantu ya Siri kwizaka zaba kisika yina ba vandaka. Mfumu ya Izraele yufulaka Elize: ‘Mu kufwa bawu?’ Elize kanisaka kwandi ti ya vandaka ntangu ya mbote na kuvutula yimbi na bantu yina zolaka sala yandi yimbi? Ve. Elize zonzaka: ‘Kufwa ve bawu. Pesa bawu madya mpe vutula bawu na bwala ya bawu.’ Na yawu mfumu salaka feti ya nene samu na bawu mpe na manima yandi vutulaka bawu na bwala ya bawu.