Bukindi ya Yehoyada

Yezabele vandaka na mwana mosi ya kento na nkumbu ya Atalia. Yandi vandaka na ntima ya yimbi kaka mutindu mama ya yandi. Atalia vandaka kento ya mfumu ya Yuda. Ntangu bakala ya yandi kufwaka, mwana ya yandi ya bakala kumaka mfumu. Kasi, ntangu mwana ya yandi kufwaka, Atalia yandi mosi bakaka kimfumu. Na manima, yandi mekaka kufwa dibuta ya kimfumu. Yandi bandaka kufwa muntu nyonso yina lenda kuma mfumu na kisika ya yandi, ya vanda mitekolo ya yandi ya babakala, yandi kufwaka bawu. Bantu nyonso vandaka na boma ya yandi.

Nganga-nzambi ya nene Yehoyada na kento ya yandi Yehosheba, zabaka ti mambu yina Atalia vanda sala vandaka mambu ya yimbi mingi. Ba tulaka luzingu ya bawu na mpasi na kubumbaka mosi ya mitekolo ya Atalia na nkumbu ya Yehoashi. Ba bandaka kukulisa yandi na kati ya tempelo.

Ntangu Yehoashi lungisaka bamvula 7, Yehoyada vukisaka bamfumu nyonso mpe balevi mpe yandi zonzaka na bawu: ‘Beno bumba mwelo ya tempelo, mpe beno bika ata muntu kukota na kati.’ Na manima Yehoyada tulaka Yehoashi mutindu mfumu ya Yuda mpe yandi tulaka yimpu ya kimfumu na zulu ya yintu ya yandi. Bantu zonzaka na ndinga ya ngolo: ‘Luzingu ya yinda na mfumu!’

Mfumu Atalia kuwaka makelele yina ba vanda sala mpe yandi kwendaka na mbangu na tempelo. Ntangu yandi talaka mfumu ya malu-malu, yandi gangaka: “Komplo! Komplo!” Bamfumu kangaka mfumu ya kento ya yimbi yayi, ba kwendaka na yandi mpe kufwaka yandi. Kasi yinki beto lenda zonza samu na mambu nyonso ya yimbi yina yandi nataka bantu na kusala?

Yehoyada sadisaka bantu ya bwala ya yandi na kusala luwawanu na Yehova mpe na luwawanu yango, ba salaka nsilulu ya kusambila kaka Yehova. Yehoyada filisaka bantu na kubwisa tempelo ya Baale mpe na kumwangisa biteki ya yandi. Yandi tulaka banganga-nzambi mpe balevi na kusala na tempelo samu bantu sambila dyaka Yehova kuna. Yandi tulaka bantu yina ke kengidilaka bamwelo, na kubumba tempelo samu muntu nyonso yina ke ve bunkete kukota ve kuna. Na manima, Yehoyada na bamfumu nataka Yehoashi na yinzo ya mfumu mpe tulaka yandi na kiti ya kimfumu. Bantu ya Yuda sepelaka. Ntangu yayi ba lenda sadila Yehova samu Atalia mpe lusambu ya Baale kele dyaka ve. Nge me tala faso bukindi ya Yehoyada sadisaka bantu mingi?