Yehova lakisaka Yona ntima ya yinda

Na ninive, bwala mosi ya Asiria, bantu vandaka na mambu ya yimbi. Yehova zonzaka na mbikudi ya yandi Yona na kukwenda na Ninive mpe kuzonza na bantu ti ba fwana kusoba ndyatulu ya bawu. Kasi Yona kimaka na nzila ya nkaka. Yandi bakaka masuwa yina vanda kwenda na Tarsisi samu na kukima ntama.

Na mubu, mupepe mosi ya ngolo bulaka mpe bantu na kati ya masuwa vandaka na boma. Ba sambilaka banzambi ya bawu mpe ba zonzaka: ‘Samu na yinki ya ke na kuminaka beto?’ Yona zonzaka na bawu: ‘Ya kele foti ya munu. Mu ke na kimaka ntama na mambu yina Yehova me zonza na munu na kusala. Beno losa munu na maza, mpe mupepe ke manisa.’ Ba vanda zola ve kulosa Yona na maza, kasi Yona bikaka ve kuzonza na bawu na kusala yawu. Ntangu ba losaka yandi na maza, mupepe manisaka.

Yona kanisaka ti yandi ke kufwa. Ntangu yandi bandaka kudyama, yandi sambilaka Yehova. Yehova filisaka mbisi mosi ya nene. Mbisi yango minaka Yona, kasi Yona kufwaka ve. Na kati ya kivumu ya mbisi, Yona sambilaka: ‘Mu ke na salaka nge nsilulu ya kutumama na nge ntangu nyonso.’ Yehova bumbaka Yona na kati ya mbisi bilumbu tatu. Na manima, mbisi lukaka yandi na ngaanda ya maza.

Samu Yehova vuukisaka Yona, ya zola zonza ti Yona ke kwenda dyaka ve na Ninive? Ve. Yehova zonzaka dyaka na Yona na kukwenda kuna. Ntangu yayi, Yona tumamaka. Yandi kwendaka kuna mpe zonzaka na bantu ya yimbi yina: ‘Na kati ya bilumbu 40, Ninive ke kufwa.’ Na manima, mambu mosi yina yandi vanda vingila ve salamaka: Bantu ya Ninive kuwaka mpe sobaka ndyatulu ya bawu. Mfumu ya Ninive zonzaka na bantu ya yandi nyonso: ‘Beto bokila Nzambi mpe beto balula bantima. Ntangu ya nkaka yandi ke kufwa ve beto.’ Ntangu Yehova talaka ti bantu yayi balulaka bantima, yandi kufwaka dyaka ve Ninive.

Yona dasukaka samu Yehova kufwaka dyaka ve mbanza ya Ninive. Kanisa ntete: Yehova lakisaka ntima ya yinda mpe ntima ya kyadi na Yona, kasi Yona lakisaka ve ntima ya kyadi na bantu ya Ninive. Yona kwendaka vanda na ngaanda ya mbanza na yisi ya mwa yinti mosi, mpe yandi vandaka ya kudasuka. Na manima, yinti yango kufwaka, mpe Yona dasukaka. Na yawu, Yehova zonzaka na yandi: ‘Nge ke na manyongi mingi samu na yinti yayi kuluta yina nge ke na yawu samu na bantu ya Ninive. Mu me lakisa bawu ntima ya kyadi mpe ba me vuuka.’ Wapi yina vandaka mambu ya kusimba? Bantu ya Ninive vandaka mfunu mingi kuluta yinti ni yinti.